ପିଏମଇଣ୍ଡିଆ

 ବ୍ରୁନେଇ ଦାରୁସଲାମର ସୁଲତାନ ତଥା ୟାଙ୍ଗ ଡି-ପର୍ତୁଆନ ମହାମହିମ ସୁଲତାନ ହାଜି ହାଜୀ ହାସନଲ ବୋଲକିଆ ମୁଇଜାଦ୍ଦିନ ୱାଦୌଲାହ ଇବ୍ନି ଅଲ-ମରହୁମ୍ ସୁଲତାନ ହାଜି ଓମାର ‘ଅଲି ସୈଫୁଦ୍ଦିନ ସାନଦୁଲ ଖୈରୀ ୱାଦ୍ଦିନଙ୍କ ନିମନ୍ତ୍ରଣକ୍ରମେ ଭାରତର ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ୩ରୁ ୪ ସେପ୍ଟେମ୍ବର ୨୦୨୪ ମଧ୍ୟରେ ବ୍ରୁନେଇ ଦାରୁସଲାମ ସରକାରୀ ଗସ୍ତ କରିଥିଲେ । ଏହା ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ପ୍ରଥମ ଗସ୍ତ ହେବା ସହିତ କୌଣସି ଭାରତୀୟ ପ୍ରଧାନମନ୍ତ୍ରୀଙ୍କ ପ୍ରଥମ ଦ୍ୱିପାକ୍ଷିକ ଗସ୍ତ ଥିଲା ।

ବ୍ରୁନେଇ ଦାରୁରସଲାମରେ ପହଞ୍ଚିବା ପରେ ଭାରତର ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କୁ କ୍ରାଉନ୍ ପ୍ରିନ୍ସ ତଥା ବ୍ରୁନେଇ ଦାରୁସଲାମସ୍ଥିତ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟର ବରିଷ୍ଠ ମନ୍ତ୍ରୀ ହାଜି ଅଲ୍‌-ମୁହତାଦି ବିଲ୍ଲାହ ସ୍ୱାଗତ କରିଥିଲେ । ମହାମହିମ ପ୍ରଧାନମନ୍ତ୍ରୀଙ୍କ ସହ ଦ୍ୱିପାକ୍ଷିକ ବୈଠକ କରିଥିଲେ ଏବଂ ଇସ୍ତାନା ନୁରୁଲ ଇମାନରେ ତାଙ୍କ ପାଇଁ ଏକ ସରକାରୀ ମଧ୍ୟାହ୍ନ ଭୋଜନର ଆୟୋଜନ କରିଥିଲେ ।

ଉଭୟ ଦେଶ ମଧ୍ୟରେ କୂଟନୈତିକ ସମ୍ପର୍କ ପ୍ରତିଷ୍ଠାର ୪୦ବର୍ଷ ପୂର୍ତ୍ତି ଅବସରରେ ଏହି ଐତିହାସିକ ଗସ୍ତ ହୋଇଥିବାରୁ ଉଭୟ ନେତା ସନ୍ତୋଷ ବ୍ୟକ୍ତ କରିବା ସହ ଗତ ଚାରି ଦଶନ୍ଧି ମଧ୍ୟରେ ବ୍ରୁନେଇ ଦାରୁସଲାମ ଏବଂ ଭାରତ ମଧ୍ୟରେ ଗଭୀର ବନ୍ଧୁତ୍ୱ ବିଭିନ୍ନ କ୍ଷେତ୍ରରେ ସୁଦୃଢ଼ ହୋଇଛି ବୋଲି ସ୍ୱୀକାର କରିଛନ୍ତି।

