ভারতকী প্রধানমন্ত্রী

ভারত মাতা কী জয়,

ভারত মাতা কী জয়,

ভারত মাতা কী জয়,

খুরুমজরি,

ঐহাক পুং অনি মঙ্খাইগী মমাংদা কুৱেত্ততা থুংখি অমসুং ঐহাক্না মফম অসিদা লাকপদগী হৌনা, মফম পুম্বদা তোঙানবা মখলগী মরী, তোঙানবা মখলগী নুংশিবা অমা ঐহাক্না ফাওরক্লি। ময়াম পুম্নমক ভারতকী তোঙান তোঙানবা রাজ্যশিংদগী লাক্লি। অদুম ওইনমক ময়াম পুম্নমকপু উবদা, ঐগী মমাংদা অপীকপা হিন্দুস্তান অমা থোরকপগুম তৌই। মফম অসিদা ঐনা অৱাং, খা-নোংপোক, নোংচুপ, লমদম খুদিংমক্কী তোঙান-তোঙানবা লোন ঙাংবা মীওইশিং উবা ফংলি। অদুবু মীপুম খুদিংমক্কী থম্মোয়দা খোন্থাং অমখক্তমক লৈ। মীপুম খুদিংমক্কী থম্মোয়দা খোন্থাং অমখক্তমক লৈ – ভারত মাতা কী জয়, ভারত মাতা কী জয়।

মফম অসিদা হলগী চৎনবীগী থৌরম পাংথোক্লি। হৌজিক্তি নখোয়না খৃস্তমাস অমসুং অনৌবা চহিগীদমক শেম-শারি। মদুগী মতুংদা পোঙ্গল লাক্কনি। মকর সংক্রান্তী, লোহরি, বিহু, অসিগুম্বা কুহ্মৈ কয়া অসি কুইশিল্লক্ত্রে। ঐহাক্না ময়াম পুম্নমকপু খৃস্তমাস, অনৌবা চহি অমসুং লৈবাক অসিগী মফম খুদিংমক্তা পাংথোক্লিবা থৌরম পুম্নমক্কী য়াইফ-পাউজেল পীজরি।

মরুপশিং,

ঙসি, মসিগী তাঙ্কক অসি ঐহাক্কীদমক্তদি য়াম্না অখন্নবা অমনি। চহি 43গী মতুংদা, চহি তরাগী খুজিং মরি হেনবগী মতুংদা ভারতকী প্রধান মন্ত্রী অমা কুৱেত্তা লাকখ্রে। ভারত্তগী মফম অসিদা লাকপদা অদোম্না পুং মরি চংই, অদুবু প্রধান মন্ত্রীনা লাকপদা চহি তরাগী খুজিং মরি চংখি। অদোমগী মরক্তগী অয়াম্বনা কুৱেত্তা চহি কয়াদগী লৈরি। মফম অসিদা ময়াম অমা পোকখি। চহি খুদিংগী ভারত মচা চা কয়া অদোমগী কাংলুপ অসিদা য়াওরি। অদোম্না কুৱেতকী খুন্নাইদা ভারত মচাগী তদকা হাপচিল্লে, অদোম্না কুৱেতকী কেনভস অসি ভারতকী স্কিলশিংগী মচুশিংনা শংজিল্লি। অদোম্না কুৱেত্তা ভারতকী তেলেন্ত, তেক্নোলোজী অমসুং ত্রেদিসনগী মাসালা অদু পুনশিনখ্রে। অমসুং মসিনা মরম ওইদুনা ঐহাক ঙসি মফম অসিদা অদোমগা উন্নবতা নত্তনা, অদোম পুম্নমক্কী মাইপাকপশিংবু ইকায় খুম্নবা উৎনবা লাক্লি।

