ভারতকী প্রধানমন্ত্রী

অদোম খুরুমজরি !

চাউখৎলবা ভারত অমগী অচেৎপা ফিরেপ অমগা লোয়ননা, মোদীগী গরেন্তিগী গারি লৈবাক অসিগী মফম খুদিংদা য়ৌরে। যাত্রা অসি হৌদোকখিবা থা অমা মপুংফারে। থা অমগী মনুংদা, যাত্রা অসি খুঙ্গং লিশিং কয়া অমসুং সহর ১৫০০ য়ৌরে। অয়াম্বনা অপীকপা সহরশিংনি। ঙসিদগী যাত্রা অসি রাজস্থান, মধ্য প্রদেস, ছতিসগর, তেলঙ্গানা অমসুং মিজোরমদসু য়ৌরে। মীখলগী কোদ ওফ কন্দক্না মরম ওইদুনা, যাত্রা অসি হায়রিবা রাজ্যশিং অসিদা হৌখিদবনি। রাজ্য খুদিংমক্কী অনৌবা সরকারশিংনা মখোয়গী রাজ্যশিংদা খোঙজেল য়াংনা বিকসিত ভারত বিকাস সংকল্প যাত্রা য়ৌহনগদবনি।

মরুপশিং,

মোদীনা বিকসিত ভারত বিকাস সংকল্প যাত্রা লমথারবসু, অশেংবদি ঙসি লৈবাক অসিগী মীয়াম্না যাত্রা অসি লমজিংলে। বেনিফিসরিশিংগা ঐগা ৱারি শানবদা, লৈবাক অসিগী মীয়াম যাত্রা অসিগীদমক য়াম্না হরাওরে হায়বা নাখৈ শেংলে। মফম অমদা যাত্রা লোইশিনবা মতমদা, অতোপ্পা খুঙ্গংশিংগী মীয়াম্না নত্ত্রগা সহরশিংগী মীয়াম্না যাত্রা অসি লমজিংবা হৌখি। মোদী কি গরেন্তি গারি তরাম্না ওক্নবা অচৌবা মুন্নবা অমা থোক্লে হায়বগী পাউ ঐনা ফংলে, মীয়াম্না অনৌবা মওংশিংদা তরাম্না ওক্নবা চাংদম্নবা অমা লৈরে। নহারোলশিংনা সেলিফিশিং য়াম্না নম্বা ঐনা উরে, মখোয়না মখোয়গী কারশিংগা সেলফিশিং নমখি অমসুং থাগৎখি। মশিং য়াম্লবা মীওইশিং বিকাস ভারত অমগী এম্বেসেদরশিং ওইরক্লে। নমো এপ্প লৌথদুনা চাউখৎলবা ভারত অমগী এম্বেসেদরশিং ওইনবা থৌরাং অমা লৈরে। মীপুম খুদিং যাত্রা অসি শরুক য়ারে। খুঙ্গং নত্ত্রগা সহর ওইগেরা, মশিং য়াম্লবা মীওই কুইজ চাংদম্নবা শরুক য়ারে, মসিনা লৌশিং হেনগৎহল্লে অমসুং ই-পাউ ফংহল্লে। চাংদম্নবা অসিদা মীয়ামশু শরুক য়ারে। চাংদম্নবশিং অসিদগী মীয়াম্না মনা-মথুমশিং ফংবতা নত্তনা, অনৌবা ই-পাউশিং ফংলে অমসুং মদু মীয়ামদা খঙহল্লে।

