ভারতকী প্রধানমন্ত্রী

খুলুম্বাই! (নমস্তে)

অসামগী গভর্নর, শ্রী লক্সমন প্রসাদ অচার্য় জী, ভর্চুএল ওইনা শরুক য়ারিবা মুখ্য মন্ত্রী হিমন্ত বিস্স শর্ম জী, অমসুং ফম্পাকথক্তা লেঙশিনবিরিবা ইকায়খুম্নরবা মীথুংশিং, ইচিল ইনাও পুম্নমক!

ঙসি অসি কার্তিক পুর্নিমাগী য়াইফরবা পুংফম্নি, অমসুং দেব দিপাবলীশু পাঙথোক্লি‍। কুমহৈগী মতমসিদা লৈবাক্কী মীপুম খুদিংগী মফমদা ঐনা য়াইফ পাউজেল পীজরি‍। নুমিৎ অসি গুরু নানক দেব জীগী ৫৫৫শুবা প্রকাস পর্ব নুমিৎসু তারি‍। ঐনা লৈবাক পুম্বগী মফমদা, মরুওইনা মালেম শিন্বা থুংনা লৈরিবা ঐখোয়গী সিখ ইচিল ইনাওশিংগী মফমদা, মরুওইখ্রবা নুমিৎ অসিগী য়াইফ-পাউজেলসু পীজরি‍। মসিগীসু মথক্তা, লৈবাক পুম্বনা জঞ্জাতিয় গৌরব দিবস থৌরমসু পাঙথোক্লি‍। ঙসি অয়ুক, ঐনা জমুই, বিহারদা ভগবান বির্সা মুন্দাগী ১৫০শুবা মপোক কুমওন থৌরমদা শরুক য়াজরুই, অমসুং হৌজিক্না নুমিদাংৱাইরম অসিদা মফমসিদা ইহান হান্বা বোরোলেন্দ মহোতসব পাঙথোক্লি‍। বোরো ফুরপগী মীওইশিংনা অসাম য়াওনা তোঙান তোঙানবা স্তেতশিংদগী মফমসিদা বোরোলেন্দ কুমহৈদা শরুক য়ানবা লাক্নরি‍। ঐনা মফমসিদা তিনবিরিবা, ইং-তপ্পা, নাৎ, অমসুং নুংঙাই য়াইফবগী অনৌবা চক অমবু হরাও তয়াম্না পাঙথোক্নবা লেঙবিরক্লিবা বোরো মরূপ পুম্নমক্কী মফমদা য়াইফ-পাউজেল পীজরি‍।

মরুপশিং,

থৌরম অসি ঐগীদমক্তা কয়াগী মতিক পুক্নিং নুংশিনিংঙাই ওইরবা মীৎকুপ্নো হায়বা অদোম্না খঙলোই‍। মীৎকুপ অসিনা ঐগী পুক্নিংবু ইথক হৌহল্লি, দিল্লীদা ফমদুনা, এয়র কন্দিসন কাদগী থিওরীশিং শেম্লিবা অমসুং লৈবাক্কী ৱারী লীরিবা মীওইশিংদুনদি থৌরম অসিগী মরুওইবা অসি লৌশিন্বা ঙম্লোই‍। চহি য়াঙ্খৈ ঈমু নাইমু তানখিবা, চহি য়াঙ্খৈ তংদু লৈতাদনা লৈরকখিবা – নহা মীরোল অহুম মরি ঈরাং অসিদা মাঙখ্রবনি‍। দেকেদ কয়াগী তুংদা বোরো ফুরুপ্না কুমহৈ অসি ঙসি পাঙথোক্লি, অমসুং রানা চন্দি জগোয় মীৎয়েঙ তাবা ফংজবা অসিমক বোরো মীয়ামগী থৌনাগী খুদম অমনি‍। দিল্লীদা লৈরিবা মীওইশিংনা থৌরম অসিগগী মরুওইবা অদু তশেংনা খঙলমগনি হায়বা ঐ থাজবা ৱাৎলি‍। মায় পাক্লিবা অসি অহিং অমদা ওইরকপা নত্তে; খাঙবা কন্না, ঈরাঙ অসিগী কিশি খুদিং তপ্না তপ্না হৈ-শিংনা থোক্তুনা ফীভম অসি পুরকখিবনি‍। ঙসিদি, ময়াম পুম্নমক্না পুৱারীগী অনৌবা পন্দুপ অমা শেম্বদা থৌদাং য়ামিন্নরি‍।

