ভারতকী প্রধানমন্ত্রী

জম্মু অমসুং কাস্মিরগী লেপ্তনেন্ত গভর্নর শ্রী মনোজ সিনহা জি, জম্মু অমসুং কাস্মিরগী চীফ মিনিস্তর শ্রী ওমর অবদুল্লাহ জি, ঐগী মন্ত্রীমন্দলগী মরুপ শ্রী নিতিন গাদকরি জি, শ্রী জিতেন্দ্র সিংহ জি, শ্রী অজয় তামতা জি, দিপুতি চীফ মিনিস্তর সুরেন্দর কুমার চৌধুরি জি, ওপোজিসনগী লুচিংবা সুনিল শর্মা জি, এম.পিশিং, এম.এল.এশিং অমসুং জম্মু অমসুং কাস্মিরগী ঐগী ইনাওশিং অমসুং ইচলশিং।

অহানবদা, জম্মু অমসুং কাস্মির অমসুং ভারত চাউখৎনবা, খ্বাইদগী খুদোংথিবা ফিবমশিংদা থবক শুখিবা অমসুং মখোয়গী পুন্সিশিং খুদোথিবা কয়া মায়োক্নখিবা শিন্মীশিং ঐনা থাগৎপা ফোঙদোকচরি। ঐখোয়গী মরুপ শিন্মী তরেৎকী থৱায় মাঙখ্রে, অদুবু খুদোংচাদবা কয়া মায়োক্নরবশু, ঐখোয়গী ৱাশক নিংহন্নদে, কনা অমতা মখোয়গী য়ুমদা হল্লগে হায়খিদে, মখোয়গী অচেৎপা ফিরেপশিংগীদমক অমসুং থবক লোইশিন্নবা খুদোংচাদবা কয়া মায়োক্নবগীদমক শিন্মীশিং থাগৎপা ফোঙদোকচরি। লৈখিদ্রবা শিন্মী ৭ গী মফমদা ঐনা ইকায়খু্ম্নবা উৎচরি।  

মরুপশিং,

ফজরবা উন্না কুপ্পা চীঙজাউশিং অমসুং নুংঙাইরবা নোং-চিংগী ফিবম অসিদা য়াম্না হরাওই। নুমিৎ নিনিগী মমাঙদা জম্মু অমসুং কাস্মিরগী চীফ মিনিস্তরনা সোসিএল মেদিয়াদা ফোতো খর থাগৎলকপা অদু উরুবদগী ঐ  জম্মু অমসুং কাস্মিরদা চৎনিংবগী ইখৌ লাংবা হেনগৎলকখি। মফম অসিগা ঐনা মতম কয়াগী মমাংদগী লোয়নদুনা লাক্লে হায়না চীফ মিনিস্তরনা ফোঙদোকখ্রে। ঐনা নহা ওইরিঙৈদা মহাক্কী দলগী থবক্কীদমক মহাক লমদম অসিদা য়াম্না তোইনা লাকখ্রে। সোনামার্গ, গুলমার্গ, গান্দরবাল অমসুং বারামুল্লাগুম্বা মফমশিংদা লৈখ্রে অমসুং পুং কয়া, কিলোমিতর কয়া খোঙনা চৎখি। উন য়াম্না তারবশু, জম্মু অমসুং কাস্মিরগী মীয়াম্না তরাম্না ওকপা অসিদগী ঐখোয় অইংবা ফাওদ্রে।

মরুপশিং,

ঙসি অসি অখন্নবা নুমিৎ অমনি। লৈবাক শীনবা থুংনা কুহ্মৈগী ফিবম অমদা লৈরি। মীওই মিল্লিয়ন কয়া ঈরুপ্নবা পুন্দুনা প্রায়াগ্রাজদা মহা কুম্ভ হৌরে। পঞ্জাবতা লোহরি অমসুং অৱাং ভারতকী অতোপ্পা মফমশিংদা উত্তরায়ান, মকর সংক্রান্তি অমসুং পোঙ্গালগুম্বা কুহ্মৈশিং পাংথোক্লি। কুহ্মৈশিং অসি পাংথোক্লিবা ভারত অমসুং মালেমগী মীয়ামগী মফমদা ঐনা য়াইফ-পাউজেল পীজরি। হৌজিক্কী মতম অসিদা কাস্মির তম্পাক অসিদা নুমিৎ ৪০ গী চিল্লাইকান মায়োক্নরি অমসুং মীয়াম্না কা হেন্না ইংবগী অৱাবা অসি খাংবগীদমক থাগৎপা ফোঙদোকচরি। অতোপ্পা অমদা, উন য়াম্না তাবা অসিনা, চহি অসিদা সোনামার্গগুম্বা লমকোয়ফমশিংদা অনৌবা খুদোংচাবা কয়া পীরে, কাস্মিরগী ফজবা য়েংনবা লৈবাক শীনবা থুংবগী মীওইশিংগী পুক্নিং চিংশিল্লে অমসুং মখোয় মফম অসিদা থুংলরে।

