পি এম ইণ্ডিয়া

প্ৰধানমন্ত্ৰী শ্ৰী নৰেন্দ্ৰ মোদীয়ে আজি ‘ভিডিঅ’ কনফাৰেন্স’ৰ জৰিয়তে বাজেট-পৰৱৰ্তি ‘ৱে’বিনাৰ’সমূহ সম্বোধন কৰে। ৱে’বিনাৰকেইখন বিকাশৰ ইঞ্জিন হিচাপে এমএছএমই; নিৰ্মাণ, ৰপ্তানি আৰু পাৰমাণৱিক শক্তি অভিযান; নিয়ামক, বিনিয়োগ আৰু ব্যৱসায় কৰাৰ স্বাচ্ছন্দ্য সম্পৰ্কীয় সংস্কাৰ শীৰ্ষক বিষয়বস্তুৰে অনুষ্ঠিত কৰা হৈছিল। অনুষ্ঠানত উপস্থিত সকলক সম্বোধন কৰি তেওঁ মন্তব্য কৰে যে নিৰ্মাণ আৰু ৰপ্তানিৰ ক্ষেত্ৰত বাজেটৰ পিছৰ ৱেবিনাৰসমূহ হৈছে যথেষ্ট গুৰুত্বপূৰ্ণ। এই বাজেট চৰকাৰৰ তৃতীয়টো কাৰ্যকালৰ প্ৰথমখন পূৰ্ণ বাজেট বুলি উল্লেখ কৰি তেওঁ গুৰুত্ব আৰোপ কৰে যে এই বাজেটৰ আটাইতকৈ উল্লেখযোগ্য দিশটো হৈছে ইয়াৰ বিতৰণ, যি প্ৰত্যাশাকো অতিক্ৰম কৰিছে। শ্ৰী মোদীয়ে উল্লেখ কৰে যে কেবাটাও ক্ষেত্ৰত চৰকাৰে বিশেষজ্ঞসকলে আশা কৰাতকৈ অধিক পদক্ষেপ গ্ৰহণ কৰিছে। তেওঁ এইটোও উল্লেখ কৰে যে এই বাজেটত উৎপাদন আৰু ৰপ্তানি সন্দৰ্ভত গুৰুত্বপূৰ্ণ সিদ্ধান্ত লোৱা হৈছে।

এক দশকৰো অধিক সময় ধৰি দেশখন ধাৰাবাহিক চৰকাৰী নীতিৰ সাক্ষী হৈ আহিছে বুলি উল্লেখ কৰি প্ৰধানমন্ত্ৰীয়ে মন্তব্য কৰে যে বিগত ১০ বছৰত ভাৰতে সংস্কাৰ, বিত্তীয় অনুশাসন, স্বচ্ছতা আৰু সামগ্ৰিক বিকাশৰ প্ৰতি প্ৰতিশ্ৰুতিবদ্ধতা প্ৰদৰ্শন কৰিছে। তেওঁ গুৰুত্ব আৰোপ কৰি কয় যে ধৰাবাহিকতা আৰু সংস্কাৰৰ আশ্বাসে উদ্যোগটোৰ ভিতৰত নতুন আত্মবিশ্বাসৰ সৃষ্টি কৰিছে। তেওঁ নিৰ্মাণ আৰু ৰপ্তানিৰে জড়িত প্ৰতিগৰাকী অংশীদাৰক আশ্বাস দি কয় যে এই ধাৰাবাহিকতা অনাগত বছৰবোৰতো অব্যাহত থাকিব। অংশীদাৰসকলক সাহসী পদক্ষেপ ল’বলৈ আৰু দেশৰ বাবে নিৰ্মাণ আৰু ৰপ্তানিৰ বাবে নতুন পথ মুকলি কৰিবলৈ উৎসাহিত কৰি শ্ৰী মোদীয়ে উল্লেখ কৰে যে বিশ্বৰ প্ৰতিখন দেশে ভাৰতৰ সৈতে ইয়াৰ অৰ্থনৈতিক অংশীদাৰিত্ব শক্তিশালী কৰিব বিচাৰে। তেওঁ নিৰ্মাণ খণ্ডক এই অংশীদাৰিত্বৰ সম্পূৰ্ণ সুবিধা গ্ৰহণ কৰিবলৈ আহ্বান জনায়।