মরুপশিং,

যাত্রা অসি হৌবদগী, ঐনা যাত্রা অসি ভর্চুএল ওইনা শরুক য়াবা অসি হন্দক্কী অসিনা মরিরকশুবনি। মমাংগী থৌরমশিংদা, ঐনা খুঙ্গংগী মীওইশিংগা ৱারি শানখি। মদু পি.এম কিষান সম্মান নিধি ওইগেরা, মহৌশাগী ওইবা লৌউ মখল ওইগেরা, খন্ন-নৈনবশিং অদু খুঙ্গংগী শেন্মিৎলোনগী তোঙান-তোঙানবা হিরমশিংদা ওইখি। ঐখোয়গী খুঙ্গংশিং চাউখৎহনবা অপীকপা হিরমশিং, তোঙান-তোঙানবা হিরমশিং ঐনা খন্নখি। ঐগা ৱারি শানবা মতমদা, মীয়াম্না ঐঙোন্দা য়াম্না মচা তানা তাকখি অমসুং হায়রিবা সরকারগী স্কিমশিং খুঙ্গংশিং অমসুং লায়রবশিংগী য়ুমশিংদা য়ৌবদা ঐ হরাওখি। ঙসিগী থৌরম অসিদা সহরগী লমশিংদগী মশিং য়াম্লবা মীওইশিং শরুক য়াখি। মরম অদুনা, থৌরম অসিদা ঐনা সহর চাউখৎহনবগা মরী লৈনবা থবকশিংদা মীৎয়েং চঙলে।

ঐগী ইমুং-মনুংগী মীওইশিং,

‘চাউখৎলবা ভারত’ অমা শেমগৎপগী ৱাশক্তা ঐখোয়গী সহরশিংনা মরুওইবা থৌদাং অমা লৌরি। নিংতম্বা মতুংদা চাউখৎপা হায়বদি মতম শাংনা অচৌবা সহর খর খক্তগী ওইরম্মী। অদুবু ঙসিদি ঐখোয়না তয়ার-২ অমসুং তয়ার-৩গী সহরশিং চাউখৎনবা মীৎয়েং চঙলে। অপীকপা সহর চা কয়ানা চাউখৎলবা ভারত অমা শেমগৎপদা থৌনা পীরি। অমরুত মিসন ওইগেরা নত্ত্রগা স্মার্দ সিতি মিসন ওইগেরা, অপীকপা সহরশিংদা তঙাইফদবা খুদোংচাদবশিং ফংহন্নবা থবক পায়খৎলে। ঈশিং পীবা, নালা অমসুং খোঙবালগী থবকশিং, ত্রাফিক্কী থবকশিং অমসুং হায়রিবা সহরশিং অসিদা সি.সি.তি.ভিগী নেতৱার্ককী থবকশিং লেপ্তনা ফগৎহন্নবা পান্দম থম্লি। হায়রিবা সহরশিং অসিদা অহানবা ওইনা লু-নানবা, মীয়ামগী তোইলেতশিং, লম্বীদা এল.ই.দি লাইতশিং থানবা উরে। মসিনা হিংবদা লাইবা, চৎথোক-চৎশিন্দা লাইবা অমসুং ললোন-ইতিক পাংথোকপদা লাইবা হেনগৎহল্লে। লায়রবা, মিদল ক্লাস নত্ত্রগা হন্দক লায়রবা কোক্লবা মীওইশিং ওইগেরা, অনৌবা মিদল-ক্লাস ইমুং অমা নত্ত্রগা নুংঙাই-য়াইফবা ইমুংশিং মশিং হেনগৎলক্লি, খুদোংচাবশিং হেনগৎলকপগী কান্নবশিং মীওই খুদিংমক ফংলি।

