ভারতকী প্রধানমন্ত্রী

ঙসি প্রধান মন্ত্রী শ্রী নরেন্দ্র মোদীনা মহাক্কী অহানবা পোদকাষ্টতা, ওন্ত্রাপ্রেনিউয়র অমসুং ইনভেষ্টর নিখিল কমাথকা ৱারি শানখ্রে। লৌথুপ-লৌকোই লৈতনা ৱারি শানবা অমদা মহাক্কী অঙাং ওইরিঙৈগী মতাংদা হংবদা, প্রধান মন্ত্রীনা মহাক্কী পুন্সিগী অঙনবা শরুকশিংগী ৱারিশিং লিখি, অৱাং থংবা গুজরাতকী মেহসানা জিলাগী অপীকপা তাউন ভাদনগরদগী মহাক্না হৌরকখিবগী মতাংদা পাউদমখি। মহাক্না হায়খি গায়কৱার স্তেৎ তাউন অমা ওইনা, ভাদনগর অসি লাইরিক-লাইশু, পুখ্রি, পোস্ত ওফিস অমসুং লাইব্রেরিগুম্বা তঙাইফদবা খুদোংচাবশিংগীদমক মমিং চৎলি। মহাক্না গায়কৱার স্তেৎ প্রাইমারি স্কুল অমসুং ভগবাতাচার্য়া নারায়ানাচার্য়া হায় স্কুলদা তম্লকখিবগী মতাংদা প্রধান মন্ত্রীনা নিংশিংখি।

ভাদনগরদা মতম শাংনা লৈরম্বা চাইনাগী ফিলোসোফর সানজাংগী ফিল্ম অমগী মতাংদা চাইনাগী এম্বেসিদা মহাক্না কমদৌনা ইখিবগে হায়বগী মতাংদা নুংঙাইরবা ৱারি অমা মহাক্না লিখি। মহাক্না ২০১৪ দা ভারতকী প্রধান মন্ত্রী ওইরকপা মতমদা থেংনখিবা থৌদোক অমা মহাক্না পনখি অমসুং সানজাং অমসুং মখোয় অনিমক্কী পোক্নফম তাউনশিংগা পুৱারিগী মরী লৈনবা লৈনবদগী, চাইনাগী রাস্ত্রপতি সি জিনপিংনা গুজরাত অমসুং ভাদনগরদা চৎনিংবগী অপাম্বা ফোঙদোকখি। মসিগী মরী অসিনা লৈবাক অনিগী মরক্ত মান্নবা চৎনবীশিং অমসুং অকনবা মরীশিং লৈনরিবা অদু মহাক্না মখা তানা ফোঙদোকখি।

মহাক্কী মহৈরোয় ওইরিঙৈগী পুন্সিগী মতাংদা, প্রধান মন্ত্রী শ্রী নরেন্দ্র মোদীনা হায়খি মহাক চাংচৎ অমদা লৈবা মহৈরোয় অমনি। মহাক্কী ওজা, ভেলজিভাই চৌধুরিনা মহাক্কী তৌবা ঙম্বশিং উখি অমসুং মহাক্কী থাজবশিং য়াম্না তোইনা মোদীগী মপাদা ফোঙদোকখি। মোদীনা থবক খুদিংমক য়াম্না য়াংনা লৌশিনবা ঙম্মী অদুবু মহাক মশাগী তাইবংপাল অমদা মাঙখি হায়না ভেলজিভাইনা ফোঙদোকখি। মহাক্কী ওজাশিংনা মহাক নুংশিনা লোয়নখি, অদুবু মহাক চাংদম্নবদা থৱায় য়াওখিদে। মহাক্না ইহোৎ হোৎনদনা পরিক্ষা পাস তৌখিবা পামখি অমসুং অতোপ্পা থবকশিংদনা হেন্না থৱায় য়াওখি। মসিগী মহাক্কী থৌওং অসিনা য়াম্না য়াংনা অনৌবা থবকশিং খঙখি অমসুং তোঙান-তোঙানবা থবকশিং পাংথোকখি…

চহি য়াম্না নৌনা য়ু্ম থাদোরকখিবা অমসুং মহাক্কী ইমুং-মনুং অমসুং মরুপ-মপাংশিংগা উনখিদবগী মহাক্কী অঙকপা খোঙচৎ অমা প্রধান মন্ত্রীনা লিখি। প্রধান মন্ত্রী শ্রী নরেন্দ্র মোদীনা হায়খি মহাক্না চীফ মিনিস্তর ওইরকপা মতমদা, মহাক্কী অপাম্বা খর লৈখি, মহাক্কী থায়না লাইরিক তম্মিন্নরকপা মমান্নবশিংগা অমুক উনবা অমসুং মরুপ ৩০-৩৫ রোম চীফ মিনিস্তরগী য়ুমদা কৌবনি, অদুবু মখোয়না মহাক মখোয়গী অরিবা মরুপ অমা ওইনা উবগী মহুত্তা মহাক চীফ মিনিস্তর অমা ওইনা উখি। মহাক্না পামজবদি মহাক্না লাইরিক তম্লকপদা অচৌবা থৌদাং লৌখিবা মহাক্কী ওজাশিং মীয়াম মমাঙদা ইকায়খুম্নবা উৎপনি। মতম অদুদা চহি ৯৩ শুরবা, মহাক্কী খ্বাইদগী অহল ওইরবা ওজা রাসবিহারি মনিহার য়াওনা, ওজা ৩০-৩২ রোম ইকায়খুম্নবা উৎনবা মহাক্না অচৌবা থৌরম অমা শীনখি। থৌরম অদুদা রাজ্যপাল অমসুং গুজরাতকী অতোপ্পা শক্নাইরবা মীওইশিং শরুক য়াখি। মসিগী মথক্ত, মহাক্কী ইমুংগী মীওইশিংগা অমুক উন্ননবা অমসুং অমগা অমগা শক খঙন্নবা মহাক্না চীফ মিনিস্তরগী য়ুমদা কৌখি। মহাক্না আর.এস.এস য়াওরিঙৈ মহাক্কী নহা ওইরিঙৈ মতমদা মহাকপু চাক পীজখিবা ইমুংশিশুং মহাক্না বার্তন তৌখি। হায়রিবা থৌরম মরি অসি মহাক্কী পুন্সিদা মরুওইবা থৌদোকশিংনি অমসুং মহাক্কী হৌরফমশিং ইকায়খুম্নবা উৎপা অমসুং মখোয়গা লোয়ননা লেংদনা লৈমিন্ননিংবগী অপাম্বা মমি তাখি।

