ভারতকী প্রধানমন্ত্রী

ঙসি প্রধান মন্ত্রী শ্রী নরেন্দ্র মোদী গুজরাতকী ভাদতালদা শ্রী শ্বামীনারায়ন মন্দির চহি ২০০ শুরকপগী থৌরম শরুক য়াখ্রে। ভিদিও কনফরেন্সিংগী খুৎথাংদা থৌরম অদুদা তিনখিবা মীয়ামদা ৱা ঙাংবদা, প্রধান মন্ত্রীনা হায়খি মদুদি শ্রী শ্বামীনারায়নগী থৌজালদগী চহি ২০০ মপুংফারকপগী থৌরম পাংথোকপা ঙম্লিবনি। থৌরম অসিদা শরুক য়ারিবা মালেম শীনবা থুংবগী ভক্তশিং তরাম্না ওকচরি। মীয়ামগী থবক তৌবা হায়বসিনা শ্বামীনারায়ন মন্দিরগী খ্বাইদগী মরুওইবনি অমসুং ঙসিদি সেবকশিং থবক তৌবদা লুপ্লে। হন্দক মেদিয়াদা থৌরম কয়া পাংথোকপা উখিবদা মহাক অপেনবা ফাওই। 

প্রধান মন্ত্রীনা হায়খি ভাদতাল ধামদা চহি ২০০ শুরকপগী থৌরমশিং পাংথোকপা অসি অচম্বা পুৱারি নত্তে। মসি ভাদতাল ধামদা থাজবা থমদুনা হৌরকখিবা মহাকগুম্বা সেবক কয়াগী মরুওইবা থৌরম অমনি। থৌরম অসি ভারতকী নাত লেপ্তনা চেন্থরকপগী খুদম অমনি। শ্রী শ্বামীনারায়ন্না ভাদতাল ধাম লিংখৎখিবা চহি ২০০গী মতুংদা ফাওবা, অধ্যাতিক্কী ৱাখল্লোন হৌজিক ফাওবা হিংদুনা লৈরি অমসুং ঙসি ফাওবা শ্রী শ্বামীনারায়নগী পাউতাকশিং অমসুং শক্তি ফংলি। লাইশঙ অসিগী চহি ২০০ শুবা থৌরমদা সাধুশিং অমসুং সেবকশিং তরাম্না ওকচরি। ভারত সরকারনা লুপা ২০০ গী চান্দিগী শেনয়েক অমা অমসুং নিংশিংনবা পোস্তেল স্তাম্প অমা ফোঙবদা অপেনবা ফাওই। হায়রিবা খুদমশিং অসিনা অচৌবা থৌরম অসি তুংগী মীরোলশিংদা নিংশিংদুনা লৈহৌরগনি।

প্রধান মন্ত্রীনা হায়খি মদুদি শ্রী শ্বামীনারায়নগা মরী লৈনবা লনাই মীওই খুদিংমক্না মহাক্কী মগুন, চৎনবী অসিগা অধ্যাতিক অমসুং খুন্নাইগা লৈনবা মরী খঙই। লৈবাক অসি চাউখৎনবা মমি তাবগা লোয়ননা হৌখিবা মতমদা অমসুং হৌজিক সাধুশিংগা লোয়ননা মহাক্না পামখি। মহাক্কী অচিনবা থবকশিং লৈবদগী মহাক থৌরম অসি মশা লাক্তুনা শরুক য়াবা ঙমখিদবনি, অদুবু মহাক্কী ৱাখলদি ভাদতাল ধামদা লৈরি।

