ভারতকী প্রধানমন্ত্রী

ভারত মাতা কী জয়!

ভারত মাতা কী জয়!

কেন্দ্রগী মন্ত্রীমন্দলগী ঐগী মরুপশিং, অন্নর্পুনা দেবী জি, সাবিত্রি থাকুর জি, সুকান্তো মজুমদার জি, অতোপ্পা শক্নাইরবশিং, লৈবাক অসিগী কাচিন-কোয়া খুদিংমক্তগী লাকপা অতিথিশিং অমসুং নুংশিরবা অঙাংশিং,

ঙসি ঐখোয় অহুমশুবা বীর বাল দিবস থৌরম শরুক য়ারি। সাহেবজাদেশিংগী লাম্বা লৈতবা থৌনা অমসুং কৎথোকপা নিংশিংনবা চহি অহুমগী মমাঙদা ঐখোয়গী সরকারনা বীর বাল দিবস পাংথোকপা হৌখিবনি। নুমিৎ অসি ঙসি ভারতমচা করোর কয়া লৈবাক্কী থবক তৌনবা ইথিল পীনবা কুহ্মৈ অমা ওইরে। ঙসিগী নুমিৎ অসিনা অঙাং কয়া অমসুং মহৈরোয় কয়া মাইথিবা পীবা ঙমদবা থৌনাগা লোয়ননা ইথিল পীগনি। থৌনা ফবা, ইন্নোবেসন, সাইন্স অমসুং তেক্নোলোজি, শান্নবা অমসুং কলাগী হিরমশিংদা ঙসি অঙাং ১৭ বীর বাল মনাশিং পীরে। ঙসিগী মনা ফংলবা অঙাংশিং অসি তোঙান-তোঙানবা হিরমশিংদা ভারতকী অঙাংশিং অমসুং নহারোলশিংগী তৌবা ঙম্বা অদুগী খুদমনি। থৌরম অসিদা ঐনা গুরুশিং অমসুং থৌনা ফরবা সাহেবজাদেশিংদা কোক নোঞ্জরি অমসুং মনা ফংলবশিং অমসুং মখোয়গী ইমুং-মনুংগী মীওইশিংদা লৈবাক অসিগী মহুৎশীন্দুনা থাগৎপা ফোঙদোকচরি অমসুং য়াইফ-পাউজেল পীজরি।

মরুপশিং,

ঙসি, মীয়ামদা ৱা ঙংবা অসিদা, থৌনা ফরবা সাহেবজাদেশিংনা মখোয়গী থৱায় কৎখিবগী থৌদোকশিং অদু ঐনা নিংশিংগনি। থৌনা ফরবা সাহেবজাদেশিংগী কৎথোকপা অদু ঙসিগী নহারোলশিংনা খঙবা য়াম্না তঙাইফদে অমসুং মরম অদুনা, হায়রিবা থৌদোকশিং অদু নিংশিংবশু য়াম্না মরুওই। চহি ৩২৫ গী মমাঙদা দিশেম্বর ২৬ তা থৌনা ফরবা সাহেবজাদেশিংনা চহি য়াম্না নৌনা মখোয়গী পুন্সি কৎথোকখি। সাহেব জারোৱার সিংহ অমসুং  সাহেব ফাতেহ সিংহ চহি য়াম্না নৌরবশু, মখোয়গী থৌনা মপান নাইদে। সাহেবজাদেশিংনা মুঘল নিংথৌশিংগী মীহৌলাংশিং অমতা য়াখিদে, মীওৎ-মীনৈ কয়া মায়োক্নখি অমসুং ৱাজির খান্না মখোয় চেক্না চনশীন্দুনা থম্নবা য়াথং পীখি অমসুং মখোয়না শিবগী চৈরাক থৌনা ফনা লৌখি। সাহেবজাদেশিংগী থৌনা অসিনা মঙোন্দা গুরু অর্জুন দেব, গুরু তেগ বহাদুর অমসুং গুরু গোবিন্দ সিংহগী থৌনা নিংশিংহল্লে অমসুং মসিগী থৌনা অসি ঐখোয়গী থাজবগী অধ্যাতিক্কী মপাঙ্গল ওইরে। সাহেবজাদেশিংনা মখোয়গী থৱায় কৎনবা ৱারেপ লৌখি অমসুং কৈদৌঙৈদা লাইনিং লম্বীদা শন্তাইনবা তৌখিদে। খুদোংথিবা মতম কয়া থেংনরবশু, লৈবাক অমসুং লৈবাক্কী থবক্তগী হেন্না মরুওইবা অমতা লৈতে হায়বা বীর বাল দিবসনা ঐখোয়দা তাক্লে। লৈবাক্কীদমক পাংথোকপা থবক খুদিংমক থৌনা ফবগী থবক অমনি অমসুং লৈবাক অসিগী অঙাং অমসুং নহারোল খুদিংমক বীর বালক অমনি।