প্রধান মন্ত্রী শ্রী নরেন্দ্র মোদীনা হায়খি মহাক্না ৱাঙুলোন অমতা ইনখিদে অমসুং মার্ক য়াম্না ৱাংনা ফংদ্রবশু পরিক্ষাশিং পাস তৌবদা পেন্থোকখি। মহাক মশানা পামজনা থবক কয়া পাংথোকপা, ইহোৎ হোৎনদনা দ্রামা চাংদম্নবগুম্বা শরুক য়াবা পামখি। চাংনাইনা মালখাম্বা অমসুং রেস্তলিং শান্নবা মহাক্কী ফিজিকেল ত্রেনিং ওজা পারমারনা মহাক ইথিল পীখিবগী ৱারি অমা মহাক্না লিখি। মহাক্না হোৎনজরবশু, মহাক্না শান্নরোয় অমা ওইবা ঙমখিদে অমসুং মতুং তারকপদা হায়রিবা থবকশিং অসি তোকখি।

রাজনিতিদা রাজনিতিৱালা অমা ওইবদা করিবু লৌশিং অমনি হায়না খনগনি হায়না হংবদা, প্রধান মন্ত্রী শ্রী নরেন্দ্র মোদীনা পাউখুম পীখি মদুদি রাজনিতিৱালা অমা ওইবা অমসুং রাজনিতিদা মাইপাকপা হায়বসি তোঙানবা থবক অনিনি। রাজনিতিদা মাইপাক্নবগীদমক কৎথোকপা, হায়দোকখিবা ৱা ঙাকপা অমসুং মীয়ামগী নুংঙাইবা অমসুং অৱাবশিং শরুক য়াবা তঙাইফদে। লুচিংবা অমা ওইবগী মহুত্ত তিমগী অফবা শান্নরোয় অমা ওইবনা হেন্না মরুওই। ভারত নিংতম্বগী ইহৌদা লনাই মীওই কয়া রাজনিতি য়াওদনা ইহৌদা মতেং পাংখি। খুন্নাইগীদমক কৎথোক্নবা অচেৎপা ৱাখল অমগা লোয়ননা নিংতম ইহৌদগী নিংতম্লবা মতুংগী লুচিংবশিং থোক্লকখি।

প্রধান মন্ত্রী শ্রী নরেন্দ্র মোদীনা হায়খি অপাম্বা ফংনবা নত্তনা অমসুং পান্দম অমগা লোয়ননা অফবা মীওইশিং রাজনিতিদা চঙলক্কদবনি। মহাত্মা গান্ধী খুদম ওইনা পল্লদুনা, প্রধান মন্ত্রী শ্রী নরেন্দ্র মোদীনা হায়খি মদুদি গান্ধীগী পুন্সি অমসুং থবকশিংনা ৱাফম কয়া ফোঙদোকখি, লৈবাক শীনবা থুংনা ইথিল পীখি। ৱা ঙাংবা হৈবদগী ফজনা পাউ ফাওনবা ঙম্বনা হেন্না মরুওই। মহাক্কী থবকশিং অমসুং ৱারোলশিংনা গান্ধীনা মপাঙ্গল কনবা পাউজেলশিং শন্দোকখি, অহিংশাগী পাউজেল পীখি। শীনফম অমগী হৈথোই-শিংথোইবশিং নত্ত্রগা ৱা ঙাংবা হৈবা খক্তদা মখা পোনবগী মথক্তা, কৎথোকপা পুন্সি অমদা হিংবা অমসুং মপুংফানা পাউ ফাওনবা ঙম্বা অসিনা রাজনিতিদা তশেংনা মাইপাকপনি।

প্রধান মন্ত্রী শ্রী নরেন্দ্র মোদীনা অমুক হন্না হায়খি মদুদি অপাম্বা ফংনবা নত্তনা মিসন অমনা লমজিংদুনা নহা লাখ ১ রাজনিতিদা শরুক য়াবা দরকার ওইরে। ওন্ত্রাপ্রেনিউয়রশিংনা চাউখৎনবা মীৎয়েং চঙবগুম, রাজনিতিদা মশা কৎথোকপা অমসুং লৈবাক্কী থবক্না হান্না পাংথোকপা দরকার ওই। লৈবাক্কী থবক্না মরুওইনা লৌবা মীওইশিং খুন্নাইনা য়াই অমসুং মরম অদুনা রাজনিতিগী পুন্সি অসি অরাইবা নত্তে। কয়ারক মিনিস্তর ওইরবশু অচম্বা পুন্সি অমদা হিংখিবা অশোক ভত্ত কৌবা কৎথোক্লবা ৱার্কর অমগী ৱারি প্রধান মন্ত্রী শ্রী নরেন্দ্র মোদীনা লিখি। অহিং নোংয়াই ফাওবদা, মতেং পাংনবগীদমক শ্রী ভত্ত মতম পুম্নমক্ত থৌরাং তৌদুনা লৈখি অমসুং মশাগী খুদোংচাবশিং ফংদনা মীয়ামগী থবক তৌবা পুন্সি অমদা লেনখি। মসিগী খুদম অসিনা রাজনিতিদা কৎথোকপা অমসুং মশাগী ওইজবা থিদবগী মরুওইবা অদু উৎলে। রাজনিতি অসি মীখলশিং খক্তদা মাইপাকপ অদু নত্তে, মীয়ামগী থম্মোয় জয় তৌবা, মীয়াম মরক্ত লৈমিন্নবা অমসুং মখোয়গী পুন্সিশিংগা শম্নবা অদুনি।

মহাক্কী “অৱাবগী য়ুনিভর্সিতি” ওইনা মহাক্কী অঙাং ওইরিঙৈগী খুদোংচাদবশিং পল্লদুনা, থৌদোক-ৱাথোকশিংনা কমদৌনা পুন্সি শেম্বগে হায়না হংবদা, প্রধান মন্ত্রী শ্রী নরেন্দ্র মোদীনা হায়খি, “ঐগী পুন্সি অসি ঐগী খ্বাইদগী ফবা ওজানি”। ঈশিং শোক্নবা খোঙনা কিলোমিতর কয়া চৎখিবা, মহাক্কী রাজ্যশিংদা নুপীশিংনা অৱাবা কয়া মায়োক্নবা মহাক্না উখি, নিংতম্লবা মতুংদা ঈশিং ফংহন্নবা মহাক্না থবক পায়খৎনবা ইথিল পীখি। মহাক্না থৌরাংশিংগী মপু ওইনা হোৎনদ্রবশু, লৈবাক অসি কান্নবা ফংনবা মঙলানশিং মঙফাওনবা ঙম্নবা মহাক মশামক কৎথোকখি। চোকথবা লৈতনা থবক শুবা, লনাইগী কান্নবা লৌদবা অমসুং তৌগে য়াওনা অরানবা তৌদবা অসি মহাক্না চীফ মিনিস্তর ওইরিঙৈগী লমজিংনবা অচুম্বা ফিদমশিংনি। অরানবা তৌবা অসি মীওইবগী মহৌশানি অদুবু অচুম্বা ৱাখল্লোনগা লোয়ননা মহাক্না থবক তৌখি। গুজরাতকী চীফ মিনিস্তর ওইনা মহাক্না ৱা ঙাংখিবা নিংশিংলদুনা, প্রধান মন্ত্রী শ্রী নরেন্দ্র মোদীনা হায়খি মদুদি মহাক থবক কন্না শুবদগী লৈদুনা চেল্লোই, মশা মশাগী ওইবা করিগুম্বা অমতা মহাক্না তৌরোই অমসুং ফত্তবা ৱাখল্লোল অমগা লোয়ননা মহাক্না অরানবশিং পাংথোক্লোই অমসুং হায়রিবা নিয়ম অহুম অসি মহাক্কী পুন্সিগী লাইৱানি হায়না খল্লি।