মরুপশিং,

ঙসি অচৌবা খুদোলপোৎ অমগা লোয়ননা অদোমগী মীনাই অমা ওইনা ঐ ময়ামগী মরক্ত লাক্লি। নুমিৎ খরগী মমাংদা, ৈনা জম্মুদা জম্মু রেল দিবিজনগী উরেপ-উয়ুং তমখ্রে। মসি মীয়াম্না মতম কয়াগী মমাঙদগী তক্নদুনা লাক্লবনি। অদোম অমসুং লৈবাক অসিগী মীয়ামদা তেন্নেল অসি খুৎশীন্নবগী খুদোংচাবা অমা ঐনা ফংলে। সোনামার্গ তন্নেল শঙ্গাদুনা জম্মু অমসুং কাস্মির অমসুং লাদাখকী মীয়াম্না মতম কয়াগী মমাঙদগী তক্নদুনা লাকপা অদু থবক ওইনা পাংথোক্লে। করিগুম্বা মোদীনা থাজবা পীখ্রবদি, মদু শোইদনা থবক ওইনা পাংথোকই হায়বা অদোম খঙলমগনি। অফবা থবক মতম চানা পাংথোক্নবা মতম লৈ।

মরুপশিং,

ঐনা সোনামার্গ তন্নেলগী মরমদা হায়রকপা মতমদা, তন্নেল অসিনা সোনামার্গ, কার্গিল অমসুং লেহগী মীয়ামগী পুন্সি হিংবদা লাইবা হেনগৎহল্লগনি। উন নিংখায়রকপা, উন য়াম্না কন্নবা তাবা অমসুং চীং নিংখায়রকপা মতমদা তোইনা লম্বীশিং থিংজিনবগী খুদোংচাদবশিং তন্নেল অসিনা কোকহল্লগনি। তন্নেল অসিনা অচৌবা হোস্পিতালশিং য়ৌবা নুংঙাইহল্লগনি অমসুং মীয়াম্না থেংনরিবা অৱাবশিং হন্থহন্দুনা তঙাইফদবা পোৎলমশিং ফংহনবা ঙম্লগনি।

মরুপশিং,

কেন্দ্রদা ঐখোয়গী সরকার লাক্লবা মতুংদা ২০১৫ দগী সোনামার্গ তন্নেল শেমগৎপা হৌখিবনি। মহাক্কী লৈঙাক মখাদা তন্নেল শেমগৎপদা লোইশিনখিবদা ঐ অপেনবা ফাওই। ঐখোয়না উরেপ-উয়ুং তমখিবা থবকশিং, ঐখোয়গী সরকারনা মপুংফানা লোইশিনগদবনি হায়বা ঐগী লাইৱা অমা লৈরি। মসি থবক ওইনা পাংথোক্লে।

মরুপশিং,

তন্নেল অসিনা নিংথম থা মনুংদা চৎথোক-চৎশিন য়াহনগনি অমসুং লমদম অসিগী তুরিজম চাউখৎহনগনি। লাক্লিবা নুমিৎ খরনি অসিদা জম্মু অমসুং কাস্মিরদা লম্বী অমসুং রেলগী প্রোজেক কয়া লোইশিল্লগনি। হৌজিক কাস্মির তম্পাক রেল য়ৌরগনি। মসিগী মতাংদা য়াম্না হরাওবগী ফিবম অমা ঐনা উবা ফংলে। অনৌবা জম্মু অমসুং কাস্মিরগী শরুক অমা ওইনা নৌবা লম্বীশিং, রেলৱেশিং, হোস্পিতালশিং অমসুং কলেজশিং শেমগৎলে। তন্নেল অসিগীদমক অমসুং চাউখৎপগী অনৌবা যুগ অমগীদমক মীওই খুদিংমক ঐনা  হরাওবা ফোঙদোকচরি। 