মরুপশিং,

ভারত রিপব্লিক অমা ওইখিবা অমসুং ঐখোয়গী সংবিধান চৎনবা হৌখিবা চহি ৭৫ মপুংফারকপগা লোয়ননা চহি অসিগী বীর বাল দিবস অসি অমুক্ক হেন্না মরুওইরে। ভারত সংবিধান চহি ৭৫ শুরকপা অসিদা, লৈবাক্কী অপুনবগী থবক তৌনবা লৈবাক অসিগী মীওই খুদিংমক থৌনা ফরবা সাহেবজাদেশিংনা ইথিল পীরে। ঙসিগী নুমিৎ অসি সাহেবজাদেশিংগী থৌনা অমসুং কৎথোকপদা শেমখিবনা ভারতকী মপাঙ্গল কল্লবা গনতন্ত্রনা চাউথোকচবা ফাওরি। খুন্নাইদা খ্বাইগী মনিংদা লৈরবা মীওই চিংখৎনবা ঐখোয়গী গনতন্ত্রনা ঐখোয়দা ইথিল পীরি। লৈবাক অসিদা কনাগুম্বা অমতা অপীকপা নত্ত্রগা অচৌবা নত্তে হায়বা সংবিধান্না ঐখোয়দা তম্বীরে। মসিগী ফিদম অসি মীওই খুদিংমক নুংঙাই-য়াইফনা লৈনবা হোৎনখিবা ঐখোয়গী গুরুশিংগী পাউতাকশিংগা মপা চানরে। লৈবাক্কী অচুম্বা ফিদমশিং অমসুং ইন্তিগ্রেতিদা শন্তাইনবা তৌদনবা সাহেবজাদেশিংগী পুন্সিনা ঐখোয়দা তম্বীরে অমসুং সংবিধান্না ভারতকী মনিংতম্বা অমসুং ইন্তেগ্রেতিগী অচুম্বা ফিদমশিং ঙাক্লি। ঐখোয়গী গনতন্ত্রগী মপাঙ্গল অসি গুরুশিংগী পাউতাকশিং, সাহেবজাদেশিংগী কৎথোকপশিং অমসুং লৈবাক অসিগী অপুনবগী লাইৱাদা য়ুম্ফম ওইবনি।

মরুপশিং,

পুৱারিদগী হৌরগা হৌজিক ফাওবদা, নহারোলশিংগী মপাঙ্গলনা মতম পুম্নমক্ত ভারতকী চাউখৎপদা অচৌবা থৌদাং অমা লৌরি। নিংতম্বগী লালদগী ২১শুবা চহিচাগী খোঙজংশিং ফাওবদা, য়াওল ইহৌ খুদিংমক্ত ভারতকী নহারোলশিংনা অচৌবা থৌদাং লৌখি। নহারোলশিংগী শক্তিনা মরম ওইদুনা মালেমনা ভারত্ত থাজবগা লোয়ননা য়েংলি। ঙসি, স্তার্দ-অপশিংদগী সাইন্স, শান্নবদগী ওন্ত্রেপ্রেনিউয়রশিপ ফাওবা, নহারোলশিংগী শক্তিনা অনৌবা য়াওল কয়া পুরক্লে। থৌশিলদা সরকারনা খ্বাইদগী মরুওইনা লৌরিবা অসি নহারোলশিংগী ফিবম ফগৎহনবনি। স্তার্দ-অপকী থবকশিং ওইগেরা, স্পেস ইকোনোমিগী তুংগী ফিবম, শান্নবা অমসুং ফিতনেস সেক্তর, ফিনতেক অমসুং মেনুফেকচরিং ইন্দস্ত্রি, নত্ত্রগা স্কিল দিবলপমেন্ত অমসুং ইন্তর্নশিপ স্কিমশিং ওইগেরা, থৌশিল খুদিংমক্না নহারোলশিংগী ফিবম ফগৎনবা পান্দম থম্লি। লৈবাক অসি চাউখৎনবগা মরী লৈনবা হিরম খুদিংমক, নহারোলশিং অনৌবা খুদোংচাবা কয়া ফংবগা লোয়ননা মখোয়গী হৈথোই-শিংথোইবা অমসুং মশানা মশাবু থাজবা সরকারদগী মতেং ফংলি।

