ভারতকী প্রধানমন্ত্রী

         ভারত মাতা কী জয়!

ভারত মাতা কী জয়!

ভারত মাতা কী জয়!

অদুদি ঐহাক হৌবা য়ারদ্রা? হিস এক্সিলেন্সী ওস্ত্রিয়াগী একনোমী অমসুং লেবর মন্ত্রী, ঐহাক্কী ইন্দিয়ন দাইস্পোরাগী মরুপশিং, ভারতকী মরুপ খুদিংমক, নুংশিবীবা পুম্নমকপু খুরমজরি।

গত্তিংতেগ!

মরুপশিং,

মসিনা ঐহাক্কী ওস্ত্রিয়াগী ইহান হানবা খোঙচৎনি। মফম অসিদা ঐহাক্না উরিবা লাংতক্নবা খৌরাংবসি অদুক্কী মতীক অঙকপা অমনি। চহি ৪১গী মতুংদা ভারতকী প্রধান মন্ত্রী অমনা মফম অসিদা লাক্লি। নখোয় অয়াম্বনা প্রধান মন্ত্রী অমনা মফম অসিদা লাক্লম্লবা মতুংদা পোকপা কয়া অমা ওইগনি। য়াম্না কুইনা ঙাইরে হায়না খনব্রা, চুম্মিকো? হৌজিক্তি ঙাইবদু লোইরে। হৌজিক্তি পুম্নমক নুংঙাইরবা নত্ত্রা? নখোয় পুম্নমক নুংঙাইরে হায়বসি ঐহাক্না হায়য়ু হায়রিবরা? শেংনা?

মরুপশিং,

ঙাইবগী অরোইবা মীকুপ অসিসু য়াম্না পুৱারীদা লৈহৌরগদবা মওং অমদনি। নখোয় কয়া অমদি ভারত অমসুং ওস্ত্রিয়ানা মরুপ শানরকপগী চহি ৭৫শুবা পালন তৌরি হায়বসি খংলম্লোই। ঐহাক্না চান্সেলর কার্ল নেহাম্মরবু অসিগুম্বা মওংদা হরাওনা ওকপীবগীদমক থাগৎচরি। ঐহাক্না একনোমি অমসুং লেবর মন্ত্রী মার্তিন কোকরবুসু থাগৎচরি। অদোম্না মফম অসিদা লাকপীবসিনা মফম অসিদা লৈরিবা ভারত মচাশিং অসিগীদমক ওস্ত্রিয়ানা কয়া য়াম্না খনবীবগে হায়বদু তাক্লে।

মরুপশিং,

জিওগ্রাফিকেল ওইনা য়েংবদা ভারত অমসুং ওস্ত্রিয়ানা ৱাংম-ৱাংমদা লৈনরি, অদুমওইনমক ঐখোয়গী মরক্তা মান্নবা কয়া অমা লৈ। গনতন্ত্রনা ঐখোয়গী লৈবাক অনিসিবু শম্নরি। নীংতম্বা, মান্নবা, প্লুরেলিজম অমসুং আইনবু ইকাই খুম্নবনা ঐখোয়গী মান্নবা মগুন ওইরি। খুন্নাই অনিমক অসিদা মলতিকলচরেলিজম অমসুং মলতিলিঙ্গুএল ওইরি। লৈবাক অনিমক্তা, ঐখোয়গী খুনাই অসিদা মান্নদবা কয়া অসিবু হরাওনা লৈমিন্নরি। অমসুং অসিগুম্বা মগুন অসিবু মশক তাক্লিবসিনা মীখলনি। ওস্ত্রিয়াদা থা খরগী মতুংদা মীখল পাঙথোক্লগনি। ভারত্তদি, গনতন্ত্রগী কুমহৈ অসি চাউনা হরাও তয়াম্বগা লোইননা পাঙথোকখ্রে। মালেমগী খ্বাইদগী চাউবা মীখল অদু ভারত্তা লোইশিনখ্রে।