মরুপশিং,

ঙসি, ভারত চাউখৎপগী অনৌবা থাকশিংগা লোয়ননা মাঙলোমদা চঙশিল্লি। ২০৪৭ দা বিকসিত ভারত অমা ওইনবা ভারত মাঙলোলমদা চঙশিল্লি অমসুং মসিদা লমদম অমতা নত্ত্রগা ইমুং অমা চিৎথরম্লোই। “সবকা সাথ, সবকা বিকাস” গী ৱাখল্লোন্দা সরকারনা থবক পায়খৎলি অমসুং হৌখিবা চহি ১০দা, জম্মু অমসুং কাস্মির য়াওনা লৈবাক অসিদা লায়রবা ইমুং করোর ৪ হেন্না পাক্কাগী য়ুমশিং ফংলে। মীওই করোর কয়া লেম্না লায়েংবগী খুদোংচাবশিং ফংলে, মসিদা জম্মু অমসুং কাস্মিরগী মীয়ামশু কান্নবা ফংলে। নহারোলশিংগী লাইরিক-লাইশু তম্নবা লৈবাক শীনবা থুংনা অনৌবা আই.আই.তিশিং, আই.আই.এমশিং, এ.আই.আই.এম.এসশিং, মেদিকেল কলেজশিং, নর্সিং কলেজশিং অমসুং পোলিতেক্নিক কলেজশিং লিংখৎলে। হৌখিবা চহি ১০দা রাজ্য অসিদা অৱাংবা থাক্কী মহৈলোয়শঙ কয়া লিংখৎলে অমসুং লমদম অসিগী ঐগী ইচানুপীশিং অমসুং ইচানুপাশিং অমসুং ঐখোয়গী নহারোলশিং মসিগী কান্নবা ফংলে।

মরুপশিং,

ঙসি, জম্মু অমসুং কাস্মিরদগী অরুনাচল প্রদেস ফাওবা ইনফ্রাস্ত্রকচর চাউখৎনবা পায়খৎলিবা থবকশিংগী মতাংদা, প্রধান মন্ত্রী শ্রী নরেন্দ্র মোদীনা হায়খি রাজ্য অসিদা মালেমদা খ্বাইদগী ৱাংবা তন্নেলশিং অমসুং খ্বাইদগী ৱাংবা রেল-রোদ থোঙশিং শেমগৎতুনা, জম্মু অমসুং কাস্মির অসি তন্নেলশিং, অৱাংবা থোঙশিং অমসুং রোপৱেশিংগী মফম অমা ওইরে। চেনাব ব্রিজ অসি ইঞ্জিনিয়ারিংগী অঙকপা অমা ওইনা, হন্দক পেসেঞ্জর ত্রেন অমা চাংয়েং ওইনা চেনখ্রে। কেবল ব্রিজ, জোজিলা, চেনানি নাসর অমসুং সোনামার্গ তন্নেল প্রোজেকশিং অমসুং উধাম্পুর-শ্রীনগর-বারামুল্লা রেল লিঙ্ক প্রোজেক্না কাস্মিরগী রেলৱে ফগৎহল্লে। সঙ্করাচার্য়া লাইশঙ, সিবখোরি অমসুং বালতাল-অমরনাথ রোপৱেশিং অমসুং কাত্রা-দিল্লি এক্সপ্রেসৱে স্কিমশিং রাজ্য অসিদা পায়খৎলি। নেসনেল হায়ৱে প্রোজেক মরি অমসুং রিং রোদ অনি য়াওনা হৌজিক জম্মু অমসুং কাস্মিরদা লুপা করোর ৪২,০০০ হেনবগী লম্বী-থোংগী প্রোজেকশিং পায়খৎলি। সোনামার্গকী অসিগুম্বা তন্নেল ১৪ হেন্না শেমগৎলে অমসুং জম্মু অমসুং কাস্মির লৈবাক অসিদা লম্বী-থোং খ্বাইদগী য়াম্না লৈবা মফম অমা ওইরে।

মরুপশিং,

বিকসিত ভারত অমা ওইরক্নবা ভারতকী খোঙচত্তা ঐখোয়গী তুরিজম সেক্তরনা অচৌবা থৌদাং অমা লৌরি। লম্বী-থোঙ ফগৎলকপা অসিনা জম্মু অমসুং কাস্মিরগী হান্না মশক খঙলমদবা মফমশিং লমকোয়বা লাকপা মীওইশিং য়ৌবা ঙম্লগনি। হৌখিবা চহি ১০ অসিদা লমদম অসিদা শান্তি অমসুং চাউখৎপা পুরকপগী কান্নবা তুরিজম সেক্তরনা মাঙজৌননা ফংখ্রে। ২০২৪ দা জম্মু অমসুং কাস্মিরদা লমকোয়বা মীওই করোর ২ হেন্না লাকখি, হৌখিবা চহি ১০ দা সোনামার্গতা লাকপা লমকোয়বা মীওইশিং শরুক তরুক হেনগৎলে। মসিনা লমদম অসিগী হোতেলশিং, হোমস্তেশিং, ধাবাশিং, ফিরোল য়োনবা দুকানশিং অমসুং তেক্সি চেল্লিবশিং কান্নবা ফংলে।