আইদেলিজম অমসুং আইদিওলোজিগী মরুওইবগী মতাংদা পল্লদুনা, প্রধান মন্ত্রী শ্রী নরেন্দ্র মোদীনা হায়খি মহাক লমজিংলিবা অচুম্বা ফিদমশিংদি মতম পুম্নমক্ত “লৈবাক্কী থবক্না হান্না পাংথোকপা” অসিনা ওইরি। মসিগী ৱাখল্লোন অসি চৎনবী অমসুং থৌশিলগী ঙমখৈশিং লান্থোক্লি, করিগুম্বা মখোয়না লৈবাক্কী য়াইফনবা ওইরবদি মহাক্না অনৌবা ৱাখলশিং লৌশিনবা অমসুং অরিবশিং লংথোকখিবা য়াই। মহাক্কী অচেৎপা ফিরেপতি “লৈবাক্কী থবক্না হান্না পাংথোকপা” হায়বা অসিনি। আইদিওলোজিদগী আইদিলিজম্না হেন্না মরুওইবা অসি রাজনিতিদা য়াম্না কান্নৈ। আইদিওলোজি তঙাইফদনা চংবগা  লোয়ন্না, আইদিলিজম অসি রাজনিতিগী ইথিল পীনবা য়াম্না মরুওই। নিংতম্বগী মান্নবা পান্দমগীদমক তোঙান-তোঙানবা ৱাখল্লোনশিং পুনশিনখিবগীদমক নিংতম ইহৌ অসি খুদম অমনি।

নহা ওইরিবা রাজনিতিৱালাশিংনা কমদৌনা মীয়াম্না চৈরকপশিং অমসুং শিথরকপশিং মায়োক্নগনি হায়না হংবদা, প্রধান মন্ত্রীনা হায়খি অতোপ্পশিংগী মতেং পাংবদা হরাওজবা ৱাখল তাবা লনাই মীওইশিং রাজনিতিদা দরকার ওই। গনতন্ত্র অমদা, মরাল শিরকপশিং কনাগুম্ব অমনা য়াগদবনি, অদুবু কনাগুম্বা অমনা চুম্লবদি অমসুং অরানবা অমতা তৌদ্রবদি, মদুগীদমক ৱানিংঙাই লৈতে।

সোসিএল মেদিয়া লাক্ত্রিঙৈ অমসুং সোসিএল মেদিয়া মতুংগী মেদিয়াগী রাজনিতি অমসুং মসিনা রাজনিতিৱালাশিংদা পীবা চৈথেং অমসুং নহা ওইরিবা রাজনিতিৱালাশিংনা সোসিএল মেদিয়া শীজিন্নবগী পাউতাক্কী মতাংদা প্রধান মন্ত্রীনা মহাক্না অঙাংশিংগা ৱারি শান্নখিবগী নোক্নিংবা থৌদোক অমা লিখি, তি.ভিদা থোক্লকপদা অমসুং চৈরকপদা মহাক করি ফাওবগে হায়না হংলকখি। মীনা চৈরকপদা করিশু খন্দবা লনাই মীওই অমগী ৱারি লিরদুনা, কনাগুম্বা অমনা অচুম্বা পাংথোক্লবা অমসুং অচুম্বা ৱাখল্লোন চেল্লবদি, চৈরকপগী ৱানিংঙাই ওইদে হায়না প্রধান মন্ত্রীনা ফোঙদোকখি। মহাক্না হায়খি মহাক্কী থবকশিং অমসুং অচুম্বশিংদা মীৎয়েং চঙদুনা মসিগা মান্নবা ৱাখল্লোন অমা মহাক্কী লৈরি। মীয়ামগী থবক তৌবদা মীয়ামগী ইহুল খঙবা য়াম্না দরকার ওই, মসি য়াওদনা, কনাগুম্বা অমনা মীয়ামগী থবক তৌবা ঙম্লোই। রাজনিতি অমসুং থবক মফমশিং য়াওনা য়ানদবা অমসুং চৈনবা অসিউ হিরম খুদিংমক্ত থেংনৈ, কনাগুম্বা অমনা মসি য়াগদবনি অমসুং মখোয় থেংগদবনি।

প্রধান মন্ত্রী শ্রী নরেন্দ্র মোদীনা হায়খি গনতন্ত্রদা সোসিএল মেদিয়াগী অওনবা পুরকপা ঙম্বগী থৌনা লৈ। মমাঙদা, মফম খর খক্তগী পাউ ফংলম্মী, অদুবু হৌজিক্তি, তোঙান-তোঙানবা চেন্নেলশিংদগী মীয়াম্না লাইনা অচুম্বশিং খঙদোকপা ঙম্লে। লনাই মীওইশিং অচুম্বা পাউশিং ফংবা অমসুং খঙদোকপা য়াহন্দুনা, গনতন্ত্রদা সোসিএল মেদিয়া অসি অফবা খুৎলায় অমা ওইরক্লে। মরুওইনা স্পেস থিজিনবগী লমদা, ঙসিগী নহারোলশিংনা থৱায় য়াওনা ই-পাউশিং সোসিএল মেদিয়াদগী অচুম্বা খঙদোক্লে। গাগনয়ান মিসনগুম্বা অফবা থবকশিং থৱায় য়াওনা শেন্নরিবা নহারোলশিংগী মরক্ত চন্দ্রয়ান মাইপাকপা অসিনা অনৌবা থৌনা অমা হাপ্লে। অনৌবা মীরোলশিংগীদকম সোসিএল মেদিয়া অসি মপাঙ্গল কল্লবা খুৎলায় অমনি। মহাক্না রাজনিতি য়াওবা কুইদ্রিঙৈদা, চৈরকপা অমসুং য়ুম্ফম য়াওদনা মরাল শিরকপা অসি য়াম্না তোইনা থোকখি, সোসিএল মেদিয়া লাক্ত্রিঙৈ মমাংদা ফাওবা থোকখি। অদুবু ঙসিদি তোঙান তোঙানবা মফম কয়া লৈবদগী অচুম্বা খঙদোক্নবা খুদোংচাবা অমা পীরে। সোসিএল মেদিয়া অসি খুন্নাইগী মমল য়াম্লবা লন অমা ওইনা, গনতন্ত্র অমসুং নহারোলশিংগী থৌনা হাপ্লে।

