ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ଉତ୍ତର ପ୍ରଦେଶର ସମ୍ଭାଲ ଜିଲ୍ଲାରେ ଶ୍ରୀ କଳ୍‌କୀ ଧାମ ମନ୍ଦିରର ଶିଳାନ୍ୟାସ କରିଛନ୍ତି । ପ୍ରଧାନମନ୍ତ୍ରୀ ଶ୍ରୀ କଳ୍‌କୀ ଧାମ ମନ୍ଦିରର ମଡେଲକୁ ମଧ୍ୟ ଉନ୍ମୋଚନ କରିଥିଲେ । ଶ୍ରୀ କଳ୍‌କୀ ଧାମ ନିର୍ମାଣ ଟ୍ରଷ୍ଟ ଦ୍ୱାରା ଶ୍ରୀ କଳ୍‌କୀ ଧାମ ନିର୍ମାଣ କରାଯାଉଛି ଯାହାର ଅଧ୍ୟକ୍ଷ ହେଉଛନ୍ତି ଆଚାର୍ଯ୍ୟ ପ୍ରମୋଦ କ୍ରିଷ୍ଣମ୍ । ଏହି କାର୍ଯ୍ୟକ୍ରମରେ ବହୁ ସାଧୁସନ୍ଥ, ଧାର୍ମିକ ନେତା ଓ ଅନ୍ୟ ମାନ୍ୟଗଣ୍ୟ ବ୍ୟକ୍ତି ଯୋଗ ଦେଇଛନ୍ତି ।

ସମାବେଶକୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଥିଲେ ଯେ , ଭଗବାନ ଶ୍ରୀରାମ ଏବଂ ଭଗବାନ ଶ୍ରୀକୃଷ୍ଣଙ୍କ ମାଟି ଆଜି ପୁଣି ଥରେ ଭକ୍ତି, ଭାବନା ଏବଂ ଆଧ୍ୟାତ୍ମିକତାରେ ପରିପୂର୍ଣ୍ଣ ହୋଇଛି କାରଣ ଆଉ ଏକ ଗୁରୁତ୍ୱପୂର୍ଣ୍ଣ ତୀର୍ଥସ୍ଥଳୀର ଶିଳାନ୍ୟାସ କରାଯାଉଛି । ସମ୍ଭାଲରେ ଶ୍ରୀ କଳ୍‌କୀ ଧାମ ମନ୍ଦିରର ଶିଳାନ୍ୟାସ କରିବାର ସୁଯୋଗ ପାଇଥିବାରୁ ଶ୍ରୀ ମୋଦୀ କୃତଜ୍ଞତା ଜ୍ଞାପନ କରିବା ସହ ଏହା ଭାରତର ଆଧ୍ୟାତ୍ମିକତାର ଏକ ନୂତନ କେନ୍ଦ୍ର ଭାବେ ଉଭା ହେବ ବୋଲି ବିଶ୍ୱାସ ବ୍ୟକ୍ତ କରିଥିଲେ । ପ୍ରଧାନମନ୍ତ୍ରୀ ମୋଦୀ ବିଶ୍ୱର ସମସ୍ତ ନାଗରିକ ଏବଂ ତୀର୍ଥଯାତ୍ରୀ ମାନଙ୍କୁ ଶୁଭେଚ୍ଛା ଜଣାଇଛନ୍ତି । 

ଧାମ ଉଦ୍‌ଘାଟନ ପାଇଁ ୧୮ ବର୍ଷର ପ୍ରତୀକ୍ଷା ବିଷୟରେ ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ , ଏହା ଜଣାପଡୁଛି ଯେ ଅନେକ ଭଲ କାମ ବାକି ରହିଛି, ଯାହାକୁ ସମ୍ପୂର୍ଣ୍ଣ କରିବାର ଦାୟିତ୍ୱ ତାଙ୍କ ପାଇଁ ରହିଛି । ସେ କହିଛନ୍ତି ଯେ ଜନସାଧାରଣ ଓ ସାଧୁସନ୍ଥ ମାନଙ୍କର ଆଶୀର୍ବାଦରେ ସେ ଅସମ୍ପୂର୍ଣ୍ଣ କାର୍ଯ୍ୟକୁ ସମ୍ପୂର୍ଣ୍ଣ କରିବା ଜାରି ରଖିବେ । 

