ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদীনা নবেম্বর ২৫ দা নুংথিলগী পুং ৩ রোম তাবদা নিউ দিল্লিগী ভারত মন্দাপমদা আই.সি.এ গ্লোবেল কোওপরেতিপ কনফরেন্স ২০২৪ অমসুং য়ু.এন ইন্তরনেসনেল ইয়র ওফ কোওপরেতিপস ২০২৫ হৌদোক্কনি।

মালেমগী কোওপরেতিপ ইহৌগী মাঙজিল থাবা লুপ অমা ওইরিবা ইন্তরনেসনেল কোওপরেতিপ এল্লাইন্স (আই সি এ)গী চহি ১৩০ গী পুৱারিদা অহানবা ওইনা ভারত্তা আই.সি.এ গ্লোবেল কোওপরেতিপ কনফরেন্স অমসুং আই.সি.এ জেনেরেল এশেমব্লি পাংথোক্কদবনি। মালেমগী মীফম অসি ইন্দিয়ান ফার্মরস ফর্তিলাইজর কোওপরেতিপ লিমিতেদ (ইফকো) না আই.সি.এগা খুৎশম্নদুনা অমসুং ভারত সরকার অমসুং ইন্দিয়ান কোওপরেতিপস অমুল  অমসুং কে.আর.আই.বি.ঐচ.সি.ওনা শীন্দুনা নবেম্বর ২৫ দগী নবেম্বর ৩০ ফাওবা পাংথোক্কদবনি।

ভারত সরকারগী “সাহকার সে সামরিদ্ধী” (কোওপরেসনগী খুৎথাংদা নুংঙাইহনবা) গা চুন্না “কোওপরেতিপশিংনা মীওই খুদিংমক নুংঙাইহনবা” হায়বা অসিনা কনফরেন্সকী থিমনি। লায়রবা কোকহনবা, নুপী অমসুং নুপা থোং মানহনবা অমসুং শেন-থুম চাউখৎহনবা অসিগুম্বা হিরমশিংদা য়ু.এনগী স্তেনেবল দিবলপমেন্ত গোলস (এস দি জি) শিং ফংনবা মালেম শীনবা থুংবগী কোওপরেতিপশিংনা অৱাবশিং অমসুং খুদোংচাবশিং খন্ননবা থৌরম অসিদা খন্ন-নৈনবশিং, পেনেল সেসনশিং অমসুং ৱার্কশোপশিং পাংথোক্কনি।

খুন্নাইগী থোং মান্নবা পুরকপা, শেন-থুমগী শক্তি পীবা অমসুং তুংকোইনা চৎনবা য়াগদবা চাউখৎ-থৌরাংগী মতাংদা “কোওপরেতিপশিংনা হেন্না ফবা মালেম অমা শেমগৎপা” হায়বা থিম অসিদা প্রধান মন্ত্রীনা য়ু.এন ইন্তরনেসনেল ইয়র ওফ কোওপরেতিপস ২০২৫ হৌদোক্কনি।  থোং মান্দবা হন্থহনবদা, লায়রবা কোকহনবা অমসুং ইজৎ লৈবা থবক য়োকখৎপগী মতাং য়াওনা স্তেনেবল দিবলপেন্তগী মরুওইবা থবকশিং ওইনা য়ু.এন এস.দি.জিশিংনা কোওপরেতিপশিং শকখঙলে। মালেমগী খ্বাইদগী খুদোংচাদবশিং কোকহন্নবা হোৎনবদা কোওপরেতিপ ইন্তরপ্রাইজশিংগী শক্তি উৎনবা চহি ২০২৫ অসি মালেমগী থবক অমা ওইহন্নবা পান্দম থম্লি।

কোওপরেতিপ ইহৌদা ভারতনা পায়খৎলিবা থবকশিং মশক তাক্নবা প্রধান মন্ত্রীনা নিংশিং পোস্তেল স্তাম্প অমা মাইখুম হাংদোক্কনি। স্তাম্প অদুদা শান্তি, থৌনা, খাংবা কনবা অমসুং চাউখৎপা খুদম ওইনা, লৈবাক চাউখৎনবা কোওপরেতিপশিংগী গুনশিংগী খুদম অমা ওইনা থম্বাল অমা উৎলি। থম্বালগী মনা মঙা অদুনা মহৌশাগী পোৎলম মঙাগী মহুৎশীন্দুনা, মহৌশা, খুন্নাই অমসুং শেন-থুমগী লমদা কোওপরেতিপশিংগী থবকশিং ফোঙদোক্লি। দিজাইন অদুদা লৌউ-শিংউ, দাইরি, ঙা য়োকপা, কঞ্জুমর কোওপরেতিপশিং অমসুং হাওসিং সেক্তরশিং য়াওরি অমসুং লৌউ-শিংউদা অনৌবা তেক্নোলোজি শীজিন্নবগী থৌদাং অসি দ্রোন অমনা খুদম ওইরি।

ভুতানগী প্রধান মন্ত্রী দাসো সেরিং তোবগে অমসুং ফিজিগী দিপুতি প্রাইম মিনিস্তর মনাও কমিকামিকা অমসুং লৈবাক ১০০ হেনবগী দেলিগেদ ৩,০০০ হেন্না থৌরম অসিদা শরুক য়াগনি।

****