ভারতকী প্রধানমন্ত্রী

প্রধান মন্ত্রী, শ্রী নরেন্দ্র মোদীনা ঙসি দিল্লীগী কারিয়াপ্পা পরেদ গ্রাউন্দদা নেস্নেল কেদেত কোর (NCC)গী চহিগী পি.এম. রেল্লীদা ৱা ঙাংখ্রে। শ্রী মোদীনা কলচরেল প্রোগ্রাম অমা মীৎয়েং তাখি অমসুং বেস্ত কেদেৎ এৱার্দশিং পীখি। NCC দেগী থৌরমদা মীয়াম তিনখিবা অদুদা নুংঙাইবা ফোংদোক্লদুনা, প্রধান মন্ত্রীনা হায়খি মদুদি মরুপ ওইরিবা লৈবাক 18গী কেদেৎ 150 রোম লৈরি অমসুং মখোয়বু তরাম্না ওকচরি। মহাক্না ভারত শিনবা থুংবদগী মেরা য়ুবা ভারত (মাই ভারত) পোর্তেলগী খুত্থাংদা ভর্চুএল ওইনা শরুক য়াখিবা নহাশিংবু থাগৎপা ফোংদোকখি।

কেদেৎশিংদা ৱা ঙাংলদুনা প্রধান মন্ত্রীনা হায়খি, “রিপব্লিক দে পরেদকীদমক খনগৎপা অসি মশামক্না মাই পাকপা অমনি।” মহাক্না মখা তাখি মদুদি চহি অসিগী রিপব্লিক দে অসি ভারতনা রিপব্লিক অমা ওইনা চহি 75 মপুং ফারকপদা অখন্নবা ওইখি। মহাক্না মখা তারদুনা হায়খি মদুদি মসিগী নিংশিংবশিং অসি পুন্সি চুপ্পা লৈগনি অমসুং কেদেৎশিংনা য়াম্না মরু ওইবা থৌরম অসিদা শরুক য়াখিবা অসিদা চাউথোকচবা ফাওগনি। মহাক্না এৱার্দ ফংলবা কেদেৎশিংদা নুংঙাইবা ফোংদোকখি। ঙসি NCCগী কেম্পেন কয়া লমথাবগী খুদোংচাবা ফংলে হায়না পল্লদুনা প্রধান মন্ত্রীনা হায়খি মদুদি অসিগুম্বা কেম্পেনশিং অসি ভারতকী হেরিতেজগা নহারোলশিংগী এস্পিরেসনগা শম্নহল্লি। মহাক্না কেম্পেন অসিদা শরুক য়ারিবা কেদেত পুম্নমকপু য়াইফ-মঙ্গোল পীখি।

