ভারতকী প্রধানমন্ত্রী

কেন্দ্রগী মন্ত্রীমন্দলদা লৈরিবা ঐহাক্কী মরুপশিং, শ্রী রাজনাথ সিংহ জী, সঞ্জয় শেথ জী, CDS -জেনরেল অনিল চৌহান জী, সর্ভিস অহুম অসিগী চীফশিং, দিফেন্স সেক্রেতরী শ্রী, DG NCC, অতৈ মীথুংলেনশিং অমসুং NCCগী ঐগী নুংশিরবা মরুপশিং!

নখোয় পুম্নমকপু NCC দেনা লাকপদা য়াইফ পাউজেল পীজরি। ঙসিদি, মরুপ ওইরিবা লৈবাক 18দগী কেদেৎ 150 রোমসু ঐখোয়গী ইরক্তা য়াওরি। ঐহাক্না কেদেৎ পুম্নমকপু তরাম্না ওকচরি। ঐহাক্না লৈবাক অসিগা মরী লৈনরিবা, মেরা য়ুবা ভারত, ঐহাক্কী ভারতকী মরুপশিংবুসু নুংঙাইবা ফোংদোকচরি।

মরুপশিং,

রিপব্লিক দে পরেদকীদমক খনগৎলকপা অসিমক মাই পাকপা অমনি। চহি অসিগী পেরেদ অসি ঐখোয়গী রিপব্লিক অসিনা চহি 75 মপুং ফারকপদগীসু অখন্নবা ওইখি। মরুপশিং, মসিগী নীংশিংবশিং অসি অদোমগী পুন্সিদা লেংদনা লৈগনি। তুংগী মতমদা, রিপব্লিক অসিনা চহি 75 মপুং ফারকপদা ঐখোয়না পরেদতা শরুক য়াখি হায়না অদোম্না শোইদনা নীংশিংগনি। বেস্ত কেদেৎ এৱার্দ ফংলবা মরুপশিং অসিদা ঐহাক্না থম্মোয় শেংনা নুংঙাইবা ফোংদোকচরি। ঐহাক্না হন্দক্তা মফম অসিদা NCCগী মিসন কয়া অমা ফোংদোকপগী খুদোংচাবা ফংখি। NCC গী অসিগুম্বা হোৎনরিবশিং অসিনা ভারতকী হেরিতেজবু নহারোলশিংগী আশাশিংগা শম্নহল্লি। ঐহাক্না মিসন অসিদা শরুক য়ারিবা কেদেৎশিংদা য়াইফ-মঙ্গোল পীজরি।