ঐগী নুংশিজরবা বোরো ইচিল ইনাওশিং,

২০২০দা, বোরো পীস একোর্দকী মতুংদা, ঐ কোক্রাঝারদা চৎনবা তাঞ্জা ফংখি‍। অদোম্না ঐগী ইফমদা উৎপিখিবা মীনুংশি অদুনা ঐবু অদোমগী মরক্তা তিল্লরবা মীশাক অমগুম ফাওহনখি‍। ঐনা মতম পুম্বদা মীৎকুপ অদু থম্মোয়নুংদা থাগোন্নদুনা লৈগনি অয়াম্বা মতমদা, মফম অমগী থৌরমশিং নৎত্রগা লৈরিবা ফীভম্না তুং কোইবা মমি অমা থমহৌই, অদুবু ঐনা মফমসিদা ফাওরিবা ইহুলসিদি তোঙান্বা অমনি‍। চহি মরিগী মতুংদা ফাওবা, চপ মান্নবা মীনুংসি, চপ মান্ননা মথুম মরাং হৌবা উবা ফংলি, অমদি মসিনা কনাগুম্বা অমগী থম্মোয়দা কয়া য়াম্না চেৎপা ইহুল ফাওহনবগে হায়বদুদি ৱাহৈনা ফোঙদোকপদা ৱাৎলগনি‍। নুমিৎ অদুদা, ঐনা ঐগী নুংশিজরবা বোরো ইচিল ইনাওশিংগী মফমদা ইং-তপ্পা অমসুং নুংঙাই য়াইফবগী অয়ুক অদু বোরোলেন্দা লাক্লে হায়খি‍। ৱাহৈশিংদু চুম্নবগী হায়খিবা ৱাহৈ নত্তে‍। ঐনা থেংনখিবা ফীভম, অদোম্না হিংশা থাদোক্তুনা অমসুং খুৎলায় থাদোক্তুনা ইং=তপ্পগী লম্বীদা হল্লক্নবা লেপখিবা খোঙফম অদু তশেংনা পুক্নিংদা পেনখি‍। মদুনা ঐঙোন্দা ইহুল অমা পোকহনখি, নুংঙাই য়াইফবা কোরৌগী চিঙ্খৈ বোরোলেন্দাআ হুল্লক্লে হায়বা থাজহনখি‍। ঙসি, অদোমগী মথুম মরাং হৌবা অমসুং অদোমগী মায়থোঙদা তারিবা হরাও নুংঙাইবগী মমি উরগা, বোরো মীয়ামগী তরং তরংবা তুংলমচৎকী অচেৎপা য়ুম্ফম অমা থোল্লে হায়না ঐনা ইখৌ পোঙনা হায়বা ঙম্ম‍ি‍।