শ্রী মোদীনা হায়খি মদুদি NCC অসি ভারতনা নীংতম্বা ফংখিবা মতম অদুৱাইদা লিংখৎখি। মহাক্না হায়খি মদুদি NCCগী খোঙচৎ অসি লৈবাক অসিগী সম্বিধান শেমদ্রিঙৈগী মমাঙদগী হৌরকখি। শ্রী মোদীনা হায়খি মদুদি রিপব্লিক্কী চহি 75গী মনুংদা, সম্বিধান্না দেমোক্রেসীবু পুক্নিং থৌগৎখি অমসুং সিভিক দ্যুতীশিংগী মরুওইবা অদুদা মীৎয়েং থমখি। অসিগুম্না, NCCনা ভারতকী নহাশিংবু লৈবাক শেমগৎপদা পুক্নিং থৌগৎলি অমসুং মখোয়দা দিসিপ্লিনগী মরুওইবা তাক্লি। প্রধান মন্ত্রীনা হৌখিবা চহিশিংদা NCCগী থৌওং অমসুং থৌদাং পাকথোক চাউথোকহন্নবা সরকারনা কন্না হোৎনরকপদা নুংঙাইবা ফোংদোকখি। NCC অসি ঙমখৈগী মফমশিং অমসুং সমুদ্র মপালগী জিলাশিংদা পাকথোক চাউথোকহনখ্রে হায়না মহাক্না পনখি। হৌজিক্তি ঙমখৈগী তালুক 170 অমসুং সমুদ্র তুরেলগী তালুক 100 রোমদা NCC লৈরে। শ্রী মোদীনা জিলাশিং অসিদা নহা ওইরিবা NCC কেদেৎশিংবু অখন্ননা ত্রেনিং পীনবগী থৌদাং লৌবগীদমক আর্মদ ফোর্স অহুমবু থাগৎপা ফোংদোকখি। মহাক্না হায়খি মদুদি খোঙথাং অসিনা ঙমখৈগী মফমশিংদা লৈরিবা নহা লিশিং কয়াদা কান্নবা ফংহল্লে। NCCদা রিফোর্মশিং অসি কেদেৎ মশিং হেনগৎলকপদা উবা ফংই হায়না পল্লদুনা শ্রী মোদীনা হায়খি মদুদি 2014দা NCCগী কেদেৎ চাউরাক্না লাখ 14 লৈরম্মি, অমসুং ঙসিদি মশিং অসি লাখ 20 য়ৌরে, মসিদা নুপী কেদেৎ লাখ 8 হেনখ্রে। প্রধান মন্ত্রী মোদীনা হায়খি মদুদি NCCগী কেদেৎশিংনা দিজাস্তর মেনেজমেন্তদা য়াম্না মরু ওইবা থৌদাং লৌরি অমসুং স্পোর্তসকী মালেমদা মগুন লৈরি। NCCনা মালেমগী খ্বাইদগী চাউবা য়ুনিফোর্মদা শেৎপা নহারোলগী ওর্গনাইজেসন অমা ওইবদা মহাক্না চাউথোকচবা ফোংদোকখি।

প্রধান মন্ত্রীনা হায়খি মদুদি ভারতকী নহারোলশিংনা 21শুবা চহিচাদা লৈবাক অমসুং মালেমগী চাউখৎ থৌরাং লেপকনি। মহাক্না অকনবা ৱাফম থমখি মদুদি “ভারতকী নহারোলশিংনা ভারতকী চাউখৎ থৌরাংদা শরুক য়াবতা নত্তনা মালেমগী অফবা ওইনসু থৌদাং লৌরি।” হৌখিবা চহি তরা অসিদা ভারতকী নহাশিংনা স্তার্তঅপ লাখ 1.5 অমসুং য়ুনিকোর্ন 100 হেন্না শেমখ্রে হায়না ফোংদোকখিবা, হৌজিক্কী ওইনা পাউচেশিংদা ফোঙখিবা পাউদম অমা পল্লদুনা প্রধান মন্ত্রীনা হায়খি মদুদি মালেমগী মরুওইবা কম্পনী 200 হেন্না ভারত মচাশিংনা লুচিংদুনা মালেমগী GDPদা লুপা ত্রিলিয়ন কয়াগী কন্ত্রিব্যুসন পীরি অমসুং মীওই লাখ কয়াগী পুন্সি মহিং ফগৎহনবদা মতেং পাংলি। ভারতকী সাইন্তিস্তশিং, রিসর্চরশিং অমসুং ওজাশিংনা মালেমগী চাউখৎ-থৌরাং য়াংখৎহল্লি হায়না প্রধান মন্ত্রী মোদীনা অকনবা ৱাফম থমখি। মহাক্না হায়খি মদুদি সেক্তর অমহেক্তদা, ভারতকী নহারোলশিংগী তেলেন্ত অমসুং শক্তি য়াওদনা মালেমগী তুংলমচৎকী ৱাখল শাগৎপা অসি অরুবা অমনি অমসুং মসিনা মরম ওইদুনা মহাক্না মখোয়বু “গ্লোবেল গুদকী ফোর্স” হায়খি।