লাংতক্নবা, মসি মীওই খুদিংমক্ত শরুক য়াবা, মহাক মশামক্ত মসি থেংনখিবগী মতাংদা, প্রধান মন্ত্রী শ্রী নরেন্দ্র মোদীনা হায়খি লাংতক্নবা লাকশিন্নবা হোৎনবা অসি মী অমগা অমগা মান্নদে অমসুং লনাই মীওই খুদিংমক মখোয় মশাগী হৈনজবী অমসুং মসি থেংনবা ঙম্বগী থৌনা লৈ। ২০০২ গী গুগরাতকী মীখলশিং অমসুং গোধারাগী থৌদোকশিং য়াওনা, খুদোংথিবা মতম মনুংদা কমদৌনা মহাক্কী পুক্নিংগী ইহুলশিং অমসুং থৌদাংশিং শেন্নখিবগে হায়বগী লনাই ৱারি প্রধান মন্ত্রী শ্রী নরেন্দ্র মোদীনা ফোঙদোকখি। মহাক্না হায়খি মদুদি মহৌশাদা মীওইবগী তৌফম থোকপা থবকশিংগী মথক্ত লৈবা অমসুং কনাগুম্বা অমগী পান্দম অমদা মীৎয়েং চঙবা অসি য়াম্না মরুওই। দরকার ওইদবা তকশিনবা য়াওদনা, মখোয়গী নোংমগী পাংথোকপা থোকপা থবকশিংগী শরুক অমা ওইনা মহৈরোয়শিংনা পরিক্ষাশিং থেংনগদবনি। মসি মখোয়গী পুন্সিগী শরুক অমা ওইনা লৌগদবনি।

কা হেন্না ৱাখল খঞ্জিনবা খুদোংচাদবা থৌদোকশিংদা মহাক্কী মীৎয়েং ফোঙদোক্লদুনা, প্রধান মন্ত্রী শ্রী নরেন্দ্র মোদীনা হায়খি মহাক্কী হৌজিক ওইরিবা ফিবম অসি য়ৌরক্নবা মহাক্না কৈদৌঙৈদা থৌরাং তৌখিদে অমসুং মতম পুম্নমক্ত মহাক্কী থৌদাংশিং পাংথোক্নবা মীৎয়েং চঙখি। মাইপাকপা নত্ত্রগা মাইথিবগী ৱাখলশিংনা কৈদৌঙৈদা মহাক হুমদুনা পুখিদে।

মাইথিবশিংদগী পারা তম্বগী মতাংদা, প্রধান মন্ত্রী শ্রী নরেন্দ্র মোদীনা হায়খি চন্দ্রয়ান-২ মাইথিবগী দাইত্ব মহাক্না লৌখি অমসুং থাজবা থম্নবা মহাক্না সাইন্তিস্তশিংগী পুক্নিং থৌগৎখি। রাজনিতিদা খুদোংথিবা মায়োক্নবা ঙম্বা, নহা ওইরিবা লুচিংবশিং শৌগৎপা অমসুং লৈবাক্কীদমক থবক তৌনবা মখোয়গী পুক্নিং থৌগৎপা অসি য়াম্না মরুওই। রাজনিতিগী অফবা মিংচৎ লৈহনবা অমসুং রাজনতিগী অফবা ওইহন্নবগীদমক অফবা মীওই শরুক য়ানবা পুক্নিং থৌগৎপা অসি তঙাইফদে। নহা ওইরিবা লুচিংবশিংনা মীয়াম মশক খঙবীদবগী অকিবা লৈরোইদবনি অমসুং ভারতকী তুংলমচৎ মাইপাকপা হায়বসি মখোয়গী খুৎতা লৈরে। লনাই কান্নবা ফংবা থবক তৌরোইদবনি, লৈবাক্কীদমক অমসুং গনতন্ত্রগী ইকায়খুম্নবা ঙাক্নবা থবক তৌগদবনি।  

রাজনিতি অসি “অমোৎপা মফম” অমনি হায়বা মীৎয়েং অসিগী মতাংদা হংবদা প্রধান মন্ত্রী শ্রী নরেন্দ্র মোদীনা হায়খি রাজনিতি অসি শুপ্নগী মীখলশিং অমসুং মাইপাকপা নত্ত্রগা মাইথিবা খক নত্তে, মসিদা শিংথাবা য়ানা অহোংবশিং পুরক্নবা থৌশিল শেম্বা অমসুং লৈবাক ঙাকপা য়াওরি। ফিবমশিং অওনবা পুরক্নবা অফবা থৌশিলশিং অমসুং মখোয় থবক ওইনা পাংথোকপা য়াম্না মরুওই। লায়রবা ত্রাইবেল ফুরুপশিং শৌগৎনবা, রাস্ত্রপতি দ্রৌপতি মুর্মুগী লমজিং মখাদা পি.এম জনমন য়োজনা কৌবা স্কিম অমা পায়খৎলে। মসিনা রাজনিতিগী কান্নবা ফংবা খক নত্তনা, মফম ২৫০ গী মীওই লাখ ২৫ গী পুন্সিদা অকনবা ইথিল অমা পীরে। রাজনিতিদা অচুম্বা মতমদা অচুম্বা ৱারেপশিং লৌবা অসিনা অফবা অহোংবশিং পুরক্কগনি অমসুং অপেনবা ৱাখল অমা পোকহনগনি।

প্রধান মন্ত্রী শ্রী নরেন্দ্র মোদীনা মাইথিবশিংগী মহাক্কী থৌদোকশিং শরুক য়াখি, মহাক্না অঙাং ওইরিঙৈদা মিলিতরি স্কুল অমদা তমনিংখিবা, শেন-থুমগী ফিবম চাদবদগী তম্বা ঙমখিবদগী মতাংদা মহাক্না পাউদমখি। প্রধান মন্ত্রী শ্রী নরেন্দ্র মোদীনা হায়খি য়োগী অমগী পুন্সিদা হিংনবা মহাক্কী অপাম্বা লৈখি, রামকৃষ্ণ মিসন শরুক য়ানবা মহাক্না হোৎনরবশু চঙবা ঙমখিদে। মদুগী মাইথিবশিং অদু পুন্সিগী শরুক অমনি অমসুং মদুনা মহাক ফগৎলক্নবা শিংথাবা য়ানা মতেং পাংখি। মহাক্না আর.এস.এস য়াওরিঙৈদা, গারি থৌরিঙদা চৎথখিবা অরানবা অমদগী পারা তমখি অমসুং মাইথিবশিংদগী তম্বগী মরুওইবা লৈ। মহাক্না মতম পুম্নমক্ত মহাক্কী নুংঙাইবা মফমশিংদগী লাপ্না লৈখি,মসিনা মহাক্কী গুনশিং অমসুং পুন্সিগী পান্দমশিং শেমখি। চাউখৎনবগীদমক নুংঙাইবা মফমশিং থাদোকপা তঙাইফদে হায়বা মহাক্না থাজৈ অমসুং মাইপাক্নবগীদমক খুদোংথিবা থেংনবা ঙম্বা অসি য়াম্না মরুওই। নুংঙাইবনা কনাগুম্বা অমগী পান্দমশিং ফংবদা অপনবা পী অমসুং চাউখৎনবগীদমক নুংঙাইবদগী খোঙ থাংদোকপা দরকার ওই।