বোরোলেন্দা হৌখিবা চহি মরিসিদা লৈখিবা খোঙজেল তশেংনা শিংথানিংঙাইনি‍। পীস এগ্রীমেন্ত মতুংদগী হৌরগা, চাওখৎপগী অনৌবা ইথক ইপোম অমনা লমদম অসোমদা হুম্দুনা লাকখি‍। ঙসিদি, ঐনা বোরো পীস একোর্দকী অফবা মহৈ, অমসুং মসিনা অদোমগী পুন্সিদা কমদৌনা অওনবা পুরক্লিবগে হায়বদু উবা মতমদা, ঐঙোন্দা তশেংনা অপেন্বগী ইহুল অমা পোকহল্লি অমসুং ফোঙদোকফম খঙদবা নুংঙাইবা অমা ফাওহল্লি মরূপশিং‍। মসিনা ঐগী থম্মোয়দা ফাওহল্লিবা নুংঙাইবা অসি অদোম্না খন্বদা লাম্বা ফংলোই‍। মীৎকুপ অমগী ওইনা মমা অমগা মহাক্কী নাইতোম পোকচবা মচানুপা অমগগী শক্তম ৱাখলদা শাগৎপিয়ু‍। মহাক্না মচানুপাদু য়াম্না চেকশিন্না য়োকচরকই, অদুবু মহাক্না মাগী মরূপশিংগা লোয়ননা, খুৎলায় পায়দুনা উমংদা কোয়চৎ চত্তুনা হিংশাগী লম্বীদা চৎখিদুনা মমাগা শেৎনা খাইনখি‍। মমাদুনা নুমিৎ কয়ানি নীংবা কায়না লেনখি, অদুগা নোংমা মচানুপাদু খুৎলায় থাদোক্তুনা ময়ুমদা হল্লক্লম্মি‍। নুমিৎ অদুদা মমাদুদা ফাওরমগদবা মখৈ ফংনা নুংঙাইবগী ইথিল অদু খন্বিয়ু‍। হৌখিবা চহি মরি অসি, ঐনা অদুগুম্বা নুংঙাইবা অদুমক ফাওদুনা লাকখি‍। ঐগী মীয়াম, ঐগী নহা ওইরিবা মরূপশিংনা ঐনা হায়জবা তাবিদুনা খুৎলায় থাদোকখি, অমদি হৌজিক্তি ঐগা লোয়ননা হেন্না তরং তরংবা ভারতকী তুংলমচৎ অমা শেমগৎপদা থবক তৌমিন্নরি‍। মসিনা ঐগী পুন্সিগী খ্বায়দগী মরু ওইবা মীৎকুপশিংগী মরক্তা অমনি, ঐঙোন্দা তশেংনা অপেন্বা পোকহনখিবা থৌওং অমনি, অদুগা ঐনা ময়াম পুম্নমক্কী মফমদা মসিগীদমক নুংঙাইবা ফোঙদোকচরি‍। মসিগীসু মথক্তা, বোরো পীস একোর্দকী কান্নবশিং লমদম অসিগী ৱাংমদসু ফংলি‍। একোর্দ অসিনা অতোপ্পা মশিং য়াম্লবা য়ানচেশিংগী লম্বী য়াৎখি‍। মসিনা ইচম চম্বা চে অমা ওইরনা লৈরম্বা তারবদি, অতোপ্পনবুদি ইং-তপ্পা পুরকপগী ওইথোকপা য়াবশিংদা থাজখিবা য়াই‍। অদুবু নখোয়না ৱাহৈশিংদুদা থৱায় হাপখি, মখোয়বু অশেংবা ওইহন্দুনা মীওই কয়াগী পুক্নিং অমসুং থম্মোয়বু খুদুম চনখিবনি‍। অদোমগী হোৎনজমল অমসুং থৌশিলননি ইং-তপ্পগী অনৌবা থোঙ হাংদুনা অৱাং নোংপোক পুম্বদা থাজবগী মৈরী চুখৎলিবা‍। অদোম্না তশেংনা পুক্নিং থৌগৎনিংঙাই ওইবা খুদম অমা শেম্লে, ঐগী মরূপশিং‍।