“যিকোনো দেশৰ উন্নয়নৰ বাবে স্থিৰ নীতি আৰু উন্নত ব্যৱসায়িক পৰিৱেশ হৈছে অতি গুৰুত্বপূৰ্ণ”, প্ৰধানমন্ত্ৰীয়ে কয় যে কেবছৰমান আগতে চৰকাৰে জন বিশ্বাস আইন প্ৰৱৰ্তন কৰিছিল আৰু অনুপালন হ্ৰাস কৰাৰ বাবে প্ৰচেষ্টা চলাইছিল। কেন্দ্ৰীয় আৰু ৰাজ্যিক দুয়োটা পৰ্যায়তে ৪০,০০০ তকৈয়ো অধিক অনুপালন নাইকিয়া কৰা হৈছিল, যাৰ ফলত ব্যৱসায় কৰাৰ স্বাচ্ছন্দ্য বৃদ্ধি পাইছিল, তেওঁ উল্লেখ কৰে। এই অনুশীলন অব্যাহত থাকিব লাগে বুলি গুৰুত্ব আৰোপ কৰি শ্ৰী মোদীয়ে উল্লেখ কৰে যে চৰকাৰে সৰলীকৃত আয়কৰ ব্যৱস্থা উত্থাপন কৰিছে আৰু জন বিশ্বাস ২.০ বিধেয়ক সন্দৰ্ভত কাম কৰি আছে। অনা-বিত্তীয় খণ্ডৰ নিয়মাৱলী পৰ্যালোচনা কৰাৰ বাবে এখন সমিতি গঠন কৰা হৈছে, যাৰ লক্ষ্য হৈছে সেইবোৰক আধুনিক, নমনীয়, জন-অনুকূল আৰু বিশ্বাস-আধাৰিত কৰা বুলি তেওঁ লগতে কয় আৰু এই অনুশীলনত উদ্যোগখণ্ডৰ গুৰুত্বপূৰ্ণ ভূমিকাত আলোকপাত কৰে। তেওঁ অংশীদাৰসকলক সমাধান কৰিবলৈ অধিক সময় লোৱা সমস্যাবোৰ চিনাক্ত কৰিবলৈ, প্ৰক্ৰিয়াবোৰ সৰল কৰাৰ উপায়ৰ পৰামৰ্শ দিবলৈ আৰু দ্ৰুত আৰু উন্নত ফলাফল প্ৰাপ্ত কৰিবলৈ প্ৰযুক্তি ব্যৱহাৰ কৰিব পৰা স্থানত পৰমৰ্শ দিবলৈ উৎসাহিত কৰে।