ঐগী ইমুং-মনুংগী মীওইশিং,

অদোমগী অৱাবা হন্থহন্নবা ঐখোয়গী সরকারনা থবক কয়া পায়খৎলি। কোরোনা লাইচৎকী অৱাবা মনুংদা, অদোমগী মতেং পাংনবা লৈজবী থাদুনা সরকারনা হোৎনখিবা অদু অদোম উরে। কোবিদ লাইচৎ মনুংদা ঐখোয়গী সরকারনা নুপী করোর ২০গী বেঙ্ক একাউন্তশিংদা লুপা করোর লিশিং কয়া পীখি। ঐখোয়গী সরকার অসিনা লাইচৎ মনুংদা মীওই খুদিংমক লেম্না তিকা থাখি। কোরোনা লাইচৎ মনুংদা ঐখোয়গী সরকারনা লায়রবা মীওই খুদিংমক্তা লেম্না চেঙ পীখি। কোরোনা লাইচৎ মনুংদা ঐখোয়গী সরকারনা অপীকপা উদোগশিং কন্নবা লুপা বিল্লিয়ন কয়া ফংহনখি। কনাগুম্বা খরগী থাজবা মাঙখ্রবা মতমদা, মোদীনা থাজবা পীবা হৌরকখি। গারিশিং, দুকানশিং অমসুং লম্বী নাকলদা শেন তাল্লিবা ঐখোয়গী মরুপশিং নিংবা কাইখি। হন্দক মখোয় কনবীরিবা অসিগুম্না অফবা অমতা মখোয়না থেংনররোই হায়না মখোয়না খনখি। মখোয় য়েংশিন্নবা কনা অমতা লৈখিদে। ঐখোয়গী সরকারনা হায়রিবা মরুপশিং অসি অহানবা ওইনা বেঙ্কগা শম্নহনখি। ঙসিদি, মরুপশিং অসি পি.এম শ্বানিধি স্কিমগী মখাদা বেঙ্কশিংদগী অপীকপা শেন্দোয়দা লাইনা লোন কয়া ফংলে। যাত্রা অসিগী মনুংদা ফাওবা, মরুপ লাখ ১.২৫ পি.এম শ্বানিধিগী কান্নবা লৌনবা হোৎনখি। পি.এম শ্বানিধিগী কান্নবা ফংলবশিংগী চাদা ৭৫ দলিত, তোল্লবশিং অমসুং ত্রাইবেলশিংনি। বেনিফিসরশিংগী চাদা ৪৫ ঐখোয়গী ইচলশিংনি।  মখোয়গী বেঙ্ক একাউন্ত হাংদোক্নবা গরেন্তি লৈতবশিং হৌজিক মোদীগী গরেন্তিগী কান্নবা ফংলে।

মরুপশিং,

সহরদা লৈরিবশিংদা খুন্নাইগী ঙাক্লৌ পীনবা ঐখোয়গী সরকারনা থবক পায়খৎলে। চহি ৬০গী মতুংদা মীওই খুদিংমক খুন্নাইগী ঙাক্লৌ অমা পীনবা ঐখোয়গী সরকারনা থবক পায়খৎলে। হৌজিক ফাওবদা লৈবাক অসিদা মীওই করোর ৬ রোম অতল পেন্সন য়োজনা য়াওরে। মসিনা চহি ৬০গী মতুংদা চাং নাইনা লুপা ৫,০০০ পেন্সন পীরে। প্রধান মন্ত্রী সুরক্ষা বিমা য়োজননা সহরশিংগী লায়রবশিংদা মঙাল অমা পীরে। স্কিম অসিগী মখাদা চহি অমতা লুপা ২০ খক্তগী প্রেমিয়ম অমা পীরগা, লুপা লাখ ২ ফংবা য়ারগনি। প্রধান মন্ত্রী জয়তি বিমা য়োজনাগী মখাদা সহরগী লায়রবশিংনা চহি অমদা লুপা ৪৩৬ খক পীরগা মখোয়না লুপা লাখ ২গী ইন্সুরেন্স কভর ফংগনি। হায়রিবা স্কিম অনি অসিগী খুৎথাংদা, ঐখোয়গী সরকারনা অৱাবা তারবা ইমুংশিংদা লুপা করোর ১৭,০০০ রোমগী ক্লেমগী শেনফমশিং ফংহনখ্রে। অৱাবা তারবা মতমদা, নুংশিরবা মীওই অমা লৈখিদবা মতমদা, অমসুং শেনফম কয়া ফংলকপা মতমদা, হায়রিবা ইমুংশিং অদু কয়া য়াম্না মতেং ওইরমগনি হায়বা অদোম খল্লু। ঙসি, করিগুম্বা লুপা করোর ২০০-৪০০গী স্কিম অমা হৌদোকপা মতমদা, মদু রাজনিতি দল খরনা য়েৎলক্কনি অমসুং মদু হেদলাইনশিংদা য়াওহনগনি। অদুবু লুপা করোর ১৭,০০০ লায়রবশিংগী য়ুমশিংদা য়ৌহনখ্রে। মীয়াম্না সরকারগী স্কিমশিংগী কান্নবশিং ফংলে। সরকারগী পেন্সন অমসুং ইন্সুরেন্স স্কিমশিংগী মতেংদগী মখোয়গী ঙাক্লৌ ফগৎহন্নবা ঐগী মরুপশিংদা ঐনা তকশিল্লি। হিরম অসিগী মতাংদা মোদীগী গরেন্তিগী গারিনা অদোমগী মতেং পাংগনি।

