ভারতকী প্রধানমন্ত্রী

ভারত মাতা কী- জয়!

ভারত মাতা কী- জয়!

উত্তরাখন্দগী মীয়াম্না য়াবা, নহা মুখ্য মন্ত্রী, ভাই পুস্কর সিংহ ধামীজী, কেন্দ্র মন্ত্রী শ্রী অজয় ভত্তজী, হান্নগী মুখ্য মন্ত্রী, রমেশ পোখরিয়াল নিশঙ্কজী, ভারতীয় জনতা পার্তীগী স্তেৎ প্রসিদেন্ত মহেন্দ্র ভত্তজী, উত্তরাখন্দ সরকারগী মন্ত্রীশিং, MP, MLA পুম্নমক, অতোপ্পা দিগনিতরীশিং অমসুং দেবভুমি, ঐগী নুংশিরবা ইমুং মনুংগী মীওইশিংবু ঐহাক্না খুরুমজরি। ঙসি উত্তরাখন্দননা শীংথানীংঙাই ওইবা কয়া পাঙথোকখ্রে। অসিগুম্বা মতৌ মমাংদা কনাগুম্বা অমত্তনা উজবগী খুদোংচাবা ফংখিদ্রি। ঙসি অয়ুক্তগী হৌদুনা ঐহাক্না উত্তরাখন্দদা কোইনা চৎখি, থৌদাল কয়া ফংখি; নুংশিবগী গঙ্গা চেল্লব্রা হায়না ফাওখি।

ঐহাক্না ঈশ্বরগী ওইবা মফম অমসুং লম্বা লৈত্রবা থৌনাগী হৌরকফম ওইরিবা লমদম অদুবু খুরুমজরি। মরু ওইনা থৌনা ফরবা ইমাশিংবু ইকাই খুম্নবা উৎচরি। বদ্রীনাথ ধামদা ‘জয় বদরী-বিশাল’ হায়না শোনবা মতমদা গরৱাল রাইফল্সকী অথৌবশিংগী থৌনা হেনগৎলকই। গঙ্গোলীহাতকী কালিকা মন্দিরগী কাংশিনা ‘জয় মহাকালী” হায়না লাউরকপা তান চানবদা কুমাউন রেজীমেন্তকী অথৌবশিংদা নমথবা ঙমলরোইদবা থৌনাগী ইচেল অমা চেনবা হৌখি। মফম অসিদা মানসখন্দদা বাগেশ্বর, বৈজনাথ, নন্দা দেবী, গোলু দেবতা, পুর্নাগিরী, কসার দেবী, কেঞ্চী ধাম, কতারমল, নানকমত্তা, রীথাসাহিব, মশি লাকঙমদ্রবা ঈশ্বরগী মফমশিং লৈ, অচৌবা হেরিতেজ অমা লৈ। লৈবাক্কী ঙাকশেল অমসুং লাইনীংগী তীর্থয়াত্রা অসিদা লাকপা খুদিং ঐহাক্না থৌজাল ফংলে খঞ্জৈ।

ঐগী ইমুং-মনুংশিং,

মফম অসিদা লাক্ত্রিঙৈ মমাংদা ঐহাক্না পার্বতী কুন্দ অমসুং জোগৈস্বরধামদা থৌনিজবগী খুদোংচাবা ফংজখি। ঐহাক্না ইরৈবাকচা খুদিংমক হকচাং ফনা লৈনবা অমসুং চাউখৎপা ভারতকী ফিরেপ অসি চেৎশিনহন্নবা অমসুং উত্তরাখন্দগী মঙলান অমসুং ফিরেপ পুম্নমক থুংহন্নবা থৌজাল নীজখি। মীকুপ খরগী মমাংদা ঐহাক্না ঐখোয়গী ঙমখৈ ঙাক্লিবা অমসুং লান্মীশিংগা উনখি। ঐহাক্না লোকেল আর্ত অমসুং সেল্ফ-হেল্প গ্রুপশিংগী ইচিল-ইনাওশিংগা উনবগী খুদোংচাবা অমসু ফংজখি। মরম অসিনা ঐগী খোঙচৎকী মসিগী অনৌবা মখল অসিনা ভারতকী কলচর, ভারতকী সেক্যুরিতী অমসুং ভারতকী চাউখৎ-থৌরাংগা মরী লৈনবা হীরম অহুমদা ইনোৎ হাপখি। মীয়ামগা লোয়ননা দর্শন তৌখি। উত্তরাখন্দগী তৌবা ঙম্বা অসি অঙকপনি অমসুং লম্বা লৈতে। মরম অসিনা ঐহাক্না থাজৈ অমসুং থাজবা অসি বাবা কেদারগী খুম্বম অসিদা ফমদুনা হায়জরি। ঐহাক্না থাজৈ মদুদি দিকেদ অসি উত্তরাখন্দগী দিকেদ ওইরগনি। অমসুং ঙসি ঐহাক্না আদী কৈলাশকী খুম্বমদা ফমদুনা অমুক হন্না থাজবা অসি ফোঙদোকচরি।

