পি এম ইণ্ডিয়া

প্ৰধানমন্ত্ৰী শ্ৰী নৰেন্দ্ৰ মোদীয়ে আজি ভিডিঅ’ কনফাৰেন্সিঙৰ জৰিয়তে বিভিন্ন ৰে’ল প্ৰকল্পৰ উদ্বোধন আৰু আধাৰশিলা স্থাপন কৰে। প্ৰধানমন্ত্ৰীয়ে নতুন জম্মু ৰে’ল বিভাগৰ শুভাৰম্ভ কৰে। পূব উপকূলীয় ৰে’লৱেৰ ৰায়গাডা ৰে’লৱে ডিভিজন ভৱনৰ আধাৰশিলা স্থাপন কৰাৰ লগতে তেলেংগানাত চাৰ্লাপল্লী নিউ টাৰ্মিনেল ষ্টেচনো উদ্বোধন কৰে।

শ্ৰী গুৰু গোবিন্দ সিংজী জয়ন্তী উপলক্ষে শুভেচ্ছা জ্ঞাপন কৰি প্ৰধানমন্ত্ৰীয়ে দৃঢ়তাৰে কয় যে তেওঁৰ শিক্ষা আৰু জীৱনে এক শক্তিশালী আৰু সমৃদ্ধিশালী দেশৰ দৃষ্টিভংগীক অনুপ্ৰাণিত কৰে। সংযোগৰ ক্ষেত্ৰত ভাৰতৰ দ্ৰুতগতিত অগ্ৰগতিৰ প্ৰশংসা কৰি শ্ৰী মোদীয়ে কয় যে ২০২৫ চনৰ আৰম্ভণিৰ পৰাই ভাৰতে মেট্ৰ’ ৰে’ল নেটৱৰ্ক ১০০০ কিলোমিটাৰতকৈও অধিক সম্প্ৰসাৰণ কৰি নিজৰ পদক্ষেপ ত্বৰান্বিত কৰি আহিছে। তেওঁ কালি দিল্লী মেট্ৰ’ প্ৰকল্প আৰম্ভ কৰাৰ লগতে দিল্লী-এনচিআৰত শেহতীয়াকৈ নমো ভাৰত ৰে’ল উদ্বোধনৰ কথা উল্লেখ কৰে। শ্ৰী মোদীয়ে লগতে কয় যে আজিৰ এই অনুষ্ঠানটোৱে এই কথাটোৰ আৰু এটা প্ৰমাণ কৰিছে যে সমগ্ৰ দেশে একেলগে আগবাঢ়িছে, খোজৰ লগত খোজ মিলাইছে, কিয়নো জম্মু-কাশ্মীৰ, ওড়িশা আৰু তেলেংগানাত আৰম্ভ কৰা প্ৰকল্পসমূহে উত্তৰ, পূব আৰু দেশৰ দক্ষিণাঞ্চলৰ বাবে আধুনিক সংযোগৰ এক বৃহৎ উত্থান চিহ্নিত কৰিছে। তেওঁ পুনৰ কয় যে ‘সবকা সাথ, সবকা বিকাশ’ৰ মন্ত্ৰই উন্নত ভাৰতৰ দৃষ্টিভংগীক বাস্তৱত পৰিণত কৰাত সহায় কৰিছে। তেওঁ এই ৰাজ্যসমূহৰ জনসাধাৰণ আৰু ভাৰতৰ সকলো নাগৰিকক এই উন্নয়নৰ বাবে অভিনন্দন জ্ঞাপন কৰে।