ଆଜି ଛତ୍ରପତି ଶିବାଜୀ ମହାରାଜଙ୍କ ଜୟନ୍ତୀ ବୋଲି ଉଲ୍ଲେଖ କରି ପ୍ରଧାନମନ୍ତ୍ରୀ ଆଜିର ସାଂସ୍କୃତିକ ପୁନରୁଦ୍ଧାର, ଗୌରବ ଏବଂ ଆମ ପରିଚୟ ଉପରେ ବିଶ୍ୱାସ ପାଇଁ ଶିବାଜୀ ମହାରାଜଙ୍କୁ ଶ୍ରେୟ ଦେଇଥିଲେ । ଛତ୍ରପତି ଶିବାଜୀ ମହାରାଜଙ୍କୁ ପ୍ରଧାନମନ୍ତ୍ରୀ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ । 

ମନ୍ଦିରର ସ୍ଥାପତ୍ୟ ଉପରେ ଆଲୋକପାତ କରି ପ୍ରଧାନମନ୍ତ୍ରୀ କହିଥିଲେ ଯେ ଏଥିରେ ୧୦ଟି ଗର୍ଭ ଗୃହ ରହିବ, ଯେଉଁଠାରେ ମହାପ୍ରଭୁଙ୍କ ସମସ୍ତ ୧୦ଟି ଅବତାର ସ୍ଥାପିତ ହେବେ । ପ୍ରଧାନମନ୍ତ୍ରୀ ମୋଦୀ ସ୍ପଷ୍ଟ କରିଛନ୍ତି ଯେ ଏହି ୧୦ଟି ଅବତାର ମାଧ୍ୟମରେ ଶାସ୍ତ୍ର ଅନୁସାରେ ମାନବ ରୂପ ସମେତ ମହାପ୍ରଭୁଙ୍କ ସମସ୍ତ ରୂପ ଉପସ୍ଥାପନ କରାଯାଇଛି । “ଜୀବନରେ, ଜଣେ ପ୍ରଭୁଙ୍କ ଚେତନା ଅନୁଭବ କରିପାରେ” ବୋଲି ଉଲ୍ଲେଖ କରିବା ସହିତ ପ୍ରଧାନମନ୍ତ୍ରୀ ଆହୁରି ମଧ୍ୟ କହିଥିଲେ, “ଆମେ ପ୍ରଭୁଙ୍କୁ ‘ସିଂହ ବରାହ (ବାର୍‌ହା) ଏବଂ କଚ୍ଛପ (କଇଁଛ)’ ରୂପରେ ପ୍ରତ୍ୟୟ କରିଛୁ । ସେ କହିଛନ୍ତି ଯେ ଏହି ରୂପରେ ମହାପ୍ରଭୁଙ୍କ ପ୍ରତିଷ୍ଠା ପ୍ରଭୁଙ୍କ ପ୍ରତି ଜନସାଧାରଣଙ୍କ ସ୍ୱୀକୃତିର ଏକ ସାମଗ୍ରିକ ଭାବମୂର୍ତ୍ତି ଉପସ୍ଥାପନ କରିବ । 