মরুপশিং,

মতম খরগী মমাংদা, ঐহাক্না মফম অসিদা থবক তৌরিবা ভারতকী শিন্মীশিং অমসুং প্রোফেস্নেলশিংগা উনখি। মরুপশিং অসিনা মফম অসিদা শাবগী থবকশিং পায়খৎলি। মখোয়না অতোপ্পা সেক্তর কয়াদসু কন্না হোৎনরি। দোক্তরশিং, নর্সশিং অমসুং পেরামেদিকশিংগী মওংদা কুৱেতকী মেদিকেল ইনফ্রাস্ত্রকচরদা ভারতকী কম্ম্যুনিতী অসি অচৌবা শক্তি অমনি। অদোমগী মরক্তা য়াওরিবা ওজাশিংনা কুৱেতকী মথংগী মীরোনবু মপাঙ্গল কনখৎহনবদা মতেং পাংলি। অদোমগী মরক্তা য়াওরিবা ইঞ্জিনীয়রশিং অমসুং আর্কিতেক্তশিংনা কুৱেতকী মথংগী মীরোনগী ইনফ্রাস্ত্রকচর শেমগৎলি।

অমসুং মরুপশিং,

ঐহাক্না কুৱেতকী লুচিংবশিংগা ৱারী শানবদা, মখোয়না অদোম পুম্নমকপু থাগৎপা ফোংদোকই। কুৱেতকী প্রজাশিংনা অদোম ভারত মচা পুম্নমকপু অদোমগী থবক কন্না হোৎনবগী, অদোমগী অচুম্বা ৱাশক, অদোমগী হৈশিংবগীদমক য়াম্না ইকায় খুম্নৈ। ঙসি ভারতনা রেমিত্তেন্সকী লমদা মালেমদা মকোক্তা লৈরে, মরম অদুনা মসিগীদমক চাউরবা ক্রেদিৎ অসি কন্না হোৎনরিবা মরুপশিংনি। লৈবাক মীয়াম্নসু অদোমগী থৌদাংবু ইকাই খুম্নৈ।

মরুপশিং,

ভারত অমসুং কুৱেতকী মরক্তা লৈনরিবা মরী অসি সভ্যতা, সমুদ্র, নুংশি-চান্নবা, ললোন-ইতিক্কী মরীনি। ভারত অমসুং কুৱেত অসি অরাবিয়ন সমুদ্রগী নাকল অনিমক্তা লৈ। ঐখোয়না দিপ্লোমেতিক্কী খক্তনা শম্নবা নত্তে, ঐখোয়গী থম্মোয়নসু শম্নৈ। ঐখোয়গী হৌজিক্কী মতম অসি খক্তা নত্তনা ঐখোয়গী মমাংগী মতমসু ঐখোয়বু শম্নহল্লি। কুৱেত্তগী ভারত্তা মোতীশিং, দেতশিং অমসুং অফবা ময়াৎকী শগোলশিং পুশিল্লকপা মতম অমা লৈরম্মি। অমসুং পোৎলম কয়া অমা ভারত্তগীসু মফম অসিদা লাক্লি। ইন্দিয়ন রাইস, ইন্দিয়ন চা, ইন্দিয়ন স্পাইসেস, ফি-রোল, শামতুচিংবা মফম অসিদা লাকই। কুয়েতিগী হীরোইশিংনা ভারতকী তীক্কী উনা শাবা হীশিংদা শাংনা চৎনরম্মি। কুৱেতকী মোতীশিং অসি ভারতকীদমক্তা দাইমন্দশিংদগী হন্থবা নত্তে। ঙসিদি, ভারতকী জ্বেলরী অসি মালেম শীনবা থুংনা মমিং চৎলি, অমসুং কুৱেতকী মোতীশিংনা মসিদা মতেং পাংলি। গুজরাত্তা, ঐখোয়না ঐখোয়গী ইচিল-ইনাওশিংদগী হৌখিবা চহি চা কয়াদা কুৱেত্তগী মীওইশিং অমসুং লল্লোন-ইতিক তৌবশিংনা চৎথোক-চৎশিন তৌরম্মি হায়না ঐখোয়না তাদুনা লাক্লি। মরুওইনা 19শুবা চহি চাদা, কুৱেত্তগী ত্রেদরশিংনা সুরত্তা লাকপা হৌরকখি। মতমদুদা সুরত অসি কুৱেতকী মোতীশিংগী ইন্তর্নেস্নেল মার্কেৎ ওইরম্মি। সুরত, পোরবন্দর নৎত্রগা ভেরাবল ওইগেরা, গুজরাতকী পোর্তশিং অসি অরিবা মরীশিং অসিগী শাখি ওইরি।