ঐগী নহা ওইরিবা মরুপশিং,

ঙসিগী য়াংনা হোংক্লিবা মালেম অসিদা, অনৌবা দরকার ওইবশিং, থাজবশিং অমসুং তুংগী লম্বী কয়া নৌনা থোক্লক্লি। ঐখোয়গী নহারোলশিং তুংগী শেম-শাবা, মহৌশাদগী লৈরক্লবা সোফৱায়ারদগী এ.আইদা হোংলকপা অমসুং মেছিন লার্নিং হেনগৎলকপা অসি য়াম্না মরুওই। অনৌবা নেসনেল ইজুকেসন পোলিসিগা লোয়ননা অমসুং তম্নবগী অনৌবা অতিয়া অমা হাংদোক্তুনা মসিগীদমক চহি কয়াগী মমাঙদগী লৈবাক অসিনা থৌরাং তৌবা হৌরক্লে। অঙাংশিংগী মরক্ত ইন্নোবেসন পুক্নিং থৌগৎনবা অতল তিনকরিং লেব ১০,০০০ হেন্না লিংখৎলে। লাইরিক তম্বগা লোয়ননা থবক ওইনা পাংথোক্নবগী খুদোংচাবশিং পীনবা, নহারোলশিংগী মরক্ত খুন্নাইগী থবক তৌনবা মথৌ মশক খঙবা হেনগৎহন্নবা ‘মেরা যুব ভারত’ খোঙজংনা পান্দম থম্লি।

ইনাওশিং অমসুং ইচলশিং,

ঙসি, লৈবাক অসিগী অতোপ্পা য়াম্না মরুওইবা অমা লৈরে- হকচাং ফনা লৈবা! লৈবাক অসিগী নহারোশিং মশা ফরবা মতমদা লৈবাক অসি লমজিংবা ঙমগনি। মরম অদুনা ফিত ইন্দিয়া অমসুং খেলো ইন্দিয়া খোঙজংশিংনা নহারোলশিংগী মরক্ত হকচাং ফবা হেনগৎহন্নবা ৱাখল তাবা হেনগৎহন্নবা পান্দম থম্লি। সুপোসিত গ্রাম পঞ্চায়ত অভিয়ান হৌদোকপা অসিনা মচি ওইবা চীঞ্জাক চাবা ৱাৎপা কোকহন্নবা অমসুং বিকসিত ভারত অমগী য়ুম্ফম থোন্নবা খুঙ্গংগী পঞ্চায়তশিংগী মরক্ত চাংদম্নবা পুক্নিং থৌগৎকনি।

মরুপশিং,

বীর বাল দিবসনা ঐখোয়দা অনৌবা ৱারেপশিংগীদমক ইথিল পীরে অমসুং পুক্নিং থৌগৎলে। ঐখোয়গী স্তেন্দার্দ অসি হৌজিক খ্বাইদগী ফবা ওইরে হায়না ঐনা লাল কিলাদা ফোঙদোকখ্রে। মখোয়গী হিরমশিংদা খ্বাইদগী ফজনা থবক তৌনবা নহারোলশিংদা ঐনা হায়জরি। করিগুম্বা ঐখোয়না ইনফ্রাস্ত্রকচরদা থবক তৌরবদি, ঐখোয়গী লম্বীশিং, রেল নেতৱার্ক অমসুং এয়রপোর্ত ইনফ্রাস্ত্রকচর মালেমদা খ্বাইদগী ফবা ওইগদবনি। করিগুম্বা ঐখোয়না মেনুফেকচরিংদা থবক তৌরবদি, ঐখোয়গী সেমিকন্দক্তরশিং, ইলেক্ত্রোনিক্সশিং অমসুং গারিশিং মালেমদা খ্বাইদগী ফবা ওইগদবনি। করিগুম্বা ঐখোয়না তুরিজমদা থবক তৌরিবদি, ঐখোয়গী লমকোয়ফমশিং, লমকোয়নবগী খুদোংচাবশিং অমসুং হোস্পিতেলিতি অসি খ্বাইদগী ফবা ওইগদবনি। করিগুম্বা ঐখোয়না স্পেস সেক্তরদা থবক তৌরবদি, ঐখোয়গী সেতেল্লাইতশিং, নেভিগেসন তেক্নোলোজি অমসুং এস্ত্রোনোমি রিছার্স খ্বাইদগী ফবা ওইগদবনি। অসিগুম্বা অচৌবা পান্দমশিং থম্নবা ইথিল অসি সাহেবজাদেশিংগী থৌনাদগী হৌরকপনি। অচৌবা পান্দমশিং অসি হৌজিক ঐখোয়গী ৱারেপশিংনি। লৈবাক অসিগী নহারোলশিংগী তৌবা ঙম্বদা হৌজিক ভারতনা মপুংফানা থাজরে অমসুং ভারতকী নহারোলশিংনা মালেমগী খ্বাইদগী চাউবা কম্পেনিশিং লুচিংবা ঙম্লে, অনৌবা মালেম লমজিংনবা অনৌবা থবক পাংথোকপা ঙম্লে অমসুং অচৌবা লৈবাক খুদিংমক অমসুং হিরম খুদিংমক্ত মখোয়গী থৌনা উৎলে অমসুং অনৌবা খুদোংচাবশিং পীবা মতমদা মখোয়গী লৈবাক্কীদমক থবক অমা হেক্ত পাংথোকপা ঙম্লে হায়বা ঐ খঙলে। মরম অদুনা বিকসিত ভারত অমগী পান্দম শোইদ্রে অমসুং অত্মানির্ভর ভারত মাইপাকপা শোইদ্রে।