মরুপশিং,

ঙসিদি মালেমগী মীয়াম্না ভারতকী মীখলগী মরমদা তাবদা অঙকপা পোক্নরে। চয়োল খরগী মমাংদা লোইশিনখিবা মীখল অদুদা, মীওই মিলিয়ন ৬৫০ হেনবনা মখোয়গী ভোত থাদনখি। মসিনা তাক্লিবসি লাখ ৬৫ রোম ওইরম্বসু য়াই, অমসুং অসুক চাউবা মীখল অমা পাঙথোক্লবা মতুংদা মীখলগী ফল পুম্বা পুং খরদা হায়দোক্লিবনি। মসিনা ভারতকী মীখলগী মেচিনরী অমসুং ঐখোয়গী গনতন্ত্রগী পাঙ্গল হায়বদু।

মরুপশিং,

রাজনিতী দল চাম্মরোমদগী কেন্দিদেৎ লিশিং নিপাল হেনবনা ভারতকী মীখল অসিদা শরুক য়াখি। অসিগুম্বা থাক্তা, অসুক পাক চাউনা অথোই অহেন তান্নবা অসিদা লৈবাক অসিগী মীয়াম্না মখোয়গী অপাম্বদু ফোংদোকখ্রে। লৈবাক অসিনা করি মোৎ পীখিবগে? চহি হুম্ফুগী মতুংদা, ভারত্তা লৈঙাক অমনা অহুম্লকশুবা তার্ম পায়ননবা খুদোংচাবা অমা পীবীরে। ঐখোয়না রাজনিতীগী তংদু লৈতাদবা কয়া মালেম পুম্বদা কোভিদকী মতুংদা উখ্রে। মসিগী মতুংদা লৈবাক কয়াদা লৈঙাক শেম্বদা অৱাবা পোক্নরি। নৌনা অমুক্কা খল্লকপা হায়বসি য়াম্না চাউবা অৱাবা অমনি। অসিগুম্বা মতাং অসিদা, ভারতকী মীয়াম্না ঐবু, ঐগী দলবু, এন.দি.এ.বু থাজবীরি। মসিগী মেন্দেত অসিনা তাক্লে মদুদি ভারতনা তংদু লৈতাবা পামি, ভারতনা মখা চত্থবা পাম্মি। মসিনি মমাংগী চহি তরাগী থৌরাং থৌরাংশিং মখা চত্থবা হায়বদু। মসিগী মখা চত্থবা হায়বসিনি অফবা লৈঙাক্লোন হায়বদু। মসিগী মখা চত্থবসিনি অচৌবা ৱারেপ হায়বদু।

মরুপশিং,

ঐহাক্না মতম চুপ্পদা থাজৈ মদুদি লৈবাক অনি অসিগী মরী অসি লোঙাক খক্তনা শেম্বা নত্তে। মীয়াম্না শরুক য়াবা হায়বসিসু মরী ফগৎনবগীদমক্তদি য়াম্না মরুওইবা অমনি। মসিগী মরম অসিননি, ঐহাক্না নখোয় পুম্নমক্কী থৌদাং অসি য়াম্না চাউই হায়রিবসি। অদোম্না মোজার্ত অমসুং স্ত্রোদেলগী লম অসিবু নশাগী ওইনা চহি তরাগী মমাংদগী শেম্লক্লে। অদুবু ইমা লৈবাক্কী ঈশৈ অমসুং মহাওদি নখোয়গী থম্মোইদা অদুমক লৈরি। নখোয়না ভিএনা, গ্রোথ, লিঞ্জ, ইন্সব্রক, সালজবর্গ অমসুং অতৈ শহরশিংবু ভারতকী মচুনা য়োমহল্লে। অদোম্না দিৱালি নৎত্রগা খৃস্তমাসপু চপ মানবা ইথিলগা লোইননা পাঙথোক্লি। নখোয়না তোর্তা অমসুং লদ্দুবু গ্রেত গস্তোগা লোইননা শেম্লি অমসুং চারি। নখোয়না ওস্ত্রিয়াগী ফুৎবোল তীম অমসুং ভারতকী ক্রিকেত তীম্বু চপ মান্নবা নুংঙাইবগা লোইননা পুক্নিং থৌগৎলি। নখোয়না মফম অসিয়া কোফী হাওনা থকই অমসুং ভারতকী নখোয়গী শহরগী চা দুকানশিংবুসু নীংশিংলি।