মরুপশিং,

ইনকম তেক্সকী কান্নবা নত্ত্রগা শেন য়াম্না তিংদনা লায়য়েংবগী খুৎথাংদা সহরগী ইমুংশিং শেন হেন্না তুংশিন্নবা সরকারনা থবক কয়া পায়খৎলে। সহরশিংগী লায়রবা লনাই মীওই কয়া অয়ুস্মান ভারত য়োজনাগী কান্নবা ফংলে। লায়রবশিংনা অনা-লায়য়েংগী লুপা করোর লাখ অমা কনবা ঙম্বগীদমক অয়ুস্মান কার্দ থাগৎপা ফোঙদোকচরি। মসিগী লুপা করোর লাখ অমা অসি দোক্তরশিংগী ফি নত্ত্রগা হিদাক-লাংথকশিং লৈবদা শীজিন্নরগদবনি, অদুবু ঙসিদি শেনফম অশি লায়রবা অমসুং মিদল ক্লাস ইমুংশিংগী ওইহৌরে। জন ঔসাধি কেন্দ্রশিং লিংখৎনবা সরকারনা পায়খৎলিবা থবক অসি বর অমা ওইরে। অদোম্না চাদা ৮৯ তানা ফংগদৌরিবা হায়রিবা সেন্তরশিং অসিদগী হিদাক-লাংথকশিং লৈনবা ঙসি ঐনা অদোমগী মফমদা হায়জরি। লুপা ১০০ পীবা হিদাক অদু শুপ্নগী লুপা ২০দা ফংগনি। হায়রিবা সেন্তরশিং অসিনা সহরগী লায়রবশিং অমসুং মিদল ক্লাস মীয়ামগী লুপা করোর ২৫,০০০ কনবা ঙম্লে। করিগুম্বা সেন্তরশিং অসি লৈরমদ্রবদি, মখোয়না অহেনবা লুপা করোর ২৫,০০০ খরচ তৌগনি। মখোয়না লুপা করোর ২৫,০০০ কল্লে। জন ঔসাধি কেন্দ্র মশিং ২৫,০০০দা হেনগৎহন্নবা হৌজিক সরকারনা থৌরাং তৌরি। চহি খর অসিদা, ঐখোয়না লৈবাক অসিদা উজালা য়োজনা পায়খৎপদগী অওনবা অমা উবা ফংলে, এল.ই.দি ব্লবশিং য়েন্থোক্লে। মসিনা সহরগী লায়রবা ইমুংশিংদগী মৈগী বিল হন্থহল্লে।