ଉଭୟ ନେତା ସ୍ୱୀକାର କରିଛନ୍ତି ଯେ ବ୍ରୁନେଇ ଦାରୁସଲାମ ଏବଂ ଭାରତ ମଧ୍ୟରେ ଐତିହାସିକ ସମ୍ପର୍କ ରହିଛି ଯାହା ଶତାବ୍ଦୀ ପୁରୁଣା, ସାଂସ୍କୃତିକ ସମ୍ପର୍କ ଏବଂ ବାଣିଜ୍ୟ ଦ୍ୱାରା ସହାୟକ ହୋଇଛି । ୧୯୮୪ମସିହାରେ ଦୁଇ ଦେଶ ମଧ୍ୟରେ କୂଟନୈତିକ ସମ୍ପର୍କକୁ ଆନୁଷ୍ଠାନିକ ରୂପ ଦେବା ଫଳରେ ଏକ ସ୍ଥାୟୀ ଭାଗିଦାରୀ ଆରମ୍ଭ ହୋଇପାରିଥିଲା ।

ଦେଶର ବିଭିନ୍ନ ବୃତ୍ତିରେ ଭାରତୀୟ ସମ୍ପ୍ରଦାୟର ସାମାଜିକ, ଅର୍ଥନୈତିକ ଓ ଜାତୀୟ ବିକାଶରେ ମୂଲ୍ୟବାନ ଅବଦାନ ପାଇଁ ମହାମହିମ ପ୍ରଶଂସା କରିଥିଲେ ।

 ଗତ କିଛି ବର୍ଷ ମଧ୍ୟରେ ଦ୍ୱିପାକ୍ଷିକ ସମ୍ପର୍କରେଉତ୍କୃଷ୍ଟ ଅଗ୍ରଗତି ବିଷୟରେ ପ୍ରତିଫଳନ କରି ଉଭୟ ନେତା ପାରସ୍ପରିକ ସ୍ୱାର୍ଥର ସମସ୍ତ କ୍ଷେତ୍ରରେ ଭାଗିଦାରୀକୁ ଆହୁରି ସୁଦୃଢ଼, ଗଭୀର ଏବଂ ବୃଦ୍ଧି କରିବା ପାଇଁ ସେମାନଙ୍କର ପ୍ରତିବଦ୍ଧତାକୁ ଦୋହରାଇଥିଲେ ।

ପ୍ରତିରକ୍ଷା, ଯୋଗାଯୋଗ, ବାଣିଜ୍ୟ ଓ ପୁଞ୍ଜିନିବେଶ, ଅକ୍ଷୟ ଶକ୍ତି ସମେତ ଶକ୍ତି, ମହାକାଶ, ଆଇସିଟି, ସ୍ୱାସ୍ଥ୍ୟ ଓ ଔଷଧ, ଶିକ୍ଷା ଓ ଦକ୍ଷତା ବିକାଶ, ସଂସ୍କୃତି, ପର୍ଯ୍ୟଟନ, ଯୁବକ ଓ ଲୋକଙ୍କ ମଧ୍ୟରେ ଆଦାନ ପ୍ରଦାନ ଏବଂ ପାରସ୍ପରିକ ସ୍ୱାର୍ଥସମ୍ପନ୍ନ ଆଞ୍ଚଳିକ ଓ ଆନ୍ତର୍ଜାତିକ ପ୍ରସଙ୍ଗ ରେ ସହଯୋଗ ବୃଦ୍ଧି ପାଇଁ କରିବା କ୍ଷେତ୍ରରେ ଉଭୟ ନେତା ଆଲୋଚନା କରିଥିଲେ।

ଉଭୟ ନେତା ବର୍ତ୍ତମାନର ଦ୍ୱିପାକ୍ଷିକ ବ୍ୟବସ୍ଥା ମାଧ୍ୟମରେ ଘନିଷ୍ଠ ଯୋଗାଯୋଗର ଗୁରୁତ୍ୱକୁ ସ୍ୱୀକାର କରିଥିଲେ ଏବଂ ବୈଦେଶିକ କାର୍ଯ୍ୟାଳୟ ପରାମର୍ଶ ଏବଂ ବିଭିନ୍ନ ଯୁଗ୍ମ କାର୍ଯ୍ୟକାରୀ ଗୋଷ୍ଠୀ ବୈଠକର ନିୟମିତ ଆୟୋଜନ ସମେତ ପାରସ୍ପରିକ ସ୍ୱାର୍ଥସମ୍ପନ୍ନ ଦ୍ୱିପାକ୍ଷିକ ଏବଂ ବହୁପାକ୍ଷିକ ପ୍ରସଙ୍ଗଉପରେ ନିୟମିତ ବୈଠକ, ବିନିମୟ ଏବଂ ଆଲୋଚନା ଜାରି ରଖିବାକୁ ରାଜି ହୋଇଥିଲେ ।