মরুপশিং,

লৈবাক অসিনা নীংতম্বা ফংলবা মতম অদুদা NCC  অসি লিংখৎখি। মওং অমদা, অদোমগী ওর্গনাইজেসনগী খোঙচৎ অসি লৈবাক অসিগী সম্বিধান শেমদ্রিঙৈগী মমাঙদগী হৌরকখি। রিপব্লিক্কী চহি 75 অসিদা, ভারতকী সম্বিধান্না মতম পুম্নমক্তা লৈবাক অসিদা দেমোক্রেসীগী ইথিল পীখি অমসুং সিভিক দ্যুতীশিংগী মরুওইবা শন্দোক্না তাকখি। অসিগুম্না, NCCনা মতম পুম্নমক্তা ভারতকী নহাশিংবু লৈবাক শেমগৎনবা পুক্নিং থৌগৎখি অমসুং মখোয়দা দিসিপ্লিনগী মরুওইবা শন্দোক্না তাকখি। হৌখিবা চহিশিংদা সরকারনা NCCগী স্কোপ অমসুং থৌদাং অনিমক হেনগৎহন্নবা থবক কয়া পায়খৎলকপদা ঐহাক্না নুংঙাইবা ফাওই। NCC অসি ঐখোয়গী ঙমখৈগী মফমশিংদা, সমুদ্রগী লমদমগা নক্নবা জিলাশিংদা পাকথোক চাউথোকহনখ্রে। ঙসিদি, NCCনা লৈবাক অসিগী ঙমখৈগী তালুক 170 হেনবা অমসুং সমুদ্র মপালগী তালুক 100 রোম য়ৌরে। ঐহাক্না আর্মী অহুম অসিবুসু থাগৎপা ফোংদোকচরি। নখোয়না জিলাশিং অসিগী নহা ওইরিবা NCC কেদেৎশিংবু অখন্ননা ত্রেনিং পীনবগী থৌদাং লৌখি। ঙসি ঙমখৈদা লৈরিবা নহা লিশিং কয়া অমা মসিগী কান্নবা ফংলে। NCCদা শেমদোকপগী মহৈ ঐখোয়না কেদেৎ মশিংদসু উবা ফংলি। 2014দা NCC কেদেৎশিংগী মশিং চাউরাক্না লাখ 14 ওইখি। ঙসিদি হায়রিবা মশিং অসি লাখ 20 য়ৌরে। নুপী কেদেৎ লাখ 8 হেনবা, ঐখোয়গী ইচানুপীশিং লৈরি হায়বসি চাউথোকচনিংঙাই ওইবা ৱাফম অমনি। ঙসিদি ঐখোয়গী NCC কেদেৎশিংনা দিজাস্তর মেনেজমেন্তদা মরু ওইবা থৌদাং অমা লৌরি। NCCগী কেদেৎশিংনা স্পোর্তসকী মালেমদা মখোয়গী ফিরাল ৱাংনা পাইহল্লি। ঐহাক্না NCC অসি মালেমগী খ্বাইদগী চাউবা য়ুনিফোর্মদা লৈবা নহারোলশিংগী ওর্গনাইজেসন অমা ওইবদা চাউথোকচবা ফাওই।

মরুপশিং,

অদোম্না 21শুবা চহিচাদা ভারত অমসুং মালেমগী চাউখৎ-থৌরাং লেপকনি। ভারতকী নহারোলশিং অসি ভারতকী শক্তি অমা ওইবতা নত্তনা মালেমগী য়াইফনবা শক্তি অমসু ওইরি। ঙসিদি মালেম অসিনা মসি য়াজরে। ইকুই কুইদ্রিঙৈদা পাউচে অমদা রিপোর্ত অমা ফোঙখ্রে। মসিদা হায়রিবসি য়াম্না মরু ওই। হৌখিবা চহি তরা অসিদা, ভারতকী নহারোলশিংনা স্তার্ত-অপ লাখ 1.5 অমসুং য়ুনিকোর্ন 100 হেন্না শেমখ্রে। ঙসিদি মালেমগী অচৌবা কম্পনী 200 হেন্না ভারত মচাশিংনা লুচিংলি। কম্পনীশিং অসিনা মালেমগী GDPদা লুপা করোর কয়াগী কন্ত্রিব্যুসন পীরি, মীওই করোর কয়াগী পুন্সিদা অহোংবা পুরকপদা মতেং পাংলি। ভারতকী সাইন্তিস্তশিং, ভারতকী রিসর্চরশিং, ভারতকী ওজাশিংনসু মালেমগী চাউখৎ থৌরাং য়াংখৎহল্লি। হায়বদি, সেক্তর অমা হেক্তা ওইরবসু, ভারতকী নহারোলগী শক্তি য়াওদনা, ভারতকী তেলেন্ত য়াওদনা মালেমগী তুংলমচৎ অদু আশা তৌবা অসি অরুবা অমনি। অমসুং মরম অসিনা ঐহাক্না অদোম পুম্নমকপু মালেমগী য়াইফনবা শক্তি অমনি হায়জরি।