শ্রী মোদীনা হায়খি মদুদি শেংলবা সাধুগী চৎনবী অসি ভারতকী অখন্নবনি অমসুং অৱাবা তারবা মতম পুম্নমক্তা সাধু অমা নত্ত্রগা মুনি অমা নত্ত্রগা মহাত্মা অমা থোক্লকই। চহি চা কয়া মীনাই ওইরবা মতুংদা লৈবাক অসি শোন্থরকপা মতমদা অমসুং লৈবাক অসিনা থাজবা মাংলক্লবা মতমদা ভগবান শ্রী শ্বামীনারায়ন লাকখি। মতম অদুগী ভগবান শ্রী শ্বামীনারায়ন অমসুং সাধু পুম্নমক্না অনৌবা অধ্যাতিক্কী থৌনা অমা পীবা খক নত্তনা, ঐখোয় ইশানা ইশাবু ইকায়খুম্নবা উৎচবা অমসুং ঐখোয়গী শক্তম অমুক হিঙ্গৎহন্নবা মিকপ থোকহনখি। মাইকৈ অসিদা সিক্ষাপাত্রি অমসুং ভাচানামরিতগী থৌদাং য়াম্না চাউই অমসুং মখোয়গী পাউতাকশিং থবক ওইনা পাংথোকপা অসি ঐখোয় খুদিংমক্কী থৌদাংনি। মীওইবা খুন্নাইগী থবক তৌবা অমসুং অনৌবা যুগ অমা শেমগৎপদা অচৌবা থৌদাং অমা লৌবগা লোয়ননা ভাদতাল ধাম্না অচৌবা ইথিল অমা পীরে। হায়রিবা ধাম অসিনা তোল্লবা খুন্নাইদগী সাগারামগুম্বা মমিং লৈরবা সেবকশিং পুথোক্লে। ঙসিদি অঙাং কয়াদা চাক, লৈফম, লাইরিক তম্বগী খুদোংচাবা পীরে অমসুং ধাম অসিনা মনুং হুঞ্জিনবা ত্রাইবেলশিংগী মফমশিংদা প্রোজেক কয়া পায়খৎলে। ত্রাইবেলশিংগী মফমশিংদা নুপীমচাশিং লাইরিক তমহন্নবা মরুওইবা খোঙজংশিং পায়খৎলে।

প্রধান মন্ত্রীনা হায়খি ভাদতাল ধামগী অতোপ্পা থবকশিংদি লায়রবগী সেবা তৌবা, অনৌবা মীরোল অমা শেমগৎপা, অনৌবা মতম অমসুং অধ্যাতিক পুনশিন্দুনা ভারতকী নাত ঙাক-শেনবা অসিনি। ভাদতাল ধামগী সাধুশিং অমসুং ভাক্তশিংনা কৈদৌঙৈদা মহাক্কী নিংবা কায়হনখিদে অমসুং অফবা তুংলমচৎ অমগীদমক লু-নানবদগী হৌরগা মহৌশাগী অকোয়বগী ফিবম ফাওবগী খোঙজং কয়া পায়খৎখি। থবকশিং অসি মখোয়গী থৌদাংনি খন্না মখোয়না পাংথোকখি অমসুং থৱায় হকচাং য়াওনা মসি পাংথোক্নবা থবক তৌখি। এক পের মা কে নাম কেম্পেনগী মখাদা শ্বামীনারায়নগী ভক্তশিংনা উ পাম্বী লাখ ১ হেন্না থাখ্রে।

প্রধান মন্ত্রীনা হায়খি মদুদি মীওই খুদিংমক্কী পুন্সিগী পান্দমনা কনাগুম্বা অমগী পুন্সি মশক তাকই। থবক অসিনা ঐখোয়গী ৱাখল, থবক অমসুং ৱাহৈশিংদা ইথিল পী অমসুং কনাগুম্বা অমা পুন্সিগী পান্দম ফংবা মতমদা, মতম অদুদা পুন্সি চুপ্পা অহোংবা লাকই। পান্দম অমা ফংনবা খুন্নাই পুম্নমক অমসুং লৈবাক অসি পুনশিল্লকপা মতমদা, সাধুশিংনা ঐখোয়গী খুন্নাইদা অচৌবা মতেং পাংখি, মসিনা মাইপাকপা ঙমখি। মসিগী চপ মান্নবা খুদম কয়া লৈরি।

প্রধান মন্ত্রীনা হায়খি মদুদি ঙসিদি লাইনিংগা মরী লৈনবা লোয়শঙশিংনা নহারোলশিংদা অচৌবা ইথিল অমা পীরে অমসুং বিকসিত ভারত অমগী পান্দম অমগা লোয়ননা লৈবাক শীনবা থুংনা মাঙলোমদা চঙশিল্লে। ভাদতালগী সাধুশিং অমসুং শ্বামীনারায়ন ইমুং-মনুং শীনবা থুংবনা চাউখৎলবা ভারত অমগী পান্দম অসি মীয়ামদা য়ৌহনগদবনি। নিংতম্নিংবগী অপাম্বা, নিংতম্বগী মৈরিনা চহি ১০০ লৈবাক অসিগী তোঙান-তোঙানবা মফমশিংগী মীয়ামদা ইথিল পীখি অমসুং মীয়াম্না নিংতম্বা পাম্বগী ৱাখল, মখোয়গী মঙলানশিং, মখোয়গী ৱাশকশিং অতম্ননা থাদোকপা নোংমা নত্ত্রগা মিকুপ অমা ফাওবা লৈখিদে। নিংতম ইহৌ মনুংদা ফংখিবা লৌশিং অমসুং করিগুম্বা ফংনবা লাংতক্নবা অদু, চাউখৎলবা ভারত অমা শেমগৎনবা লৈবাক অসিগী মীওই করোর ১৪০ গী মরক্তা মিকুপ খুদিংদা লৈরে। বিকসিত ভারত অমগী পান্দম ফংবা ঙম্নবা লাক্লিবা চহি ২৫ অসিদা সাধুশিং অমসুং ভক্তশিংনা মীয়ামগী পুক্নিং থৌগৎকদবনি। মখোয়না লৈরিবা মফম অদুগী খেন্নবা লৈতনা মীওই খুদিংমক্না বিকসিত ভারতকী থবকশিংদা মতেং পাংগদবনি। চাউখৎলবা ভারত অমা ওইহন্নবা অহানবা ফিবমদি লমদম অসিগী পোৎথোকশিং শীজিন্নদুনা ‘অত্মানির্ভর’ ওইহনবনি।