উত্তরাখন্দনা চাউখৎপগী অনৌবা পনখৈশিং য়ৌবা ঙম্নবা অমসুং নখোয়গী পুন্সিবু নুংঙাইহন্নবা ঐখোয়গী সরকারনা থমোয় শেংনা, মপুং ফানা কত্থোকপগা লোয়ননা ঙসি থবক পাইখৎলি। হৌজিক লুপা করোর লিশিং 4 হেনবগী চাউখৎ-থৌরাংগী থবকশিংগী উরেপ-উয়ুং তমখ্রে অমসুং শঙ্গাখ্রে। প্রোগ্রাম অমা খক্তদা লুপা করোর লিশিং 4 অসি উত্তরাখন্দগী ইচিল-ইনাওশিংগীদমক্তনি। প্রোজেক্তশিং অসিগীদমক ঐহাক্না ময়ামদা নুংঙাইবা ফোঙদোকচরি।

ঐগী ইমুং-মনুংশিং,

লম্বেল অসি ঐহাক্কী ওইনা অনৌবা নত্তে অমদি মরুপ ময়ামসু অনৌবা নতে। উত্তরাখন্দগা লৈনরিবা মরি অসি ঐগী ইফমদা লেংদনা লৈ। অমসুং নখোয়সু ঐগা লোয়ননা মসিগী চপ মান্নবা মরী অসিনা লেংদনা পুন্দুনা থম্মি। উত্তরাখন্দদগী মরুপ কয়ানা অমসুং অরাপ্পা খুঙ্গংশিংদগী ঐঙোন্দা চিথীশিং ইবীরকই। অৱাবা অমসুং নুংঙাইবা অনিমক্তা পুন্না লেপ্পী। ইমুংদা অনৌবা মীওই অমা পোকপদা পাউ অদু ঐঙোন্দা য়ৌহল্লকই। মচানুপীনা মহৈদা খুমাং চাউশিনবা মতমদা ঐঙোন্দা চিথী ইরকই। হায়বদি উত্তরাখন্দগী ইমুং পুম্নমক্কী ঐহাক অসি মীওই অমা  ওইবা অদুগুম্না উত্তরাখন্দগা ঐগা মরী লৈনৈ।

লৈবাক অসিনা করিগুম্বা অচৌবা অমা ফংবা মতমদা নখোয়না নুংঙাইবা ফোঙদোকই। করিগুম্বা নখোয়না ফগৎকদবা লম্বী অমা উবা মতমদা মদু ঐঙোন্দা খঙহল্লকই। হন্দক্তা লৈবাক অসিনা লোক সভা অমসুং বিধান সভাদা নুপীশিংগীদমক সীতকী চাদা 33 খাক্তুনা থম্নবা পুৱারী ওইরবা ৱারেপ অমা লৌখি। চহি 30-30, 40-40 পন্দুনা লৈরকখিবা থবক অসি নখোয়গী থৌজালশিংগা লোয়ননা পাঙথোকপা ঙমজখ্রে। অমসুং মতম অসিদা ইচে-ইচল  কয়ানা চিথী কয়া থাবীরকখি।

ঐগী ইমুং-মনুংশিং,

নখোয় পুম্নমক্কী থৌজালশিংগা লোয়ননা ঙসি ভারতনা চাউখৎপগী অনৌবা পনখৈশিং য়ৌবা ঙমজরে। ভারত অমসুং ভারত মচাশিং অসি মালেম শিনবা থুংবদা থাগৎনরি। ভারতকী ভোইস অসি মালেম পুম্বনা তারি, নত্ত্রা? মালেমশিনবা থুংবদা অৱাবগী এতমোস্ফিয়র অমা লৈখি, লৈবাক পুম্বনা চৈথেং নংখি। মতম অদুদা ঐখোয়না মন্দির খুদিংদা চৎখি অমসুং ভারতপু অৱাবা অসিদগী থুনা কোকহন্নবা থৌনিখি। ভারত মচা খুদিংমক্না লৈবাক অসিবু করোর লিশিং কয়াগী স্কেমদগী কনবা পামখি। মীপুম খুদিংমক্না ভারতকী মীংচৎ হেনগৎহনবা পামখি।