মরুপশিং,

মীওই অমা নৎত্রগা লৈবাক অমা ওইরবসু, মদুগী শক্তি অসি মথৌ তাদবা খুদোংচাদবশিংবু কোকহল্লবা মতমদা হেনগৎলকই। হৌখিবা চহি 10 অসিদা ঐখোয়না ভারতকী নহারোলশিংনা থেংনরিবা খুদোংচাদবা খুদিংমক মুত্থৎনবা থবক পায়খৎলে হায়না ঐহাক্না নুংঙাইবা ফাওই। মসিনা ভারতকী নহাশিংগী শক্তি হেনগৎহল্লে, লৈবাক অসিগী শক্তি হেনগৎহল্লে। 2014দা নহাক অসি চহি 10, 12 নত্ত্রগা 14 ওইরম্বা য়াই। মমাংগী ফিভম অসি করিনো হায়বদু নহাক্কী ইমুং মনুংদগী হংবীয়ু, খুদম ওইনা, দোক্যুমেন্তশিং এথেন্স তৌবীয়ু। মমাংদা, এদমিসন, একজামিনেসন, রিক্রুতমেন্ত, ফোর্ম অমা হেক্তা মপুং ফাহনবগীদমক্তা, গাজেত তৌরবা ওফিসর অমনা দোক্যুমেন্তশিং অদু এতেস্তেদ তৌবা মথৌ তাই। ঐখোয়গী সরকারনা নহারোলশিংগী খুদোংচাদবশিং অসি লৌথোকখি, অমসুং অদোমদা থাজবা থমখি, হৌজিক্তি অদোম্না সেল্ফ-এতেস্ত তৌরগা অদোমগী দোক্যুমেন্তশিং অদু ভেরিফাই তৌবা য়াগনি। মমাংদা, নহারোলশিংনা স্কোলারশিপকীদমক এপ্লাই তৌবদা, স্কোলারশিপ ফংবদা অৱাবা কয়া মায়োক্নরম্মি। স্কোলারশিপকী শেনফমদা হোংদোক-হোংজিন তৌবগী থৌওং কয়া লৈরম্মি, শেনফম অসি অঙাংশিংগী একাউন্তশিংদা চংখিদে। হৌজিক সিঙ্গল ৱিন্দো সিস্তেম্না হান্নগী প্রোব্লেম পুম্নমক মুত্থৎখ্রে। মমাংদা হীরমশিং খনবগী মতাংদা অতোপ্পা অচৌবা প্রোব্লেম অমা লৈরম্মি। করিগুম্বা অদোম্না বোর্দ অদুগী মতুংদা নৈনরিঙৈদা সবজেক্ত অমা লৌরবদি মদু হোংদোকপা হায়বসি অরুবা ওইগনি। হৌজিক অনৌবা নেস্নেল এজুকেসন পোলিসী অসিনা অদোমগী অপাম্বগী মতুং ইন্না হীরমশিং হোংদোক্নবগী ফ্লেক্সিবিলিতী পীরি।

মরুপশিং,

চহি 10গী মমাংদা, নহাশিংনা বেঙ্ক লোন য়াম্না লায়না ফংবা ঙমদবা মতম অমা লৈখি। বেঙ্কশিংনা হায়নৈ মদুদি করিগুম্বা নহাক্না লোন অমা পাম্লবদি, অহানবদা গরেন্তী অমা পীগদবনি। 2014দা, লৈবাক অসিগী মীয়াম্না ঐঙোন্দা প্রধান মন্ত্রী ওইনা থবক তৌবগী খুদোংচাবা পীরকপা মতমদা, ঐহাক্না হায়খি, ঐহাক্না ঐহাক্কী লৈবাক্কী নহাশিংগীদমক গেরেন্তী লৌগনি। ঐখোয়না বেঙ্ক গেরেন্তী য়াওদনা লোন পীনবা মুদ্রা য়োজনা হৌদোক্লে। মমাংদা, লুপা লাখ 10 ফাওবগী লোন অসি গরেন্তী য়াওদনা ফংলম্মি। হৌজিক সরকার অসিগী অহুমশুবা তর্মদা ঐখোয়না মসি লাখ 20দা হেনগৎহনখ্রে। চহি 10দা ঐখোয়না মুদ্রা লোনগী মখাদা লুপা কোতি লাখ 40 হেন্না পীখ্রে। অদোমগুম্বা নহারোল লাখ কয়ানা লোন অসিদগী মতেং লৌদুনা মখোয়গী ললোন-ইতিক হৌখ্রে।