প্ৰধানমন্ত্ৰীয়ে দেশত ডেডিকেটেড ফ্ৰেইট কৰিডৰৰ দৰে আধুনিক ৰে’ল নেটৱৰ্কৰ কাম দ্ৰুতগতিত আগবাঢ়িছে বুলি গুৰুত্ব আৰোপ কৰে।এই বিশেষ কৰিডৰসমূহে নিয়মীয়া ট্ৰেকত চাপ হ্ৰাস কৰাৰ লগতে দ্ৰুতবেগী ৰে’লৰ বাবে অধিক সুযোগ সৃষ্টি কৰিব বুলিও কয়। শ্ৰী মোদীয়ে দৃঢ়তাৰে কয় যে মেড ইন ইণ্ডিয়াৰ প্ৰচাৰৰ লগে লগে ৰে’লৱেৰ এক ৰূপান্তৰ ঘটিছে। তেওঁ কয় যে মেট্ৰ’ আৰু ৰে’লৱেৰ বাবে নতুন সুবিধাসম্পন্ন ডবা নিৰ্মাণ কৰা হৈছে। ষ্টেচনসমূহো পুনৰ উন্নয়ন সাধন কৰা হৈছে, ষ্টেচনসমূহত সৌৰ পেনেল স্থাপন কৰা হৈছে আৰু ৰে’লৱে ষ্টেচনসমূহত ‘এক ষ্টেচন, এক প্ৰডাক্ট’ বিপনী স্থাপন কৰা হৈছে। এই সকলোবোৰ পদক্ষেপে ৰে’ল খণ্ডত লাখ লাখ নতুন কৰ্মসংস্থাপনৰ সুযোগ সৃষ্টি কৰিছে। ‘যোৱা এটা দশকত লাখ লাখ যুৱকে ৰে’লৱেত স্থায়ী চৰকাৰী চাকৰি লাভ কৰিছে। নতুন ৰে’ল ডবা উৎপাদন কৰা কাৰখানাসমূহত কেঁচামালৰ চাহিদাই অন্যান্য খণ্ডতো অধিক চাকৰিৰ সুযোগৰ সূচনা কৰে”, শ্ৰী মোদীয়ে লগতে কয়।

প্ৰধানমন্ত্ৰীয়ে কয় যে ৰে’লৱেৰ সৈতে জড়িত বিশেষ দক্ষতাৰ প্ৰতি লক্ষ্য ৰাখি দেশৰ প্ৰথমখন গতি-শক্তি বিশ্ববিদ্যালয়ো স্থাপন কৰা হৈছে। ৰে’লৱে নেটৱৰ্ক সম্প্ৰসাৰণৰ লগে লগে নতুন বিভাগ আৰু মুখ্য কাৰ্যালয় স্থাপন কৰা হৈছে, যাৰ ফলত জম্মু, কাশ্মীৰ, হিমাচল প্ৰদেশ, পঞ্জাৱ, লেহ-লাডাখৰ দৰে অঞ্চল উপকৃত হৈছে। তেওঁ উল্লেখ কৰে যে উধামপুৰ-শ্ৰীনগৰ-বাৰামুল্লা ৰে’ল লাইনৰ জৰিয়তে জম্মু-কাশ্মীৰে ৰে’ল আন্তঃগাঁথনিৰ ক্ষেত্ৰত নতুন মাইলৰ খুঁটি অৰ্জন কৰিছে, যিটো আজি সমগ্ৰ দেশতে আলোচনা কৰা হৈছে। শ্ৰী মোদীয়ে কয় যে বিশ্বৰ সৰ্বোচ্চ ৰে’লৱে তোৰণ দলং চেনাব দলং নিৰ্মাণ সম্পূৰ্ণ হোৱাৰ লগে লগে লেহ-লাডাখৰ জনসাধাৰণক সুবিধা প্ৰদান কৰি অঞ্চলটোক ভাৰতৰ বাকী অংশৰ সৈতে সংযোগ স্থাপনৰ ক্ষেত্ৰত গুৰুত্বপূৰ্ণ ভূমিকা গ্ৰহণ কৰিব।