কুৱেতিগী ললোন-ইতিক তৌবশিংনা গুজরাতি লোলদা লাইরিক কয়া অমসু ফোঙখ্রে। গুজরাতকী মতুংদা, কুৱেতিগী ত্রেদরশিংনা মুম্বাই অমসুং অতোপ্পা কৈথেলশিংদা মশক থোকপা মশক অমা শেমখি। মমিং লৈরবা ত্রেদর অব্দুল লতিফ অল অব্দুল রাজ্জাককী লাইরিক হাউ তু কেলকুলেত পর্ল ৱেথ অসি মুম্বাইদা ফোঙখি। কুৱেতকী ত্রেদর কয়ানা মুম্বাই, কোলকাতা, পোর্বন্দর, ভেরাবল অমসুং গোৱাদা মখোয়গী ওফিসশিং এক্সপোর্ত অমসুং ইম্পোর্তকীদমক হাংদোকখ্রে। কুৱেতকী ইমুং কয়া অমা হৌজিক ফাওবা মুম্বাইগী মোহমদ অলি লম্বীদা লৈরি। চহি 60-65গী মমাংদা, ভারতকী শেনয়েক অসি কুয়েত্তা শীজিন্নরম্মি। হায়বদি, করিগুম্বা অদোম্না মফমসিদা লৈবা দুকান অমহেক্তদগী পোৎশক অমা লৈরবদি, ভারতকী রুপী খক্তমক লৌগনি। মতম অদুদা ভারতকী শেনয়েক, রুপী, পাইসা, আনাগী ৱাহৈ-ৱাতা অসিসু কুৱেতকী মীয়ামদা য়াম্না চৎনরম্মি।

মরুপশিং,

ভারত অসি কুৱেতকী নীংতম্লবা মতুংদা মশক খঙদোকখিবা মালেমগী অহানবা লৈবাকশিংগী মনুংদা অমনি। অমসুং মরম অসিনা, ঐখোয়গী হৌজিক্কী মতমগা কন্নেক্তেদ ওইনা লৈবগা লোয়ননা লৈবাক অমা অমসুং খুন্নাই অমদা চৎপা ঐহাক্কীদমক য়াম্না নীংশিংনীংঙাই ওইরি। ঐহাক্না কুৱেতকী মীয়াম অমসুং মফমসিগী সরকারদা য়াম্না থাগৎপা ফোংদোকচরি। ঐহাক্না মরুওইনা হিজ হাইনেস, অমিরবু মহাক্কী বর্তনগীদমক থাগৎপা ফোংদোকচরি।