মরূপশিং,

য়ানখিবশশিং অদুনা মরম ওইরগা, অসাম খক্তদা – দিল্লীদা ফম্লিবা অখঙ—অহৈনি হায়রিবশিং অসিনা খঙলম্লোইদবা মশিং অদু ঐ অমুক্কা হন্না হায়জগে – নহা মীওই ১০,০০০ হেন্বনা মখোয়গী খুৎলায় থাদোকখি, হিংশাগী লম্বী তুংওইনরমখি, অমসুং চাওখৎপগী লম্বীদা চঙশিল্লকখি‍। কার্বি অংলোং এগ্রীমেন্ত, ব্রু-রিয়ং এগ্রীমেন্ত, নৎত্রগা NLFT-ত্রিপুরা এগ্রীমেন্ত অশেঙবা ওইরক্কনি হায়না কনানবু থাজরুগদগে? অদুম ওইনমক, পুম্নমক অসি, ঐগী মরুপশিং, নখোয় ময়ামগী তেংবাংনা ওইহল্লকপা ঙমহল্লিবনি‍। মদুননি, লৈবাক পুম্বনা জঞ্জাতিয় গৌরব দিবস থৌরম পাঙথোক্লিবা নুমিৎ অসিদা, অমদি ঐখোয়না ভগবান বির্সা মুন্দাগী মপোক কুমওন থৌরম পাঙথোকপা নুমিৎসিদা, ঐনা ময়ামগী মফমদা থম্মোয়নুংদগী তৌবিমল খঙবা ফোঙদোকচবা লাকচরিবসি‍। ঐনা ময়ামগী মফমদা থাগৎপা ফোঙদোকচবা লাকচবনি‍। ঐনা অদোমগী ইমুংশিংগী মফমদা ইকায় খুম্নবা উৎপা লাকচবনি‍। ঐখোয়না ঐখোয়গী মীৎমাঙদা ঐখোয়গী মঙলান মঙফাওনরকপা উরকপা মতমদা, মদুনা থম্মোয়বু মথুম মরাং হৌহল্লি, অমসুং মসিগীদমক ঐনা অদোমগী থাগৎপগী লোইবা নাইররোই‍। ঐনা লৈবাকসিগী নহাশিংগী মফমদা, মরুওইনা নক্সলিজমগী লম্বীদা হৌজিকসু চঙশিল্লিবশিংগী মফমদা, ঐগী বোরো মরূপশিংগী মতৌ তমজনবা ৱাফম থমজরি‍। নোংমৈ থাদোকপিয়ু; হিংশা অমসুং খুৎলায়গী লম্বীনা কৈদৌঙৈদা অশেঙবা মহৈ পুরক্লোই‍। বোরো ফুরুপ্না উৎলিবা লম্বী অসিনা তুং কোইগদবা মহৈ পুরক্কদবা লম্বীদুনি‍।

মরূপশিং,

ঐনা লাকপা মতমদা ঐনা অদোমদা থমখিবা থাজবা অদু অদোম্না ইকায়খুম্নবিখি, অমদি অদোম্না ঐগী ৱাহৈশিংবুসু ইকায় খুম্নবিখি‍। অদোম্না ঐগী ৱাহৈশিংদা অসুক্কী মতিক মতিক ময়াই হাপখিবনা মদুনা মীরোল কয়া নুংদা হক্তুনা লৈহৌগদবা ৱাশক অমা ওইহনখিবনি‍। ঐখোয়গী লৈঙাক্না, অসাম লৈঙাক্কা লোয়ননা অদোমগী চাওখৎ থৌরাংগীদমক চোকথবা নাইদনা হোৎনরি‍।