য়েংঙু ঙসি মালেম অসি শীংনবশিংনা থল্লি, মালেমগী ফীভম নখোয়না উরে, শীংনবশিংনা থল্লবা মালেম অসিদা ভারতকী ভোইস কয়া য়াম্না হৌবগে নখোয়না উরে। চয়োল খরগী মমাংদা G-20 গী  অচৌবা ইভেন্ত পাঙথোকখি। মদুদা মালেমনা করম্না ভারত মচা ঐখোয়গী শক্তি মশক খঙখিবগে উবা ফংখ্রে। নখোয়না হায়য়ু, মালেমনা ভারতপু শৈথারিবা মতম অসিদা, ভারতকী ভোইস মালেমদা খোন্থাং য়ৈরিবা মতম অসিদা নখোয়না ৱাহং অমগী পাউখুম পীগরা? ঐহাক করিগুম্বা অমা হংজগে পাউখুম পীগদ্রা? মালেমদা ভারতকী মীংচৎ হেনগৎলকপা অসি নখোয় পামব্রা? নখোয় পামব্রা হৌনা হায়বীয়ু? মালেমদা ভারতনা মাইকৈ তাকপা অসি নখোয় পামব্রা?

মসি কনানা তৌহনখি? মসি কনানা তৌহনখি? মোদীনা তৌহনবা নত্তে, মসি নখোয়না অমসুং ঐগী ইমুং মনুংশিংনা তৌহনখিবনি, মসিগী মনাদি মীয়ামদা পীজরি। করিগী? করিগীনো নীংশিংব্রা? মরমদি নখোয়না ঐঙোন্দা চহি 30গী মতুংদা দিল্লীদা স্তেবল ওইবা অমসুং শক্তি লৈবা সরকার অমা শেম্বগী খুদোংচাবা পীবীখি। নখোয়গী ভোৎতা শক্তি য়াওই, ঐহাক্না মালেমগী অচৌবা মীওইশিংগী খুৎ শোক্নবা মতমদা নখোয়না অফবা থবক কয়া উবা ফংলমগনি। অদুবু ঐহাক্না খুৎ শোক্নবা মতমদা ঐহাক্না মীৎচানৈ। মদুদা মখোয়না ইরৈবাকচা করোর 140বু ঐগী মীৎতা উবা ফংই।্

ঐগী ইমুং-মনুংশিং,

চীংনুংদা অমসুং লৈবাক্কী কাচিন-কোয়াশিংদা লৈরিবা মীওইশিংগীদমক ঐখোয়না ৱাই। মরম অসিনা শুপ্নগী চহি 5 দা লৈবাক অসিদা মীওই করোর 13.5না লাইরবদগী থোরকপা ঙমখি, মশিং অসি নখোয় নীংশিংগদ্রা? চহি মঙাদা মীওই করোর 13.5না লাইরবদগী থোরকপা ঙমখিবনা মালেমদা অঙকপা পোক্নহল্লি। মীওই করোর 13.5 অসি কনানো? মীওইশিং অসি অয়াম্বনা নখোয়গুম্বা, চীংদা অমসুং মনুং হঞ্জিনবা মফমশিংদা লৈবা মীওই ঙাক্তনি। মীওই করোর 13.5 অসি ভারতনা লাইরবা মুত্থৎলি হায়বগী ময়েক লারবা খুদম অমা ওইরি।

মরুপশিং,

মমাংদা লাইরবা মুত্থৎনবা স্লোগান লাউখি। মোদীনা হায়রি ঐখোয় পুন্না লাইরবা মুত্থৎকনি। ঐখোয়না (35.54) থৱায় য়াওনা থবক অসি পাইখৎখি, থৌদাং লৌখি। ঙসি ঐখোয়গী তিরঙ্গা অসি হেন্না ৱাংনা লম খুদিংমক্তা পাইবা ঙম্লি। ঐখোয়গী চন্দ্রয়ান্না মালেমগী লৈবাক অমত্তনা য়ৌবা ঙমদবা মফমদা য়ৌবা ঙমখি। অমসুং ভারতনা চন্দ্রয়ান্না য়ৌখিবা মফম অদুবু শিব-শক্তি হায়না থোনখি। উত্তরাখন্দগী মীয়াম নখোয় শিব-শক্তি হায়বা ৱাখল্লোন অসিদা নুংঙাইবা পোকপ্রা? মসিনা তাকপদি উত্তরাখন্দগী শক্তাক অসি মফম অদুদসু য়ৌরে হায়বনি। উত্তরাখন্দদা শিব অমসুং শক্তিগী অপুনবা অসিনা করি হায়রি হায়না তাকপগী মথৌ তাদে, মসি খোঙথাং খুদিংদা মফম অসিদা ময়েক শেংনা উবা ফংই।