শ্রী মোদীনা হায়খি মদুদি থৌরম অসিদা শরুক য়ারিবা ভক্তশিংনা লমদম অসিগী পোৎথোকশিং শীজিন্নবদা মতেং পাংগদবনি। বিকসিত ভারত অমগীদমক লৈবাক অসিগী অপুনবা অমসুং ঙমখৈগী অপুনবা শক্তম য়াম্না মরুওই। মশাগী য়াইফনবা খক খনবশিংনা খুন্নাই অসি মাঙহন্নবা লৌতুনরি। অসিগুম্বা থবকশিং অসি অমতা ওইনা পুনশিন্দুনা মাইথিবা পীনবা হোৎনবা অসি তঙাইফদে। অৱাবা খাংদুনা কমদৌনা অচৌবা পান্দমশিং ফংগনি, লৈবাক অমা শেমগৎনবা নহা অমনা কমদৌনা অচুম্বা মাইকৈদা চৎগনি অমসুং কমদৌনা নহা অমনা লৈবাক শেমগৎপা ঙমগনি হায়বগী পাউতাকশিং ভগবান শ্রী শ্বামীনারায়ন্না তাকপীরমখি। মসি মতিক চাবা, থবক ঙম্বা অমসুং লাইরিক-লাইশু হৈবা নহারোলশিং শেমগৎনবা দরকার ওই। থৌনা লৈরবা অমসুং হৈথোই-শিংথোইবা নহারোলশিং অসি বিকসিত ভারত অমগী খ্বাইদগী কনবা মপাঙ্গলনি। মালেমদা মখা তানা ভারতকী নহারোলশিংগী দরকার ওইবা হেনগৎলক্লগনি।

প্রধান মন্ত্রীনা হায়খি মদুদি মালেমদা ভারতকী হৈথোই-শিংথোইবা মীওইশিংগী দরকার ওইরিবা অসি য়াম্না য়াম্মী অমসুং ভারতকী নহারোলশিংগী অকনবা থৌনা অসি মালেম শীনবা থুংনা পাম্নরে। ভারতকী নহারোলশিংগী থবক ঙম্বদা মালেম শীনবা থুংনা পুক্নিং চিংশিল্লে, হৈথোই-শিংথোইরবা নহারোলশিং অসিনা লৈবাক অসিগী দরকার ওইবশিং ফংহনবা খক নত্তনা মালেমগী দরকার ওইবশিং ফংহনগনি। নহারোলশিং ময়াই কাবা চীঞ্জাকশিংদগী কন্নবা অমসুং লাইচুবা ফনবা সাধুশিং অমসুং সেবকশিংনা থবক পায়খৎকদবনি। নহারোলশিং ময়াই কাবা চীঞ্জাকশিং লাইচুবা ফংনবা থবকশিং অসি মতম পুম্নমক্তা ভারত খক্তগী দরকার ওইবা খক নত্তনা মালেম শীনবা থুংবগী দরকার ওইরি অমসুং মসি লেপ্তনা পাংথোক্কদবনি।