মরুপশিং,

মমাংদা কলচর অমসুং কম্মর্সনা শেমগৎখিবা মরী অসিনা অনৌবা চহি চা অসিদা অনৌবা অৱাংবা থাক্তা চংশিল্লি। ঙসি কুৱেত অসি ভারতকী য়াম্না মরু ওইবা ইনর্জী অমসুং ত্রেদ পার্তনর অমনি। কুৱেতিগী কম্পনীশিংগীদমক ভারত অসি অচৌবা ইনভেস্তমেন্ত দেস্তিনেসন অমসুনি। ঐহাক্না নীংশিংলি, হিস হায়নেস, কুৱেতকী ক্রাউন প্রিন্সনা ন্যু য়োর্কতা ঐখোয়গী মীফম অদুদা পাউরৌ অমা পনখি। মহাক্না হায়খি- “অদোমগী মথৌ তাবা মতমদা, ভারতনা অদোমগী লমথুংফম ওইগনি।“ ভারত অমসুং কুৱেতকী প্রজাশিংনা অৱাবা মতমদা, খুদোংথিবা থোকপা মতমদা ফাওবা অমগা অমগা মতেং পাংলি। কোরোনা লাইচৎ মনুংদা লৈবাক অনিমক্না লেবেল খুদিংমক্তা অমনা অমবু মতেং পাংনখি। ভারতনা খ্বাইদগী মথৌ তাবা মতমদা, কুৱেতনা ভারততা লিক্বিদ ওক্সিজেন পীখি। হিস হাইনেস ক্রাউন প্রিন্স মশামক্না মাং থাখি অমসুং মীপুম খুদিংমকপু হেন্না থুনা থবক তৌনবা পুক্নিং থৌগৎখি। ভারতনা ভেক্সিনশিং অমসুং মেদিকেল তীমশিং কুৱেত্ততা থাদুনা অৱাবা অসি থেংননবা থৌনা পীখিবা অসিদা ঐহাক্না নুংঙাইবা ফাওই। কুৱেত অমসুং মাগী অকোয়বদা লৈরিবা মফমশিংদা চিঞ্জাক্কী পোৎলমশিংগী অৱাৎপা লৈহন্দনবা ভারতনা মাগী পোর্তশিং হাংদুনা থম্লি। চহি অসিগী জুন থাদা, কুৱেত্তা অসিগুম্বা নুংঙাইতবা থৌদোক অমা থোকখি। মঙ্গাফতা থোকখিবা মৈ চাকপগী থৌদোক অদুদা ভারত মচা কয়ানা মখোয়গী পুন্সি মাংখি। ঐহাক্না পাউ অসি তাবা মতমদা, ঐহাক য়াম্না ৱাখি। অদুবু মতমদুদা কুৱেত সরকারনা পীখিবা মতেং অসিদি ইনাওনুপা অমখক্তনা পীবা ঙম্বা অমনি। ঐহাক্না কুৱেতকী থৌনা অসিবু ইকায় খুম্নবা উৎচরি।

মরুপশিং,

নুংঙাইবা অমসুং অৱাবা খুদিংমক্তা পুন্না লৈমিন্নবগী চৎনবী অসি ঐখোয়গী ম্যুচুএল রিলেসনশিং অমসুং অমগা অমগা থাজবগী য়ুম্ফম্নি। লাক্কদৌরিবা দিকেদশিংদা, ঐখোয়না ঐখোয়গী চাউখৎ-থৌরাংগী অচৌবা পার্তনরশিংসু ওইরগনি। ঐখোয়গী পান্দমশিং অসিসু য়াম্না খেন্নদে। কুৱেতকী মীয়াম্না অনৌবা কুৱেত অমা শেমগৎপদা শরুক য়ারি। ভারতকী মীয়াম্না 2047 ফাওবদা লৈবাক অসিবু চাউখৎলবা লৈবাক অমা ওইহন্নবা হোৎনরি। কুৱেতনা ললোন-ইতিক অমসুং ইন্নোবেসনগী খুত্থাংদা দাইনামিক ইকনোমী অমা ওইহনবা পাম্মি। ভারতনা ঙসি ইন্নোবেসনদা অকনবা মীৎয়েং থম্লি অমসুং ইকনোমী অসিবু লেপ্পা লৈতনা মপাঙ্গল কনখৎহল্লি। হায়রিবা পান্দম অনিমক্না অমনা অমবু শৌগৎকনি। অনৌবা কুৱেত অমা শেমগৎনবা দরকার ওইবা ইন্নোবেসন, স্কিল, তেক্নোলোজী অমসুং মেনপাৱর ভারত‌তা লৈরি। ভারতকী স্তার্ত-অপশিংনা কুৱেতকী ফিনতেকদগী হেল্থকেয়র ফাওবা, স্মার্ত সিতীদগী গ্রীন তেক্নোলোজী ফাওবা মথৌ তাবা পুম্নমক্কীদমক অৱাংবা থাক্কী সোলুসনশিং পুথোকপা ঙম্মি। ভারতকী হৈথোই-শিংথোইরবা নহারোলশিংনা কুৱেতকী তুংলমচৎকী খোঙচৎতা অনৌবা শক্তি পীবা ঙমগনি।