ପାରସ୍ପରିକ ସ୍ୱାର୍ଥ କ୍ଷେତ୍ରରେ ଦ୍ୱିପାକ୍ଷିକ ବାଣିଜ୍ୟ ଓ ଅର୍ଥନୈତିକ ସମ୍ପର୍କକୁ ଆହୁରି ବିସ୍ତାର କରିବାକୁ ଉଭୟ ନେତା ରାଜି ହୋଇଥିଲେ। ଯୁଗ୍ମ ବାଣିଜ୍ୟ କମିଟି (ଜେଟିସି) ଏବଂ ଅନ୍ୟାନ୍ୟ ପ୍ରାସଙ୍ଗିକ ଦ୍ୱିପାକ୍ଷିକ, ଆଞ୍ଚଳିକ ଏବଂ ବହୁପାକ୍ଷିକ ଫୋରମ୍ ଭଳି ପ୍ରମୁଖ ପ୍ଲାଟଫର୍ମ ମାଧ୍ୟମରେ ନିୟମିତ ଆଦାନପ୍ରଦାନ ଏବଂ ଆଲୋଚନାର ମହତ୍ୱ ଉପରେ ସେମାନେ ଗୁରୁତ୍ୱାରୋପ କରିଥିଲେ ।

ବୈଷୟିକ ଜ୍ଞାନକୌଶଳ, ଅର୍ଥ, ଉତ୍ପାଦନ ଏବଂ ପ୍ରକ୍ରିୟାକରଣ ସମେତ ସମ୍ପୃକ୍ତ ଶକ୍ତିର ଉପଯୋଗ କରିବା ଏବଂ ପାରସ୍ପରିକ ଲାଭଦାୟକ ଉପାୟରେ ପରିପୂରକତା ଅନୁସନ୍ଧାନ କରିବାକୁ ଉଭୟ ନେତା ଆହ୍ୱାନ ଦେଇଥିଲେ।

ଉଭୟ ନେତା ଖାଦ୍ୟ ନିରାପତ୍ତାର ଗୁରୁତ୍ୱକୁ ସ୍ୱୀକାର କରିଥିଲେ ଏବଂ ଜ୍ଞାନ, ସର୍ବୋତ୍ତମ ଅଭ୍ୟାସ ଏବଂ ଅଭିଜ୍ଞତା ଆଦାନ ପ୍ରଦାନ ମାଧ୍ୟମରେ କୃଷି ଏବଂ ଖାଦ୍ୟ ଯୋଗାଣ ଶୃଙ୍ଖଳାରେ ସହଯୋଗ ବୃଦ୍ଧି କରିବାକୁ ରାଜି ହୋଇଥିଲେ ।

ମହାକାଶ କ୍ଷେତ୍ରରେ ଭାରତର ଜାରି ରହିଥିବା ପ୍ରୟାସରେ ଯୋଗଦାନ ଦେଇଥିବା ଭାରତୀୟ ମହାକାଶ ଗବେଷଣା ସଂସ୍ଥା (ଇସ୍ରୋ)ର ଟେଲିମେଟ୍ରି ଟ୍ରାକିଂ ଏବଂ ଟେଲିକମ୍ମାଣ୍ଡ (ଟିଟିସି) ଷ୍ଟେସନର ଆୟୋଜନ ଜାରି ରଖିଥିବାରୁ ପ୍ରଧାନମନ୍ତ୍ରୀ ବ୍ରୁନେଇ ଦାରୁସଲାମଙ୍କୁ ଗଭୀର ପ୍ରଶଂସା କରିଥିଲେ । ଉଭୟ ନେତା ଦୁଇ ସରକାରଙ୍କ ମଧ୍ୟରେ ଦୀର୍ଘ ଦିନ ଧରି ବୁଝାମଣା ପତ୍ର (ଏମଓୟୁ) ଅଧୀନରେ ଚାଲିଥିବା ବୁଝାମଣା ଏବଂ ବୁଝାମଣାପତ୍ର ଅଧୀନରେ ପାରସ୍ପରିକ ସ୍ୱାର୍ଥ କ୍ଷେତ୍ରରେ ଅଧିକ ସହଯୋଗକୁ ସ୍ୱାଗତ କରି ନୂତନ ବୁଝାମଣାପତ୍ର ସମ୍ପୂର୍ଣ୍ଣ ହେବା ପାଇଁ ପ୍ରଶଂସା କରିଥିଲେ ।