প্রধান মন্ত্রী শ্রী নরেন্দ্র মোদীনা হায়খি মহাক্না কৈদৌঙৈদা মশাগী কান্নবা ফংনবা হোৎনদবা মরম্না খুদোংথিবা মায়োক্নবা ঙম্বা মহাক্কী থৌনা অসি অঙকপনি অমসুং মসিগী অকিবা লৈতবা মীৎয়েং অসিনা মহাক্না চিংনবা লৈতনা ৱারেপশিং লৌবা ঙমহল্লে। মহাক মশামক্কা শম্ননবা অমসুং মমি তানবা মহাক্না অচিকপা মফমশিংদা নাইতোম লৈখি। মহাক্না ১৯৮০গী মতমদা মরুভুমিদা লৈখি, মফম অদুদা মহাক্না অধ্যাতিক্কি মিকপ থোকখি। থৌদোক অসিনা, মালেমদা খ্বাইদগী ফবা লমকোয়ফম খুঙ্গং ওইনা শকখঙনরবা, মরুওইবা তুরিজমগী থৌরম অমা ওইরবা, রন উৎসব পাংথোক্নবা মঙোন্দা ইথিল পীখি। রাজনিতি অমসুং ওন্ত্রাপ্রেনিউয়রশিপ অনিমক্ত চাউখৎনবগীদমক কনাগুম্বা অমগী নুঙাইবা থাদোকপা দরকার ওই। খুদোংথিবা থেংনবা ঙম্বা অসিনা হেন্না মাইপাকপশিং পুরকপা ঙমগনি। মমা-মপা অমা মাঙজবগী পুক্নিংগী ইহুলশিং মহাক্না ফাওখি। মহাক চহি য়াম্না নৌনা য়ুম থাদোকখি অমসুং পুন্না হিংমিন্নবগী নুংঙাইবা অদু মহাক্না ফংখিদে, অদুবু মহাক্কী মমাগী চহি ১০০শুবা মপোক নুমিত্তা, মমানা মঙোন্দা মমল য়াম্লবা পাউতাক পীখি: “লৌশিংগা লোয়ননা থবক তৌগদবনি, পুকচেল শেংনা হিংউ”। মহাক্কী মমা লাইরিক হৈত্রবশু, লৌশিং য়াম্না লৈখি। মহাক্কা কুপ্না ৱারি শানবগী খুদোংচাবা কয়া ফংখিদে, মহাক্কী থবকশিংদা পুক্নিং চঙনবা মমানা মতম পুম্নমক্ত মহাক্কী পুক্নিং থৌগৎখি। মমা-মপা লৈখিদবা অসি থৱায় নুংঙাইতে, অদুবু মখোয়না পীরম্বা লৌশিং অমসুং গুনশিং অদুনা লেংদ্রবা লন অমা ওইহৌরে।

রাজনিতি অসি অমোৎপা মফম অমনি হায়না লৌনরিবা অসিগী মতাংদা, প্রধান মন্ত্রী শ্রী নরেন্দ্র মোদীনা হায়খি রাজনিতিৱালাশিংগী থবকশিংনা মরম ওইদুনা রাজনিতিগী মিংচৎ থিহনবনি। অহোংবা পুরকপা পাম্বা অচুম্বা চৎপা মীওইশিংগী মফম হৌজিক ফাওবা রাজনিতিদা লৈরি। অচুম্বা অমসুং কৎথোকপা খুন্নাইনা ইকায়খুম্নবা উৎপা অমসুং শৌগৎপা মশক তাকখিবা, শেন খর খক্তনা ইন্দিপেন্দেন্ত ওইনা মীখলগী কেম্পেন অমা পাংথোকখিবা দোক্তর অমগী মতাংদা মহাক্না অঙাং ওইরিঙৈগী ৱারি অমা প্রধান মন্ত্রী শ্রী নরেন্দ্র মোদীনা লিখি। মহাক্না হায়খি রাজনিতিদা হায়দোকখিবা ৱা ঙাকপা অমসুং খাংবা কনবা য়াম্না দরকার ওই অমসুং মসি মীখল খক্তগী মীৎয়েংদগী য়েংলোইদবনি। শিংথানিঙাই ওইবা অহোংবশিং পুরক্নবা মীয়ামগী থবক তৌবা অমসুং থৌশিল শেম্বা অসি য়াম্না মরুওই। মহাক্না চীফ মিনিস্তর ওইরিঙৈদা য়ুহা হাবদা শোকহল্লবশিং খুন্দা-লৈতানবা থবক তৌনবা মহাক্না ওফিসিএলশিংগী পুক্নিং থৌগৎখি অমসুং চৎনদ্রবা অরিবা নিয়মশিং হোংদোক্তুনা কান্নবা ৱারেপশিং লৌখি। খুঙ্গংগী পুন্সিগী অশেংবা মশক খঙনবা অমসুং মখোয়গী থবকশিংগী কান্নবা খঙনবা, মখোয়না অহানবা থবক তৌবা হৌরকখিবা খুঙ্গংশিংদা অমুক হন্না চৎনবা মহাক্না ফম্নাইবশিং পুক্নিং থৌগৎপা থবক অমগী মতাংদশু প্রধান মন্ত্রী শ্রী নরেন্দ্র মোদীনা মীয়ামদা ফোঙদোকখি। মহাক্না হায়খি লৈবাক ঙাকপদা মহাক্কী থবক অসিদা অকনবা ৱাহৈশিং নত্ত্রগা চৈরাকশিং শীজিন্নদনা মহাক্কী কাংবু পুক্নিং থৌগৎপা অমসুং লমজিংবা য়াওরি।