মরুপশিং,

নহারোলশিংগী তুংলমচৎকা মরী লৈনবা অতোপ্পা মরু ওইবা ৱাফম অমদি লৈবাক অসিগী ইলেক্তোরেল সিস্তেমনি। নুমিৎ নিনিগী মমাংদা ঐখোয়না নেস্নেল ভোতরস দে পাংথোকখি। অদোমগী মরক্তগী অয়াম্বনা অহানবা ওইনা ভোৎ থাদরিবনি। ভোতরগী নুমিৎকী পান্দমদি ভোতর মশিং য়াম্না শরুক য়াবা অমসুং মখোয়গী হক শীজিন্নবা হায়বসিনি। ঙসিদি, মালেমগী খ্বাইদগী চাউবা মীখল ভারত্তা পাংথোক্লি, অদুবু মসিগী অতোপ্পা মশক অমদি ভারত্তা থা খরগী মতুংদা মীখল পাংথোকপা অসিনি। নীংতম্বগী মতুংদা, মতম শাংনা লোক সভা অমসুং এসেমব্লীগী মীখলশিং মতম অমত্তদা পাংথোক্নরম্মি। অদুবু মসিগী পেতর্ন অসি থুগাইখি, মসিগী মরম্না লৈবাক অসিনা অৱাবা কয়া মায়োক্নখি। মীখল খুদিংদা, ভোৎ লিস্ত অসি অপদেৎ তৌই, থবক কয়া অমা তৌই, অমসুং ঐখোয়গী ওজাশিং অসি মসিদা য়াম্না তোয়না দ্যুতীদা থম্বদা অদোম্না উরম্বা য়াই, মসিগী মরমদি মহৈ তম্বদা, একজামগী শেম-শাবদা শোকহল্লি। তোইনা পাংথোকপা মীখলশিং অসিনা মরম ওইদুনা লৈঙাক পায়বদা অৱাবা পীরি। মরম অদুনা, লৈবাক অসিদা য়াম্না মরু ওইবা দিবেৎ অমা হৌজিক চত্থরি। মীপুম খুদিংমক্না হীরম অসিগী মতাংদা মখোয়গী ৱাখল্লোনশিং ফোংদোক্লি অমসুং মসিগী খন্ন-নৈনবগী থৌওং অসি দিমোক্রেসীদা য়াম্না মথৌ তাই, মীপুম খুদিংমক্না মখোয়গী ৱাখল্লোনশিং ফোংদোক্কদবনি, মসি মথৌ তাই, অমসুং দিবেৎ হায়বদি – ৱান নেসন ৱান ইলেক্সন হায়বসিনি। লোক সভা অমসুং এসেমব্লীগী মীখলশিং অমুক্তংদা পাংথোক্কদবনি, অমসুং চহি 5 খুদিংগী মতম লেপ্লবদি পাংথোক্কদবনি। মরম অদুনা, অনৌবা থবকশিং পায়খৎপদা নুংঙাইবা পোক্কনি। ঙসি ঐহাক্না ভারতকী নহারোলশিংদা, ঐহাক্না NCCগী কেদেৎশিংদা, ঐহাক্না মাই ভারতকী ভোলুন্তিয়রশিংদা, ঐহাক্না NCCগী কমরেদশিংদা হায়জরি মদুদি ঐখোয়না কদায়দা লৈবগে, ঐখোয়না খন্ন-নৈনবা অসি পাংথোক্কদবনি, খন্ন-নৈনবা অসি মাংলোমদা পুখৎকদবনি, খন্ন-নৈনবা অসি লুচিংগদবনি, ঐখোয় মশিং য়াম্না শরুক য়াগদবনি। মসি অদোমগী তুংলমচৎকা হকথেংননা মরী লৈনবা হীরম অমনি। অমেরিকাগুম্বা লৈবাক অমদা, অনৌবা সরকার শেম্নবা মতম লেপকনি, চহি মরি খুদিংগী মীখল পাংথোকই। অদোমগী কোলেজ নত্ত্রগা স্কুলদসু, মহৈরোইগী কাউন্সিলগী মীখল অসি অমুক্তংদা লোইশিনগনি। খল্লু, করিগুম্বা থা খুদিংগী মীখল পাংথোক্লবদি, য়ুনিভর্সিতী নৎত্রগা কোলেজ অমদা মহৈ তম্বা ঙমগদ্রা? মরম অদুনা, অদোম্না ৱান নেসন-ৱান ইলেক্সনগী মতাংদা খন্ন-নৈনবগী লুচিংবা ওইগদবনি; লৈবাক অসিনা অচুম্বা মাইকৈদা চংশিন্নবা ৱারেপ লৌনবগীদমক্তা লৈবাক শীনবা থুংনা খন্ন-নৈনবা অমা লৈগদবনি।