মরুপশিং,

ভারতনা মালেমগী স্কিল কেপিতেল ওইনবগী পোতেন্সিএলসু লৈরি। ভারত অসি লাক্কদৌরিবা দিকেদ কয়া অসিদা মালেমগী খ্বাইদগী নহা ওইরিবা লৈবাক অমা ওইদুনা লৈহৌরগনি। অসিগুম্বা ফীভম অমদা, ভারতনা মালেমগী স্কিল দিমান্দ মপুং ফাহনবগী মপাঙ্গল লৈ। অমসুং মসিগীদমক্তা, ভারতনা মালেমগী মথৌ তাবশিংবু য়েংলগা, মাগী নহারোলশিংগী স্কিলশিং শেমগৎলি, মখোয়বু অপগ্রেদ তৌরি। হৌখিবা চহিশিংদা, ভারতনা লৈবাক কুনমরিরোমগা মাইগ্রেসন অমসুং এমপ্লোইমেন্তকা মরী লৈনবা এগ্রীমেন্তশিংদা খুৎয়েক পীনখ্রে। মসিদা গল্ফ লৈবাকশিং অসি নত্তনা জাপান, ওস্ত্রেলিয়া, ফ্রান্স, জর্মনী, মোরিসিয়স, UK অমসুং ইতালিগুম্বা লৈবাকশিং য়াওরি। মালেমগী লৈবাকশিংনসু ভারতকী হৈশিংবা মীওইশিংগীদমক্তা থোঙ হাংলি।

মরুপশিং,

মপাল লৈবাক্তা থবক তৌরিবা ভারত মচাশিংগী য়াইফনবা অমসুং খুদোংচাবশিং ফংহন্নবা লৈবাক কয়াগা লোয়ননা য়ানা ৱারোলশিং শেমগৎলি। ই-মাইগ্রেৎ পোর্তেল অসি নখোয়না খঙলমগনি। মসিগী খুত্থাংদা, ফোরেন কম্পনীশিং অমসুং রেজিস্তর তৌরবা এজেন্তশিং অসি প্লেৎফোর্ম অমখক্তদা পুশিল্লে। মসিনা কদায়দা মীওইবগী পাঙ্গল মথৌ তাবগে, করম্বা মখলগী মীওইবগী পাঙ্গল মথৌ তাবগে অমসুং করম্বা কম্পনীনা মথৌ তাবগে হায়বদু খঙবা লায়হল্লি। পোর্তেল অসিগী মতেংদগী হৌখিবা চহি 4-5 অসিদা মীওই লাখ কয়ানা গল্ফ লৈবাকশিংদা লাকখ্রে। অসিগুম্বা হোৎনবা পুম্নমক্কী মখাদা পান্দম অমখক্তমক লৈ। মালেম অসিনা ভারতকী হৈশিংবগা লোয়ননা খুমাং চাউশিল্লক্কদবনি অমসুং মপান লমদা থবক তৌনবা চৎখিবা মীওইশিংনা মতম পুম্নমক্তা নুংঙাইনা লৈগদবনি। কুৱেত্তা লৈরিবা ময়াম পুম্নমক্না ভারতকী হোৎনরিবশিং অসিদগী কান্নবা কয়া অমা ফংলগনি।