মরূপশিং,

কেন্দ্র অমসুং অসাম লৈঙাক অনিমক্না বোরোলেন্দ তেরিতোরিএল রীজন্দা বোরো ফুরুপকী মথৌ তাবশিং অমসুং অনিংবা অপাম্বশিং ফংহন্বদা মরুওইবা মীৎয়েঙ থম্লি‍। কেন্দ্র লৈঙাক্না বোরোলেন্দগী চাওখৎ থৌরাংগী লুপা করোর ১৫০০গীঈ অখন্নবা পেকেজ অমা কাইথোক্লে‍। অসাম লৈঙাক্নসু অখন্নবা দিভেলপমেন্ত পেকেজ অমা পীরে‍। বোরোলেন্দগী মহৈ মশিং, হকশেল অমসুং নাৎকা মরী লৈনবা ইনফ্রাস্ত্রকচরশিং শেমগৎপদা লুপা করোর ৭০০ হেন্না শীজিন্নখ্রে‍। হিংশা থাদোক্তুনা নুংতিগী পুন্সিগী হঞ্জিল্লক্লবা মীওইশিংগী ইহুল মপুং ফানা য়েংদুনা থবক পায়খৎনবা ঐখোয়না ফিরেপ লৌরে‍। নেস্নেল দিমোক্রেতিক ফ্রন্ত ওফ বোরোলেন্দকী মেম্বর ৪,০০০ হেন্বা হান্নগী পুন্সিদা হঞ্জিল্লকখ্রে, অমসুং নহা কয়া অসাম পুলিসতা থবক হাপখ্রে‍। মসিগী মথক্তা, অসাম লৈঙাক্না বোরো ঈরাংনা শোকহল্লবা ইমুং খুদিংদা লুপা লাখ ৫গী শেলগী তেংবাং ফংহনখ্রে‍। অসাম লৈঙাক্না বোরোলেন্দ চাওখৎহন্নবা চহি খুদিংগী লুপা করোর ৮০০ হেন্না চাদিং তৌরি হায়বসি খঙবদা অদোম অপেন্বা পোক্কনি‍।

মরূপশিং,

মফম অমা হেক্তদা চাওখৎপা পুরক্নবগীদমক, নহা অমসুং নুপীশিং স্কিল দিভেলপমেন্ত অমসুং মখোয়গী মঙলান তান্ননবা খুদোংচাবা মরাঙ কায়না ফংহন্বা মরু ওই‍। হিংশা লোইশিনখ্রবা মতুংদা, বোরোলেন্দা চাওখৎপগী “খোঙনাং পাম্বী” থাবা মথৌ তাই‍। মঙলান অসিনা লমজিং ওইরগা SEED মিসনগী য়ুম্ফম থোনখিবনি‍। স্কিল্লিং, ওন্ত্রপ্রিন্যুরসিপ, এন্দ এমপ্লোইমেন্ত দিভেলপমেন্ত হায়রিবা SEED মিসন অসি বোরো নহাশিংগী মফমদা নীংথিনা কান্নবা পীরি‍।

মরূপশিং,

মতম অমদা নোংমৈ পায়রম্বা নহাশিংনা শান্ন-খোৎনবগী লমদা মাঙজিল থারকপা উবদা ঐঙোন্দা য়াম্না অপেন্বা পোকহল্লি‍। বঙ্গলাদেশ, নেপাল, অমসুং ভুতান্দগী তীমশিংনা শরুক য়াদুনা কোক্রাঝারদা পাঙথোকখিবা দুরান্দ কপকী ইদিসন অনি অদু পুৱারী ওইরবা থৌরমশিংনি‍। পীস এগ্রীমেন্ত খুৎয়েক পীনখিবা মতুংদগী, বোরোলেন্দ লিতরেসী ফেস্তিবেল হৌখিবা চহি অহুমসিদা কোক্রাঝারদা পাঙথোক্তুনা লাক্লি, অমসুং ঐনা মসিগীদমক সাহিত্য পরিসদকী মফমদা তৌবিমল খঙবা উৎচরি‍। মসি বোরো লিতরেচরদা চাউনা থৌদাং য়াবা অমনি‍। ঙসি অসি বোরো সাহিত্য সভাগী ৭৩শুবা মপোক কুমওন নুমিৎশু ওইদুনা বোরো লিতরেচর অমসুং লোল সেলেব্রেত তৌবা নুমিৎ অমসু ওইরি‍। হয়েং নবেম্বর ১৬তা কল্চরেল রেলী অমসু পাঙথোক্নবা থৌরাং তৌরি হায়বা ঐ খঙই‍। মদুগীদমকসু ঐনা য়াইফ-পাউজেল পীজরি‍। অদুগা মরূপশিং, দিল্লীগী মীয়াম্না মসি উবা মতমদা, লৈবাক পুম্বনা মসিবু উননবা তাঞ্জা অমসু ফংগদৌরিবনি‍। অদোম্না দিল্লীদা লাক্তুনা ইং-তপ্পগী পাউজেল শন্দোক্নবা হৈ-শিংনা তাঞ্জা অসি লৌরি‍।