“মশিং য়ামদবা সরকার, অচৌবা লৈঙাক” গী মতাংদা হংবদা, প্রধান মন্ত্রী শ্রী নরেন্দ্র মোদীনা হায়খি মসি মিনিস্তরশিং নত্ত্রগা সরকারগী থবক তৌবা মীওইশিং মশিং হন্থহনবা নত্তে, মসিনা থবকশিং মওং -মরিল তানা পাংথোক্নবা অমসুং ফম্নাইবশিংগী পোৎলুমশিং হন্থহন্নবদা মীৎয়েং চঙলি। মীয়ামগী খুদোংচাদবশিং কোকহন্নবা চাউরাক্না শুকশোই শোইদনা ইনগদবা নিয়ম ৪০,০০০ রোম মুৎথৎলে। অরিবা আইন ১,৫০০ রোম মুৎথৎলে অমসুং ক্রিমিনেল লোশিং অমুক হন্না শেমদোক্লে। মসিগী পান্দমদি লৈবাক ঙাকপা অসি লাইথোকহনবা অমসুং মসি হেন্না ফজনা থবক পাংথোকহনবনি অমসুং হায়রিবা থবকশিং অসি হৌজিক মাইপাক্না পায়খৎলে। ইন্দিয়া স্তেক ইনিসিয়েতিপকী মতাংদা, প্রধান মন্ত্রী শ্রী নরেন্দ্র মোদীনা হায়খি য়ু.পি.আই, ই-কে.ৱাই.সি অমসুং আধারগুম্বা ভারতকী দিজিতেলগী থবকশিংনা অচৌবা অওনবশিং পুরক্লে। হায়রিবা তেক্নোলোজিশিং অসিনা লৌমীশিংগী একাউন্তশিংদা হকথেংননা শেন হাপচিনবা ঙমহল্লে, শেঞ্জা-থুমজা মুৎথৎলে অমসুং ফন্দশিং হুরানবদগী কনবা ঙম্লে। ঙসিগী তেক্নোলোজিনা লমজিংবা চহিচা অসিদা মীয়ামদা তেক্নোলোজিগী কান্নবা ফংহনবা ভারতকী তৌবা ঙম্বা উৎতুনা, য়ু.পি.আই অসি মালেমগী অঙকপা অমা ওইরে। মহাক্না তাইৱানদা চৎপা মতমদা, অৱাংবা থাক্কী লুচিংবশিংনা মহাক অঙকপা পোকহনখি। মসিগা মান্নবা থাকশিংদা থবক তৌনবা ভারতকী নহারোলশিংনা হোৎনগদবনি। ভারতকী মরমদা অরিবা চৎনদ্রবা ৱাখল্লোন লৈরিবা, তাইৱানগী ইন্তরপ্রেতর অমগা ৱারি শানখিবগী থৌদোক অমশু প্রধান মন্ত্রী শ্রী নরেন্দ্র মোদীনা ফোঙদোকখি। ফাগি ওইনা প্রধান মন্ত্রী শ্রী নরেন্দ্র মোদীনা হায়খি মদুদি থায়না মমাংঙদা ভারত্ত লিন পুবশিং লৈরমখি, ঙসিগী ভারত তেক্নোলোজি শীজিন্নরে, অঙাং খুদিংমক কম্পুতর মাউস শীজিন্নবদা খুৎলোয়রে। লৈবাক অসিগী তেক্নোলোজিশিং চাউখৎপদা ভারতকী মপাঙ্গল লৈরে অমসুং অনৌবা থবকশিং পায়খৎপদা মতেং পাংনবা সরকারনা তোখায়বা ফন্দশিং শেম্লে। নহারোলশিংনা খুদোংথিবা মায়োক্নবা ঙমগদবনি অমসুং করিগুম্বা মখোয়না মাইথিরবশু মখোয় মতেং পাংগনি।

মালেম্না ভারত্ত য়েংলিবা মীৎয়েং ফগৎলকপগী মতাংদা খন্নবদা, প্রধান মন্ত্রী শ্রী নরেন্দ্র মোদীনা হায়খি মসি মহাক খক্তগী মাইপাকপা নত্তে, ভারতমচা খুদিংমক্কি অপুনবা থবকশিংগী মাইপাকপনি। মপান লৈবাকশিংদা চৎলিবা ভারতমচা খুদিংমক লৈবাক অসিগী এম্বেসেদর অমা ওইনা থবক তৌরি, লৈবাক অসিগী মিংচৎ হেনগৎহল্লি। মালেম শীনবা থুংনা লৈরিবা ভারতমচাশিংগা উন্নবা অমসুং মখোয়গী মপাঙ্গল শীজিন্ননবা নিতি অয়োগনা পান্দম অমা থম্লি। মহাক্না চীফ মিনিস্তর ওইদ্রিঙৈদা লৈবাক কয়াদা চৎখি অমসুং মপান লৈবাকশিংদা লৈরিবা ভারতমচাশিংগী তৌবা ঙম্বশিং মহাক্না খঙখি। মসি খঙবা অসিনা মালেমদা ভারতকী মিংচৎ হেন্না ফগৎলকখি। ভারতমচাশিংনা ফত্তবা থবকশিং পাংথোকপগী চাং য়াম্না নেম্বা, অৱাংবা থাক্কী মহৈ-মশিং তম্বা অমসুং ভারতমচাশিংনা আইন ঙাক্না চৎপা অসিনা মালেমগী অফবা মীৎয়েং অমা য়েংলকপদা মতেং পাংখি। অপুনবগী পাঙ্গল শীজিন্নদুনা, অফবা মমি অমা লৈহন্দুনা অমসুং অফবা নেতৱার্কশিং অমসুং মরীশিং শেমগৎপদা মীৎয়েং থমদুনা ওন্ত্রাপ্রেনিউয়রশিংনা থবক অসিদগী তমগদবনি।

প্রধান মন্ত্রী শ্রী নরেন্দ্র মোদীনা হায়খি ওন্ত্রাপ্রেনিউয়রশি অমসুং রাজনিতি অনিমক্ত চাংদম্নবা য়াম্না মরুওই। মীয়াম্না খনবা সরকার অমদা অমসুং লৈবাক অমদা ইকায়বা পীবা ওইনা, ২০০৫ দা অমেরিকা সরকারনা মহাক ভিসা পীখিদে। ভারতমচাশিংদা ভিসা পীনবা মালেমগী লৈবাকশিংনা ঙাইনবা তুংলমচৎ অমা শেমগৎনবা মহাক্না মঙ মঙখি অমসুং ঙসিদি, ২০২৫ দা, মহাক্কী মঙলান মঙফাওনরে। ভারতকী নহারোলশিং অমসুং মীচম মীয়ামগী অনিংবশিং অমসুং হন্দক মহাক্না কুৱেত্ত চৎলুবগী খুদম অমা প্রধান মন্ত্রী শ্রী নরেন্দ্র মোদীনা শরুক য়াখি। মহাক্না হায়খি মহাক্কী জিলাদা ইন্তরনেসনেল এয়রপোর্ত অমা শেমগৎনবা মঙ মঙলিবা শিন্মী অমগা মহাক্কা ৱারি শানখি। অসিগুম্বা মঙলানশিং অসিনা ২০৪৭ দা ভারত চাউখৎলবা লৈবাক অমা ওইহনবা ঙমগনি। লৈবাক অসি চাউখৎহনবদা ভারতকী নহারোলশিংগী থৌনা অমসুং মঙলান অসি য়াম্না মরুওই।