মরুপশিং,

ঙসি 21শুবা চহিচাগী মালেম অসি য়াম্না থুনা হোংলক্লি। ঙসি, মতমগী মথৌ তাবা অসিদি ঐখোয়না য়াম্না থুনা মাংলোমদা চংশিনবা তাই। অদোম পুম্নমক, লৈবাক অসিগী নহারোলশিংনা, মসিদা অচৌবা থৌদাং অমা লৌরি। সেক্তর খুদিংমক্তা, হীরম খুদিংমক্তা, মসি আর্ত, রিসর্চ, ইন্নোবেসনগী হীরম ওইরবসু, নহাক্না নহাক্কী ইন্নোবেতিব আইদিয়াশিং, ক্রিএতিবিতীগা লোয়ননা অনৌবা ইনর্জী শেমগদবনি। অসিগুম্বা মরুওইবা হীরম অমা হায়রগদি পোলিটিক্সনি। ঐখোয়গী লৈবাক অসিগী নহারোলশিংনা রাজনীতিগী লমদা য়ারিবমখৈ থুংহনগদবনি, অনৌবা ৱাখল্লোনশিংগা লোইননা থুংহনগদবনি, অনৌবা থৌনাগা লোয়ননা থুংহনগদবনি, অনৌবা ৱাখল্লোনশিংগা লোয়ননা থুংহনগদবনি। মসি ঙসি লৈবাক অসিনা মথৌ তারি। মসিনা মরম ওইদুনা নহা লাখ অমা রাজনিতীদা চঙগদবনি হায়না লাল কিল্লাদগী ঐনা হায়খি। নহারোলশিংগী শক্তি অসি করিনো হায়বদু ঐখোয়না ‘বিকাস ভারত: য়ং ইন্দিয়া দাইলোগ’কী মনুংদা উখি। লৈবাক শিনবা থুংবদগী লাকপা নহারোল লাখ কয়ানা চাউখৎলবা ভারত অমা শেম্নবগীদমক মখোয়গী মমল য়াম্লবা ৱাখল্লোনশিং, মখোয়গী ৱাখল্লোনশিং ফোংদোকখ্রে।