মথৌ তাদবা খুদোংচাদবশিং কোকহনবা মতমদা মীওই অমগী নত্ত্রগা লৈবাক অমগী শক্তি হেনগৎলকই হায়না পল্লদুনা প্রধান মন্ত্রীনা হৌখিবা চহি 10দা, ভারতকী নহারোলশিংনা থেংনখিবা খুদোংচাদবা কয়া কোকহনখ্রে, মসিনা নহারোল অমসুং লৈবাক অনিমক্কী তৌবা ঙম্বশিং হেনগৎহনখ্রে হায়বগী মতাংদা নুংঙাইবা ফোংদোকখি। মহাক্না পনখি মদুদি 2014দা নহারোল কয়া অসি চহি 10-12গী মনুংদা ওইরম্মি অমসুং মতম অদুগী ফিভমগী মতাংদা মখোয়গী ইমুং-মনুংদগী ৱাহং হংগদবনি। প্রধান মন্ত্রীনা দোক্যুমেন্ত এস্তিমেসনগী খুদম অমা পনখি। মমাংদা, দোক্যুমেন্তশিং অসি এদমিশন, একজাম অমসুং রিক্রুতমেন্তকীদমক্তা গেজেতেদ ওফিসর অমনা এতেস্ত তৌবগী মথৌ তাই, মসিনা য়াম্না খুদোংচাদবা থোকহল্লি। মহাক্না হায়খি মদুদি সরকারনা ৱাফম অসি লোইশিন্দুনা হৌজিক্তি দোক্যুমেন্তশিং সেল্ফ-এতেস্তেসন তৌবা য়াহল্লে। মহাক্না স্কোলারশিপকী শেনফম পীনবদা ইসু কয়া লৈবগা লোয়ননা স্কোলারশিপকীদমক এপ্লাই তৌবদা অমসুং ফংবদা নহাশিংনা থেংনরিবা অৱাবা কয়াগী মতাংদসু পনখি। সিঙ্গল ৱিন্দো সিস্তেম হৌদোকপদগী হায়রিবা অরিবা সমস্যাশিং অসি মুত্থৎখ্রে হায়না মহাক্না ফোংদোকখি। সবজেক্ত সেলেক্সনগা মরী লৈনবা অতোপ্পা মরুওইবা ৱাফম অমা পল্লদুনা শ্রী মোদীনা হায়খি মদুদি মমাংদা, বোর্দ একজামগী মতুংদা সবজেক্ত অমা খনবগা লোয়ননা, মদু হোংদোকপা অসি অরুবা ওইরম্মি। অদুম ওইনমক, হৌজিক অনৌবা নেস্নেল এজুকেসন পোলিসী অসিনা মী অমগী অপাম্বগী মতুং ইন্না সবজেক্তশিং হোংদোকপা য়াবগী ফ্লেক্সিবিলিতী পীরি।

চহি তরাগী মমাংদা, নহাশিংনা বেঙ্ক লোন লৌবদা অৱাবা ওইরম্মি মরমদি বেঙ্কশিংনা লোন পীনবা মমাংদা গেরেন্তী চংলম্মি হায়না পল্লদুনা শ্রী মোদীনা হায়খি মদুদি মহাক্না 2014দা প্রধান মন্ত্রী ওইরকপা মতমদা, মহাক্না লৈবাক অসিগী নহাশিংগীদমক থৌদাং লৌগনি হায়না থাজবা পীখি। সরকারনা বেঙ্ক গরেন্তী য়াওদনা লোন পীরবা মুদ্রা য়োজনা হৌদোক্লে হায়না মহাক্না মখা তাখি।  স্কিম অসিগী মতাংদা মখা তানা হায়রদুনা, প্রধান মন্ত্রীনা হায়খি মদুদি অহানবদা লুপা লাখ 10 ফাওবগী লোন অসি গেরেন্তী য়াওদনা পীখি। অমসুং সরকার অসিগী অহুমশুবা তর্মদা, মসিগী লিমিৎ অসি লুপা লাখ 20দা হেনগৎহনখ্রে। মহাক্না হায়খি মদুদি হৌখিবা চহি 10দা মুদ্রা য়োজনাগী মখাদা লুপা করোর লাখ 40 হেন্না পীখ্রে। মসিনা নহা লাখ কয়াদা মখোয়গী বিজিনেস হৌনবা মতেং পাংলি।