মরুপশিং,

২১শুবা চহিচাগী জম্মু অমসুং কাস্মিরনা চাউখৎপগী অনৌবা পন্দুব অমা ইরে। হৌখ্রবা মতমগী অৱাবশিং অদু কাউথোক্লগা, ঙসিদি লমদম অসি মালেমদা লৈবা লাইরৈবাক অমনি হায়না অমুক হন্না মশক তাক্লে। ঙসি মীয়াম্না অহিংদা লাল চোকতা হাওনা আইজ ক্রিম চারে অমসুং মফম অসি য়াম্না নুংঙাইরে। মফম অসিদা য়াম্না তোইনা ঈশৈগী থৌরমশিং পাংথোক্তুনা, লমদম অসিগী কলাকারশিংনা পোলো ভিয়ু মার্কেত অসি অনৌবা মফম অমা ওন্থোক্লে। হৌজিক শ্রীনগরগী মীয়াম্না মখোয়গী ইমুং-মনুংশিংগা সেনিমা হোলশিংদা নুংঙাইনা সেনিমাশিং য়েংলে অমসুং নুংঙাইনা পোৎ-চৈ লৈরে। অসিগুম্বা শিংথাবা য়াবা মাইপাকপা অসি সরকার খক্তনা পুরকপা ওইথোক্লোই অমসুং গনতন্ত্র মপাঙ্গল কনখৎহনবা অমসুং মখোয়গী তুংগী পুন্সি অশোই-অঙাম থোকহন্দবা অসি জম্মু অমসুং কাস্মিরগী মীয়ামনা হোৎনবদগীনি।

মরুপশিং,

ঐনা জম্মু অমসুং কাস্মিরগী নহারোলশিংগী তুংগী অফবা কয়া ময়েক শেংনা উবা ফংলে। শান্নবা পীরিবা খুদোংচাবশিং য়েংসি। থা খরগী মমাঙদা শ্রীনগরদা অহানবা ওইনা ইন্তরনেসনেল মরাথোন অমা পাংথোকখ্রে। মসি উবদা নহারোল কয়া হরাওখি। চীফ মিনিস্তরনা মরাথোন শরুক য়াখিবগী ভিদিও ভাইরেল চৎখিবা অদু ঐ নিংশিংলি।  ঐনা দিল্লিদা মহাক্কা উনবদা চীফ মিনিস্তর থাগৎপা ফোঙদোকখি। মীফম মনুংদা, ঐনা মহাক্কী হরাওবা অদু উবা ফংখি অমসুং মরাথোনগী মরমদা মহাক্না ঐঙোন্দা কুপ্না হায়খি।

মরুপশিং,

হৌজিক জম্মু অমসুং কাস্মিরগী অশেংবা যুগ অমনি। চহি ৪০ গী মতুংদা লমদম অসিদা ইন্তরনেসনেল ক্রিকেত লিগ পাংথোকখ্রে অমসুং ফজরবা দাল পাৎকী অকোয়বদা কার লমজেল তান্নবা উরে। খেলো ইন্দিয়া ৱিন্তর গেমস মরি পাংথোক্তুনা অমসুং মথং থা খরগী মতুংদা মঙাশুবা ইদিসন পাংথোক্তুনা, গুলমার্গ ভারতকী ৱিন্তর গেমসকী কোনুং ওইরে। হৌখিবা চহি অনিদা, জম্মু অমসুং কাস্মিরদা পাংথোকখিবা তোঙান তোঙানবা শান্নবগী তুর্নামেন্তশিংদা লৈবাক শীনবা থুংবগী শান্নোয় ২,৫০০ হেন্না শরুক য়াখ্রে। লমদম অসিদা খেলো ইন্দিয়া সেন্তর ৯০ হেন্না লিংখৎতুনা, লমদম অসিগী নহারোল ৪,৫০০ হেন্না ত্রেনিং পীরে।