ଶ୍ରୀ କଳ୍‌କୀ ଧାମ ମନ୍ଦିରର ଶିଳାନ୍ୟାସ କରିବାର ସୁଯୋଗ ଦେଇଥିବାରୁ ପ୍ରଭୁଙ୍କ ଆଶୀର୍ବାଦ ପାଇଁ ପ୍ରଧାନମନ୍ତ୍ରୀ ମହାପ୍ରଭୁଙ୍କୁ ଧନ୍ୟବାଦ ଜଣାଇଥିଲେ । ପ୍ରଧାନମନ୍ତ୍ରୀ ଏହି ଅବସରରେ ଉପସ୍ଥିତ ସମସ୍ତ ସାଧୁସନ୍ଥ ମାନଙ୍କୁ ସେମାନଙ୍କ ମାର୍ଗଦର୍ଶନ ପାଇଁ ପ୍ରଣାମ କରିବା ସହ ଶ୍ରୀ ଆଚାର୍ଯ୍ୟ ପ୍ରମୋଦ କ୍ରିଷ୍ଣମ୍‌ଙ୍କୁ ଧନ୍ୟବାଦ ଜଣାଇଥିଲେ । 

ଆଜିର କାର୍ଯ୍ୟକ୍ରମ ଭାରତର ସାଂସ୍କୃତିକ ପୁନରୁଦ୍ଧାର ପାଇଁ ଆଉ ଏକ ଅନନ୍ୟ ମୁହୂର୍ତ୍ତ ବୋଲି ପ୍ରଧାନମନ୍ତ୍ରୀ କହିଥିଲେ । ଅଯୋଧ୍ୟା ଧାମରେ ଶ୍ରୀରାମ ମନ୍ଦିରର ପବିତ୍ରତା ଏବଂ ନିକଟରେ ଆବୁଧାବିରେ ମନ୍ଦିର ଉଦଘାଟନ ବିଷୟରେ ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ “ଯାହା କଳ୍ପନା ବାହାରେ ଥିଲା ତାହା ବର୍ତ୍ତମାନ ବାସ୍ତବରେ ପରିଣତ ହୋଇଛି” । 

ଗୋଟିଏ ପରେ ଗୋଟିଏ ହେଉଥିବା ଏଭଳି କାର୍ଯ୍ୟକ୍ରମର ଗୁରୁତ୍ୱ ଉପରେ ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ । ସେ ଆଧ୍ୟାତ୍ମିକ ପୁନରୁଦ୍ଧାର ବିଷୟରେ କହିବା ଜାରି ରଖିଥିଲେ ଏବଂ କାଶୀରେ ବିଶ୍ୱନାଥ ଧାମ, କାଶୀର ରୂପାନ୍ତର, ମହାକାଳ ମହାଲୋକ, ସୋମନାଥ ଏବଂ କେଦାରନାଥ ଧାମ ବିଷୟରେ ଉଲ୍ଲେଖ କରିଥିଲେ । ଆମେ ‘ବିକାଶ ଭି ବିରାସତ ଭି – ବିକାଶ ସହିତ ଐତିହ୍ୟ’ ମନ୍ତ୍ର ନେଇ ଆଗକୁ ବଢ଼ୁଛୁ ବୋଲି ସେ କହିଛନ୍ତି । ହାଇଟେକ୍ ସହରାଞ୍ଚଳ ଭିତ୍ତିଭୂମି, ମନ୍ଦିର ସହ ନୂତନ ମେଡିକାଲ କଲେଜ ପ୍ରତିଷ୍ଠା, ବିଦେଶୀ ପୁଞ୍ଜି ନିବେଶ ସହିତ ବିଦେଶରୁ କଳାକୃତି ଫେରାଇ ଆଣିବା ଭଳି ଆଧ୍ୟାତ୍ମିକ କେନ୍ଦ୍ରର ପୁନରୁଦ୍ଧାର ପାଇଁ ସେ ପୁଣି ଥରେ ଦାବି କରିଛନ୍ତି । ସେ କହିଛନ୍ତି ଯେ ଏହା ସୂଚାଉଛି ଯେ ସମୟର ଚକ୍ର ଗତି କରୁଛି । ସେ ଲାଲକିଲ୍ଲାରୁ ତାଙ୍କର ଆହ୍ୱାନକୁ ମନେ ପକାଇଥିଲେ – ‘ୟେ ହି ସମୟ ହୈ ସହି ସମୟ ହୈ’ ଏବଂ ଏହି ଆଗମନକୁ ଗ୍ରହଣ କରିବାର ଆବଶ୍ୟକତା ଉପରେ ସେ ଗୁରୁତ୍ୱାରୋପ କରିଥିଲେ । 