নহারোলশিংগী তুংলমচৎকীদমক ইলেক্তোরেল সিস্তেমগী মরুওইবা অদু পল্লদুনা শ্রী মোদীনা হায়খি মদুদি নুমিৎ নিনিগী মমাংদা নেস্নেল ভোতর্স দে পাংথোকখি অমসুং নহারোল কয়া অহানবা ওইনা ভোতর ওইখি। মহাক্না মখা তাখি মদুদি ভোতর দেগী পান্দমদি ভোতরশিংগী শরুক য়াবা হেনগৎহনবনি। প্রধান মন্ত্রীনা হায়খি মদুদি ভারতনা মালেমগী খ্বাইদগী চাউবা মীখল পাংথোকপা মতমদা, থা খরগী মনুংদা তোইনা মীখল পাংথোকপা হায়বসি অৱাবা অমা ওইহল্লি। মহাক্না হায়খি মদুদি হৌরকপদা, লোক সভা অমসুং বিধান সভাগী মীখলশিং অমত্তা ওইনা পাংথোকখি, অদুবু মসিগী মওং অসি হোংলকখি, মসিনা লৈবাক অসিগীদমক মরুওইবা ইসুশিং থোকহনখি। শ্রী মোদীনা হায়খি মদুদি তোইনা পাংথোকপা মীখলশিংনা ভোতর লিস্ত অপদেৎ তৌবগী মথৌ তাই অমসুং থবক কয়া অমা য়াওরি, মসিনা মহৈরোয়শিংগী মথৌ, মহৈ তম্বগী থবক অমসুং একজামগী শেম-শাবা কয়াদা অকায়বা পীরি। মহাক্না মখা তাখি মদুদি হন্না হন্না পাংথোকপা মীখলশিংনা লৈঙাক পায়বদা অৱাবা কয়া থোকহল্লি অমসুং মরম অদুনা, লৈবাক অসিনা হৌজিক “ৱান নেসন, ৱান ইলেক্সন”গী ৱাখল্লোনগী মতাংদা খন্ন-নৈনরি। প্রধান মন্ত্রী মোদীনা ভারতকী নহারোলশিংদা মখোয়গী তুংলমচৎতা হকথেংননা ইথিল পীগদবা অসিগুম্না মসিগী দিবেৎ অসিদা এক্তিব ওইনা শরুক য়াবীনবা তকশিনখি। মহাক্না হায়খি মদুদি য়ুনাইতেদ স্তেৎসকুম্বা লৈবাকশিংদা, অনৌবা সরকার অমা শেম্নবগী তাং অদু লেপথোকই, অমসুং মীখলশিং চহি মরি খুদিংগী পাংথোকই। মতৌ অসুম্না, কোলেজশিং নৎত্রগা স্কুলশিংদা, মহৈরোইশিংগী কাউন্সিলগী মীখলশিং অসি অমুক্তদা লোইশিনগনি হায়না মহাক্না হায়খি। মহাক্না নহারোলশিংদা থা খুদিংগী মীখল পাঙথোকপা অসিনা মখোয়গী মহৈ-মশিং তম্বদা করি শাফু পীরকপগে হায়বদু খনবা অমসুং “ৱান নেসন, ৱান ইলেক্সন” হায়বা দিবেৎ অসিদা শরুক য়ানবা পুক্নিং থৌগৎখি।