মরুপশিং,

যুগ খুদিংদা লৈবাক অমগী নহারোলশিংদা লৈবাক অদুগী মরাইবক অহোংবা পুরক্নবা খুদোংচাবা পী। নিংতম ইহৌ মনুংদা ভারতকী নহারোলশিংনা মপান লৈঙাক্কী মঙক কনবা অদু থুদেকখি অমসুং মখোয়গী পান্দম ফংখি, ঙসি, নহারোলশিং বিকসিত ভারত অমগী পান্দম থম্লে। চৎলিবা দিকেদ অসিদা, ঐখোয়না মথং চহি ২৫ দা য়াংনা চাউখৎনবা য়ুম্ফম থোনগনি। হিরম খুদিংমক্ত চাউখৎনবা অমসুং লৈবাক অসি মাঙলোমদা পুখৎনবা নহারোলশিংনা মতম অসিগী খুদোংচাবা লৌগদবনি। মখোয়গী ইমুং-মনুং কৈদৌঙৈদা রাজনিতি শরুক য়াদ্রিবা নহারোল লাখ অমা রাজনিতি শরুক য়াহন্নবা মহাক্কী পান্দম অমা থম্লি হায়না ঐনা লাল কিলাদা হায়খ্রে। মসিগী থবক অসি মথং চহি ২৫ গী য়াম্না মরুওই অমসুং অনৌবা মীরোল অমা রাজনিতি য়াওহন্নবা খোঙজং অসিদা নহারোলশিং শরুক য়াগদবনি। শ্বামী বিবেকানন্দগী চহি ১০০শুবা মপোক নুমিত্ত মথং চহি হৌরকপদা বিকসিত ভারত য়ং লিদর্স দাইলোগ পাংথোক্কনি। লৈবাক শীনবা থুংবগী খুঙ্গংশিং, সহরশিংদগী নহারোল মিল্লিয়ন কয়া শরুক য়াগনি অমসুং বিকসিত ভারত অমগী পান্দম অমসুং লম্বী খন্ন-নৈনগনি।

মরুপশিং,

লাক্লিবা চহি ১০, মরুওইনা মথং চহি ৫ অসি অমৃতকালগী চহি ২৫ গী পান্দমশিং ফংনবা য়াম্না মরুওই। লৈবাক অসিগী নহারোলশিংগী থৌনা শীজিন্নবা দরকার ওইরে। নহারোলশিংগী শক্তি শৌগৎপা, মতেং পাংবা অমসুং পুন্না থবক তৌমিন্নবা অসিনা ভারত অনৌবা অৱাংবা থাকশিংদা পুখৎকনি হায়না ঐনা থাজবা থম্লি। মসিগী থাজবা অসিগা লোয়ননা, ঐনা অমুক হন্না গুরুশিং, থৌনা ফরবা সাহেবজাদেশিং অমসুং মাতা গুজরি জিদা ইকায়খুম্নবা উৎতুনা কোক নোঞ্জরি।

অদোম ঙমখৈ লৈতনা থাগৎপা ফোঙদোকচরি!

***