ঐগী ইমুং-মনুংগী মীওইশিং,

থবক থিনবা খুঙ্গংদগী লাকপা ঐগী লায়রবা ইনাওশিং অমসুং ইচলশিংগী অৱাবা ঐখোয়গী সরকারনা খঙলে। মখোয়গী রেসন কার্দশিং অদু অতোপ্পা রাজ্যশিংগী সহরশিংদা চৎনবা য়াদবগী অৱাবা কয়া মায়োক্নরে। মরম অদুনা, মোদীনা লৈবাক অমা রেসন কার্দ অমা স্কিম হৌদোক্লিবনি। হৌজিক, ইমুং অমা হেক্তা, মখোয় খুঙ্গং নত্ত্রগা সহরদগী ওইগেরা, মখোয়না দরকার ওইরকপদা রেসন কার্দ অমা খক্তা শীজিন্নরগনি। ঐগী ইমুং-মনুংগী মীওইশিং, কনাগুম্বা মীওই অমতা স্লমশিংদা লৈতনবা অমসুং মীওই খুদিংমক্কী নোং য়ুদবা লেংদবা য়ুম অমা লৈহন্নবা ঐখোয়গী সরকারনা থবক পায়খৎলে। হৌখিবা চহি ৯দা, কেন্দ্র সরকারনা য়ুম করোর ৪ হেন্না শারে অমসুং য়ুম করোর ১ হেন্না সহরগী লায়রবা ইমুংশিংদা পীখ্রে। মিদল-ক্লাস ইমুংশিং মখোয় মশাগী য়ুম লৈনবগী মঙলান অদু মঙফাওন্নবা ঐখোয়গী সরকারনা পাংবা য়াবা মতেংশিং পাংলি। ক্রেদিদ-লিঙ্ক সবসিদি স্কিমগী মখাদা, মিদল-ক্লাস ইমুং লাখ কয়াদা মতেং পীখ্রে। মখোয় মশাগী য়ুম লৈতবশিংদা, চুনবা মমলদা ভারাগী য়ুম ফংহন্নবা সরকারনা হোৎনরি। সহরদা থবক থিবা লাককপশিং, শিন্মীশিং অমসুং অতোপ্পা শীনফমশিংদা লৈরিবা লনাই মীওইশিংদা ভারাগী য়ুম ফংহন্নবা সরকারনা স্কিম অমা হৌদোক্লে অমসুং তোঙান-তোঙানবা সহরশিংদা অখন্নবা কমপ্লেক্সশিং শাগৎলে।

ঐগী ইমুং-মনুংগী মীওইশিং,

সহরশিংগী লায়রবশিং অমসুং মিদল-ক্লাস ইমুংশিংদা হেন্না ফবা পুন্সি মহিং অমা ফংহন্নবা অতোপ্পা মরুওইবা থবক অমদি অফবা মীয়ামগী চৎথোক-চৎশিনগী থবক অসিনি। হৌখিবা চহি ১০দা শেমগৎলিবা অনৌবা মীয়ামগী চৎথোক-চৎশিনগী থবক অসিগী চাউখৎপা লাম্বা লৈতে। চহি ১০ গী মনুংদা অনৌবা সহর ১৫দা মেত্রোগী থবকশিং ফংহল্লে অমসুং সহর ২৭দা মেত্রো লৈরে নত্ত্রগা য়াম্না কন্না শেমগৎলি। হৌখিবা চহি খর অসিদা, সহরশিংদা ইলেক্ত্রিক বসশিং চেন্নবা সরকারনা লুপা করোর কয়া থাদরে। ইলেক্ত্রিক বসশিং সহরশিংদা চেনবদা পি.এম ই-বস সর্বিস কেম্পেন্না মতেং পাংলি। নুমিৎ ২-৩গী মমাঙদা, দিল্লি খক্তদা কেন্দ্র সরকারনা অনৌবা ই-বস ৫০০ চেনবা হৌহনখ্রে।