21শুবা চহি চাগী মালেম অসি য়াম্না থুনা হোংলক্লি অমসুং অহোংবা অসিগা লোয়ননা চৎমিন্নবা তঙাইফদে হায়না পল্লদুনা শ্রী মোদীনা অহোংবা অসিদা নহাশিংনা মরুওইবা থৌদাং লৌরি হায়না পনখি। মহাক্না মখা তাখি মদুদি সেক্তর খুদিংমক্তা, আর্ত, রিসর্চ, নৎত্রগা ইন্নোবেসন ওইগেরা, নহাশিংনা মখোয়গী ইন্নোবেতিব আইদিয়া অমসুং ক্রিএতিভিতিগী থোংদা অনৌবা ইনর্জী পুরকপা তাই। অতোপ্পা মরুওইবা লম অমা ওইনা রাজনিতীগী মরুওইবা অদু প্রধান মন্ত্রীনা ফোংদোকখি। মসি মতমগী মথৌ তাবা অমনি হায়না ফোংদোক্লদুনা মহাক্না নহাশিংবু অনৌবা ৱাখল্লোনশিং অমসুং অনৌবা ৱাখল্লোনশিংগা লোয়ননা রাজনিতীদা চঙলক্নবা পুক্নিং থৌগৎখি। মহাক্না নহা লাখ অমা রাজনিতীদা শরুক য়ানবা লাল কিলাদগী মহাক্না হায়খিবা অদু অমুক হন্না ফোংদোকখি। প্রধান মন্ত্রী মোদীনা “ভিকসিৎ ভারত: য়ং লিদর্স দাইলোগ”কী মনুংদা উখিবা নহাশিংগী শক্তি অদু পনখি। মহাক্না হায়খি মদুদি লৈবাক শিনবা থুংনা লৈরিবা নহারোল মিলিয়ন কয়ানা চাউখৎলবা ভারত অমা শেমগৎনবা মখোয়গী ৱাখল্লোনশিং ফোংদোক্নবগীদমক মমল য়াম্লবা সজেসনশিং অমসুং ৱাখল্লোনশিং পীরম্মি।

প্রধান মন্ত্রীনা হায়খি মদুদি নীংতম লানগী মতমদা, শিনফম খুদিংমক্কী মীওইশিংনা ভারতকী নীংতম্বা ফংনবা পান্দম অমখক্তমক থমখি। মসিগা মান্ননা, মহাক্না মখা তাখি মদুদি অমৃত কাল অসিদা, ঐখোয়গী পান্দমদি চাউখৎলবা ভারত অমা ওইগদবনি। মহাক্না অকনবা ৱাফম থমখি মদুদি ৱারেপ অমসুং থবক খুদিংমক মসিগী পান্দম অসিগী মায়কৈদা য়েংগদবনি। প্রধান মন্ত্রীনা পঞ্চপ্রন অসি নীংশিংবগী মরুওইবা অদু পনখি: চাউখৎলবা ভারত অমা শেমগৎপা, মীখা পোনবগী ৱাখল্লোনদগী ঐখোয় ইশাবু ঙাকথোকপা, ঐখোয়গী হেরিতেজ অসিদা চাউথোকচবা, ভারতকী অপুনবগীদমক থবক তৌবা, অমসুং ইকাইখুম্ননা ঐখোয়গী থৌদাংশিং পাংথোকপা। মহাক্না হায়খি মদুদি পঞ্চ প্রন অসিনা ভারত মচা খুদিংমক্তা লমজিং-লমতাকপীগনি অমসুং পুক্নিং থৌগৎপীগনি। শ্রী মোদীনা থৌরম অদুদা মহাক্না মমাংদা উখিবা কলচরেল পর্ফোমেন্স অদু থাগৎপা ফোংদোকখি। মসিনা “এক ভারত, শ্রেস্ত ভারত”কী স্পিরিত অদু উৎলি হায়না মহাক্না ফোংদোকখি। মহাক্না হায়খি মদুদি প্রয়াগতা হৌজিক পাঙথোক্লিবা মহা কুম্ভ অসি লৈবাক অসিগী অমত্তা ওইবগী খুদম অমনি। মহাক্না মসিবু “অখন্নবা কুম্ভ” হায়খি। লৈবাক অসিনা খুমাং চাউশিল্লকপদা মসিগী অপুনবা অসি তঙাইফদে হায়না মহাক্না অকনবা ৱাফম থমখি।

মতম পুম্নমক্তা ইশাগী মথৌশিং নীংশিংবগী মরুওইবা অদু পল্লদুনা প্রধান মন্ত্রীনা হায়খি মদুদি চাউখৎলবা ভারতকী য়ুম্ফম অসি ইশাগী মথৌশিং অদুদা য়ুম্ফম ওইদুনা শেমগৎকনি। মহাক্কী ৱারোল লোইশিল্লকপদা, প্রধান মন্ত্রীনা লৈবাক অসিগী কেদেৎশিং অমসুং নহারোলশিংবু পুক্নিং থৌগৎনবা মহাক্না ইখিবা ৱাহৈ পরেংশিং অদু নীংশিংখি অমসুং মীপুম খুদিংমক্কী অফবা তুংলমচৎ অমগীদমক মহাক্কী থম্মোয়দগী য়াইফ মঙ্গোল পীখি।