মরুপশিং,

ভারতকুম্না, ওস্ত্রিয়াগী পুৱারী নাৎশিং অসি য়াম্না লিরে অমসুং অঙকপা পোক্নিংঙাই ওই। ঐখোয়না অমগা অমগা পাউ ফাওনবগী ৱারীসু পুৱারীদগী লৈরক্লে অমসুং লৈবাক অনিনা মসিদগী কান্নবা লৌমিন্নরি। অসিগুম্বা খুদোংচাবা অসি কলচর অমসুং কমর্সতা লৈরক্লি। ভিএনা য়ুনিভর্সিতীদা চহি ২০০গী মমাংদগী সংস্কৃত তম্বা হৌখ্রে। মসি ১৮৮০দা ইন্দিপেন্দেন্ত চীয়র ফোর ইন্দোলোজী লিংখৎপদগী অমুক্কা হেন্না ৱাংখৎখি। ঙসিদি ঐহাক্না মফম অসিদা লৈবা অফাওবা ইন্দোলোজিস্তশিং উনবগী খুদোংচাবশিংসু ফঞ্জরে। মখোয়না হায়বদগী ময়েক শেংনা খঙলে মদুদি মখোয়দা ভারতকী মতাংদা খঙনিংবা কয়া অমা লৈ। ভারতকী অফাওবা মীওই কয়া অমা ওস্ত্রিয়াদগী নুংশিবা ফংজৈ। ভিএনানা রবিন্দ্রনাথ তেগোর অমসুং নেতাজি সুভাশকুম্বা অফাওবা মীওইশিং তরাম্না ওকখি অমসুং গান্ধীজিগী তুংইনবা মিরাবেন্না ভিএনাদা মহাক্কী অরোইবা মতম লেনখি।

মরুপশিং,

ঐখোয়না নাত অমসুং কম্মর্স খক্তদা মরী থম্বা নত্তে, সাইন্সনসু ঐখোয়বু শম্নহল্লি। চহি কয়াগী মমাংদা, ঐখোয়গী নোবেল প্রাইজ লৌখিবা সার সি.ভি. রমন্না ভিএনা য়ুনিভর্সিতীদা লেকচর পীখি। ঙসিদি ঐহাক্না নোবেল প্রাইজ ৱিনর এন্তন জৈলিঙ্গরগা উনবগী খুদোংচাবা ফংলে। ক্বান্তম্না হায়রিবা অফাওবা সাইন্তিস্ত অনি অসিবু শম্নহল্লি। এন্তন জৈলিঙ্গরনা ক্বান্তম কম্প্যুতিংদা মালেম পুম্ববু ইনোৎ হাপ্লি অমসুং ইথিল পীরি।

মরুপশিং,

ঙসিদি, মালেম পুম্বদা ভারতকী মতাংদা খন্ননৈনরি। মসি থোকপ্রা থোক্তবরা? মীপুম খুদিংমক্না ভারতকী মতাংদা ৱারী শানরি। মীপুম খুদিংমক্না ভারতকী মতাংদা খঙবা পাম্লি। নখোয়দসু মসিমক থোক্লমগনি, চুম্মিকো? মীয়াম্না নখোয়দা কয়া অমা হংদব্রো? অসিগুম্বা মতাং অসিদা ভারতনা ঙসি করি খল্লি? ভারতনা ঙসি করি তৌরি? মসিগী মতাংদা মালেমদা হেন্না খঙহনবা অমা চঙই। ভারতনা মীওইবা জাতিগী ৬থোকপগী ১ গী মহুৎ শিল্লি। চহি লিশিং কয়া অমা, ঐখোয়না মালেমগা লোইননা খঙ হৈবা অমসুং লৌশিং কয়া লান্নরি। ঐখোয়না লান তৌখিদে; ঐখোয়না মালেমদা চাউথোক্না হায়বা য়াই মদুদি ভারতনা বুদ্ধ পীখি, লান পীখিদে। ঐহাক্না বুদ্ধগী মতাংদা ঙাংবা মতমদা মসিনা তাক্লিবসি ভারতনা মতম চুপ্পদা শান্তি অমসুং চাউখৎপদদমক পীনবা হোৎনরক্লি। মরম অসিনা ২১শুবা চহি চা অসিদা, ভারতনা থৌদাং অসি হেন্না মপাঙ্গল লৈহন্নবা হোৎনগনি। ঙসিদি মালেম অসিনা ভারতপু ঈচিল ঈনাও অমা ওইনা উরকপা মতমদা, ঐখোয়না চাউথোকচনিংঙাই ওইরি। খোঙথাং খুদিংদা নখোয়না চাউথোকচবা ফাওদব্রা?