“বিশ্ব সম্প্ৰতি ৰাজনৈতিক অনিশ্চয়তাৰ সন্মুখীন হৈছে, আৰু সমগ্ৰ বিশ্বই ভাৰতক এক বিকাশ কেন্দ্ৰ হিচাপে বিবেচনা কৰিছে”, শ্ৰী মোদীয়ে কয় যে কভিড সংকটৰ সময়ত যেতিয়া বিশ্বৰ অৰ্থনীতি মন্থৰ হৈ পৰিছিল, ভাৰতে গোলকীয় বিকাশ ত্বৰান্বিত কৰিছিল। তেওঁ লগতে কয় যে আত্মনিৰ্ভৰ ভাৰতৰ দৃষ্টিভংগী আগবঢ়াই আৰু সংস্কাৰ ত্বৰান্বিত কৰি এয়া আহৰণ কৰা হৈছে। তেওঁ গুৰুত্ব আৰোপ কৰে যে এই প্ৰচেষ্টাই অৰ্থনীতিৰ ওপৰত কভিডৰ প্ৰভাৱ হ্ৰাস কৰে যাৰ ফলত ভাৰত দ্ৰুতগতিত বিকশিত হোৱা অৰ্থনীতিসমূহৰ ভিতৰত অন্যতম হ’ব। তেওঁ কয়, “ভাৰত বিশ্ব অৰ্থনীতিৰ বাবে এক বিকাশৰ ইঞ্জিন হৈ আছে আৰু প্ৰত্যাহ্বানজনক পৰিস্থিতিত ইয়াৰ স্থিতিস্থাপকতা প্ৰমাণিত কৰিছে”। যোগান শৃংখলাৰ ব্যাঘাতে বিশ্বৰ অৰ্থনীতিক প্ৰভাৱিত কৰে বুলি উল্লেখ কৰি আৰু বিশ্বক উচ্চ মানৰ সামগ্ৰী উৎপাদন কৰা আৰু নিৰ্ভৰযোগ্য যোগান নিশ্চিত কৰা নিৰ্ভৰযোগ্য অংশীদাৰৰ প্ৰয়োজন বুলি উল্লেখ কৰি শ্ৰী মোদীয়ে গুৰুত্ব আৰোপ কৰে যে এই প্ৰয়োজনীয়তা পূৰণ কৰিবলৈ সক্ষম, দেশৰ বাবে এক গুৰুত্বপূৰ্ণ সুযোগ প্ৰদান কৰে। তেওঁ উল্লেখ কৰে যে অতীতৰ তুলনাত আজি এয়া সহজ, কিয়নো দেশত এতিয়া বন্ধুত্বপূৰ্ণ নীতি আছে আৰু চৰকাৰে উদ্যোগখণ্ডৰ সৈতে কান্ধত কান্ধ মিলাই থিয় দিছে। প্ৰধানমন্ত্ৰীয়ে গোলকীয় যোগান শৃংখলাত সুযোগ বিচৰা আৰু প্ৰত্যাহ্বান গ্ৰহণৰ ক্ষেত্ৰত এক শক্তিশালী সংকল্প, বস্তুনিষ্ঠতাৰ আহ্বান জনায়। তেওঁ গুৰুত্ব আৰোপ কৰে যে যদি প্ৰতিটো উদ্যোগে সামূহিকভাৱে এখোজ আগুৱাই যায়, তেন্তে তেওঁলোকে গুৰুত্বপূৰ্ণ প্ৰগতি লাভ কৰিব পাৰে।

