પીએમઇન્ડિયા

મહામહિમ, રાષ્ટ્રપતિ બોરિચ,

બંને દેશોના પ્રતિનિધિઓ,

મીડિયાના મિત્રો,

નમસ્તે! હોલા!

રાષ્ટ્રપતિ બોરિકની આ પહેલી ભારત મુલાકાત છે અને ભારત પ્રત્યેની તેમની મિત્રતાની ભાવના અને સંબંધોને મજબૂત બનાવવાની તેમની પ્રતિબદ્ધતા ખરેખર અદ્ભુત છે. આ માટે  હું તેમને ખાસ અભિનંદન આપું છું. હું તેમનું અને તેમના પ્રતિષ્ઠિત પ્રતિનિધિમંડળનું હાર્દિક સ્વાગત કરું છું.

મિત્રો,

ચિલી લેટિન અમેરિકામાં ભારત માટે એક મહત્વપૂર્ણ મિત્ર અને ભાગીદાર છે. આજની ચર્ચાઓમાં અમે આગામી દાયકામાં સહયોગ વધારવા માટે ઘણી નવી પહેલો ઓળખી કાઢી.

અમે પરસ્પર વેપાર અને રોકાણમાં વધારાનું સ્વાગત કરીએ છીએ. અમે સંમત છીએ કે વધુ સહયોગ માટે પણ અખૂટ સંભાવનાઓ રહેલી છે. આજે અમે અમારી ટીમોને પરસ્પર ફાયદાકારક વ્યાપક આર્થિક ભાગીદારી કરાર પર ચર્ચા શરૂ કરવા સૂચના આપી છે.

મહત્વપૂર્ણ ખનિજોના ક્ષેત્રમાં ભાગીદારી પર ભાર મૂકવામાં આવશે. સ્થિતિસ્થાપક પુરવઠા અને મૂલ્ય શૃંખલાઓ સ્થાપિત કરવા માટે કાર્ય કરવામાં આવશે. કૃષિ ક્ષેત્રે, એકબીજાની ક્ષમતાઓને જોડીને ખાદ્ય સુરક્ષા સુનિશ્ચિત કરવા માટે સહયોગ કરવામાં આવશે.

ભારત ડિજિટલ પબ્લિક ઈન્ફ્રાસ્ટ્રક્ચર, રિન્યુએબલ એનર્જી, રેલ્વે, અવકાશ અને અન્ય ક્ષેત્રોમાં ચિલી સાથે પોતાનો સકારાત્મક અનુભવ શેર કરવા તૈયાર છે.

અમે ચિલીને એન્ટાર્કટિકાના પ્રવેશદ્વાર તરીકે જોઈએ છીએ. આ મહત્વપૂર્ણ ક્ષેત્રમાં સહયોગ વધારવા માટે બંને પક્ષો વચ્ચે આજે થયેલા ઉદ્દેશ પત્ર પર થયેલા કરારનું અમે સ્વાગત કરીએ છીએ.

ચિલીની આરોગ્ય સુરક્ષા સુનિશ્ચિત કરવામાં ભારત એક વિશ્વસનીય ભાગીદાર રહ્યું છે. અમે આ સહયોગને વધુ ગાઢ બનાવવા સંમત થયા. ચિલીના લોકોએ યોગને સ્વસ્થ જીવનશૈલી તરીકે અપનાવ્યો છે તે ખૂબ જ આનંદની વાત છે. ચિલીમાં 4 નવેમ્બરને રાષ્ટ્રીય યોગ દિવસ તરીકે જાહેર કરવામાં આવ્યો તે આપણા બધા માટે પ્રેરણાદાયક છે. અમે ચિલીમાં આયુર્વેદ અને પરંપરાગત દવાઓમાં સહયોગ વધારવા પર પણ વિચાર કર્યો.

સંરક્ષણ ક્ષેત્રમાં વધતો સહયોગ આપણા ઊંડા પરસ્પર વિશ્વાસનું પ્રતીક છે. આપણે આ ક્ષેત્રમાં એકબીજાની જરૂરિયાતો અનુસાર સંરક્ષણ ઔદ્યોગિક ઉત્પાદન અને સપ્લાય ચેઇન બનાવવા માટે આગળ વધીશું. સંગઠિત અપરાધ, ડ્રગ હેરફેર, આતંકવાદ જેવા સામાન્ય પડકારોનો સામનો કરવા માટે અમે બંને દેશોની એજન્સીઓ વચ્ચે સહયોગ વધારીશું.