ଉଭୟ ଦେଶ ମଧ୍ୟରେ ନିୟମିତ ଗସ୍ତ, ପ୍ରଶିକ୍ଷଣ କାର୍ଯ୍ୟକ୍ରମ, ମିଳିତ ଅଭ୍ୟାସ ଏବଂ ନୌସେନା ଓ ତଟରକ୍ଷୀ ଜାହାଜ ପରିଦର୍ଶନ ମାଧ୍ୟମରେ ପ୍ରତିରକ୍ଷା ଏବଂ ସାମୁଦ୍ରିକ ସହଯୋଗ ବୃଦ୍ଧି ର ଗୁରୁତ୍ୱକୁ ଉଭୟ ନେତା ସ୍ୱୀକାର କରିଥିଲେ ।

ଉଭୟ ଦେଶର ଜାହାଜଗୁଡ଼ିକର ନିୟମିତ ବନ୍ଦର-କଲ୍ କୁ ନେଇ ଉଭୟ ନେତା ସନ୍ତୋଷ ବ୍ୟକ୍ତ କରିଛନ୍ତି।

ବନ୍ଦର ସେରି ବେଗୱାନ ଏବଂ ଚେନ୍ନାଇ ମଧ୍ୟରେ ଯୋଜନାବଦ୍ଧ ସିଧାସଳଖ ବିମାନ ଯୋଗାଯୋଗକୁ ଉଭୟ ନେତା ସ୍ୱାଗତ କରିଥିଲେ ଯାହା ଲୋକମାନଙ୍କ ମଧ୍ୟରେ ସୁଦୃଢ଼ ସମ୍ପର୍କକୁ ପ୍ରୋତ୍ସାହିତ କରିବ ଏବଂ ଦୁଇ ଦେଶ ମଧ୍ୟରେ ବାଣିଜ୍ୟ ଏବଂ ପର୍ଯ୍ୟଟନ କାର୍ଯ୍ୟକଳାପକୁ ବୃଦ୍ଧି କରିବାରେ ସାହାଯ୍ୟ କରିବ ।

ଉଭୟ ନେତା ଜାତୀୟ ବିକାଶ ଦିଗରେ ଯୁବଗୋଷ୍ଠୀଙ୍କ ଗୁରୁତ୍ୱପୂର୍ଣ୍ଣ ଭୂମିକାକୁ ସ୍ୱୀକାର କରିଥିଲେ ଏବଂ ଦୁଇ ଦେଶ ମଧ୍ୟରେ ଅଧିକ ଯୁବ ଆଦାନ ପ୍ରଦାନକୁ ପ୍ରୋତ୍ସାହିତ କରିବାକୁ ସହମତି ପ୍ରକାଶ କରିଥିଲେ ।

ମହାମହିମ ଭାରତୀୟ ବୈଷୟିକ ଏବଂ ଅର୍ଥନୈତିକ ସହଯୋଗ (ଆଇଟିଇସି) ଏବଂ ଇ-ଆଇଟିଇସି କାର୍ଯ୍ୟକ୍ରମ ସମେତ ବିଭିନ୍ନ କାର୍ଯ୍ୟକ୍ରମ ଅଧୀନରେ ବ୍ରୁନିଆର ନାଗରିକମାନଙ୍କ ପାଇଁ ଭାରତ ଦ୍ୱାରା ପ୍ରଦାନ କରାଯାଇଥିବା ପ୍ରଶିକ୍ଷଣ ଏବଂ ବୃତ୍ତି ପ୍ରଦାନକୁ ପ୍ରଶଂସା କରିଥିଲେ ଏବଂ ସେମାନଙ୍କୁ ସ୍ୱାଗତ କରିବା ଜାରି ରଖିଛନ୍ତି ।