মরূপশিং,

হন্দক্তা বোরো আর্ত অমসুং ক্রাফ্তশিং মপুং ফানা থেন্দুনা উৎখিবা একজিবিসন অমদা ঐ লাকখি‍। অরোনাই, দোখোনা, গমসা, করাই-দাখিনি, থোর্খা, চাউ-গিসি, অমসুং খামনচিংবা পোৎলমশিং মফমসিদা উৎখি‍। পোত্থোকশিং অদু GI তেগ ফংখি, হায়বদি মখোয়না মালেম শিন্বা থুংনা কোয়না চৎলুবা মতমদা, মখোয়গী শক্তম অদু মতম পুম্বদা বোরোলেন্দ অমসুং বোরো নাৎকা শাগোন্নদুনা লৈহৌরগনি‍। সেরিকলচরনা মতম পুম্বদা বোরো চৎনবীগী তৎন-থানবা য়াদ্রবা শরুক অমা ওইদুনা লাক্লি, মরম অসিননি ঐখোয়গী লৈঙাক্না বোরোলেন্দ সেরিকলচর মিসন পায়খৎলিবা ‍। ফিশা লোনশা হায়বসি বোরো য়ুমথোঙ খুদিংগী লুনা থমজবা মচৎ অমনি, অমসুং বোরোলেন্দ হেন্দলুম মিসন্না ইনাক খুল্লবা নাৎকী লন অসিবু য়োকখৎনবা অমসুং ঙাক শেন্দুনা থম্নবা থবক পায়খৎলি‍।

মরূপশিং,

অসাম্না ভারতকী তুরিজম সেক্তরগী মশক নাইবা য়ুম্বী অমা ওইরি, অমসুং বোরোলেন্দা মতিক অসিগী মরুওইবা শরুক অমা ওইরি‍। অসাম তুরিজম্না মীয়ামগী পুক্নিং চিংশিল্লিবা অসিগী নুংদা বোরোলেন্দ লৈরি‍। মানস নেস্নেল পার্ক, রাইমোনা নেস্নেল পার্ক, অমসুং সিখ্না জহলাও নেস্নেল পার্ক্তা পামদবা থবক থৌওংশিংগী মকোন ওইরম্বা মতম অমা লৈরম্মি‍। মতম অমদা লোৎফম ওইরম্বা উমংশিং অসি হৌজিক ঐখোয়গী নহাশিংগী অৱাংবা মঙলান মঙফাওনফম ওইরকপা উবদা ঐ অপেন্বা পোকই‍। বোরোলেন্দদা তুরিজম চাওখৎলকপনা মফমসিগী নহাশিংগী অনৌবা থবক পীনবগী খুদোংচাবা কয়াশু শেমগৎলক্কদৌরবিনি‍।