মরুপশিং,

ঙসি মালেমনা স্পেস খক্তদা নত্তনা স্পোর্তস্তসু ভারতকী শক্তি উবা ফংলি। হন্দক্তা পাঙথোকখিবা এসিয়ন গেম্সতা ভারতনা পুৱারীগী রেকোর্দ থুগাইবা ঙমখি। অহানবা ওইনা ভারতকী শান্নরোয়শিংনা চেনচুরী য়ৌবা ঙমদুনা মেদল 100 হেন্না লৌদুনা রেকোর্দ থম্বা ঙমখি। নখোয়না খুবাক হেন্না কন্না খুবীয়ু, উত্তরাখন্দদগী ইচানুপা-ইচানুপী 8না এসিয়ন গেম্স য়াওবা চৎখি। অমসুং মসিদসু ঐখোয়গী লক্ষ্য সেনগ তীমনা মেদল অমা লৌরকখি অমসুং বন্দনা কতারিয়াগী হোক্কী তীমনা লৈবাক্কীদমক অচৌবা মেদল লৌরকখি। উত্তরাখন্দগী অঙাংশিং অসিনা শীংথানীংঙাই ওইনা পরফোর্ম তৌখি, নখোয়না করিগুম্বা অমা তৌবীগরে? মোবাইল ফোন লৌথোকপীদুনা ফ্লাশ ওন তৌবীয়ু। অমসুং নখোয়গী ফ্লাশলাইৎ শীজিন্নদুনা শান্নরোয়শিংদা নুংঙাইবা ফোঙদোকপীয়ু। মীপুম খুদিংমক্না মোবাইল লৌথোক্তুনা ফ্লাশ থানবীয়ু। মসি উত্তরাখন্দগী অঙাংশিং, ঐখোয়গী শান্নরোয়শিংদা পুক্নিং থৌগৎপনি।

মরুপশিং,

ফম্বীয়ু, ঐহাক্না ময়ামদা তৌবীমল খঙবা উৎচরি। সরকারনা ভারতকী শান্নরোয়শিংদা লৈবাক অসিদা অমসুং মালেমদা ভারতকী ফিরাল পাইখৎহন্নবা মপুং ফানা সপ্পোর্ত পীরি। চীঞ্জাক্তগী হৌরগা মোদর্ন ত্রেনিং য়াওনা শান্নরোয়শিংদা সরকার অসিনা লুপা করোর কয়া চাদিং তৌরি। মসি অচুম্বনি অদুবু মসিগী ওন্নতৈনবসু থোক্লি। সরকারনা মসি তৌরবসু লক্ষ্যগী ইমুং-মনুং অমসুং লক্ষ্যনা মহাক্না মাইপাকপা খুদিংদা ঐগীদমক অথুম-অহাও পুরকই। শান্নরোয়শিংনা শাংনা চৎতনবা সরকারনা তোঙান-তোঙানবা মফমশিংদা শান্নবুংশিং শারি।ল ঙসি হলদ্বানিদা হোকী গ্রাউন্দ অমসুং রুদ্রপুরদা বেলোদ্রোম স্তেদিয়মগ উরেপ-উয়ুং তমখ্রে। উত্তরাখন্দগী নহারোলনা মসিদগী কান্নবা ফংলগনি। ঐহাক্না ধামিজী অমসুং মহাক্কী তীমবসু নুংঙাইবা ফোঙদোকচরি, মখোয়না নেস্নেল গেম্সকীদমক থৱায় য়াওনা শেম শারি। অপুনবা তীমদা ঐহাক্না নুংঙাইবা ফোঙদোকচরি।