ଉଭୟ ନେତା ଏହି ଅଞ୍ଚଳର ଶାନ୍ତି, ସ୍ଥିରତା, ନିରାପତ୍ତା, ସମୃଦ୍ଧି ଏବଂ ସ୍ଥିରତା ବଜାୟ ରଖିବା ପାଇଁ ସେମାନଙ୍କର ଦୃଢ଼ ପ୍ରତିବଦ୍ଧତାକୁ ଦୋହରାଇଥିଲେ ଏବଂ ମିଳିତ ଜାତିସଂଘ ଚାର୍ଟର ଏବଂ ଅନ୍ତର୍ଜାତୀୟ ଆଇନରେ ଦର୍ଶାଯାଇଥିବା ନୀତିଗୁଡ଼ିକୁ ପାଳନ କରିବାର ଗୁରୁତ୍ୱ ଉପରେ ଗୁରୁତ୍ୱାରୋପ କରିଥିଲେ ।

ଆସିଆନ୍‌-ଭାରତ ଆଲୋଚନା ସମ୍ପର୍କ, ପୂର୍ବ ଏସିଆ ଶିଖର ସମ୍ମିଳନୀ, ଆସିଆନ୍ ଆଞ୍ଚଳିକ ଫୋରମ୍‌, ଏସିଆ-ୟୁରୋପ ବୈଠକ (ଏଏସ୍‌ଇଏମ୍‌) ଏବଂ ଜାତିସଂଘ (ୟୁଏନ୍‌) ଭଳି ବିଭିନ୍ନ ଆଞ୍ଚଳିକ ଓ ବହୁପାକ୍ଷିକ କ୍ଷେତ୍ରରେ ସହଯୋଗକୁ ସୁଦୃଢ଼ କରିବାକୁ ଉଭୟ ନେତା ରାଜି ହୋଇଥିଲେ। ଶାନ୍ତି ଓ ବିକାଶ କୁ ସୁନିଶ୍ଚିତ କରିବା ପାଇଁ ନିୟମ ଭିତ୍ତିକ ଅନ୍ତର୍ଜାତୀୟ ବ୍ୟବସ୍ଥାକୁ ପାଳନ କରିବା ମହତ୍ୱ ବୋଲି ନେତାମାନେ ମତ ବ୍ୟକ୍ତ କରିଛନ୍ତି।

ସମସାମୟିକ ବାସ୍ତବତାକୁ ପ୍ରତିଫଳିତ କରୁଥିବା ବହୁପକ୍ଷବାଦବୃଦ୍ଧି ପାଇଁ ଉଭୟ ନେତା ମିଳିତ ଭାବେ କାର୍ଯ୍ୟ କରିବାକୁ ରାଜି ହୋଇଥିଲେ।

ଆସିଆନ୍ – ଭାରତ ବ୍ୟାପକ ରଣନୈତିକ ଭାଗିଦାରୀକୁ ଅଧିକ ସୁଦୃଢ଼ କରିବା ପାଇଁ ଉଭୟ ନେତା ପାରସ୍ପରିକ ଲାଭଦାୟକ କ୍ଷେତ୍ରରେ ମିଳିତ ଭାବେ କାର୍ଯ୍ୟ କରିବାକୁ ସେମାନଙ୍କର ପ୍ରତିବଦ୍ଧତାକୁ ଦୋହରାଇଥିଲେ।