વૈશ્વિક સ્તરે, ભારત અને ચિલી સંમત છે કે તમામ તણાવ અને વિવાદોનો ઉકેલ વાતચીત દ્વારા લાવવો જોઈએ. અમે એકમત છીએ કે વૈશ્વિક પડકારોનો સામનો કરવા માટે સંયુક્ત રાષ્ટ્ર સુરક્ષા પરિષદ અને અન્ય સંસ્થાઓમાં સુધારા જરૂરી છે. સાથે મળીને આપણે વૈશ્વિક શાંતિ અને સ્થિરતામાં યોગદાન આપતા રહીશું.

મિત્રો,

ભારત અને ચિલી ભલે વિશ્વના નકશાના અલગ છેડા પર હોય, આપણી વચ્ચે આપણને અલગ કરતા વિશાળ મહાસાગરો હોય, પરંતુ કુદરતે આપણને અનોખી સમાનતાઓ સાથે જોડ્યા છે.

ભારતના હિમાલય અને ચિલીના એન્ડીઝ પર્વતોએ હજારો વર્ષોથી બંને દેશોમાં જીવનશૈલીને આકાર આપ્યો છે. હિંદ મહાસાગરના મોજા ભારતમાં એ જ ઊર્જાથી વહે છે, જે રીતે પેસિફિક મહાસાગરના મોજા ચિલીના કિનારાને સ્પર્શે છે. બંને દેશો કુદરતી રીતે જોડાયેલા છે એટલું જ નહીં, પણ આ વિવિધતાને અપનાવીને આપણી સંસ્કૃતિઓ પણ એકબીજાની નજીક રહી છે.

ચિલીના મહાન કવિ અને નોબેલ પુરસ્કાર વિજેતા “ગેબ્રિએલા મિસ્ત્રલ”ને રવિન્દ્રનાથ ટાગોર અને અરવિંદ ઘોષના વિચારોમાંથી પ્રેરણા મળી. તેવી જ રીતે, ભારતમાં પણ ચિલીના સાહિત્યની પ્રશંસા કરવામાં આવી હતી. ભારતીય ફિલ્મો, ભોજન, શાસ્ત્રીય નૃત્યોમાં ચિલીના લોકોનો વધતો રસ આપણા સાંસ્કૃતિક સંબંધોનું જીવંત ઉદાહરણ છે.

આજે, ચિલીને પોતાનું ઘર કહેનારા લગભગ ચાર હજાર ભારતીય મૂળના લોકો આપણા સહિયારા વારસાના રક્ષક છે. હું રાષ્ટ્રપતિ બોરિચ અને તેમની સરકારનો તેમની સંભાળ બદલ આભાર માનું છું.

આજે આપણે બંને દેશો વચ્ચે સાંસ્કૃતિક આદાન-પ્રદાન કાર્યક્રમ પર થયેલા કરારનું સ્વાગત કરીએ છીએ. અમે બંને દેશો વચ્ચે વિઝા પ્રક્રિયાને સરળ બનાવવાનું પણ વિચાર્યું. અમે ભારત અને ચિલી વચ્ચે વિદ્યાર્થીઓના આદાનપ્રદાનને વધારવા માટે પણ પ્રયાસશીલ રહીશું.

મહામહિમ,

તમારી મુલાકાતે આપણા સંબંધોમાં નવી ઊર્જા અને ઉત્સાહનો સંચાર કર્યો છે. આ ઊર્જા આપણા દ્વિપક્ષીય સંબંધો તેમજ સમગ્ર લેટિન અમેરિકન ક્ષેત્રમાં આપણા સહયોગને નવી ગતિ અને દિશા આપશે.

હું તમને ભારતમાં સુખદ મુલાકાત અને રોકાણની શુભેચ્છા પાઠવું છું.

ખૂબ ખૂબ આભાર!

ગ્રાસિયાસ!

AP/IJ/GP/JD