শ্ৰী মোদীয়ে মন্তব্য কৰে যে দেশৰ প্ৰথমখন কেবল ভিত্তিক ৰে’ল দলং অঞ্জি খাদ দলংখনো এই প্ৰকল্পৰ অংশ। তেওঁ কয় যে চেনাব দলং আৰু অঞ্জি খাদ দলং আশ্বৰ্যকৰ অভিযান্ত্ৰিকতাৰ অতুলনীয় উদাহৰণ যিয়ে অঞ্চলটোত অৰ্থনৈতিক প্ৰগতিৰ দিশত আগুৱাই লৈ যায় আৰু সমৃদ্ধিৰ প্ৰসাৰ ঘটায়।

প্ৰধানমন্ত্ৰীয়ে আলোকপাত কৰে যে ওড়িশা প্ৰচুৰ প্ৰাকৃতিক সম্পদ আৰু বৃহৎ উপকূলৰ দ্বাৰা ধন্য, আৰু আন্তঃৰাষ্ট্ৰীয় বাণিজ্যৰ বাবে উল্লেখযোগ্য সম্ভাৱনা আছে। তেওঁ কয় যে ৰাজ্যখনত ৭০ হাজাৰ কোটিতকৈ অধিক মূল্যৰ কেইবাটাও ৰে’ল প্ৰকল্প চলি আছে। ৰাজ্যখনত লগতে ৭টা গতি শক্তি কাৰ্গো টাৰ্মিনেল স্থাপন কৰা হৈছে, যিয়ে বাণিজ্য আৰু উদ্যোগক উন্নীত কৰিছে। শ্ৰী মোদীয়ে কয় যে আজি ওড়িশাত ৰায়গড়া ৰে’লৱে বিভাগৰ আধাৰশিলা স্থাপন কৰা হৈছে, যিয়ে ওড়িশা বিশেষকৈ দক্ষিণ ওড়িশাত পৰ্যটন, ব্যৱসায় আৰু নিয়োগক প্ৰসাৰিত কৰা ৰাজ্যখনৰ ৰে’ল আন্তঃগাঁথনি শক্তিশালী কৰিব, য’ত জনজাতীয় পৰিয়ালৰ সংখ্যা অধিক।

আজি তেলেংগানাত চাৰ্লাপল্লী নিউ টাৰ্মিনেল ষ্টেচন উদ্বোধন কৰি প্ৰধানমন্ত্ৰীয়ে আউটাৰ ৰিং ৰোডৰ সৈতে সংযোগ কৰি আঞ্চলিক উন্নয়ন ত্বৰান্বিত কৰাৰ সম্ভাৱনাৰ ওপৰত আলোকপাত কৰে। তেওঁ কয়, ‘আউটাৰ ৰিং ৰোডৰ সৈতে সংযুক্ত এই ষ্টেচনে অঞ্চলটোৰ উন্নয়নত যথেষ্ট উন্নতি সাধন কৰিব। শ্ৰী মোদীয়ে ষ্টেচনৰ প্লেটফৰ্ম, লিফ্ট, এস্কেলেটৰ, সৌৰশক্তিচালিত কাৰ্য্যকলাপকে ধৰি আধুনিক সুবিধাসমূহৰ ওপৰতো আলোকপাত কৰি কয়, “এয়া বহনক্ষম আন্তঃগাঁথনি সৃষ্টিৰ ক্ষেত্ৰত এক পদক্ষেপ।” তেওঁ লগতে আলোকপাত কৰে যে এই নতুন টাৰ্মিনেলে ছেকেণ্ডৰাবাদ, হায়দৰাবাদ আৰু কাচিগুড়াৰ বৰ্তমানৰ ষ্টেচনসমূহৰ ওপৰত হেঁচা কম কৰিব, যাৰ ফলত জনসাধাৰণৰ বাবে যাত্ৰা অধিক সুবিধাজনক হ’ব।