মরুপশিং,

নীংতম লানগী মতমদা, লৈবাক অসিগী শিন্মী খুদিংমক্না মখোয়গী অমত্তা ঙাইরবা পান্দম লৈবাক অসিগী নীংতম্বা ওইগনি হায়না লেপখি, অমসুং নহারোলশিংনা থৌনা ফনা শরুক য়াখি, কত্থোকখি, মখোয়গী নহারোলশিংবু জেলদা থমখি। মসিগা মান্ননা, অমৃতকলা অসিদা, ঐখোয়না পান্দম অমখক্তমক থমগদবনি – দিবেলপ তৌরবা ভারত। ঐখোয়গী ৱারেপ খুদিংমক্কী ক্রাইতেরিয়া, থবক খুদিংমক্কী ক্রাইতেরিয়া অসি ভারত ওইগদবনি। অমসুং মসিগীদমক্তা ঐখোয়না ঐখোয়গী পঞ্চ প্রনাসপু মতম পুম্নমক্তা নীংশিংগদবনি। পান্থ প্রনানা হায়রিবদি ঐখোয়না চাউখৎলবা ভারত অমা শেমগদবনি, ঐখোয়না ইচিল-ইনাওগী ৱাখল্লোন অমমমদগী নীংতমগদবনি, ঐখোয়না ঐখোয়গী হেরিতেজ অসিদা চাউথোকচগদবনি, ঐখোয়না ভারতকী অমত্তা ওইবগীদমক থবক তৌগদবনি, অমসুং ঐখোয়না ঐখোয়গী মথৌশিং নিংথিনা পাংথোক্কদবনি। পঞ্চ প্রনশিং অসিনা ভারত মচা খুদিংমক্তা লমজিং-লমতাক পীরি, মখোয় অসি ভারত মচা খুদিংমক্কী ইথিলনি। হৌজিক অদোম্না উৎলিবা শক্নাইরবা কলচরেল পর্ফোমেন্সশিং অসিনা মসি উৎলি। ভারত অমমম, ভারতকী খ্বাইদগী ফবা ওইবগী ৱাখল্লোন অসি লৈবাক অসিগী অচৌবা পাঙ্গল অমনি। ঙসি প্রয়াগরাজতা পাংথোক্লিবা মহা কুম্ভ অসিদসু লৈবাক অসিগী অপুনবগী মমি অসি উবা ফংলি। মরম অদুনা, মসিগী মহা কুম্ভ অসি য়ুনিতীগী মহা কুম্ভ অমনি। লৈবাক অসিনা খুমাং চাউশিলহন্নবগীদমক্তা অসিগুম্বা অমত্তা ওইবগী মথৌ তাই।

মরুপশিং,

অদোম্না মতম পুম্নমক্তা অদোমগী থৌদাংশিং অদু নীংশিংগদবনি। চাউখৎলবা ভারত অমা থৌদাংশিংদা য়ুম্ফম ওইদুনা শেমগৎকনি।

মরুপশিং,

ঙসি ঐহাক অদোমগী মরক্তা লৈরি, অদোমগী থৱায় য়াওবা অমসুং পুক্নিং চংবা অদু উরি, মতম খরগী মমাংদা ঐহাক্না ইখিবা ৱাহৈ পরেংশিং অদু ঐহাক্না নীংশিংলি-

মশীং থীঙমদ্রবা খুৎশিংগী শক্তি লৈ, মফম খুদিংমক্তা লৈবাক্কীদমক ইকায় খুম্নবা লৈ!

অদোম্না হৌগৎতুনা তিরঙ্গা হায়দুনা ভারতকী মঙলানবু শৌগৎলি।

অদোম্না তৌবা ঙমদবা করিসু লৈতে, অদোম্না ফংবা ঙমদবা করিসু লৈতে।

অদোম্না লেপ্লু, অদোম্না অমত্তা ওইনা লেপ্লু!

নহাক্কী পাঙ্গল খঙবিয়ু, নহাক্কী থৌদাং খঙবিয়ু!

মরুপশিং,

অমুক্কা হন্না, ঐহাক্না অদোমগী থোইদোক হেন্দোকপা তুংলমচৎকীদমক য়াইফ-মঙ্গোল পীজরি অমসুং অদোম পুম্নমকপু থাগৎচরি। ঐগা লোয়ননা হায়বিয়ু-

ভারত মাতা কী জয়।

ভারত মাতা কী জয়।

ভারত মাতা কী জয়।

বন্দে মাতরম। বন্দে মাতরম।

বন্দে মাতরম। বন্দে মাতরম।

বন্দে মাতরম। বন্দে মাতরম।

বন্দে মাতরম।

*****