মরুপশিং,

ঐখোয়না মালেমগী মফম খুদিংমক্তা লৈ, ঐখোয়না লৈবাক অসিবু ইকায় খুম্নবা উৎলি অমসুং ভারতনা অনৌবা থাক্তা য়ৌরকপদা ঐখোয়সু চপ মান্ননা নুংঙাইবা ফাওই। ময়াম পুম্নমক ভারতকী মফমশিং অসিদগী মফমসিদা লাকখ্রে, মফমসিদা লৈখ্রে, অদুবু ময়াম পুম্নমক্না অদোমগী থম্মোয়দা ভারত মচা ওইবগী মগুন অসি ঙাক্লি। হৌজিক ঐঙোন্দা হায়বিয়ু, মঙ্গলয়ানগী মায় পাকপা অসিদা ভারতকী করম্বা মীওইনা চাউথোকচবা পোক্লোইদগে? চন্দ্রয়াননা থাদা য়ৌরকপদা ভারতকী করম্বা মীওইরা নুংঙাইরমলোইদগে? ঐহাক্না হায়রিবা চুম্মি নৎত্রগা লাল্লি হায়য়ু? ঙসিগী ভারত অসি অনৌবা ৱাখল্লোন অমগা লোয়ননা মাংলোমদা চংশিল্লি। ঙসিদি ভারত অসি মালেমগী খ্বাইদগী চাউবা ইকনোমীগী মঙাশুবা মফমদা লৈরে। ঙসিদি মালেমগী মকোক থোংবা ফিনতেক ইকোসিস্তেম অসি ভারত্তনি। ঙসিদি মালেমগী খ্বাইদগী চাউবা অহুমশুবা স্তার্ত-অপ ইকোসিস্তেম অসি ভারত্তা লৈরি। ঙসিদি ভারত অসি মালেমগী অনিশুবা খ্বাইদগী চাউবা মোবাইল মেন্যুফেকচরিং লৈবাক ওইরে।

ঐহাক্না অদোমদা স্তেতিস্তিক্স অমা পীগনি অমসুং অদোম্না মসিসু পামগনি। হৌখিবা চহি 10 অসিদা ভারতনা থম্বা ওপ্তিকেল ফাইবরগী অশাংবা অসি পৃথিবী অমসুং থাগী মরক্তা লৈরিবা অরাপ্পা অদুদগী শরুক 8 হেন্না শাংলে। ঙসিদি, ভারত অসি মালেমগী খ্বাইদগী দিজিতেল ওইনা কন্নেক্তেদ ওইবা লৈবাকশিংগী মনুংদা অমনি। অপীকপা শহরদগী হৌরগা খুঙ্গং ফাওবদা, ভারত মচা খুদিংমক্না দিজিতেলগী খুৎলাইশিং শীজিন্নরি। ভারতকী স্মার্ত দিজিতেল সিস্তেম অসি হৌজিক্তি লকজরী অমা নত্তে অদুবু মসি মীচম প্রজাগী পুন্সিগী শরুক অমা ওইরে। ভারত্তা ঐখোয়না করিগুম্বা চা থকপা নৎত্রগা লম্বীদা পোৎ য়োল্লিবশিংদগী মহৈ-মরোং অমদি মনা-মশিং লৈরবদি ঐখোয়না দিজিতেল পেমেন্ত তৌই। করিগুম্বা নহাক্না রাসন, চিঞ্জাক, মহৈ-মরোং অমদি মনা মশিং নত্ত্রগা য়ুমগী পোৎলমশিং ওর্দর তৌবা পাম্লবদি, দেলিভরী অসি য়াম্না অতেনবা মতমদা পাংথোকই অমসুং পেমেন্ত অসি ফোন্দা তৌই। মীওইশিংনা মখোয়গী দোকুমেন্তশিং থম্নবগীদমক দিজি লোকর, এয়রপোর্ত্তা লেপ্পা লৈতনা চৎথোক চৎশিন তৌনবগীদমক দিজি যাত্রা, তোল বুথশিংদা মতম কনবা ঙম্নবগীদমক ফাস্ত তেগ, ভারত অসি দিজিতেলগী লমদা লেপ্পা লৈতনা হৈ-শিংবা হেনগৎলক্লি অমসুং মসিদি অহৌবা খক্তনি। তুংলমচৎকী ভারত অসি মালেম পুম্বদা লমজিং-লমতাক পীরগদবা অসিগুম্বা ইন্নোবেসনগী মায়কৈদা চংশিনগনি। তুংলমচৎকী ভারত অসি মালেমগী চাউখৎ-থৌরাংগী হব ওইগনি, মালেমগী গ্রোথ ইঞ্জিন ওইগনি। ভারতনা মালেমগী গ্রীন ইনর্জী হব, ফার্মা হব, ইলেক্ত্রোনিক্স হব, ওতোমোবাইল হব, সেমিকন্দক্তর হব, লিগেল, ইন্সুরেন্স হব, কন্ত্রেক্তিং, কম্মর্সিএল হব ওইরকপা মতম অসি য়াম্না লাপত্রে। মালেমগী খ্বাইদগী চাউবা ইকনোমী সেন্তরশিং ভারত্তা কদাইদা ওইগদগে হায়বদু অদোম্না উবা ফংলগনি। গ্লোবেল কেপবিলিতী সেন্তরশিং, গ্লোবেল তেক্নোলোজী সেন্তরশিং, গ্লোবেল ইঞ্জিনীয়রিং সেন্তরশিং ওইরবসু, ভারত অসি মসিগী অচৌবা হব অমা ওইরগনি।

