ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদী নিউ দিল্লিগী সুপ্রিম কোর্ততা পাংথোকপা সংবিধান নুমিৎ থৌরম শরুক য়াখ্রে। থৌরম অদুদা ভারতকী চীফ জজতিস শ্রী সঞ্জিব খন্না, সুপ্রিম কোর্তকী জজশিং শ্রী জজতিস বি.আর গাভাই অমসুং শ্রী জজতিস সুর্য়াকান্ত, লোল অমসুং জজতিস মিনিস্তর শ্রী অর্জুন রাম মেঘাৱাল, ভারতকী এত্তোর্নি জেনেরেল অমসুং অতোপ্পা শক্নাইরবশিং শরুক য়াখি।

থৌরম অদুদা প্রধান মন্ত্রীনা সংবিধান নুমিৎ থৌরমদা শক্নাইরবশিং, দেলিগেতশিং অমসুং মীয়াম তরাম্না ওকখ্রে। মহাক্না হায়খি ভারতকী সংবিধান চহি ৭৫ মপুংফারকপা অসি য়াম্না চাউথোকচনবগী মচাক অমনি। মহাক্না থৌরম অসিদা কন্সতিতুয়েন্ত এশেমব্লিগী মেম্বরশিং অমসুং কন্সতিতুসনদা ইকায়খুম্নবা উৎখ্রে।

প্রধান মন্ত্রীনা হায়খি মদুদি ঙসি ঐখোয়না সংবিধান নুমিৎ থৌরম পাংথোক্লি, ঙসিগী নুমিৎ অসি মুম্বাই তেরর এত্তেক্কী কুমওন তাবনা নুমি অসি কাউবা ঙম্লরোই। মহাক্না তেরর এত্তেক অদুদা লৈখিদ্রবশিংগী মফমদা ইকায়খুম্নবা উৎখি। শ্রী মোদীনা হায়খি ভারতকী সেকুরিতি অমসুং ঙমখৈগী অপুনবা শক্তমদা শিংনরকপা তেরর ওর্গনাইজেসন খুদিংমক ভারতনা মতিক চাবা পাউখুম অমা পীগনি।

ভারতকী সংবিধানগী মরমদা কন্সতিতুয়েন্ত এশেমব্লিদা মরৈ য়েৎনখিবা অমসুং খন্নখিবা কয়া অদু নিংশিংলদুনা, প্রধান মন্ত্রীনা বাবাসাহেব অম্বেদকারগী ৱারোল পল্লদুনা হায়খি: “সংবিধান অসি ইচম চম্বা উকিলশিংগী চে-চাং অমা নত্তে, মসি থৌনানি, মসি মতম পুম্নমক্ত চহি কয়াগী থৌনানি”। প্রধান মন্ত্রীনা হায়খি মসিগী থৌনা অসি য়াম্না মরুওই। লৈবাক্কী, মতম অমসুং ফিবমগী মতুংইন্না চুনবা ৱারেপশিং লৌদুনা মতম মতমগী ওইনা সংবিধান ৱাহন্থোক পীনবা সংবিধান শেম্লম্বশিংনা ঐখোয়না মনিংতম্বা পীরে।

মহাক্না মখা তানা হায়খি মতমগী মতুংইন্না ভারতকী মঙলানশিং অমসুং অনিংবশিং অনৌবা থাকশিং য়ৌরক্কনি হায়বা সংবিধান শেম্লম্বশিংনা মপুংফানা খঙখি অমসুং খুদোংচাদবা কয়াগা লোয়ননা নিংতম্লবা ভারতকী মীয়ামগী দরকার ওইবশিংশু হেনগৎলক্লি। মরম অদুনা, সংবিধান শেম্বশিংনা সংবিধান অসি ইচম চম্বা চে অমা ওইনা শেমখিদে, মসি অহিংবা, লেপ্তনা চেন্থরিবা ঈচেল অমনি।