মরুপশিং,

নখোয়না ভারত্তা খোঙজেল য়াঙনা হোংলক্লিবশিং অসি পাবা অমসুং তাবা মতমদা করি ফাওই? ঐহাক্না থাজৈ মদুদি নখোয়গী তবক অদু ইঞ্চ ৫৬ য়ৌরমগনি। ভারতনা ঙসিদি মালেমদা খ্বাইদগী চাউবা শেন্মিৎলোন ৫শুবদা লৈ। ২০১৪দা, ঐহাক্না সর্ভিসকী থবক চঙবা মতমদা ঐখোয়না মশীং ১০দা লৈরম্মি, ঐহাক্না মশীং ১০দুতমক হায়বা নত্তে। ঙসিদি ঐখোয়না মশীং ৫ শুবদা । মসি তাবদা নখোয়দা করি ফাওবগে? মরুপশিং নখোয়বু চাউথোকপা ফাওদবরা? ঙসিদি ভারতনা চাদা ১গী চাংদা চাউখৎপা হেনগৎলক্লি। মসিগী খোংজেল অসিদা করি থোকপা য়াই, ঐহাক হায়য়ু হায়বরা? ঐবু হায়রসিরা? ঙসিদি ঐখোয়না মশীং ৫শুবদা লৈরি, অদুগা ঐখোয়না মকোক ৩ গী মরক্তা য়ৌগনি। ঐহাক্না লৈবাক মীয়ামদা হায়খি মদুদি ঐহাক্কী অহুমশুবা তার্মদা ঐহাক্না লৈবা অসিবু মালেমগী মকোক থোংবা শেন্মিৎলোন ৩ গী মনুং চলহনগনি অমসুং ঐহাক্না নখোয়দা হায়জরি মদুদি ঐখোয়না মকোক থোংনবগীদমক্তা হোৎনবা নত্তে, ঐখোয়গী মিসন অসি ২০৪৭নি। লৈবাক অসিনা ১৯৪৭দা নীংখা তমখি, লৈবাক অসিনা নীং তম্বগী চহি চাম্মা ২০৪৭ দা পাঙথোক্কনি। মদুগী চহি চাম্মা অদুনা চাউখৎলবা ভারতকী চহি চাম্মা ওইগনি। ভারতনা হীরম খুদিংমক্তা চাউখৎনবা হোৎনগনি। ঐখোয়না মথংগী চহি ১০০০গী মপাঙ্গল লৈরবা য়ুম্ফম অমা থোল্লমগনি।

মরুপশিং,

ভারতনা মমাংদা অমুক্তা উখিদ্রিবা মওংদা, এজুকেসন, স্কিল, রিসর্চ অমসুং ইন্নোভেসনদা চাউনা হোৎনরি। চহি ১০ খক্তদা, মসিগী ফিভম অসি য়ৌরিবনি। মসি নীংশিংবীয়ু। চহি ১০দা, অনৌবা কোলেজ অনি ভারত্তা নুমিৎ খুদিংগী হাংদোক্লি। মসিদগী হেন্না হায়খো হায়ব্রা? চয়োল খুদিংগী অনৌবা য়ূনিভর্সিতী অমা হাংদোক্লি। মমাং চহিদা, পেতেন্ত ২৫০ হেন্না অয়াবা পীখ্রে। ভারতনা মালেমদা খ্বাইদগী চাউবা স্তার্ত অপ ইকোসিস্তেম অহুমশুবা ওইরি। ঙসিদি, মালেমদা য়ুনিকোর্ন ১০শুবা খুদিং ভারত্তা লৈ। মালেমদা থোক্লিবা রিএল তাইম দিজিতেল ত্রাঞ্জেক্সনগী চাংদু ভারতখক্তদা থোক্লি। ঐখোয়গী পেমেন্তশিং অসি দিজিতেল ওইরে, ঐখোয়গী প্রোসেসশিং অসিসু দিজিতেল ওইরে। ভারতনা চে য়াম্না শীজিন্নদবা, শেল অচৎপা য়াম্না শীজিন্নদবগী মায়কৈদা চঙশিল্লি অদুবু অতৎ অখম লৈতবা শেন্মিৎলোন্দি ওইরি।