প্রধান মন্ত্রী শ্রী নরেন্দ্র মোদীনা হায়খি শান্তিগীদমক লেপ্তনা লাউবদগী মালেমদা ভারতকী থাজবা অমসুং মিংচৎ হেনগৎলকপনি। ভারতনা ময়াইদা লৈবা নত্তে, অদুবু শান্তিদা অচেৎপা থাজবা থম্লি অমসুং মসিগী ফিরেপ অসি রুসিয়া, য়ুক্রেন, ইরান, পেলেস্তাইন অমসুং ইজরেল য়াওনা মরী লৈনবা লৈবাকশিংদা পাউ ফাওনরি। ভারতমচাশিং লৈবাক অসিদা পুরকপা অমকসুং কোবিদ-১৯ লাইচৎ মনুংদা য়ুম্লোন্নরিবা লৈবাকশিংদগী ভারতমচাশিং পুরকপা য়াওনা অৱাবা মতমদা ভারতনা থবক কয়া থৱায় য়াওনা পায়খৎখি। লৈবাক অসিগী মীয়ামদা ভারতনা হায়দোকখিবা ৱা ঙাকপা অদু উৎতুনা, মীয়াম লৈবাক অসিদা পুরক্নবা ইন্দিয়ান এয়র ফোর্স পর্সোনেলশিংনা মশানা য়ানা খুদোংথিবা মায়োক্নখি। নেপালগী য়ুহা হাবগী থৌদোক্ত মী কনবা অমসুং ভারতমচাশিং লৈবাক অসিদা পুরকখিবা ভারতকী থবকশিং অদু অসিগুম্বা মীওইবগী পুন্সি কনবা থবকশিংদা তেক্সশিংগী মগুন খঙখিবা দোক্তর অমনা থাগৎপগী থৌদোক অমা প্রধান মন্ত্রী শ্রী নরেন্দ্র মোদীনা মীয়ামদা শরুক য়াখি। প্রধান মন্ত্রী শ্রী নরেন্দ্র মোদীনা হায়খি মদুদি মালেমগী লৈবাকশিংদা মীয়াম মতেং পাংবা অসিনা অফবা ৱাখল অমা পোকহল্লে। ইস্লামগী লৈবাক অমা ওইরিবা অবু ধাবীদা লাইশঙ অমা শানবা হায়জবদা য়ারকপা অসি, মালেমগী লৈবাকশিংনা ভারত্ত থম্লিবা ইকায়খুম্নবা অমসুং থাজবা অদুগী মমি তাবনি। থবক অসিনা ভারতমচা মিল্লিয়ন কয়া হরাওহনখি। মালেম শীনবা থুংনা লৈরিবা লৈবাক অসিগী মীয়াম মতেং পাংনবা অমসুং শান্তি পুরক্নবা ভারতকী থাজবা অসি লেংদ্রবনি অমসুং লৈবাক অসিগী তৌবা ঙম্বা মখা তানা মালেমগী ফম্বাক্ত হেনগৎলক্কনি। মহাক্না পামজবা চীঞ্জাক্কী মতাংদা ফোঙদোক্লদুনা, প্রধান মন্ত্রী শ্রী নরেন্দ্র মোদীনা হায়খি মহাক চাবদা ঙাউবা মীওই অমা নত্তে অমসুং তোঙান-তোঙানবা লৈবাকশিংদা মঙোন্দা পীজরকপশিং মহাক্না পাম্না চাখি। মহাক্না দলগী থবক তৌরিঙৈ মনুংদা, ভারত শীনবা থুংবগী খ্বাইদগী হাওবা রেস্তুরান্তশিং অমসুং মথেলশিং ফজনা খঙবা লৈখিদ্রবা শ্রী অরুন জেতলিগা য়াম্না তোইনা তানখি।

প্রধান মন্ত্রী শ্রী নরেন্দ্র মোদীনা হায়খি চহি খর অসিদা মহাক্কী ফিবম হোংলকখি অমসুং থৌদাংশিংশু হোংলে। মহাক হান্নগী মীওই অদু ওইরি অমসুং খেন্নবা অমতা ফাওখিদে অমসুং মরুওইবা গুনদি মহাক হোংদবা অদুনি। ফম অমসুং থৌদাংশিংদা অহোংবা পুরকপা অসিনা মহাক্কী মরুওইবা গুনশিং অমসুং ফিদমশিংদা শোকহন্দে। মহাক্কী ফমদা অহোংবা পুরকপা অসিনা অকায়বা থোকহন্দে অমসুং লেংদনা লৈরি, মহাক্কী থবক পাংথোক্নবা চপ মান্নবা মীনুংশি অমসুং কৎথোকপা লেংদনা লৈরি।

প্রধান মন্ত্রী শ্রী নরেন্দ্র মোদীনা হায়খি মহাক্না মীয়ামদা ৱা ঙাংবদা, মশামক্না থেংনখিবা থৌদোকশিংনা মরুওইবা থৌদাং অমা লৌরি। মীয়াম্না মখোয় মশাগী থৌদোকশিং, মখোয়গী ৱাহৈশিং, অনিংবশিং অমসুং পাউদম্বা মতমদা মহৌশানা কান্নবা ওই। মহাক্না নহা ওইরিঙৈগী থৌদোকশিং হায়বদি রেলৱে স্তেসনশিংদা চা য়োনখিবা অমসুং তোঙান-তোঙানবা লমদমশিংগী মীওইশিংগা ৱারি শানখিবা কয়া অসিনা মহাক গুজরাতমচা অমা ওইজরবশু, মহাক হিন্দী ফজনা ঙাংবা ঙমখি। নোল্লুকপা অমসুং কনাগুম্বা অমগী হৌরকফমগা শম্নবা অসিনা নিংথিনা পাউ ফাওনবদা মতেং পাংই। ৱা ফজনা ঙাংবা ঙম্বগী গুন অসি থম্মোয়দগী ঙাংবা অমসুং অশেংবা থৌদোকশিং লিবগী মখা পোল্লি।

প্রধান মন্ত্রী শ্রী নরেন্দ্র মোদীনা হায়খি ভারত্ত স্তার্দঅপকী থবকশিং অওনবা লাক্লে। ভারতকী নহারোলশিংগী থৌনাদা থাজবা থম্লি। অহানবা স্তার্দঅপ কনফরেন্সতা কোলকাতাদগী নুপী অমনা স্তার্দঅপশিং অসি মাইথিনবগী লম্বী অমনি হায়না হান্না খল্লম্বা ৱাখল্লোন অমা ফোঙদোকখিবগী ৱারি অমা প্রধান মন্ত্রীনা ফোঙদোকখি। প্রধান মন্ত্রীনা হায়খি ঙসিদি স্তার্দঅপশিং মিংচৎ লৈরে। অচৌবা মঙলানশিংনা ভারত্ত ওন্ত্রাপ্রেনিউয়রশিপকী থৌনা লমজিংলি অমসুং থবকশিং থিবগী মহুত্ত মখোয় মশাগী থবকশিং পায়খৎনবা হৌজিক নহারোলশিংনা হেন্না পুক্নিং চঙলে।

