ভারতকী প্রধানমন্ত্রী

ঙসি ভিদিও মেসেজগী খুৎথাংদা তামিল নাদুদা তুতিকোরিন ইন্তরনেসনেল কন্তেন্নর তর্মিনেল শঙ্গাবদা প্রধান মন্ত্রী শ্রী নরেন্দ্র মোদী ৱা ঙাংখ্রে। থৌরম অদুদা প্রধান মন্ত্রীনা হায়খি মদুদি ঙসি অসি চাউখৎলবা লৈবাক অমা ওইনবা ভারতকী খোঙচৎকী শিংথানিঙাই ওইরবা মাইপাকপা অমনি অমসুং অনৌবা তুতিকোরিন ইন্তরনেসনেল কন্তেন্নর তর্মিনেলনা ভারতকী মেরিতাইম ইনফ্রাস্ত্রকচরদা অনৌবা থৱান্মিচাক অমা ওইবদা থাগৎপা ফোঙদোকচরি।

ভি.ও চিদাম্বরনার পোর্তকী থবক তৌবা ঙম্বগী শক্তি হেনগৎহনবদা মসিনা লৌরিবা থৌদাং পল্লদুনা, প্রধান মন্ত্রীনা হায়খি মদুদি মিতর ১৪ হেন্না লুদুনা অমসুং মিতর ৩০০ হেন্না শাংবা বার্থ অমা লৈদুনা, ভি.ও.সি পোর্তকী থবক হেনগৎহনবদা তর্মিনেল অসিনা মরুওইবা থৌদাং অমা লৌগনি। অনৌবা তর্মিনেল অসিনা হিথাংফমদা পোৎ-চৈ পুথোক-পুশিনদা শেন চঙবা হন্থহনগনি অমসুং ভারতনা ফোরেন একচেঞ্জ কনবা ঙমগনি।

মহাক্না তামিল নাদুগী মীয়াম থাগৎপা ফোঙদোকখি অমসুং ভি.ও.সি পোর্তকা মরী লৈনবা থবকশিং মহাক্না চহি অনিগী মমাঙদা হৌদোকখিবা অদু নিংশিংখি। য়াম্না য়াংনা প্রোজেকশিং লোইশিনবদা প্রধান মন্ত্রীনা অপেনবা ফোঙদোকখি। মহাক্না হায়খি তর্মিনেল অসিগী মরুওইবা মাইপাকপশিংগী মনুংদা অমদি মসিদা থবক তৌরিবশিংগী চাদা ৪০ হেন্না নুপীশি ওইবা অসিনি অমসুং মসিনা মেরিতাইম সেক্তরদা নুপীশিংনা লমজিংদুনা চাউখৎপগী খুদম অমা ওইরে।

ভারতকী শেন-থুম চাউখৎহনবদা তামিল নাদুগী সমুদ্র মপানশিংনা লৌরিবা থৌদাংগী মতাংদা শ্রী মোদীনা হায়খি মদুদি অচৌবা হিথাংফম অহুম অমসুং অপীকপা হিথাংফম ১৭ লৈদুনা, তামিল নাদু সমুদ্রগী ললোন-ইতিক্কী মরুওইবা মফম অমা ওইরে। হিথাংফম্না লুচিংদুনা মখা তানা চাউখৎনবা, আউতর হার্বর কেন্তেন্নর তর্মিনেল অমা শেমগৎনবা অমসুং ভি.ও.সি পোর্তকী থবক মখা তানা ফগৎনবা ভারতনা লুপা করোর ৭,০০০ হেন্না থাদরে। ভারতকী মেরিতাইম চাউখৎহনবদা অনৌবা পন্দুব অমা ইনবা ভি.ও.সি পোর্তনা থৌরাং তৌদুনা লৈরে।

ইনফ্রাস্ত্রকচর চাউখৎহনবদগী হেন্দোক্তুনা, ভারতকী হেন্না পাক-চাউবা মেরিতাইম মিসনগী মতাংদা শ্রী মোদীনা হায়খি মদুদি ভারতনা মালেমদা তুংকোইনা চৎনবা য়াবা অমসুং মাঙলোমদা য়েংবা চাউখৎ-থৌরাংগী লম্বী তাক্লে। ভি.ও.সি পোর্ত অসি গ্রিন হায়দ্রোজেন হব অমা ওইনা খঙনরে অমসুং ওফসোর ৱিন্দ ইনর্জিগী নোদেল পোর্ত অমা ওইরে। হায়রিবা থবকশিং অসিনা অইং-অশাগী খল হোংলকপদগী মালেম্না মায়োক্নরিবা অৱাবশিং মায়োক্নবদা মরুওইবা থৌদাং অমা লৌগনি।

প্রধান মন্ত্রীনা মখা তানা হায়খি মদুদি ইন্নোবেসন অমসুং পুন্না থবক তৌমিন্নবা অসি লৈবাক অসিগী চাউখৎপগী খোঙচৎকী খ্বাইদগী কনবা মপাঙ্গলনি। তর্মিনেল শঙ্গাবা অসি অপুনবগী পাঙ্গলগী খুদম অমনি। হৌজিক ভারত পাক-চাউরবা লম্বীশিং, হায়ৱেশিং, ঈশিং লম্বীশিং অমসুং এয়রৱেশিংনা শম্নরে অমসুং মালেমগী ললোন-ইতিক্কী থবক্তা লৈবাক অসিগী ফিবম ফগৎলে।  গ্লোবেল সপ্লাই চেন্দা ভারত মরুওইবা লৈবাক অমা ওইরে অমসুং লৈবাক অসিগী তৌবা ঙম্বা হেনগৎলকপা অসি ঐখোয়গী শেন্মিৎলোন চাউখৎনবগী য়ুম্ফমনি। মসিগী খোঙজেল অসিদা ভারত অথুবা মতমদা মালেমদা অহুমশুবা খ্বাইদগী চাউবা ইকোনোমি ওইরগনি অমসুং মসিগী চাউখৎলকপা অসিদাস তামিল নাদুনা মরুওইবা থৌদাং অমা লৌগনি।

Sharing my remarks during inauguration of new international container terminal at Thoothukudi port.https://t.co/MSYb6KQBjY

— Narendra Modi (@narendramodi) September 16, 2024

****