ঐগী ইমুং-মনুংশিং,

উত্তরাখন্দগী খুঙ্গং খুদিংদা লৈবাক্কী ঙমখৈ ঙাকপশিং লৈ। ঐগী লৈবাক অসিবু ঙাকপী শেনবীরিবা অথৌবা মচানুপাশিং থৌনা ফরবা ইমাশিংনা পোকপীরি। ঐখোয়গী সরকারনা মখোয়গী দিকেদ কয়া শুরবা দিমান্দ ৱান রেঙ্ক ৱান পেন্সন অসি ফংহনখি। হৌজিক ফাওবদা ঐখোয়গী সরকারনা ৱান রেঙ্ক ৱান পেন্সনগী মখাদা এক্স-সর্ভিসমেনশিংদা লুপা করোর লিশিং 70 হেন্না পীথখ্রে। উত্তরাখন্দগী এক্স-সর্ভিসমেন লিশিং 75 হেনবগী ইমুং মনুংশিংনা মসিদগী কান্নবা ফংলি। ঙমখৈগী মফমশিং শেমগৎপগী থবক অসিদসু ঐখোয়গী সরকারনা চাউনা মীৎয়েং চংলি। ঙসি খোঙজেল য়াংনা ঙমখৈগী মফমশিংদা ফেসিলিতীশিং শাবগী থবক চত্থরি। নখোয়গী নরাল করিনো হায়না নখোয়না খল্লমগনি…করিগীদমক মমাংগী সরকারনা মসি তৌরমদ্রিবনো খল্লমগনি? মসি নখোয়গী নরাল নত্তে। মমাংগী সরকারনশিংনা ঙমখৈগী মফমশিং চাউখৎহল্লমদে মরমদি মখোয়না য়েক্নবশিংনা মসিগী খুদোংচাবা লৌদুনা মনুংদা চংশিল্লক্কনি খলমখি। মসি মরম চাব্রা হায়বীয়ু? ঙসি অনৌবা ভারতনা মমাংগী সরকারগী অকিবা ৱাখল্লোন অসি তুংঙোইননা থনমদুনা মাংদা চংশিল্লি। ঐখোয়দা অকিবা লৈতে।

ভারতকী ঙমখৈ পুম্বদা ঐখোয়না মতমগা চুনবা লম্বী, তনেল, থোংশিং শারি। হৌখিবা চহি 9 অসিদা ঐখোয়না ঙমখৈগী মফমশিং খক্তদা কিলোমিতর 4200 হেন্না শাংবা লম্বী শেমখ্রে। ঐখোয়না অচৌবা থোং 250 অমসুং তনেল 22 ঙমখৈগী মফমশিংদা শাখ্রে। ঙসিসু অনৌবা থোংশিংগী উরেপ উয়ুং তমখ্রে। হৌজিক ঐখোয়না ঙমখৈগী মফমদা ত্রেনশিং য়ৌহন্নবা শেমশারি। উত্তরাখন্দনা অহোংবা ৱাখল্লোন অসিদগী চাউনবা কান্নবা ফংলগনি।

ঐগী ইমুং-মনুংশিং,

মমাংদা ঙমখৈগী মফমশিং, ঙমখৈগী খুঙ্গংশিং অসি লৈবাক্কী অরোইবা খুঙ্গংশিং ওইনা লৌনরমখি। অরোইবদা লৈবা অদুদা চাউখৎ-থৌরাংগী মতাংদসু অরোইবদা য়ৌগনি। মসি অরিবা ৱাখল্লোন অমনি। ঐখোয়না ঙমখৈগী খুঙ্গংশিং অসি অরোইবা ওইহনবগী মহুৎ লৈবাক্কী অহানবা খুঙ্গং ওইনা খন্দুনা চাউখৎ থৌরাংগী থবক পাইখৎপা হৌখি। বাইব্রেন্ত ভিলেজ প্রোগ্রামগী মখাদা ঙমখৈদা লৈবা খুঙ্গংশিং অসি চাউখৎহনখি। ঐখোয়গী খোঙথাং অসি মফম অসিদগী মাইগ্রেৎ তৌখ্রবশিংবু অমুক হল্লকহনবনি। খুঙ্গংশিং অসিদা, তীর্থয়াত্রাশিং অসিদা ঐখোয়না তুরিজম হেনগৎহনবা পাম্মি।