বৰ্তমান পিএলআই আঁচনিৰ দ্বাৰা ১৪টা খণ্ড লাভান্বিত হৈছে বুলি উল্লেখ কৰি প্ৰধানমন্ত্ৰীয়ে কয় যে আঁচনিখনৰ অধীনত ৭৫০তকৈয়ো অধিক গোট অনুমোদিত হৈছে, যাৰ ফলত ১.৫ লাখ কোটি টকাতকৈয়ো অধিক বিনিয়োগ, ১৩ লাখ কোটি টকাৰো অধিক নিৰ্মাণ আৰু ৰপ্তানি ৫ লাখ কোটি টকাতকৈয়ো অধিক হৈছে। তেওঁ গুৰুত্ব আৰোপ কৰি কয় যে সুযোগ পালে উদ্যোগীসকলে কেনেদৰে নতুন ক্ষেত্ৰত আগবাঢ়িব পাৰে এই কথাই সেই সত্যকে প্ৰদৰ্শন কৰে। শ্ৰী মোদীয়ে উৎপাদন আৰু ৰপ্তানিৰ প্ৰসাৰৰ বাবে দুটা অভিযান আৰম্ভ কৰাৰ বাবে গ্ৰহণ কৰা সিদ্ধান্ত ঘোষণা কৰে। তেওঁ উন্নত প্ৰযুক্তি আৰু মানৰ সামগ্ৰীত গুৰুত্ব আৰোপ কৰাৰ লগতে ব্যয় হ্ৰাস কৰাৰ বাবে দক্ষতাত গুৰুত্ব আৰোপ কৰে। তেওঁ সকলো অংশীদাৰক বিশ্ব জুৰি চাহিদা থকা নতুন সামগ্ৰী চিনাক্ত কৰিবলৈ আহ্বান জনায়, যিবোৰ ভাৰতত নিৰ্মাণ কৰিব পাৰি, আৰু তেওঁলোকক কৌশলগতভাৱে ৰপ্তানিৰ সম্ভাৱনা থকা দেশসমূহৰ কাষ চাপিবলৈ উৎসাহিত কৰে। “ভাৰতৰ উৎপাদনী যাত্ৰাত গৱেষণা আৰু উন্নয়নে এক গুৰুত্বপূৰ্ণ ভূমিকা পালন কৰিছে আৰু অধিক উন্নতি আৰু ত্বৰণৰ প্ৰয়োজন” বুলি প্ৰধানমন্ত্ৰীয়ে মন্তব্য কৰে। তেওঁ উল্লেখ কৰে যে আৰ এণ্ড ডি-ৰ জৰিয়তে উদ্ভাৱনী মূলক সামগ্ৰী আৰু বৰ্তমানে থকা সামগ্ৰীৰ মূল্য সংযোজনত গুৰুত্ব আৰোপ কৰিব পাৰি। তেওঁ গুৰুত্ব আৰোপ কৰে যে বিশ্বই ভাৰতৰ পুতলা, জোতা আৰু চামৰা উদ্যোগৰ সম্ভাৱনাক স্বীকৃতি দিছে আৰু পৰম্পৰাগত শিল্পক আধুনিক প্ৰযুক্তিৰ সৈতে একত্ৰিত কৰি গুৰুত্বপূৰ্ণ সফলতা অৰ্জন কৰিব পাৰি। তেওঁ উল্লেখ কৰে যে ভাৰত এই খণ্ডসমূহত গোলকীয় চেম্পিয়ন হ’ব পাৰে, যাৰ ফলত ৰপ্তানি যথেষ্ট পৰিমাণে বৃদ্ধি পাব পাৰে। শ্ৰী মোদীয়ে উল্লেখ কৰে যে এই বিকাশে শ্ৰমিক-নিবিড় খণ্ডসমূহত লাখ লাখ চাকৰিৰ সুযোগ সৃষ্টি কৰিব আৰু উদ্যোগীসকলক উৎসাহিত কৰিব। প্ৰধানমন্ত্ৰী বিশ্বকৰ্মা যোজনাই পৰম্পৰাগত শিল্পীসকলক আদিৰে পৰা অন্তলৈকে সহযোগিতা আগবঢ়ায় বুলি উল্লেখ কৰি তেওঁ এই শিল্পীসকলক নতুন সুযোগৰ সৈতে সংযোগ কৰাৰ প্ৰয়াস কৰাৰ লগতে এই খণ্ডসমূহত লুকাই থকা সম্ভাৱনা সম্প্ৰসাৰিত কৰিবলৈ সকলো অংশীদাৰক আগবাঢ়ি আহিবলৈ আহ্বান জনায়।