প্ৰধানমন্ত্ৰীয়ে এই কথাত গুৰুত্ব আৰোপ কৰে যে এনে প্ৰকল্পই কেৱল জীৱন-যাপনৰ সহজতা বৃদ্ধি কৰাই নহয়, ভাৰতৰ বহল আন্তঃগাঁথনিৰ লক্ষ্যৰ সৈতে সংগতি ৰাখি ব্যৱসায়ৰ সহজতাও প্ৰসাৰিত কৰে। শ্ৰী মোদীয়ে উল্লেখ কৰে যে ভাৰতত বৰ্তমান এক্সপ্ৰেছৱে, জলপথ আৰু মেট্ৰ’ নেটৱৰ্ককে ধৰি এক বৃহৎ আন্তঃগাঁথনি সম্প্ৰসাৰণ চলি আছে। তেওঁ কয় যে ২০১৪ চনত বিমানবন্দৰৰ সংখ্যা ৭৪ৰ পৰা আজি ১৫০টাতকৈও অধিক হৈছে আৰু সমগ্ৰ দেশৰ ৫খন চহৰৰ পৰা ২১খন চহৰলৈ মেট্ৰ’ সেৱা সম্প্ৰসাৰিত হৈছে। তেওঁ কয়, “এই প্ৰকল্পসমূহ এখন উন্নত ভাৰতৰ দিশত বৃহত্তৰ ৰোডমেপৰ অংশ, যিটো এতিয়া এই দেশৰ প্ৰতিজন নাগৰিকৰ বাবে এক অভিযান।”

ভাৰতৰ বিকাশৰ ওপৰত আস্থা প্ৰকাশ কৰি প্ৰধানমন্ত্ৰীয়ে কয়, “মই নিশ্চিত যে একেলগে আমি এই বিকাশ আৰু অধিক ত্বৰান্বিত কৰিম।” এই মাইলৰ খুঁটিসমূহৰ বাবে ভাৰতৰ নাগৰিকসকলক অভিনন্দন জনোৱাৰ লগতে ৰাষ্ট্ৰ নিৰ্মাণৰ প্ৰতি চৰকাৰৰ দায়বদ্ধতাক পুনৰ দৃঢ়তাৰে কয়।

এই উপলক্ষে অনুষ্ঠানত কেন্দ্ৰীয় ৰে’ল, তথ্য আৰু সম্প্ৰচাৰ, ইলেক্ট্ৰনিকছ আৰু তথ্য প্ৰযুক্তি মন্ত্ৰী শ্ৰী অশ্বিনী বৈষ্ণৱ, কেন্দ্ৰীয় মন্ত্ৰী শ্ৰী জি কিষাণ ৰেড্ডী, কেন্দ্ৰীয় বিজ্ঞান আৰু প্ৰযুক্তি, পৃথিৱী বিজ্ঞান বিভাগৰ ৰাজ্যিক মন্ত্ৰী আৰু পিএমঅ’ৰ ৰাজ্যিক মন্ত্ৰী, ড° জিতেন্দ্ৰ সিং, কেন্দ্ৰীয় মন্ত্ৰী শ্ৰী ভি সোমান্না, ৰাজ্যিক মন্ত্ৰী শ্ৰী ৰৱনীত সিং বিট্টু, কেন্দ্ৰীয় মন্ত্ৰী বন্দী সঞ্জয় কুমাৰ, ওড়িশাৰ ৰাজ্যপাল শ্ৰী জিষ্ণু দেৱ তেলেংগানাৰ ৰাজ্যপাল বৰ্মা, জম্মু-কাশ্মীৰৰ উপ-ৰাজ্যপাল শ্ৰী হৰি বাবু কম্ভমপতি, জম্মু-কাশ্মীৰৰ মুখ্যমন্ত্ৰী শ্ৰী মনোজ সিনহা, তেলেংগানাৰ মুখ্যমন্ত্ৰী শ্ৰী ওমৰ আব্দুল্লা, তেলেংগানাৰ মুখ্যমন্ত্ৰী শ্ৰী এ ৰেৱন্ত ৰেড্ডী আৰু ওড়িশাৰ মুখ্যমন্ত্ৰী শ্ৰী মোহন চৰণ মাঝিকে ধৰি অন্যান্য বিশিষ্ট ব্যক্তিসকল উপস্থিত থাকে।

***

MJPS/VJ/RT/DB