ঐগী ইমুং-মনুংশিং,

হায়নবা লৈ চীংগী ঈশিং অমসুং চীংগী নহা ওইরিঙৈগী মতম অসি চীংদা কান্নফম লৈতে। মসিগী ৱাখল্লোন অসিদা অওনবা পুরক্না ঐহাক্না ফিরেপ লৌখি। নখোয়না উবা ফংলি মদুদি মমাংঙৈগী অশোইবা পোলিসীশিংনা উত্তরাখন্দগী খুঙ্গং কয়া কুন্তাক লান শীখি। লম্বী, মৈ, ঈশিং, এজুকেসন, হীদাক লাংথক, শেন্থোক লম্বী  পুম্নমক অসিগী অৱাৎপা লৈবনা মীয়াম্না ময়ুম থাদোক্তুনা চৎপা তাখি। হৌজিক্তি ফীভম অসিদা অওনবা পুরকপা ঙমলে। অনৌবা খুদোংচাবশিং অমসুং অনৌবা ফেসিলিতীশিং উত্তরাখন্দদা লৈরে, মরুপ কয়ানা মখোয়গী খুঙ্গংশিংদা হন্নরকপা হৌরে। মসি দবল ইঞ্জিন সরকারগী খোঙথাংশিনা ঙমহনবনি। মরম অসিনা লম্বী-থোং, মৈ, অনা লায়েং, স্কুল অমসুং কোলেজশিং অমদি মোবাইল তাৱরদা চাউনা ইনভেস্তমেন্ত তৌরি। ঙসিসু মসিগা মরী লৈনবা প্রোজেক্ত কয়া হৌদোকখি।

মফম অসিদা শেমগী হৈকোল অমসুং উহৈ অমদি মনা-মশিংগী অচৌবা পোতেন্সিএল লৈ। হৌজিক মফম অসিদা লম্বী-থোং শেমদুনা লৌমী ইচিল-ইনাওশিংদা ঈশিং ফংহল্লি। ঙসি পোলীহাউস শানবা অমসুং শেমগী হৈকোল শেমগৎনবা থবক পাইখৎপসু হৌখ্রে। স্কিম অসিদা লুপা করোর 1100 চাদিং তৌরি। উত্তরাখন্দগী অপীকপা লৌমীশিংগী পুন্সি মহিং ফগৎহন্নবা শেল য়াম্না চাদিং তৌরি, পি.এম. কিসান সম্মান নিধিগী মখাদা উত্তরাখন্দগী লৌমীশিংনা লুপা করোর 2200 হেন্না হৌজিক ফাওবদা ফংখ্রে।

মরুপশিং,

কোর্স গ্রেনগুম্বা মহৈ-মরোং অসি মফম অসিদা মীরোল কয়াদগী থাদুনা লাকখি। নখোয়গী নরক্তা লৈবা মতমদা ঐহাক্না নখোয়গা লোয়ননা মতম কয়া লেনখি। মতম অদুদা কোর্স গ্রেন অসি য়ুমথোং খুদিংদা মরাং কাইনা চানৈ। কেন্দ্র সরকারনা কোর্স গ্রেন অসি মালেমগী মফম খুদিংদা য়ৌহন্নবা থবক পাইখৎখি। মসিগীদমক কেম্পেন অমা লৈবাক শিনবা থুংবদা হৌদোকখি। ঐখোয়গী উত্তরাখন্দগী লৌমীশিংনা মসিদগী চাউনা কান্নবা ফংলগনি।

ঐগী ইমুং-মনুংশিং,

ঐখোয়গী সরকরনা ইমাশিং অমসুং ইচে-ইচলশিংগী খুদোংচাদবা খুদিংমক কোকহন্নবা হোৎনরি। মরম অসিনা ঐখোয়গী সরকারনা লায়রবা ইচে ইচলশিংদা পর্মিনেন্ত হাউস ফংহনখি। মখোয়গীদমক তোইলেৎশিং শাখি, গ্যাস কন্নেক্সন লেম্না পীখি, বেঙ্ক একাউন্তশিং হাংখি, লেম্না লায়েং অমসুং লেম্না রাসন পীখি।

হর ঘর জল য়োজনাগী মখাদা উত্তরাখন্দগী ইমুং লাখ 11গী ইচে ইচলশিংআ তোতি ঈশিং ফংলে। হৌজিক মখোয়গীদমক থবক অমগা পাইখৎলে। চহি অসিদা লাল কিলাদগী ঐহাক্না নুপী সেল্ফ হেল্প গ্রুপশিংদা দ্রোনশিং পীনবা লাউথোকখি। দ্রোনশিংগী খুত্থাংদা হীদাক লাংথক, হার, মরু অমসুং থবক কয়া তৌবা ঙমগনি। হৌজিক দ্রোনশিংনা উহৈ অমসুং মনা মশিং মনাক নকপা কৈথেলদা থাবা ঙম্লগনি। হীদাকশিং চীংদা থুনা য়ৌহনবা ঙমল্লগনি। মরম অসিনা নুপী সেল্ফ-হেল্প গ্রুপশিংদা দ্রোনশিং পীবনা উত্তরাখন্দবু মোদর্নিতীগী অনৌবা পনখৈ য়ৌহনবা ঙম্লগনি।