প্রধান মন্ত্রীনা হায়খি মদুদি লৈবাক অদুগী হেরিতেচগী চাউথোকচবা ফাওরবা অমসুং মদু ঙাক্তুনা থম্লবা মতম খক্তদা লৈবাক অমা চাউখৎপা ঙমগনি, ঐখোয়গী লাইৱাদি চাউখৎপা অমসুং হেরিতেচ অনিমক চৎমিন্নবনি। মতম অমদা মাং-তাক্লে হায়না খন্নরম্বা চহি লিশিং কয়া শুরবা ভারতকী হেরিতেচগী মফমশিং অমুক হন্না শেমগৎলে। মখোয়গী মনুংদা অয়োধ্যা য়াওরি। কাসি, কেদরনাথ, পাবগাধ, মোধেরাগী সন তেম্পল অমসুং সোমনাথ অমুক হন্না শেমগৎলে। মফম শীনবা থুংনা অনৌবা ৱাখল্লোন অমসুং অনৌবা অওনবা অমা লৈরে। চহি চা কয়াগী মমাঙদা হুরান্দুনা পুখিবা লাইনিংথৌ অমসুং লাইরেম্বীশিংগী মীতমশিং ভারত্তা অমুক পুরক্লে। লোথাল অমুক হন্না শেমগৎনবা প্রোজেক পায়খৎলে। নাতকী ৱাখল তানবা খোঙজং চঙশিনবা অসি সরকারগী থৌদাং খক নত্তনা লৈবাক অসিগী নুংশিজবা, লৈবাক অসিগী নাত নুংশিজবা, লৈবাক অসিগী নাতকী চাউথোকচবা ফাওরিবা, ঐখোয়গী নাতকী পুক্কৈগী চাউথোকচরিবা মীওই খুদিংমক্কী থৌদাংনি। ভাদতাল ধামদা ভগবান শ্বামীনারায়নগী কলাগী পোৎলমশিংগী অক্ষার ভুবান কৌবা ম্যুজিয়ম অমা লৈরিবা অসি খোঙজং অসিগী শরুক অমনি। অক্ষার ভুবান অসি ভারতকী মুৎপা নাইদ্রবা অধ্যাতিক্কী হেরিতেচগী অচৌবা লাইশঙ অমা ওইরগনি।

প্রধান মন্ত্রীনা হায়খি মদুদি মান্নবা পান্দম অমা ফংনবা ভারতমচা করোর ১৪০ অমতা ওইনা পুল্লবা মতমদা বিকসিত ভারত অমগী পান্দম ইরাই লাইনা ফংবা ঙমগনি। খোঙচৎ অসি মপুংফানবা ঐখোয়গী সাধুশিংগী পাউতাকশিং য়াম্না মরুওই। থৌরম অসি শরুক য়ানবা মালেম শীনবা থুংবা মফমশিংদগী লাক্লিবা সাধুশিংনা, চহি ১২ খুদিংগী পাংথোকপা পুর্না কুম্ভ অমসুং ভারতকী হেরিতেচগী মৈরা অসি মালেমদা শন্দোক্কদবনি। সাধুশিংনা মালেম শীনবা থুংবগী মীওইশিংদা প্রায়াগ্রাজদা পাংথোক্কদৌরিবা পুর্না কুম্ভগী মরমদা ভারত্তগী হৌখিবা মীওইশিং নত্তবা মালেমগী লৈবাকশিংগী মীওইশিংদা শন্দোক্নবা তাক্কদবনি। পাংথোক্কদৌরিবা কুম্ভ মেলা অসিদা মখোয়না মশা লোয়শঙশিংদগী য়ামদ্রবা মপান লৈবাক্কী মীওই ১০০ পুরক্নবা হোৎনগদবনি। থবক অসিনা মালেম শীনবা থুংনা সাধুশিংনা য়াম্না লাইনা পাংথোকপা ঙমগনি।

লোইশিল্লকপগী ৱারোলদা, থৌরম অসি হকথেংননা শরুক য়াবা ঙমখিদবদা ঙাকপীনবা শ্রী মোদীনা হায়জখি অমসুং চহি ২০০শুবা থৌরম অসিগীদমক শ্বামীনারায়ন মন্দিরগী সাধুশিং অমসুং সেবকশিংগী মফমদা য়াইফ-পাউজেল পীখি।

নুঙগীৱারোল

প্রধান মন্ত্রী শ্রী নরেন্দ্র মোদীনা নবেম্বর ১১,২০২৪ দা ভিদিও কনফরেন্সকী খুৎথাংদা গুজরাতকী ভাদতালদা শ্রী শ্বামীনারায়ন মন্দিরগী ২০০শুবা মপোক কুমওন থৌরম শরুক য়াখ্রে। ভাদতালদা লৈবা শ্রী শ্বামীনারায়ন মন্দিরনা চহি কয়া খুন্নাই অমসুং মীয়ামগী অধ্যতিক্কী পুন্সিদা ইথিল পীদুনা লাক্লি।

****