“এমএছএমই খণ্ড হৈছে ভাৰতৰ উৎপাদন আৰু ঔদ্যোগিক বিকাশৰ মেৰুদণ্ড”, প্ৰধানমন্ত্ৰীয়ে কয়। তেওঁ উল্লেখ কৰে যে ২০২০ চনত চৰকাৰে ১৪ বছৰৰ পিছত এমএছএমই-ৰ সংজ্ঞা সংশোধন কৰাৰ এক গুৰুত্বপূৰ্ণ সিদ্ধান্ত গ্ৰহণ কৰে, যাৰ ফলত এমএছএমইসমূহৰ মাজত এই ভয় দূৰ হয় যে যদি তেওঁলোকৰ বৃদ্ধি হয় তেন্তে তেওঁলোকে চৰকাৰী লাভালাভ হেৰুৱাব। তেওঁ উল্লেখ কৰে যে দেশত এমএছএমই-ৰ সংখ্যা ৬ কোটিতকৈয়ো অধিক হৈছে, যাৰ ফলত কোটি কোটি লোকক নিযুক্তিৰ সুযোগ প্ৰদান কৰা হৈছে। শ্ৰী মোদীয়ে গুৰুত্ব আৰোপ কৰে যে এই বাজেটত এমএছএমইসমূহৰ সংজ্ঞা অধিক সম্প্ৰসাৰিত কৰি তেওঁলোকৰ নিৰন্তৰ বিকাশৰ ওপৰত আস্থা গঢ়ি তোলা হৈছে। ইয়াৰ ফলত যুৱসকলৰ বাবে অধিক নিযুক্তিৰ সুযোগ সৃষ্টি হ’ব বুলি উল্লেখ কৰি তেওঁ কয় যে এমএছএমইসমূহে সন্মুখীন হোৱা আটাইতকৈ ডাঙৰ সমস্যাটো হৈছে ঋণ লাভ কৰাত অসুবিধা। তেওঁ লগতে কয় যে দহ বছৰ পূৰ্বে এমএছএমইসমূহে প্ৰায় ১২ লাখ কোটি টকাৰ ঋণ লাভ কৰিছিল, যি এতিয়া প্ৰায় ৩০ লাখ কোটি টকালৈ বৃদ্ধি পাইছে। প্ৰধানমন্ত্ৰীয়ে ঘোষণা কৰে যে এই বাজেটত এমএছএমই ঋণৰ গেৰাণ্টী আৱৰণ দুগুণ কৰি ২০ কোটি টকা কৰা হৈছে। ইয়াৰ উপৰিও, কাৰ্যকৰী মূলধনৰ প্ৰয়োজনীয়তা পূৰণ কৰাৰ বাবে ৫ লাখৰ সীমাৰ সৈতে অনুকূলিত ক্ৰেডিট কাৰ্ড প্ৰদান কৰা হ’ব।