সরকারগী অহানবা, অনিশুবা অমসুং অহুমশুবা তার্মশিংগী খেন্নবশিংগী মতাংদা হংবদা, প্রধান মন্ত্রী শ্রী নরেন্দ্র মোদীনা হায়খি ভারত চাউখৎনবগীদমক মহাক্কী পান্দমশিং লৈরি। মহাক্কী অহানবা তার্মদা, মহাক অমসুং মীয়াম্না অমনা অমবু মশক খঙনবা হোৎনখি অমসুং মহাক দিল্লি মশক খঙনবশু হোৎনখি। মহাক্কী অহানবা অমসুং অনিশুবা তার্মদা, মহাক্না হৌখিবা মতমগী মাইপাকপশিং চাংদম্নখি অমসুং অনৌবা পান্দমশিং থমখি। অদুবু মহাক্কী অহুমশুবা তার্মদা, মহাক্কী মীৎয়েং পাকথোক-চাউথোক্লে। ২০৪৭ দা চাউখৎলবা ভারত অমা শেমগৎনবা নাখৈ শেংবা পান্দম অমগা লোয়ননা মহাক্কী মঙলানশিং অমসুং অনিংবশিং পাকথোক-চাউথোক্লে।

তঙাইফদবা খুদোংচাবশিং হায়বদি তোইলেতশিং, ইলেক্ত্রিসিতি অমসুং তোতি ঈশিং মীয়ামদা চাদা ১০০ ফংহন্নবা মীৎয়েং চঙলে। হায়রিবশিং ঙসি খুদোংচাবশিং নত্তে মখোয়গী ফংফম থোকপশিংনি। মীচং-মীখায় নাইদনা ভারতমচা খুদিংমক্না কান্নবশিং ফংলবা মতমদা অশেংবা খুন্নাইগী অচুম্বা অমসুং সেকুলারিজম ফংবা ঙমগনি। মহাক ইথিল পীরিবা শাফু অসি “এস্পিরেসনেল ইন্দিয়া” অনি অমসুং ২০৪৭ ফাওবদা শিংথানিঙাই ওইবা মাইপাকপশিং পুরক্নবা মহাক্কী হৌজিক্কী মীৎয়েং অসি তুংদা য়েংলি। অনিংবা অমসুং ৱাশক হান্নদগী হেন্না ৱাংবা ৱাখল্লোন অমগা লোয়ননা মহাক্কী অহুমশুবা তার্ম অসি হান্নদগী তোঙাল্লে। তুংগী মীরোলশিংগী লুচিংবশিংগী শেম-শাবা দরকার ওই। মহাক্না গুজরাতকী চীফ মিনিস্তর ওইরিঙৈদা, মথং চহি ২০ গী মতিং লৈবা লুচিংবশিং ত্রেনিং পীনবা মহাক্না মীৎয়েং চঙখি। তুংগী অৱাবশিং থেংনবা ঙম্নবা কমদৌনা মহাক্না মহাক্কী কাংবু শেম-শাবগে হায়বা অসিনা মহাক্কী মাইপাকপা ওল্লি। তুংগীদমক মপাঙ্গল কনবা অমসুং থবক ঙম্বা লুচিংবা অমা শেমগৎনবা নহারোলশিং শেমগৎনবা মহাক্না অচেৎপা ফিরেপ লৌরে।

প্রধান মন্ত্রী শ্রী নরেন্দ্র মোদীনা হায়খি কেন্দিদেত অমা ওইনবা অমসুং মাইপাক্লবা রাজনিতিৱালা অমা ওইনবা মহৈগী থাকশিংদা খেন্নবা লৈরি। কেন্দিদেত ওইনবগী চঙদ্রবা য়াদ্রবা অসি খর খক্তনি অদুবু মাইপাক্লবা রাজনিতিৱালা অমা ওইনবগী তোপ-তোপ্পা গুনশিং দরকার ওই। রাজনিতিৱালা অমদা লেপ্তনা য়েংশিল্লি অমসুং অশোইবা খোঙথাং অমনা চহি কয়া কন্না হোৎনরকপা অদু অরেম্বা তাহল্লি। ২৪/৭ ৱাখল তাবা দরকার ওই অমসুং য়ুনিভর্সিতিশিংগী সর্তিফিকেদশিংদগী কৎথোকপা অমসুং গুনশিং ফংবা ঙম্লোই। অশেংবা রাজনিতিগী মাইপাকপদা লাম্বা লৈতবা হায়দোকখিবা ৱা ঙাকপা অমসুং পুকচেল শেংবা দরকার ওই।

লোইশিল্লকপদা, প্রধান মন্ত্রী শ্রী নরেন্দ্র মোদীনা হায়খি লৈবাক অসিগী নহারোলশিং অমসুং নুপীশিং লুচিংবা ওইবা অমসুং রাজনিতিদা শরুক য়াবা অসি য়াম্না মরুওই। লোকেল গভর্নান্সতা সিত চাদা ৫০ খাক্লিবা অসিগী খুদোংচাবশিং নুপীশিংনা লৌগদবনি অমসুং লেজিসলেতিপ এশেমব্লিশিং অমসুং সংসদকী সিত চাদা ৩৩ খাক্নবা থৌরাং তৌরিবা অসিদা লুচিংবগী থৌদাং লৌনবা মখোয় মশামক থৌরাং তৌগদবনি। নহারোলশিংনা রাজনিতি অসি য়াম্না ফত্তবা মীৎয়েংদা য়েংলোইদবনি অমসুং পান্দম অমগা লোয়ননা মীয়ামগী থবক তৌগদবনি। হৈথোই-শিংথোইবা, পাম্বৈ পুথোকপা ঙম্বা অমসুং লৈবাক অসি চাউখৎনবা কৎথোকপা ঙম্বা লুচিংবশিং দরকার ওই। ঙসিগী নহারোলশিংনা লৈবাক অসি চাউখৎনবা লমজিংদুনা ২০৪৭ দা মরুওইবা ফমশিং পায়গনি। নহারোলশিং রাজনিতিদা শরুক য়ানবা মহাক্না হায়রিবা অসি অকক্নবা রাজনিতি দল অমা খক্তদা নত্তে, মসিনা রাজনিতি দল খুদিংমক্ত অনৌবা মীৎয়েং অমসুং থৌনা পীনবা পান্দম থম্লি। লৈবাক অসি চাউখৎহনবা অমসুধং ভারতকী অফবা তুংলমচৎ অমা শেমগৎনবা নহা ওইরিবা লুচিংবশিং দরকার ওইরে।

An enjoyable conversation with @nikhilkamathcio, covering various subjects. Do watch… https://t.co/5Q2RltbnRW

— Narendra Modi (@narendramodi) January 10, 2025

****