ভারতকী প্রধানমন্ত্রী

রুসিয়ানা ময়াই তাংবল লৌদুনা কাজান্দা পাংথোক্লিবা ১৬শুবা ব্রিক্স মীফমদা ঙসি প্রধান মন্ত্রী শ্রী নরেন্দ্র মোদী শরুক য়াখ্রে।

মালেমগী লুপশিংগী থবক মপাঙ্গল কনখৎহনা, তেরোরিজম থেংনবা, শেন-থুম চাউখৎপা য়াংখৎহনবা, তুংকোইনা চৎনবা য়াগদবা চাউখৎ-থৌরাং পায়খৎপা অমসুং গ্লোবেল সাউথকী দরকার ওইবশিং মালেমদা খঙহনবা য়াওনা কান্নরবা হিরম কয়া ব্রিক্স লুচিংবশিংনা খন্নখ্রে। লুচিংবশিংনা অনৌবা ব্রিক্স পার্তনর লৈবাক ১৩ তরাম্না ওকখ্রে।

​প্রধান মন্ত্রীনা ব্রিক্স মীফমগী সেসন অনিমক্তা ৱা ঙাংখ্রে। মহাক্কী ৱারোলদা প্রধান মন্ত্রীনা হায়খি মদুদি, মালেম অসি তম্বা ঙমদবা ফিবম কয়া মায়োক্নরিঙৈ মতম অমদা মীফম অসি পাংথোক্লি অমসুং মুক্নবশিং, অইং-অশাগী খল হোংলকপনা পীরিবা অকনবা চৈথেংশিং অমসুং সাইবরগী শিংনবশিং ব্রিক্স মীফমদা পুখৎলে। তেরোরিজমগী অৱাবশিং কোকহন্নবা য়ুনাইতেদ নেসন্সতা ইন্তরনেসনেল তেরোরিজমগী মতাংদা কমপ্রেহেন্সিপ কনভেন্সন অমা অথুবা মতমদা চৎনবা দরকার ওইরে।

প্রধান মন্ত্রীনা হায়খি মদুদি মালেমগী লৈঙাক্লোন্দা অওনবশিং পুরক্নবা হোৎনবদা থৱায় য়াওনবা ব্রিক্সতা তকশিল্লি। ভারতনা জি-২০গী প্রসিদেন্ত ওইরিঙৈ মনুংদা ভারতনা ভোইস ওফ গ্লোবেল সাউথ মীফমশিং পাংথোকখ্রে। ব্রিক্সনা গ্লোবেল সাউথনা থেংনরিবা খুদোংচাদবশিং মরুওইনা লৌগদবনি। ভারতকী গিফ সিতি য়াওনা নিউ দিবলপমেন্ত বেঙ্ক লিংখৎপা অসিনা অনৌবা গুনশিং অমসুং ইথিলশিং ফংহল্লে। শেন-থুমগী চাউখৎপা য়াংখৎনবা ব্রিক্সনা থবক কয়া পায়খৎলে। ঐখোয় শেন-থুমগী মতেং পাংনবা অসিদা লৌউ-শিংউ, সপ্লাই চেনশিং, ই-কম্মর্স অমসুং স্পিসিএল ইকোনোমিক জোনশিংদা ললোন-ইতিক্কী খুদোংচাবা পীগনি। হায়রিবা থবকশিং অসিগী মরক্তা, অপীকপা অমসুং ময়াই ওইরপ চাউবা উদ্যোগশিংদা ঐখোয়না মীৎয়েং চঙগদবনি। চহি অসিদা ভারতনা হৌদোক্কদবা ব্রিক্স স্তার্দঅপ ফোরম্না ব্রিক্সকী শেন-থুমগী পান্দমশিংদা কান্নবা পীরগনি।

প্রধান মন্ত্রীনা ভারতনা হন্দক পায়খৎখিবা থবকশিংগী মনুংদা ইন্তরনেসনেল সোলার এল্লাইন্স, কোএলিসন ফোর দিজাস্তর রিসিলিয়েন্ত ইনফ্রাস্ত্রকচর, মিসন লাইফ অমসুং কোপ-২৮ মনুংদা গ্রিন ক্রেদিৎগী থবক য়াওরি। হায়রিবা থবকশিং অসিদা ব্রিক্স লৈবাকশিং শরুক য়ানবা মহাক্না তকশিনখি।

১৬শুবা ব্রিক্স মীফম মাইপাক্না পাংথোকপগীদমক প্রধান মন্ত্রীনা রাস্ত্রপতি পুতিন থাগৎপা ফোঙদোকখি অমসুং ব্রাজিলনা লুপ অসিগী প্রসিদেন্তগী ফম পায়খিবদা য়াইফ-পাউজেল পীখ্রে। মীফম লোইশিল্লকপদা, লুচিংবশিংনা কাজান দিক্লারেসন চৎনখ্রে।

ক্লোজ প্লেনারিদা ফোঙদোকখিবা প্রধান মন্ত্রীগী ৱারোল মফম অসিদা ফংগনি।

ওপন প্লেনারিদা ফোঙদোকখিবা প্রধান মন্ত্রীগী ৱারোল মফম অসিদা ফংগনি।

***