ଅଯୋଧ୍ୟାରେ ଶ୍ରୀରାମ ଜନ୍ମଭୂମି ମନ୍ଦିରର ପ୍ରତିଷ୍ଠା ସମାରୋହକୁ ମନେ ପକାଇ ପ୍ରଧାନମନ୍ତ୍ରୀ ୨୨ ଜାନୁଆରୀ, ୨୦୨୪ରୁ ଏକ ନୂତନ ‘କାଳ ଚକ୍ର’ ର ଶୁଭାରମ୍ଭ ବିଷୟରେ ଦୋହରାଇ ଥିଲେ ଏବଂ ହଜାର ହଜାର ବର୍ଷ ଧରି ଚାଲିଥିବା ଶ୍ରୀରାମ ଶାସନର ପ୍ରଭାବ ଉପରେ ଆଲୋକପାତ କରିଥିଲେ । ସେହିଭଳି ଏବେ ରାମଲାଲା ସ୍ଥାପିତ ହେବା ପରେ ଭାରତ ତା’ର ନୂଆ ଯାତ୍ରା ଆରମ୍ଭ କରୁଛି, ଯେଉଁଠି ଆଜାଦି କା ଅମୃତ କାଳରେ ବିକଶିତ ଭାରତର ସଂକଳ୍ପ କେବଳ ଏକ ଇଚ୍ଛା ନୁହେଁ । ପ୍ରଧାନମନ୍ତ୍ରୀ କହିଥିଲେ, “ଭାରତର ସଂସ୍କୃତି ଏବଂ ପରମ୍ପରା ପ୍ରତ୍ୟେକ ସମୟରେ ଏହି ସଂକଳ୍ପ ମାଧ୍ୟମରେ ବଞ୍ଚିଛି” । 

ଆଚାର୍ଯ୍ୟ ପ୍ରମୋଦ କ୍ରିଷ୍ଣମ୍‌ଙ୍କ ଗବେଷଣା ଓ ଶ୍ରୀ କଳ୍‌କୀଙ୍କ ରୂପ ସମ୍ପର୍କରେ ଗବେଷଣା ଓ ଅଧ୍ୟୟନ ବିଷୟରେ ପ୍ରଧାନମନ୍ତ୍ରୀ ଆଲୋକପାତ କରିବା ସହ ଶାସ୍ତ୍ରଜ୍ଞାନର ଦିଗ ଓ ଅଧ୍ୟୟନ ବିଷୟରେ ଆଲୋକପାତ କରିଥିଲେ ଏବଂ ସୂଚନା ଦେଇଥିଲେ ଯେ କଳ୍‌କୀଙ୍କ ରୂପ ହଜାର ହଜାର ବର୍ଷ ଧରି ଭଗବାନ ଶ୍ରୀରାମଙ୍କ ପରି ଭବିଷ୍ୟତର ମାର୍ଗ ନିର୍ଦ୍ଧାରଣ କରିବ ।