মরূপশিং,

ঙসি ঐখোয়না কুমহৈ অসি পাঙথোকপসিগা লোয়ননা, বোরোফা উপেন্দ্র নাৎ ব্রহ্মা অমসুং গুরুদেব কালিচরন ব্রহ্মাবু নীংশিংবা হায়বসি হৌনশানি‍। বোরোফানা মতম পুম্বদা ভারতকী অপুন্বগী শক্তম ঙাক্নবা অমসুং বোরো মীয়ামগী সংবিধান্না পীরিবা হক ঙাক্নবা দিমোক্রেতিক ওইবা পাম্বৈ শীজিন্নরম্মি‍। গুরুদেব কালিচরন ব্রহ্মানা হিংশা য়াওদনা অমসুং লাইনিংগী লম্বীদা চঙশিন্দুনা ফুরুপশিং পুনশিন্ননবা হোৎনরম্মি‍। ঙসি, বোরো ইমা অমসুং ইচে-ইচলশিংগী মীত্তা পিরাং শিন্থদনা, তরং তরংবা তুংলমচৎ অমগী মঙলান উবা মতমদা ঐঙোন্দা মপুং ফানা অপেন্বা পোকহল্লি‍। বোরো ইমুং খুদিংম্না মখোয়গী ফুরুপকী মায় পাক্লবা মীওইশিংনা পুক্নিং থৌগৎনফম ওইদুনা মখোয়গী অঙাংশিংদা অফবা তুংলমচৎ অমা পীননবা মঙ মঙলি‍। বোরো ফুরুপ্তগী শক্নাইরবা মীওই কয়ানা মশক নাইবা থৌদাংশিং পায়দুনা লৈবাক্কী থৌগল তৌখি‍। হান্নগী চীফ ইলেক্সন কম্মিস্নর শ্রী হরিশঙ্কর ব্রহ্মা, অমসুং মেঘালয়গী হান্নগী গভর্নর রঞ্জিৎ সেখর মুসাহারীগুম্বা মশক নাইবা মীওইশিংনা বোরো মীয়ামগী ইকায়খুম্নবগী থাক ৱাংখৎহল্লি‍। বোরোলেন্দকী নহাশিংনা মায় পাকপা করিয়াগীদমক মঙ মঙবা উবদা ঐ নুংঙাইবা ফাওই‍। পুম্নমকসিদা, ঐখোয়গী লৈঙাক্না – কেন্দ্র নৎত্রগা স্তেতকী ওইরবসু – বোওরো ইমুং খুদিংগী খোঙবু ওইনা লেপ্লি‍।

মরূপশিং,

ঐগী ইফমদদি, অসাম য়াওনা অৱাং নোংপোক লমদম পুম্বনা ভারতকী অস্তলক্সমিগী শক্তম ওইনা উই‍। হৌজিক চাওখৎপগী নমুৎ অমগী চিঙ্খৈ হুল্লকপা নোংপোকলোমদগী, নোংপোকথংবা ভারত্তগী উবা ফংলদুনা, ভিক্সিত ভারত (চাওখৎপা ভারত) অমগী মঙলান্দা অনৌবা ইনোৎ হাপ্লগনি‍। মরম অসিননি ঐখোয়না অৱাং নোংপোক লমদমদা তুং কোইনা চৎকদবা ইং-তপ্পা পুরক্নবা চোকথবা নাইদনা হোৎনরিবা, অমসুং ঐখোয়না ইচঙ থৌনা অৱাং নোংপোক স্তেতশিংগী ঙমখৈগী ৱাথোক লোইশিন্নবা ৱারোইশিন পুরক্নবা হোৎনরিবা‍।

মরূপশিং,

হৌখিবা দেকেদ অসিদা, অসাম অমসুং অৱাং নোংপোক্কী চাওখৎপগী সনা ফুদোংবা চক হৌখ্রে‍। BJP-NDA লৈঙাক্কী খুজিল থৌরাংশিংগী খুত্থাঙদা, হৌখিবা চহি তরাসিদা মীওই করোর ২৫না লাইরবগী পনখৈগী ৱাংমদা লান্থোরকখ্রে‍। মখোয়গী মনুংদা, অসামদগী মশিং থিঙমদ্রবা মীওই কয়ানা লান্থেংনদুনা লাইরববু মায়থিবা পীরমখিবনি‍।