কেন্দ্রগী ঙাকশেল মন্ত্রী, শ্রী রাজনাথ সিংহ, কেন্দ্রগী ঙাকশেলগী রাজ্য মন্ত্রী, শ্রী সঞ্জয় শেথ, চীফ ওফ দিফেন্স স্তাফ, জেনরেল অনিল চৌহান, চিফ ওফ আর্মি স্তাফ, জেনরেল উপেন্দ্র দ্বিবেদী, চিফ ওফ এয়র স্তাফ এয়র চিফ মার্শেল এ.পি. সিংহ, চিফ ওফ নেভেল স্তাফ, এদমিরেল দিনেশ কে ত্রিপাথি, NCCগী দাইরেক্তর জেনরেল, লেফতেনেন্ত জেনরেল গুরবীরপাল সিংহ, অমসুং দিফেন্স সেক্রেতরী, শ্রী রাজেশ কুমার সিংহ অসি থৌরম অদুদা শরুক য়াখি।

বাকগ্রাউন্দ

চহি অসিগী রিপব্লিক দে কেম্পতা NCCগী কেদেৎ 2361না শরুক য়াখি। মসিগী মনুংদা নুপী কেদেৎ 917 য়াওখি। মসিনা নুপী কেদেৎশিংনা শরুক য়াখিবা খ্বাইদগী ৱাংবা ওইখি। পি.এম. রেল্লীদা কেদেৎশিং অসিনা শরুক য়াবা অসিনা ন্যু দিল্লীদা থা অমা চুপ্না পাংথোক্কদৌরিবা NCCগী রিপব্লিক দে কেম্প 2025গী মায় পাক্না লোইশিনবগী খুদম ওইগনি। চহি অসিগী NCC পি.এম. রেল্লীগী থিমদি ‘য়ুবা শক্তি, ভিকসিৎ ভারত’নি।

লৈবাক শেমগৎপগী মায়কৈদা NCCগী অচেৎপা ফিরেপ উৎনবা কেদেৎ 800 হেনবনা কলচরেল প্রোগ্রাম অমা পাংথোকখি। মরুপ মপাং ওইবা লৈবাক 18গী নহা ওইরিবা কেদেৎ 144না শরুক য়াখিবনা চহি অসিগী রেল্লীদা থৌনা হাপখি।

মেরা য়ুবা (মাই) ভারত, এজুকেসন মন্ত্রালয় অমসুং ত্রাইবেল এফিয়র্সকী ভোলুন্তিয়র 650 হেনবনা লৈবাক শিনবা থুংবদগী অখন্নবা মীথুংলেন ওইনা NCC পি এম রেল্লীদা শরুক য়াখি।

Addressing the NCC rally in Delhi. It is a great platform that empowers youth to realise their potential for national development. https://t.co/axOljrwXRP

— Narendra Modi (@narendramodi) January 27, 2025

The NCC has constantly inspired the youth of India towards nation-building. pic.twitter.com/c65edD1aVZ

— PMO India (@PMOIndia) January 27, 2025

India’s youth are a force for global good. pic.twitter.com/AiOIsKhJvH

— PMO India (@PMOIndia) January 27, 2025

In the last 10 years, we have worked towards removing many obstacles faced by the youth in India. This has enhanced the potential of India’s youth. pic.twitter.com/ktKdh9ncm5

— PMO India (@PMOIndia) January 27, 2025

इस अमृतकाल में…हमें अपना एक ही लक्ष्य रखना है- विकसित भारत।

हमारे हर निर्णय की कसौटी, हर हर कार्य की कसौटी…विकसित भारत ही होनी चाहिए। pic.twitter.com/NoFgNA9Zpc

— PMO India (@PMOIndia) January 27, 2025

***