“କଳ୍‌କୀ କାଳ ଚକ୍ରରେ ପରିବର୍ତ୍ତନର ପ୍ରବର୍ତ୍ତକ ଏବଂ ପ୍ରେରଣାର ଉତ୍ସ ମଧ୍ୟ” ବୋଲି ପ୍ରଧାନମନ୍ତ୍ରୀ କହିଥିଲେ । ସେ କହିଛନ୍ତି ଯେ କଳ୍‌କୀ ଧାମ ମହାପ୍ରଭୁଙ୍କୁ ସମର୍ପିତ ଏକ ସ୍ଥାନ ହେବାକୁ ଯାଉଛି ଯିଏ ଏପର୍ଯ୍ୟନ୍ତ ଅବତାରିତ ହୋଇ ନାହାନ୍ତି । ଭବିଷ୍ୟତ ବିଷୟରେ ଏଭଳି ଧାରଣା ହଜାର ହଜାର ବର୍ଷ ପୂର୍ବେ ଶାସ୍ତ୍ରରେ ଉଲ୍ଲେଖ ହୋଇଛି ବୋଲି ସେ ଆଲୋକପାତ କରିଥିଲେ । ଏହି ବିଶ୍ୱାସକୁ ପୂର୍ଣ୍ଣ ବିଶ୍ୱାସ ସହିତ ଆଗେଇ ନେବା ଏବଂ ଏଥି ପାଇଁ ନିଜ ସମ୍ପୂର୍ଣ୍ଣ ଜୀବନ ଉତ୍ସର୍ଗ କରିଥିବାରୁ ଶ୍ରୀ ମୋଦୀ ଆଚାର୍ଯ୍ୟ ପ୍ରମୋଦ କ୍ରିଷ୍ଣମ୍‌ଙ୍କୁ ପ୍ରଶଂସା କରିଥିଲେ । ସେ କଳ୍‌କୀ ମନ୍ଦିର ପ୍ରତିଷ୍ଠା ପାଇଁ ପୂର୍ବ ସରକାର ମାନଙ୍କ ସହ ଆଚାର୍ଯ୍ୟଜୀଙ୍କ ଦୀର୍ଘ ଲଢ଼େଇ ବିଷୟରେ ଉଲ୍ଲେଖ କରିଥିଲେ ଏବଂ ଏଥିପାଇଁ ତାଙ୍କୁ ବହୁବାର କୋର୍ଟକୁ ଯିବାକୁ ପଡିଥିଲା ବୋଲି ଉଲ୍ଲେଖ କରିଥିଲେ । ନିକଟରେ ଆଚାର୍ଯ୍ୟଜୀଙ୍କ ସହ ତାଙ୍କର ବାର୍ତ୍ତାଳାପକୁ ମନେ ପକାଇ ପ୍ରଧାନମନ୍ତ୍ରୀ କହିଥିଲେ ଯେ , ସେ ତାଙ୍କୁ କେବଳ ଜଣେ ରାଜନୈତିକ ବ୍ୟକ୍ତିତ୍ୱ ଭାବରେ ଜାଣିଥିଲେ , କିନ୍ତୁ ଧର୍ମ ଏବଂ ଆଧ୍ୟାତ୍ମିକତା ପ୍ରତି ତାଙ୍କର ସମର୍ପଣ ବିଷୟରେ ତାଙ୍କ ସହିତ କଥାବାର୍ତ୍ତା କରିବା ପରେ ଜାଣିଥିଲେ । “ଆଜି ପ୍ରମୋଦ କୃଷ୍ଣମ୍ ଜୀ ମାନସିକ ଶାନ୍ତିରେ ମନ୍ଦିର କାର୍ଯ୍ୟ ଆରମ୍ଭ କରିବାରେ ସକ୍ଷମ ହୋଇଛନ୍ତି”, ବୋଲି ପ୍ରଧାନମନ୍ତ୍ରୀ ବିଶ୍ୱାସ ବ୍ୟକ୍ତ କରି କହିଥିଲେ ଯେ ଏହି ମନ୍ଦିର ଏକ ଉନ୍ନତ ଭବିଷ୍ୟତ ଦିଗରେ ବର୍ତ୍ତମାନର ସରକାରଙ୍କ ସକାରାତ୍ମକ ଦୃଷ୍ଟିକୋଣର ପ୍ରମାଣ ହେବ ।