ଶାନ୍ତି, ସ୍ଥିରତା, ସାମୁଦ୍ରିକ ନିରାପତ୍ତା ଏବଂ ନିରାପତ୍ତା ବଜାୟ ରଖିବା ଏବଂ ପ୍ରୋତ୍ସାହିତ କରିବା ସହିତ ଅନ୍ତର୍ଜାତୀୟ ଆଇନ, ବିଶେଷକରି ସମୁଦ୍ର ଆଇନ ଉପରେ ଜାତିସଂଘ ସମ୍ମିଳନୀ (ୟୁଏନସିଏଲଓଏସ୍‌) ୧୯୮୨ ଅନୁଯାୟୀ ନାଭିଗେସନ୍ ଏବଂ ଓଭରଫ୍ଲାଇଟ୍ ଏବଂ ଅବାଧ ଆଇନଗତ ବାଣିଜ୍ୟର ସ୍ୱାଧୀନତାକୁ ସମ୍ମାନ ଦେବା ପାଇଁ ଉଭୟ ନେତା ସେମାନଙ୍କର ପ୍ରତିବଦ୍ଧତାକୁ ଦୋହରାଇଥିଲେ। ଅନ୍ତର୍ଜାତୀୟ ଆଇନ, ବିଶେଷ କରି ୟୁଏନସିଏଲଓଏସ୍ ୧୯୮୨ ଅନୁଯାୟୀ ଶାନ୍ତିପୂର୍ଣ୍ଣ ଉପାୟରେ ବିବାଦର ସମାଧାନ କରିବାକୁ ନେତାମାନେ ସମସ୍ତ ପକ୍ଷଙ୍କୁ ଅନୁରୋଧ କରିଛନ୍ତି।

ଉଭୟ ନେତା ସମସ୍ତ ପ୍ରକାର ଆତଙ୍କବାଦକୁ ନିନ୍ଦା କରିବା ସହ ଏହାକୁ ପ୍ରତ୍ୟାଖ୍ୟାନ କରିବାକୁ ରାଜ୍ୟମାନଙ୍କୁ ଆହ୍ୱାନ ଦେଇଛନ୍ତି। କୌଣସି ଦେଶ ନିଜ ନିୟନ୍ତ୍ରଣରେ ଥିବା ଅଞ୍ଚଳକୁ ଆତଙ୍କବାଦ ପାଇଁ ବ୍ୟବହାର କରିବାକୁ ଅନୁମତି ଦେବା ଉଚିତ ନୁହେଁ ବୋଲି ସେମାନେ ଗୁରୁତ୍ୱାରୋପ କରିଥିଲେ। କୌଣସି ଦେଶ ଆତଙ୍କବାଦୀଙ୍କୁ ଆଶ୍ରୟ ଦେବା ଉଚିତ ନୁହେଁ ଏବଂ ଆତଙ୍କବାଦୀ କାର୍ଯ୍ୟକଳାପର ଦୋଷୀମାନଙ୍କୁ ନ୍ୟାୟ ଦେବା ପାଇଁ ମିଳିତ ଭାବେ କାର୍ଯ୍ୟ କରିବାକୁ ସଂକଳ୍ପ ନେଇଥିଲେ । ଆତଙ୍କବାଦ ଏବଂ ଆନ୍ତର୍ଜାତିକ ସଂଗଠିତ ଅପରାଧ ସମ୍ପର୍କକୁ ସ୍ୱୀକୃତି ଦେଇ ଉଭୟ ନେତା ଏ ଦିଗରେ ସହଯୋଗ ବୃଦ୍ଧି କରିବାକୁ ରାଜି ହୋଇଥିଲେ। ଆତଙ୍କବାଦ ର ମୁକାବିଲା ପାଇଁ ମିଳିତ ଜାତିସଂଘ ଏବଂ ଅନ୍ୟାନ୍ୟ ବହୁପକ୍ଷୀୟ କ୍ଷେତ୍ରରେ ମିଳିତ ଭାବେ କାର୍ଯ୍ୟ କରିବାକୁ ଉଭୟ ପକ୍ଷ ସହମତି ହୋଇଛନ୍ତି।