মরুপশিং,

ভারতনা খ্বাইদগী ফবা, খ্বাইদগী লংবা, খ্বাইদগী চাউবা অমসুং খ্বাইদগী ৱাংবা মাইলস্তোন অমগীদমক হোৎনরি। ঐখোয়না ভারতপু ইন্দস্ত্রী ৪.০ অমসুং গ্রীন ফ্যুচরগীদমক শেম্লি। গ্রীন হায়দ্রোজেন মিসননা ২০৭০ ফাওবদা নেট জিরোগী পান্দম ফংনবা হোৎনরি। ঐখোয়না গ্রী মোবিলিতীদা মীৎয়েং থম্লি। অমসুং ওস্ত্রিয়ানা অসিগুম্বা ভারতকী চাউখৎপগী ৱারে অসিদগী কান্নবা ফংলি। ঙসিদি, ওস্ত্রিয়ান কম্পেনী ১৫০ দগী হেন্না ভারত্তা তোঙান-তোঙানবা সেক্তরশিংদা লৈরে। মসিনা ইনফ্রাস্ত্রকচরগা মরী লৈননা ভারতকী মঙলানশিং মঙফাওনহনবদা মতেং পাংলি। ওস্ত্রিয়ান কম্পেনীশিংনা ভারত্তা তোঙান-তোঙানবা ইনফ্রাস্ত্রকচর প্রোজেক্তশিং হায়বদি মেত্রো, দেম, তন্নেলশিংদা হোৎনরি অমসুং ঐহাক্না থাজৈ মদুদি লাক্কদবা মতম অসিদা কম্পেনীশিং অমসুং ইনভেস্তরশিং অসিনা মফম অসিদা ভারত্তা হেন্না পাকথোক চাউথোক্কনি।

মরুপশিং,

ওস্ত্রিয়াদা লৈরিবা ভারত মচা মশীং অসি য়াম্না য়াম্বা নত্তে। অদুবু নখোয়না ওস্ত্রিয়ান খুনাইদা তম্লিবা শরুক অসিদি য়াম্না চাউই। অখন্ননা নখোয়না মফম অসিদা হকশেলগী সেক্তরদা লৌরিবা থৌদাং অসি য়াম্না শীংথানিংঙাই ওই। ঐখোয় ভারত মচাশিং অসি নুংশিবা অমসুং চানবীবগীদমক খঙনরি। ঐহাক্না অসিগুম্বা মগুনশিং অসি নখোয়গী শিনফমদা পুদুনা চৎপদা নুংঙাইবা ফাওই। নখোয় পুম্নমক্না ওস্ত্রিয়াগী চাউখৎপগী লম্বীদা অসিগুম্না মতেং পাংগদবনি। ঐহাক্না পুম্নমকপু অমুক্কসু হন্না মশীং অসুক য়াম্না লাকপীবগীদমক থাগৎপা ফোংদোকচরি, ঐহাক্কী মায়কৈদগী অমুক্কা হন্না থাগৎচরি।

মরুপশিং,

ঐহাক্কী অহানবা ওস্ত্রিয়াগী খোঙচৎ অসি য়াম্না মহৈ য়াল্লি। অমুক্কা হন্না ঐহাক্না লৈঙাক অমসুং মফম অসিদা লৈরিবা মীয়ামদা তৌবীমল খঙবা উৎচরি। পুম্নমক্কী মফমদা য়াইফবা পীনবীরসনু। ঐহাক্না থাজৈ মদুদি ওগস্ত ১৫ অসি হন্দক্তি হান্নগী রেকোর্দ খুদিংমক ওইরসনু। মসিমক থোক্কনি, চুম্মিকো? মসি শোইদনা থোক্কনি। ঐহাক্কা লোইননা হায়মিন্নসি –

ভারত মাতাকী – জয়!

ভারত মাতাকী – জয়!

ভারত মাতাকী – জয়!

ভন্দে মাতরম!

ভন্দে মাতরম!

ভন্দে মাতরম!

ভন্দে মাতরম!

ভন্দে মাতরম!

ভন্দে মাতরম!

অদুক্কী মতীক থাগৎচরি!

***