ঐগী ইমুং-মনুংগী মীওইশিং,

ঐখোয়গী সহরশিং অসি ঐখোয়গী নহারোল অমসুং নুপীশিং শক্তি পীনবা শিংথানিঙাই ওইবা পাম্বৈ অমনি। মোদীগী গরেন্তিগী গারিনা নহারোল অমসুং নুপী অনিমক শক্তি পীরি। অদোম্না মসিগী কান্নবা লৌগদবনি অমসুং চাউখৎলবা ভারত অমা শেমগৎনবা ৱাশক থবক ওইনা পাংথোক্কদবনি। ঐনা অদোম অমুক হন্না য়াইফ-পাউজেল পীজরি। মসিগী যাত্রা অসি মীওই কয়া কান্নবা পীবা ওইরসনু, মীওই মশিং হেন্না মসিদা শরুক য়াবা ওইরসনু অমসুং যাত্রা থুংলদ্রিঙৈ মমাঙদা খুঙ্গংশিং অমসুং সহরশিংদা অফবা ফিবম অমা শেমগৎলসি অমসুং সরকারগী কান্নবা ফংখ্রবশিংনা মখোয় শরুক য়াহন্দুনা কান্নবা ফংদ্রিবশিংদা থাজবা লৈহল্লসি অমসুং ঙাইদুনা লৈরিবশিংনা কান্নবা ফংলগনি। মরম অদুনা, ঙম্লিবমখৈ মীওই কয়া পুরকউ, মখোয়দা ই-পাউ ফংহল্লু অমসুং কনাগুম্বা অমনা কান্নবা ফংখিবগী মতাংদা ৱা ঙাংবদা মতমদা, অতোপ্পশিংগী থাজবা হেনগৎলক্কনি। মরম অদুনা, গ্যাস কন্নেক্সন ফংলবা মীওই অমা, মৈ ফংলবা, ঈশিং ফংলবা, য়ুম লৈরবা, অয়ুস্মান কার্দ অমা পায়রবা নত্ত্রগা মুদ্রা য়োজনাগী কান্নবা নত্ত্রগা শ্বানিধি স্কিমগী কান্নবা ফংলবশিং, বেঙ্কতগী শেন নত্ত্রগা ইন্সুরেন্সকী শেন ফংলবা কনাগুম্বা অমনা মদু অতোপ্পশিংদা খঙহল্লু। কান্নবা কয়া লৈরি। মখোয়গী খুঙ্গংগী কান্নবা মীওই অমা কান্নবা ফংলে হায়বা মখোয়না খঙলকপদা, মখোয় থোরক্কনি অমসুং মিং চনগনি।

খুঙ্গংগী লায়রবশিংদগী হৌরগা সহরগী স্লমশিংদা লৈরিবশিংদা অৱাবা অমতা পীদনা সরকারগী কান্নবা ফংহন্নবা ঐনা থাজবা পীরি। মরম অদুনা, মসিগী গারি অসি, মোদীগী থাজবনা শক্তি পীরিবনি, মসি অদোমগীনি। মরম অদুনা, ঙম্লিবমখৈ শরুক য়াবীয়ু, মসি মাইপাকহনবীয়ু।  ভারতনা নিংতম্বা ফংবগী চহি ১০০ মপুংফারকপগী থৌরম পাংথোকপা মতম ২০৪৭দা লৈবাক অসি চাউখৎলবা লৈবাক অমা ওইরগনি। ঐখোয় মশিগী থৌনা অসি লৈগদবনি। ঐখোয়না খুদিংমক ফজনা পাংথোক্কনি অমসুং লৈবাক অসি হেন্না ফগৎহনগনি। মসিগী ৱাখল্লোন অসি ঐখোয়না লৌশিনবা দরকার ওই। অফবা ফিবম অমা শেমগৎপদা যাত্রা অসিনা য়াম্না মতেং পাংগনি। ময়াম পুম্নমক ঐনা ঐগী য়াইফ-পাউজেল পীজরি।

থাগৎচরি!

দিসক্লাইমর: মসি প্রধান মন্ত্রীগী ৱারোলগী চাউরাকপা ৱাহন্থোক্নি। অশেংবা ৱারোল হিন্দীদা পীখি।

****