ପ୍ୟାରିସ୍ ଚୁକ୍ତି ଭଳି ଆନ୍ତର୍ଜାତିକ ଜଳବାୟୁ ଉଦ୍ଦେଶ୍ୟ ଅନୁଯାୟୀ ଜଳବାୟୁ ପରିବର୍ତ୍ତନର ମୁକାବିଲା କରିବା ଏବଂ ଏହି ବଢୁଥିବା ଆହ୍ୱାନର ପ୍ରତିକୂଳ ପ୍ରଭାବକୁ ହ୍ରାସ କରିବା ଦିଗରେ ପ୍ରୟାସ କୁ ବୃଦ୍ଧି କରିବା ର ଜରୁରୀ ଆବଶ୍ୟକତା ଉପରେ ଉଭୟ ନେତା ରାଜି ହୋଇଥିଲେ । ଅନ୍ତର୍ଜାତୀୟ ସୌର ମେଣ୍ଟ (ଆଇଏସଏ), ବିପର୍ଯ୍ୟୟ ପ୍ରତିରୋଧୀ ଭିତ୍ତିଭୂମି ପାଇଁ ମେଣ୍ଟ (ସିଡିଆରଆଇ) ଏବଂ ଗ୍ଲୋବାଲ ବାୟୋ-ଇନ୍ଧନ ଆଲାଏନ୍ସ (ଜିବିଏ) ପ୍ରତିଷ୍ଠା ରେ ଭାରତର ପଦକ୍ଷେପକୁ ମହାମହିମ ପ୍ରଶଂସା କରିଥିଲେ । ଆସିଆନ୍ ଜଳବାୟୁ ପରିବର୍ତ୍ତନ କେନ୍ଦ୍ର ର ଆୟୋଜନ ପାଇଁ ବ୍ରୁନେଇ ଦାରୁରସଲାମଙ୍କ ପ୍ରୟାସକୁ ଭାରତର ସମର୍ଥନକୁ ମଧ୍ୟ ମହାମହିମ ପ୍ରଶଂସା କରିଥିଲେ ।

ଭଏସ୍ ଅଫ୍ ଦି ଗ୍ଲୋବାଲ୍ ସାଉଥ୍ ଶିଖର ସମ୍ମିଳନୀ (ଭିଓଜିଏସ୍‌ଏସ୍‌)ରେ ବ୍ରୁନେଇ ଦାରୁସଲାମଙ୍କ ନିରନ୍ତର ଅଂଶଗ୍ରହଣକୁ ପ୍ରଧାନମନ୍ତ୍ରୀ ସ୍ୱାଗତ କରିଥିଲେ । ଭାରତର ନେତୃତ୍ୱାଧୀନ ଏହି ପଦକ୍ଷେପର ଉଦ୍ଦେଶ୍ୟ ହେଉଛି ବିଶ୍ୱ ଦକ୍ଷିଣର ଦେଶଗୁଡ଼ିକୁ ଏକ ସାଧାରଣ ପ୍ଲାଟଫର୍ମ ଅଧୀନରେ ଏକାଠି କରିବା ଏବଂ ବିଭିନ୍ନ ପ୍ରସଙ୍ଗରେ ସେମାନଙ୍କର ଦୃଷ୍ଟିକୋଣ ଏବଂ ପ୍ରାଥମିକତା ବାଣ୍ଟିବା ପାଇଁ ଏକ ବୁଝାମଣା ଉପସ୍ଥାପନ କରାଇଥିବା ଉଚିତ ।

ଏହି ଗସ୍ତ ସମୟରେ ତାଙ୍କୁ ଏବଂ ତାଙ୍କର ପ୍ରତିନିଧି ଦଳକୁ ମିଳିଥିବା ଉଷ୍ମ ସ୍ୱାଗତ ଏବଂ ଆତିଥ୍ୟ ପାଇଁ ପ୍ରଧାନମନ୍ତ୍ରୀ ମହାମହିମଙ୍କୁ ପ୍ରଶଂସା କରିଥିଲେ । ନିକଟ ଭବିଷ୍ୟତରେ ଭାରତ ଗସ୍ତ ରେ ଆସିବା ପାଇଁ ପ୍ରଧାନମନ୍ତ୍ରୀ ମହାମହିମଙ୍କୁ ନିମନ୍ତ୍ରଣ ମଧ୍ୟ ଦେଇଛନ୍ତି ।

*****

NS/SLP