ঐগী ইমুং-মনুংশিং,

উত্তরাখন্দদা খুঙ্গং খুদিংদা গঙ্গা অমসুং গঙ্গোত্রি চেল্লি। ভগৱাব শিব অমসুং নন্দনা মফম অসিগী উন্না কুপ্পা চীংথক্তা লৈ। উত্তরাখন্দগী মেলা কৌথিগ, থৌল, ঈশৈ-নোংমাই, অমসুং চীঞ্জাক অসি মাগী মশাগী তোপ-তোপ্পা মশক লৈজৈ। লমদম অসিগী পান্দব জগোই, ছোলিয়া জগোই, মঙ্গল গীত, ফুলদৈ, হরেলাম ভগ্বাল অমসুং রম্মানগুম্বা কলচরেল ইভেন্ত কয়া লৈ। রোত, অরসে, ঝাঙ্গোরে কী খীর, কফলী, পকোরা, রাইতা, অল্মোরগী বাল মিথাই, সিঙ্গোরি… মসিগী মহাও কনানা কাওবা ঙমগনি। অমসুং কালি গঙ্গাগী লমদম অসিগা ঐহাক্কা মরী লৈনৈ। চম্পাৱতদা লৈবা অদ্বৈতা আশ্রমগা ঐগা অচেৎপা মরী লৈনৈ।

মফম অসিগা শাগোন্নবা মেমোরী কয়া লৈ। হন্দক্তি ঐহাক্না শেংলবা মফম অসিদা মতম খরা লৈজবা পামখিবনি অদুবু হয়েং অসি দিল্লীদা G-20গা মরী লৈনবা অচৌবা কনফরেন্স অমা লৈ মরম অসিনা ঐহাক্না চম্পাৱতদা লৈবা অদ্বৈতা আশ্রমদা চৎপা ফংলরোই। অথুবদা আশ্রম অসিদা লাকচবা ফংনবা খুদোংচাবা পীনবীয়ু হায়না ঈশ্বরদা থৌনিজরি।

ঐগী ইমুং-মনুংশিং,

উত্তরাখন্দগী তুরিজম অমসুং তীর্থয়াত্রা চাউখৎহনবগা মরী লৈন্ননা দবল ইঞ্জিন সরকারগী খোঙথাংশিংগী মহৈ চাবা হৌরক্লে। চহি অসিদা উত্তরাখন্দগী চারধাম য়াত্রাদা লাকপা ভক্তাশিংগী মশিং অসি লাখ 50 রোম ওইখি, মসিনা মমাংগী রেকোর্দশিং থুগাইখি। বাবা কেদারগী থৌজালগা লোয়ননা কেদারনাথ ধাম নৌনা শাবগা মরী লৈনবা থবক্কী অহানবা তাঙ্কক লোইশিনবা ঙমখ্রে। লুপা করোর কয়া চংনা শ্রী বদ্রীনাথ ধাম শাবগী থবকসু পাইখৎলি। অথুবদা কেদারনাথ ধামদগী শ্রী হেমকুন্দ শাহিব ফাওবগী রোপৱেগী থবক লৌরগনি অমসুং মীমান্নদ্রবা অমদি অহল ওইরবা ভক্তাশিংনা লাইনা চৎপা ফংলগনি। ঐখোয়না কেদারখন্দ অমসুং মানসখন্দ ফাওগী কেন্নেক্তিবিতী ফগৎহনবদা মীৎয়েং চংখি। খোঙথাংশিং অসিনা কেদারনাথ অমসুং বদ্রীনাথ ধামদা চৎপা মীওইশিংনা লাইনা জগেশ্বর ধাম, আদি কাইলাশ অমসুং ওম পর্বত য়ৌশিনবা ঙম্লগনি। ঙসি হৌদোকখিবা মানসখন্দ তেম্পল মালা মিসন অসিনা কুমাউন্দা লৈরিবা মন্দির কয়াদা চৎপদা খুদোংচাহল্লগনি।