প্রধান মন্ত্রীনা হায়খি ঐখোয়গী সংবিধান অসি ঐখোয়গী হৌজিক অমসুং ঐখোয়গী তুংলমচৎগী লমজিংবনি। হৌখিবা চহি ৭৫ দা লৈবাক অসিনা থেংনবা তোঙান-তোঙানবা খুদোংচাদবশিং থেংননবা অচুম্বা লম্বী হায়রিবা সংবিধান অসিনা ঐখোয়দা তাক্লে। সংবিধান ফাওবা ইমর্জেন্সি মতমগী খুদোংথিবা কয়া মায়োক্নখি। লৈবাক অসিগী অনিংবা অমসুং দরকার ওইবশিং সংবিধান্না ফংহল্লে। সংবিধান্না পীবা শক্তি খক্তনা দোক্তর ভিমরাও অম্বেদকারনা শেম্লম্বা সংবিধান ঙসি জম্মু অমসুং কাস্মিরদা চৎনরে। ঙসিদি অহানবা ওইনা জম্মু অমসুং কাস্মিরদা সংবিধান নুমিৎ থৌরম পাংথোক্লে।

প্রধান মন্ত্রীনা হায়খি ভারতনা অহোংবগী মরুওইবা তাঙ্কক কয়া ফাউদুনা চৎলি। লমজিং মৈরা অমা ওইনা সংবিধান্না ঐখোয়দা অচুম্বা লম্বী তাক্লি। হৌজিক ভারতকী তুংলমচৎকী লম্বীদি অচৌবা মঙলানশিং অমসুং অচৌবা ৱারেপশিং থবক ওইনা পাংথোকপনি। ঙসিদি মীওই খুদিংমক্কী পান্দম অমা লৈরে, বিকসিত ভারত অমা শেমগৎপা। বিকসিত ভারত হায়বদি মীওই খুদিংমক অফবা মগুন লৈবা পুন্সি অমা অমসুং ইকায়খুম্নবা পুন্সি অমা ফংবা মফম অমা অদুবুনি। মসি খুন্নাইগী অচুম্বা পুরক্নবা অমসুং সংবিধানগী থৌনা হাপ্নবা খ্বাইদগী চাউবা পাম্বৈ অমনি। মরম অদুনা, হৌখিবা চহি ১০ অসিদা বেঙ্কগা শম্নদ্রিবা মীয়ামগী বেঙ্ক একাউন্ত করোর ৫৩ হেন্না হাংদোক্তুনা হৌখিবা চহি খর অসিদা খুন্নাই অমসুং শেন-থুমগী অচুম্বশিং পুরক্নবা থবক কয়া পায়খৎলে। হৌখিবা চহি ১০ দা, মীওই করোর ৪ পাক্কাগী য়ুমদা লৈবা ফংলে, নুপীশিংদা গ্যাস সিলিন্দর কন্নেক্সন করোর ১০ ফংহনখ্রে। নিংতম্বা ফংলবা চহি ৭৫ গী মতুংদা ভারতকী য়ুমথোং করোর ৩ খক তোতি ঈশিং ফংলমখি। হৌখিবা চহি ৫-৬ অসিদা মহাক্কী সরকারনা ইমুং করোর ১২ হেন্না তোতি ঈশিং ফংহন্দুনা মীয়াম অমসুং মরুওইনা নুপীশিং হিংবদা লাইহল্লে। মসিনা সংবিধানগী থৌনা মপাঙ্গল হেনগৎহল্লে।

প্রধান মন্ত্রীনা হায়খি মদুদি ভারত সংবিধানগী ওরিজিনেল কপিদা ভগবান রাম, লাইরেম্বী সিতা, ভগবান হনুমান, ভতবান বুদ্ধা, ভগবান মহাবির অমসুং গুরু গোবিন্দগী শক্তমশিং য়াওরি। মসিনা ঐখোয়দা মীওইবগী গুনশিংগী মতাংদা ৱাখল তাহন্নবা অমসুং ৱাখল খলহন্নবা সংবিধানদা মফম অমা পীরিবা ভারতকী নাত অমসুং চৎনবীশিংগী খুদমশিংনি। ঙসিগী ভারতকী থৌশিলশিং অমসুং ৱারেপশিং অসি মীওইবগী গুনশিংদা য়ুম্ফম ওইবনি। মীয়ামদা অচুম্বা ৱায়েন খোঙজেল য়াংনা ফংহন্নবা ভারতিয় ন্যায় সনহিতা চৎনরে। চৈরাক পীবদা য়ুম্ফম ওইবা অসি হৌজিক অচুম্বদা য়ুম্ফম ওইবদা হোঙদোক্লে। নুপীশিং রাজনিতিদা শরুক য়াবা হেনগৎহন্নবা পুৱারি ওইরবা ৱুমেন্স রিজার্বেসন বিল পুথোক্লে। থার্দ জেন্দর মীওইশিংগী শক্তম অমসুং হকশিং ঙাক্নবা অমসুং দিবয়াং মীওইশিং হিংবদা লাইহন্নবা থবক কয়া পায়খৎলে।