ପ୍ରଧାନମନ୍ତ୍ରୀ କହିଥିଲେ ଯେ ପରାଜୟର କବଳରୁ ବିଜୟକୁ କିପରି ଛଡ଼ାଇ ନିଆଯିବ ତାହା ଭାରତ ଜାଣେ । ଏକାଧିକ ନିମନ୍ତ୍ରଣ ସତ୍ତ୍ୱେ ସେ ଭାରତୀୟ ସମାଜର ନମନୀୟତା ଉପରେ ଆଲୋକପାତ କରିଥିଲେ । “ଆଜିର ଭାରତର ଅମୃତ କାଳରେ ଭାରତର ଗୌରବ, ଉଚ୍ଚତା ଏବଂ ଶକ୍ତିର ବୀଜ ପ୍ରସ୍ଫୁଟିତ ହେଉଛି”, ବୋଲି ଉଲ୍ଲେଖ କରିବା ସହିତ ସେ ଆହୁରି ମଧ୍ୟ କହିଥିଲେ ଯେ ସାଧୁ ଏବଂ ଧାର୍ମିକ ନେତାମାନେ ନୂତନ ମନ୍ଦିର ନିର୍ମାଣ କରୁଛନ୍ତି, ତେଣୁ ତାଙ୍କୁ ଦେଶର ମନ୍ଦିର ନିର୍ମାଣ ଦାୟିତ୍ୱ ଦିଆଯାଇଛି । ଦିନରାତି ମୁଁ ଦେଶର ମନ୍ଦିରର ମହିମା ଓ ସମ୍ପ୍ରସାରଣ ପାଇଁ କାମ କରୁଛି ବୋଲି ସେ କହିଛନ୍ତି । ଆଜି ପ୍ରଥମ ଥର ପାଇଁ ଭାରତ ଏପରି ସ୍ଥିତିରେ ପହଞ୍ଚିଛି, ଯେଉଁଠି ଆମେ ଅନୁସରଣ କରୁନାହୁଁ ବରଂ ଏକ ଉଦାହରଣ ସୃଷ୍ଟି କରୁଛୁ ବୋଲି ପ୍ରଧାନମନ୍ତ୍ରୀ ମୋଦୀ କହିଛନ୍ତି । 

ଏହି ପ୍ରତିଶ୍ରୁତିର ଫଳାଫଳ ସମ୍ପର୍କରେ ଉଲ୍ଲେଖ କରି , ପ୍ରଧାନମନ୍ତ୍ରୀ କହିଥିଲେ ଯେ ଭାରତ ଡିଜିଟାଲ ପ୍ରଯୁକ୍ତି ଏବଂ ଉଦ୍ଭାବନର କେନ୍ଦ୍ରରେ ପରିଣତ ହେଉଛି, ଭାରତ ପଞ୍ଚମ ବୃହତ୍ତମ ଅର୍ଥନୀତିରେ ପରିଣତ ହୋଇଛି, ଚନ୍ଦ୍ରଯାନର ସଫଳତା, ବନ୍ଦେ ଭାରତ ଏବଂ ନମୋ ଭାରତ ଭଳି ଆଧୁନିକ ଟ୍ରେନ୍‌, ଆଗକୁ ଆସୁଥିବା ବୁଲେଟ୍ ଟ୍ରେନ୍‌, ହାଇଟେକ୍ ରାଜପଥ ଏବଂ ଏକ୍ସପ୍ରେସୱେର ଏକ ସୁଦୃଢ଼ ନେଟୱାର୍କ ଅନେକ ସଫଳତାର କାହାଣୀ ଉପସ୍ଥାପନ କରୁଛି । ଏହି ସଫଳତା ଭାରତୀୟ ମାନଙ୍କୁ ଗର୍ବ ଅନୁଭବ କରିବାକୁ ଦେଇଛି ଏବଂ ଦେଶରେ ସକାରାତ୍ମକ ଚିନ୍ତାଧାରା ଏବଂ ଆତ୍ମବିଶ୍ୱାସର ଏହି ତରଙ୍ଗ ଆଶ୍ଚର୍ଯ୍ୟଜନକ ବୋଲି ପ୍ରଧାନମନ୍ତ୍ରୀ କହିଥିଲେ । ସେଥିପାଇଁ ଆଜି ଆମର ସାମର୍ଥ୍ୟ ଅସୀମ ଏବଂ ଆମ ପାଇଁ ସମ୍ଭାବନା ମଧ୍ୟ ଅସୀମ । 

ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ଏକ ଦେଶ ସାମୂହିକ ମାଧ୍ୟମରେ ସଫଳ ହେବା ପାଇଁ ଶକ୍ତି ପାଇଥାଏ । ସେ ଆଜି ଭାରତରେ ଏକ ବିରାଟ ସାମୂହିକ ଚେତନା ଦେଖିଛନ୍ତି । ପ୍ରତ୍ୟେକ ନାଗରିକ ସବ୍‌କା ସାଥ, ସବ୍‌କା ବିକାଶ, ସବ୍‌କା ବିଶ୍ୱାସ ଏବଂ ସବ୍‌କା ପ୍ରୟାସର ଭାବନା ନେଇ କାର୍ଯ୍ୟ କରୁଛନ୍ତି ବୋଲି ସେ କହିଥିଲେ । 

ପ୍ରଧାନମନ୍ତ୍ରୀ ଗତ ୧୦ ବର୍ଷର ପ୍ରୟାସ ବିଷୟରେ ଉଲ୍ଲେଖ କରି ପ୍ରଧାନମନ୍ତ୍ରୀ ଆବାସ ଯୋଜନାରେ ୪ କୋଟିରୁ ଅଧିକ ପକ୍କା ଘର, ୧୧ କୋଟି ଶୌଚାଳୟ, ୨.୫ କୋଟି ପରିବାରକୁ ବିଜୁଳି ସଂଯୋଗ, ୧୦ କୋଟିରୁ ଅଧିକ ପରିବାରକୁ ପାଇପ୍ ପାଣି, ୮୦ କୋଟି ନାଗରିକଙ୍କ ପାଇଁ ମାଗଣା ରାସନ, ୧୦ କୋଟି ମହିଳାଙ୍କ ପାଇଁ ରିହାତି ଗ୍ୟାସ ସିଲିଣ୍ଡର, ୫୦ କୋଟି ଆୟୁଷ୍ମାନ କାର୍ଡ, ୧୦ କୋଟି କୃଷକଙ୍କ ପାଇଁ କିଷାନ ସମ୍ମାନ ନିଧି, ମହାମାରୀ ସମୟରେ ମାଗଣା ଟିକା, ସ୍ୱଚ୍ଛ ଭାରତ ଇତ୍ୟାଦି ସମ୍ପର୍କରେ ସୂଚନା ପ୍ରଦାନ କରିଥିଲେ ।