মরুপশিং,

ঙসি, জম্মু অমসুং কাস্মিরগী নহারোলশিংগী অনৌবা খুদোংচাবশিং পীরে। জম্মু অমসুং অবান্তিপোরাদা এ.আই.আই.এম.এস শাগৎপা য়াংনা পায়খৎলি, মসিনা লায়েংনবা লৈবাক অসিগী অতোপ্পা মফমশিংদা চৎপা হন্থহল্লগনি। জম্মুদা লৈরিবা আই.আই.তি, আই.আই.এম অমসুং সেন্ত্রেল য়ুনিভর্সিতি কেম্পসনা অফবা লাইরিক-লাইশু তম্বগী খুদোংচাবশিং ফংহল্লে। লমদম অসিগী খুৎহৈবশিং পি.এম বিশ্বকর্মা স্কিমনা অমসুং জম্মু অমসুং কাস্মির সরকারগী অতোপ্পা থবকশিংনা শৌগৎলি। লমদম অসিদা অনৌবা উদ্যোগশিং লিংখৎনবা মখা তানা থবকশিং পায়খৎলি, লুপা করোর ১৩,০০ রোম থাদদুনা নহারোলশিংগী থবক লিশিং কয়া ফংহল্লে। জম্মু অমসুং কাস্মরি বেঙ্কগী থবক ফগৎলক্তুনা, হৌখিবা চহি ৪ অসিদা লুপা করোর লাখ ১.৬ দগী লুপা করোর লাখ ২.৩ দা হেনগৎলকপা অসি থাগৎনিঙাইনি। লমদম অসিগী নহারোলশিং, লৌমীশিং, উহৈ থাবা লৌমীশিং, দুকান ফম্বশিং অমসুং ওন্ত্রাপ্রেনিউয়রশিংদা লোনশিং ফংহনবা বেঙ্ক অসিনা হেনগৎলে।

মরুপশিং,

হৌখিবা মতমগী জম্মু অমসুং কাস্মিরদা অওনবশিং পুরক্তুনা হৌজিক ওইরিবা চাউখৎপগী ফিবম অমদা লাকখিবনি। লৈবাক অসিগী লুহুপ ওইরিবা কাস্মিরগদা চাউখৎপগী সনাগী লৈতেংগী পোৎলমশিং থোল্লবা মতমদা বিকসিত ভারত অমগী মঙলান মঙফাওনবা ঙমগনি। কাস্মির হেন্না ফজহনবা অমসুং নুংঙাই য়াইফহনবা অসি ঐগী অপাম্বনি। থবক অসিগীদমক লমদম অসিগী নহারোলশিং, অহলশিং অমসুং অঙাংশিং মখা তানা শৌগৎকনি। মখোয়গী মঙলানশিং মঙফাওনবা ঙম্নবা রাজ্য অসিগী মীয়াম পুকচেল শেংনা থবক তৌরি অমসুং লমদম অসি অমসুং লৈবাক অসি চাউখৎনবা মতেং পাংলি। অদোমগী খোঙথাং খুদিং মোদীগা লোয়ননা চৎমিন্নগনি হায়না ঐনা অমুক হন্না অদোমগী মফমদা থাজবা পীরি। অদোমগী মঙলানশিংগী লম্বীদা থেংনবা অপনবা খুদিংমক মোদীনা লৌথোক্কনি।

মরুপশিং,

অমুক হন্না, ঙসিগী চাউখৎ-থৌরাংগী প্রোজেকশিং অসিগীদমক জম্মু অমসুং কাস্মিরগী ইমুং খুদিংমক্ত ঐনা ঐগী য়াইফ পাউজেল পীজরি। চাউখৎপগী খোঙজেল অমসুং পায়খৎকদৌরিবা অনৌবা প্রোজেকশিংগী মরমদা ঐখোয়গী মরুপশিং নিতিন জি, মনোজ সিনহা জি অমসুং চীফ মিনিস্তরনা য়াম্না কুপ্না ফোঙদোকখ্রে। ঐনা মখোয় অমুক হঞ্জিন্না হায়ররোই। ঐনা অদোমগী মফমদা হায়রি মদুদি হৌজিক অরাপ্পা লৈহন্দ্রে, হৌজিক ঐখোয় অমতা ওইনা মঙলানশিং মঙফাওনবা ঙম্নবা, ৱারেপশিং লৌরসি। অদোমগী মফমদা ঐগী য়াইফ পাউজেল পীজরি। 

অদোম ঙমখৈ লৈতনা থাগৎপা ফোঙদোকচরি।

****