প্রধান মন্ত্রীনা হায়খি মদুদি মীয়াম হিংবদা লাইনবা থবক কয়া ঙসি ভারতনা পায়খৎলে। অহলশিং মখোয়গী থোংজিলদা দিজিতেল লাইফ সর্তফিগেতশিং ফংহল্লে অমসুং হৌজিক ফাওবদা অহল করোর ১.৫ রোম কান্নবা ফংলে। ভারত অসি লায়রবা ইমুং খুদিংমক্ত লুপা লাখ ৫ ফাওবগী লেম্না লায়েংবগী খুদোংচাবা পীবা লৈবাকশিংগী মনুংদা অমনি অমসুং চহি ৭০ গী মথক্ত লৈবা অহলশিং লেম্না লায়েংবগী খুদোংচাবা পীবা লৈবাকশিংগী মনুংদা ভারত অমনি। ভারত্ত জন ঔশাধি কেন্দ্র লিশিং কয়া হাংদোক্তুনা হিদাক-লাংথকশিং মমল চাদা ৮০ তানা ফংহল্লে। হৌখিবা মতমদা চাদা ৬০ তিকা থারম্বা অদুগী মথক্ত মিসন ইন্দ্রধনুসকী মখাদা হৌজিক অঙাং চাদা ১০০ তিকা থারে। ঙসি মনুং-হুঞ্জিনবা মফমশিংগী অঙাংশিং ফাওবা তিকা থারে। হায়রিবা থবকশিং অসিনা লায়রবশিং অমসুং মিদল ক্লাস ইমুংশিংগী অৱাবশিং হন্থহল্লে।

সরকারগী এস্পিরেসনেল দিস্ত্রিক্স প্রোগ্রামগী মতাংদা, প্রধান মন্ত্রীনা হায়খি খ্বাইদগী লায়রবা জিলা ১০০ হেন্না খনগৎলে অমসুং হিরম খুদিংমক্ত চাউখৎহন্নবা থবকশিং পায়খৎলে। ঙসিদি এস্পিরেসনেল দিস্ত্রিক কয়া অতোপ্পা জিলাশিংদগী হেন্না ফরে। এস্পিরেসনেল দিস্ত্রিক্স প্রোগ্রামগী নমুনাদা য়ুম্ফম ওইদুনা হৌজিক সরকারনা এস্পিরেসনেল ব্লোগ প্রোগ্রাম হৌদোক্লে।

প্রধান মন্ত্রীনা হায়খি মীয়াম্না মায়োক্নরিবা অৱাবশিং কোকহন্নবা সরকারনা পায়খৎপা য়াবা থবক খুদিংমক পায়খৎলি। চহি খরগী মমাঙদা ইলেক্ত্রিসিতি ফংলমদবা য়ুমথোংশিং লেম্না মৈ ফংহন্নবা স্কিমগী মখাদা ইমুং করোর ২.৫ হেন্না মৈ ফংহল্লে। ৪-জি অমসুং ৫-জিগী খুৎথাংদা মীয়ামদা মোবাইল কন্নেক্তিবিতি ফংহন্নবা মনুং হুঞ্জিনবা মফমশিংদা মোবাইল তৱারশিং খিল্লে। সমুদ্র মনুংদা ওপ্তিকেল ফাইবর কেবলশিং তিংদুনা হৌজিক অন্দমান অমসুং নিকোবর ইথৎশিং অমসুং লক্ষদ্বিপতা য়াম্না য়াংবা ব্রোদবেন্দ ফংহল্লে। ভারত্তা য়ুমশিং অমসুং লৌবুকশিংগী লেন্দ রেকোর্দশিং ফংহনবদা ভারতনা চাউখৎলবা লৈবাকশিংদগী মাংজিল থারে। পি.এম শ্বামিতভা য়োজনাগী মখাদা, খুঙ্গংগী লম অমসুং য়ুমশিং দ্রোন মেপ্পিং পাংথোক্লে অমসুং মসিদা য়ুম্ফম ওইদুনা আইনগী ওইবা চে-চাংশিং ফংহল্লে।