ସରକାରଙ୍କ କାର୍ଯ୍ୟର ଦ୍ରୁତ ଗତି ଓ ବ୍ୟାପକତା ପାଇଁ ପ୍ରଧାନମନ୍ତ୍ରୀ ଦେଶର ନାଗରିକ ମାନଙ୍କୁ ଶ୍ରେୟ ଦେଇଛନ୍ତି । ଆଜିର ଲୋକମାନେ ଗରିବ ଲୋକମାନଙ୍କୁ ସରକାରୀ ଯୋଜନାର ଲାଭ ଉଠାଇବାରେ ସାହାଯ୍ୟ କରୁଛନ୍ତି ଏବଂ ଶତ ପ୍ରତିଶତ ସଚେତନତା ପାଇଁ ଏହି ଅଭିଯାନରେ ଭାଗ ନେଉଛନ୍ତି ବୋଲି ସେ କହିଥିଲେ । ଗରିବ ଲୋକଙ୍କ ସେବା ଭାବନା ଭାରତର ଆଧ୍ୟାତ୍ମିକ ମୂଲ୍ୟବୋଧରୁ ଆସିଛି ଯାହା ‘ନର ମେଁ ନାରାୟଣ’ (ନର ଭିତରେ ନାରାୟଣ) କୁ ପ୍ରେରଣା ଦେଇଥାଏ ବୋଲି ସେ କହିଥିଲେ । ‘ବିକଶିତ ଭାରତ ନିର୍ମାଣ’ ର ପାଞ୍ଚଟି ନୀତି ଏବଂ ‘ଆମ ଐତିହ୍ୟକୁ ନେଇ ଗର୍ବ କରିବା’ ପ୍ରସଙ୍ଗ ଉପରେ କାର୍ଯ୍ୟ କରିବାକୁ ସେ ଦେଶକୁ ନିବେଦନ କରିଥିଲେ ।

ପ୍ରଧାନମନ୍ତ୍ରୀ କହିଥିଲେ ଯେ ଯେତେବେଳେ ବି ଭାରତ ବଡ଼ ସଂକଳ୍ପ ନେଇଥାଏ, ସେତେବେଳେ ଏହାକୁ ମାର୍ଗଦର୍ଶନ କରିବା ପାଇଁ ଦିବ୍ୟ ଚେତନା ନିଶ୍ଚିତ ଭାବରେ ଆମ ମଧ୍ୟରେ କୌଣସି ନା କୌଣସି ରୂପରେ ଆସିଥାଏ । ଗୀତାର ଦର୍ଶନ ବିଷୟରେ ଉଲ୍ଲେଖ କରି ପ୍ରଧାନମନ୍ତ୍ରୀ ନିରବଚ୍ଛିନ୍ନ ପଦକ୍ଷେପ ନେବା ଉପରେ ଗୁରୁତ୍ୱାରୋପ କରିଥିଲେ । “ଆଗାମୀ ୨୫ ବର୍ଷ ପାଇଁ ଏହି ‘କର୍ତ୍ତବ୍ୟ କାଳ’ ରେ ଆମକୁ କଠିନ ପରିଶ୍ରମର ଶୀର୍ଷରେ ପହଞ୍ଚିବାକୁ ପଡିବ । ଦେଶ ସେବାକୁ ଆଗଧାଡ଼ିରେ ରଖି ନିଃସ୍ୱାର୍ଥପର ଭାବେ କାମ କରିବାକୁ ପଡ଼ିବ । ଆମର ପ୍ରତ୍ୟେକ ପ୍ରୟାସରୁ ଦେଶକୁ କ’ଣ ଲାଭ ମିଳିବ, ଏହି ପ୍ରଶ୍ନ ଆମ ମନରେ ପ୍ରଥମେ ଆସିବା ଦରକାର । ଏହି ପ୍ରଶ୍ନ ଦେଶର ସାମୂହିକ ଆହ୍ୱାନ ଗୁଡିକର ସମାଧାନ ପ୍ରଦାନ କରିବ ବୋଲି ପ୍ରଧାନମନ୍ତ୍ରୀ କହିଥିଲେ । 

ଅନ୍ୟମାନଙ୍କ ମଧ୍ୟରେ ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଶ୍ରୀ ଯୋଗୀ ଆଦିତ୍ୟନାଥ ଏବଂ ଶ୍ରୀ କଳ୍‌କୀ ଧାମର ପିଠାଧୀଶ୍ୱର, ଆଚାର୍ଯ୍ୟ ପ୍ରମୋଦ କ୍ରିଷ୍ଣମ୍ ପ୍ରମୁଖ ଉପସ୍ଥିତ ଥିଲେ। 

***

SSP