চৰকাৰে ঋণৰ প্ৰৱেশাধিকাৰৰ সুবিধা প্ৰদান কৰিছে আৰু এক নতুন ধৰণৰ ঋণ প্ৰৱৰ্তন কৰিছে বুলি উল্লেখ কৰি শ্ৰী মোদীয়ে উল্লেখ কৰে যে মানুহে এতিয়া গেৰাণ্টী নোহোৱাকৈয়ে ঋণ লাভ কৰিছে, যিটো তেওঁলোকে আগতে কেতিয়াও কল্পনা কৰা নাছিল। বিগত ১০ বছৰত মুদ্ৰাৰ দৰে আঁচনিয়ে, যিবোৰে গেৰাণ্টী অবিহনে ঋণ প্ৰদান কৰে ক্ষুদ্ৰ উদ্যোগসমূহকো সমৰ্থন জনাইছে বুলি উল্লেখ কৰি তেওঁ কয় যে ট্ৰেডছ পৰ্টেলে ঋণ সম্পৰ্কীয় বহুতো সমস্যা সমাধান কৰি আছে। প্ৰধানমন্ত্ৰীয়ে ‘ক্ৰেডিট ডেলিভাৰী’ৰ নতুন পদ্ধতি বিকশিত কৰাৰ প্ৰয়োজনীয়তাত গুৰুত্ব আৰোপ কৰে আৰু প্ৰতিটো এমএছএমই-ৰ কম ব্যয় আৰু সময়মতে ঋণ প্ৰাপ্ত কৰাটো নিশ্চিত কৰে। তেওঁ ঘোষণা কৰে যে মহিলা, অনুসূচিত জাতি আৰু অনুসূচিত জনজাতি সম্প্ৰদায়ৰ প্ৰথমবাৰৰ বাবে পাঁচ লাখ উদ্যোগীয়ে ২ কোটি টকাৰ ঋণ লাভ কৰিব। তেওঁ উল্লেখ কৰে যে প্ৰথমবাৰৰ বাবে হোৱা উদ্যোগীসকলক কেৱল ঋণৰ সমৰ্থনৰে প্ৰয়োজন নহয় নিৰ্দেশনাৰো প্ৰয়োজন আৰু উদ্যোগটোক এই ব্যক্তিসকলক সহায় কৰাৰ বাবে এক পৰামৰ্শমূলক কাৰ্যসূচী সৃষ্টি কৰিবলৈ আহ্বান জনায়।
বিনিয়োগ বৃদ্ধিৰ ক্ষেত্ৰত ৰাজ্যসমূহৰ ভূমিকা অতি গুৰুত্বপূৰ্ণ বুলি উল্লেখ কৰি শ্ৰী মোদীয়ে গুৰুত্ব আৰোপ কৰে যে ৰাজ্যসমূহে ব্যৱসায় কৰাৰ স্বাচ্ছন্দ্য যিমান বেছিকৈ বৃদ্ধি কৰিব সিমানেই তেওঁলোকে বিনিয়োগকাৰীক আকৰ্ষিত কৰিব পাৰিব। তেওঁ আঙুলিয়াই দি কয় যে ই সংশ্লিষ্ট ৰাজ্যসমূহক আটাইতকৈ বেছি লাভান্বিত কৰিব। এই বাজেটৰ সৰ্বাধিক ব্যৱহাৰ কোনে কৰিব পাৰে সেয়া চাবলৈ তেওঁ ৰাজ্যসমূহৰ মাজত প্ৰতিযোগিতাক উৎসাহিত কৰে। তেওঁ উল্লেখ কৰে যে প্ৰগতিশীল নীতি থকা ৰাজ্যসমূহে প্ৰতিষ্ঠানসমূহক তেওঁলোকৰ অঞ্চলত বিনিয়োগ কৰিবলৈ আকৰ্ষিত কৰিব।

সকলো অংশগ্ৰহণকাৰীয়ে এই বিষয়সমূহ গুৰুত্ব সহকাৰে বিবেচনা কৰি আছে বুলি বিশ্বাস ব্যক্ত কৰি প্ৰধানমন্ত্ৰীয়ে গুৰুত্ব আৰোপ কৰে যে ৱেবিনাৰৰ লক্ষ্য হৈছে কাৰ্যকৰী সমাধান নিৰ্ধাৰণ কৰা। তেওঁ নীতি, আঁচনি আৰু নিৰ্দেশনা প্ৰস্তুত কৰাত অংশগ্ৰহণকাৰীসকলৰ সহযোগিতাত আলোকপাত কৰে। তেওঁ উল্লেখ কৰে যে ই বাজেটৰ পিছত ৰূপায়ণ ৰণনীতি প্ৰস্তুত কৰাত সহায় কৰিব। তেওঁ অংশগ্ৰহণকাৰীসকলৰ অৱদান অতি উপযোগী প্ৰমাণিত হ’ব বুলি তেওঁৰ বিশ্বাস ব্যক্ত কৰি তেওঁৰ ভাষণৰ সামৰণি মাৰে।

অনুষ্ঠানটোত ‘ভিডিঅ’ কনফাৰেন্স’ৰ মাধ্যমেৰে কেবাগৰাকী কেন্দ্ৰীয় মন্ত্ৰী আৰু অন্যান্য গণ্যমান্য ব্যক্তি উপস্থিত আছিল।

***

MJPS/SR/KB