মরুপশিং,

উত্তরাখন্দদা কন্নেক্তিবিতী হেনগৎহনবনা মফম অসিগী চাউখৎ থৌরাংবু অনৌবা পনখৈ য়ৌহনবা ঙম্লগনি। নখোয়না চারধাম গ্রান্দ প্রোজেক্ততগী চাউনা খুদোংচাবা ফংলে। ঋশিকেশ-কর্নপ্রয়াগ রেল প্রোজেক্ত লোইরবা মতুংদা লমদম পুম্বদা অওনবা পুরক্লগনি। উরান স্কিমগী মখাদা লমদম অসিদা হোংনা এয়র সর্ভিস ফংহল্লি। ঙসি ভাগেশ্বরদগী কানালিচিনা ফাওবা, গঙ্গোলিহততগী অল্মোরা ফাওবা অমসুং তানকপুর ঘাত্তগী পিথোরাগর ফাওবগী লম্বী শেম্বগী থবক হৌখ্রে। মফম অসিদা হোমস্তে তৌবদা সরকারনা পুক্নিং থৌগৎলি। তুরিজম সেক্তরনা মফম অসিদা থবক চাউনা পীরি অমসুং কেপিতেল য়াম্না চংদে। তুংদা লাক্কদবা মতমশিংদা তুরিজম সেক্তর হেন্না পাকথোক চাউথোক্লগনি। মরমদি মালেম পুম্বনা ভারত্তা লাকপা পাম্মি। ভারত য়েংনীংলি। ভারত খঙনীংলি। ভারত্তা লাকপা খুদিংমক্না উত্তরাখন্দ য়াওদনা মপুং ফাবা ওইরোই।

ঐগী ইমুং-মনুংশিং,

মমাংঙৈদা উত্তরাখন্দদা মহৌশাগী খুদোংথিবা নংখিবগী মওং অদু ঐহাক্না খঙই। ঐখোয়গী মরী মতা কয়া লৈখিদ্রে। ঐখোয়না মহৌশাগী খুদোংথিবা থেংনবা ঙম্নবা শেম শাবা হেনগৎপা তাই। মসিগীদমক উত্তরাখন্দদা মথংগী চহি 4-5গী ওইনা লুপা করোর লিশিং মরি চাদিং তৌরগনি। খুদোংথিবা থোকপা মতমদা তেংবাং পীবা অমসুং মী কনবগী থবক থুনা পাইখৎপা য়ানবা উত্তরাখন্দদা অদুগুম্বা ফেসিলিতীশিং শারগনি।

ঐগী ইমুং-মনুংশিং,

মসি ভারতকী অমৃতকালনি। মসিগী অমৃতকালগী মতম অসিগী মনুংদা লৈবাক অসিগী মফম খুদিংমক ফেসিলিতীশিং, ইকাই খুমনবা অমসুং হরাউ তয়াম্বগা লোয়ননা শম্নবা মতম ওইরে। বাবা কেদর অমসুং বাদ্রি বিশাল, আদি কৈলাশকী থৌজালগা লোয়ননা ঐখোয়গী ৱারেপশিং অসি মপুংফানা থবক্তা ওন্থোকপা ঙমগনি হায়না ঐহাক্না থাজবা থম্মি। ঐহাক্না হেলিকোপ্তরদা থমনম্লগা মফম অসিদা কিলোমিতর 7 লাপ্না লাকি। অমসুং হ্যুমেন চেন শেমদুনা কিলোমিতর 7 অসিদা মীয়াম্না লম্বীগী নাকল অনিমক্তা লৈরম্বনা মফম অসি য়ৌরকপদা থেংখি। মীয়াম অদু অদুক্কী মতিক য়ামখি, ইমুং অমদা থৌদোক অমা থোকপা অদুগুম্না মীয়াম্না ফিরোল নান্না শেৎচাদুনা নুংঙাইরবা এতমোস্ফিয়র অমদা আর্তী, লৈ, পাইদুনা ইমাশিংনা ঙাইরমখি, থৌজালশিং পীরকখি। মসি ঐগী ওইনা য়াম্না নুংঙাইবা মীকুপ ওইখি। ঙসি পিথোরাগরদা লাকপদা উৎপীরিবা মীনুংশি অমসুং থৌজাল অসিদা ঐহাক্না ইকাই খুম্নবা উৎচরি। ময়ামবু হন্না-হন্না থাগৎচরি।

অমুক্কা হন্না নখোয় পুম্নমকপু হন্না হন্না য়াইফ পাউজেল পীজরি। ঐহাক্কা লোয়ননা খুৎ অনিমক থাংগৎতুনা কন্না লাউবীয়ু-

ভারত ইমানা য়াইফরে!

ভারত ইমানা য়াইফরে!

ভারত ইমানা য়াইফরে!

হন্না হন্না থাগৎচরি!

***