মরুপশিং,

ঐখোয়না মালেম পুম্ববু ইমুং অমগুম্না লৌই। মালেমগী য়াইফনবা ৱাখল্লোনগা লোয়ননা ভারত অসি বিশ্বভধু (ৱার্ল্দ ব্রদর) অমা ওইনা মাংলোমদা চংশিল্লি। অমসুং মালেমসিনা ভারতকী ৱাখল্লোন অসিবু ইকাই খুম্নবা উৎলি। ঙসি, 2024গী দিসেম্বর 21দা মালেমনা অহানবা ওইনা ৱার্ল্দ মেদিতেসন দে পাংথোক্লি। মসি ভারতকী চহি লিশিং কয়াগী মমাংদগী লৈরক্লবা মেদিতেসনগী চৎনবীদা কত্থোকপনি। 2015দগী হৌনা মালেমনা জুন 21দা ইন্তর্নেস্নেল য়োগ নুমিৎ পাংথোক্লি। মসিসু ভারতকী য়োগগী চৎনবীদা কত্থোকপা অমনি। মালেম অসিনা 2023 অসি ইন্তর্নেস্নেল মিল্লেৎস ইয়র ওইনা পাংথোকখি। মসিসু ভারতকী হোৎনবশিং অমসুং ৱাফমশিং অসিনা ওইথোকপা ঙমখি। ঙসিদি, ভারতকী য়োগনা মালেমগী মফম খুদিংমকপু শম্নহল্লি। ঙসিদি, ভারতকী ত্রেদিস্নেল মেদিসিন, ঐখোয়গী আয়ুর্বেদ, ঐখোয়গী আয়ুশ প্রদক্তশিংনা মালেমগী হকশেলবু মপাঙ্গল কনখৎহল্লি। ঙসিদি, ঐখোয়গী সুপরফুদ মিল্লেৎ, ঐখোয়গী শ্রী আন্না অসি ন্যুত্রিসন অমসুং হকচাং ফনা হিংনবগী মরুওইবা য়ুম্ফম অমা ওইরক্লি। ঙসিদি, নালন্দাদগী IITশিংদা ঐখোয়গী লৌশিংগী পথাপ অসিনা মালেমগী লৌশিংগী ইকোসিস্তেমদা শক্তি পীরি। ঙসিদি, ভারত অসি মালেমগী কন্নেক্তিবিতীদা মরু ওইবা লিঙ্ক অমা ওইরক্লি। মমাং চহিদা ভারত্তা পাংথোকখিবা G20 সমিৎ মনুংদা, ইন্দিয়া-মিদল ইস্ত-য়ুরোপ কোরিদোর লাউথোকখি। কোরিদোর অসিনা তুংলমচৎকী মালেমদা অনৌবা মাইকৈ অমা পীগনি।