BJP-NDA লৈঙাক্কী মখাদা, অসাম্না চাওখৎপগী অনৌবা পন্দোল খিল্লি‍। ঐখোয়না হকশেলগী ইনফ্রাস্ত্রকচরদা অখন্নবা মীৎয়েঙ থম্লি‍। হৌখিবা চহি অমগা মখায়সিদা, অসাম্না খুদোল ওইনা অচৌবা হোস্পিতাল মরি ফংখ্রে‍। গুৱাহাতী AIIMS অমসুং কোক্রাঝার, নালবারী, অমসুং নগাওগী মেদিকেল কলেজনচিংবা ফেসিলিতীশিংনা মীওই কয়াগী হকশেলগী শিংনবশিং কোকহল্লে‍। অসামদা কেন্সর হোস্পিতাল হাংদোকপনা অৱাং নোংপোক পুম্বগী অনাবা মীওইশিংদা চাওনা মতেঙ ওইহল্লে‍।

২০১৪গী মমাঙদা, অসামদা মেদিকেল কলেজ তরুকখক লৈরম্মি‍। ঙসিদি, মশিং অসি শরুক অনি হেনগৎত্তুনা ১২ শুরে, অমসুং মেদিকেল কলেজ ১২ অমগশু লিংখৎনবা থৌরাং পায়খৎলি‍। অসামদা মেদিকেল কলেজ মশিং হেনগৎলক্লিবা অসিনা ঐখোয়গী নহাশিংগী খুদোংচাবগী অনৌবা থোঙশিং হাংদোক্লি‍।

মরূপশিং,

বোরো পীস একোর্দনা য়াৎলম্বা লম্বী অদুনা অৱাং নোংপোক পুম্বদা নুংঙাই য়াইফবা পুরক্লি‍। ঐনা বোরোলেন্দবু চহিচা কয়া লিরবা নাৎকী লনগী তুংনফম অমা ওইনা লৌই‍। ঐখোয়না হায়রিবা ইনাক খুল্লবা নাৎ অমসুং বোরো চৎনবী অসিবু মখোঙ শোম্বিবা অমসুং মপাঙ্গল কনখৎহন্বা তাই‍। অমুক্কা হন্না, ঐনা ময়াম পুম্নমক্কী মফমদা নুংঙাইরবা বোরোলেন্দ ফেস্তিবেলগী য়াইফ-পাউজেল পীজরি‍। ময়াম্না মফমসিদা তিন্বা উরগা, অমসুং ময়ামবু দিল্লীদা তরাম্না ওকচনবগী তাঞ্জা ফংবসিনা ঐঙোন্দা হায়নিংঙাই লৈতনা নুংঙাইবা ফাওহল্লি, অমসুং ঐনা ময়াম পুম্নমকপু পাম্বোম ৱাংনা থাঙ্গত্তুনা তরাম্না ওকচরি‍। মরূপশিং, অদোম্না ইফমদা উৎপিরিবা তরাম তরাম্বা মতৌ অমসুং মীনুংশি অসিনা, অমসুং অদোমগী মীত্তা তারিবা মঙলানগী মমিশিং অদুনা-ঐবু থাজবিয়ু, ঐহাক্না অদোমগী থাজবা অমসুং মঙলানশিং মঙফাওনহন্নবা চোকথবা নাইদনা হোৎনগনি‍।

মরূপশিং,

ঐনা পুক্নিং লুপ্না থবক পাঙজবগী খ্বায়দগী চাওবা মরমদি অদোম্না ঐগী থম্মোয়বু খুদুম চনখিবগীনি‍। মরম অসিননি ঐনা মতম পুম্বদা অদোমগীদমক লেপ্লিবা, অদোমগীদমক পুক্নিং লুপ্না থবক তৌরিবা অমসুং অদোম্না ঐবু পুক্নিং থৌগৎলিবসু মসিননি‍। ময়াম পুম্নমক্কী মফমদা য়াইফ-পাউজেল পীজরি‍। ময়ামবু হন্না হন্না থাগৎচরি!

হৌজিক, ময়াম পুম্নমক খোঞ্জেল হৌনা ঐগা লোয়ননা লাউমিন্নসি—

ভারত ইমানা য়াইফরে!

ভারত ইমানা য়াইফরে!

ভারত ইমানা য়াইফরে!

ময়ামবু হন্না হন্না থাগৎচরি!

***