প্রধান মন্ত্রীনা হায়খি লৈবাক অসি চাউখৎনবা য়াম্না য়াংনা অনৌবা মতমগী ইনফ্রাস্ত্রকচর শেমগৎপা দরকার ওই। মতম চানা ইনফ্রাস্ত্রকচর প্রোজেকশিং লোইশিনবা অসিনা শেন চঙহন্দে অমসুং প্রোজেক অদু মতম চানা শীজিন্নবা ফংহল্লে। প্রধান মন্ত্রী মশামক্না লুচিংবা প্রাগাতি প্লেতফোর্ম শীজিন্নদুনা ইনফ্রাস্ত্রকচর প্রোজেকশিংগী ফিবম চাংনাইনা য়েংশিল্লি অমসুং লুপা করোর লাখ ১৮ হেনবগী প্রোজেকশিং হন্না য়েংশিনখ্রে অমসুং মখোয়না মায়োক্নবা খুদোংচাদবশিং কোকহনখ্রে। ইনফ্রাস্ত্রকচর প্রোজেকশিং মতম চানা লোইশিনবা অসিনা মীয়ামগী পুন্সিদা অচৌবা কান্নবা কয়া ফংহল্লে। হায়রিবা থবকশিং অসিনা লৈবাক অসি চাউখৎহনবগা লোয়ননা সংবিধানগী মপাঙ্গলশু কনখৎহল্লে।

মহাক্কী ৱারোল লোইশিল্লকপদা, প্রধান মন্ত্রীনা  নবেম্বর ২৬, ১৯৪৯ দা পীখিবা দোক্তর রাজেন্দ্র প্রাসাদকী ৱারোলদগী ৱাহৈ খর লৌখৎখি অমসুং হায়খি “ঙসি ভারতনা দরকার ওইরিবা অসি পুকচেল শেংবা মীওই কাংবু অমনা মখোয়গী মশাগী খনবগী মহুত্তা লৈবাক্কী য়াইফনবা খনবা অদুনি”। লৈবাক্কী থবক্না হান্না পাংথোকপা হায়বা ৱাখল্লোন অসিনা লাক্কদৌরিবা চহিচা কয়াদা ভারতকী সংবিধান হিংদুনা লৈহনগনি।

নুঙগীৱারোল

ভারতকী সংবিধান চৎনবা হৌখিবা চহি ৭৫ মপুংফারকপগী থৌরমদা, সুপ্রিম কোর্তকী এদমিনিস্ত্রেতিপ বিল্দিং কমপ্লেক্সতা লৈবা ওদিওতোরিয়মদা পাংথোকপা সংবিধান নুমিৎ থৌরমদা প্রধান মন্ত্রী শ্রী নরেন্দ্র মোদী শরুক য়াখ্রে। থৌরম অসি ভারতকী সুপ্রিম কোর্তনা শীনবনি। ভারতকী চীফ জজতিস অমসুং সুপ্রিম কোর্তকী অতোপ্পা জজশিং থৌরম অদুদা শরুক য়াখি।

Addressing a programme marking #75YearsOfConstitution at Supreme Court. https://t.co/l8orUdZV7Q

— Narendra Modi (@narendramodi) November 26, 2024

संविधान – एक जीवंत, निरंतर प्रवाहमान धारा। pic.twitter.com/zyaOfOMRXE

— PMO India (@PMOIndia) November 26, 2024

हमारा संविधान, हमारे वर्तमान और हमारे भविष्य का मार्गदर्शक है। pic.twitter.com/mN8jjDBHWp

— PMO India (@PMOIndia) November 26, 2024

आज हर देशवासी का एक ही ध्येय है- विकसित भारत का निर्माण। pic.twitter.com/TUby4sPpd9

— PMO India (@PMOIndia) November 26, 2024

भारतीयों को त्वरित न्याय मिले, इसके लिए नई न्याय संहिता लागू की गई है। pic.twitter.com/pJgtYj3XyI

— PMO India (@PMOIndia) November 26, 2024

****