মরুপশিং,

ইন্দিয়ন দাইস্পোরাগী মতেং অমসুং শরুক য়াবা য়াওদনা চাউখৎলবা ভারত অমগী খোঙচৎ অসি মপুং ফাদ্রি। ঐহাক্না ময়াম পুম্নমকপু চাউখৎলবা ভারতকী ৱারেপ অসিদা শরুক য়ানবা কৌজরি। অনৌবা চহিগী অহানবা থা, জনুৱারী, 2025 অসি লৈবাক অসিগী কুহ্মৈ কয়া পাংথোক্কদৌরিবা থা অমা ওইরগনি। চহি অসিদা, জনুৱারী 8দগী 10 ফাওবা, প্রভাসি ভারতী দিবস ভুবনেশ্বরদা পাংথোক্কনি, মালেম পুম্বদগী মীওইশিং লাক্কনি। ঐহাক্না ময়াম পুম্নমকপু প্রোগ্রাম অসিগীদমক্তা কৌজরি। মসিগী খোঙচৎ অসিদা, অদোম্না পুরীদা মহাপ্রভু জগন্নাথজীগী য়াইফ-পাউজেল লৌবা য়াই। মসিগী মতুংদা, অদোম্না প্রয়াগরাজদা মহা কুম্ভতা শরুক য়ানবা প্রয়াগরাজদা লাক্কদবনি। মসি জনুৱারী 13দগী ফেব্রুৱারী 26 ফাওবা, থা অমা মখাই পাংথোক্কনি। জনুৱারী 26দা রিপব্লিক দে উরবা মতুংদা অমুক হল্লক্কনি। অমসুং হোয়, অদোমগী কুয়েতিগী মরুপশিংসু ভারত্তা পুরকউ, মখোয়বু ভারতকী অকোয়বদা উৎলু, মতম অমদা দিলিপ কুমার সাহাবনা মফম অসিদা অহানবা ভারতকী রেস্তোরেন্ত শঙ্গাখি। ভারতকী অশেংবা মচাক অদু মফম অদুদা চৎলবা মতুংদা খংবা ঙমগনি। মরম অদুনা ঐখোয়না ঐখোয়গী কুয়েতিগী মরুপশিংবু মসিগীদমক্তা শেম-শাবিবা তাই।

মরুপশিং,

অদোম পুম্নমক্না ঙসি হৌগদৌরিবা আরবিয়ন গল্ফ কপকীদমক্তা য়াম্না নুংঙাইবা পোক্লি হায়বা ঐ খঙই। অদোম্না কুৱেতকী তীম শৌগৎনবা ঙাইরি। হৌদোকপগী থৌরম অসিদা ঐবু গেস্ত ওফ ওনর ওইনা কৌখিবগীদমক ঐহাক হিজ হাইনেস, অমিরদা থাগৎপা ফোংদোকচরি। রোয়ল ফেমিলী, কুৱেত সরকারনা ভারতপু কয়া য়াম্না ইকায় খুম্নৈ হায়বা মসিনা তাক্লি। ময়াম পুম্নমক্না ভারত-কুৱেত মরীশিং অসিবু মখা তানা চেৎশিলহল্লগনি হায়বগী থাজবগা লোয়ননা, ঐহাক্না ময়াম পুম্নমকপু অমুক্কা হন্না থাগৎচরি!

ভারত মাতা কী জয়,

ভারত মাতা কী জয়,

ভারত মাতা কী জয়!

হন্না-হন্না থাগৎচরি।

****