ভারতকী প্রধানমন্ত্রী

থৌরমসিদা শরুক য়ারিবা ঐহাক্কী কেবিনেতকী মরুপশিং, সরকারগী ওফিসরশিং, নিতি আয়োগকী মরুপশিং, অদুগা থৌরম অসিদা শরুক য়ারিবা লৈবাক্কী তোঙান-তোঙানবা মফম, ব্লোক্তগী গ্রাসরুত লেভেল ফাওবগী মীওই লাখ কয়া, মশিং য়াম্লবা  মীয়ামগী মীহুৎশিং, ঙসিগী থৌরম অসিদা থৱাই য়াওবীদুনা তোঙান-তোঙানবা পাম্বৈগী খুত্থাংদা শরুক য়াবীরিবা খুদিংমকপু ঐহাক্না তরাম্না ওকচরি। ঐহাক্না ঙসিগী থৌরম অসিগীদমক্তা অদোম পুম্নমক অমসুং নিতি আয়োগপু মরু ওইনা থাগৎচরি। লোয়ননা, ঐহাক্না মীপুম খুদিংগী মফমদা য়াইফ পাউজেল পীজরি।

অদোম্না ঙসি ভারত মন্দপমদা পুল্লিবা অসিদা লৈবাক্কী ৱাখল্লোন, ভারত সরকারগী ৱাখল্লোন করিনো খঙবা য়াই। মদুদি, মফমসিদা থা খরসিদা ফমখিবা মীপুম খুদিংমক মশাগী ইমুংগীদমক্তা খনবা মীওই ঙাক্তনি। ইমুংগী য়াইফ থৌরাংগীদমক্তা স্কিম কয়া খুমাং চাউশিলহনবা পাম্বা মীওইশিংনি। থা অমদগী মফমসিদা ফমখিবা মীওইশিংনা মালেমদা মাইকৈ তাকপগী থৌদাং পাংথোকখি। মসিনা হায়বদি ভারত মন্দপমগী রেঞ্জ অসি য়াম্না পাক চাউই হায়বনি। মফমসিদা মালেমগী লুচিংবশিং কয়াগা লোয়ননা মালেমগীদমক্তা খন্নখি। অদুগা মসিগী ভারত মন্দপম অসিমক্তদা ঙসি মীওই লাখ কয়া তিন্দুনা গ্রাউন্দ লেভেলদা অহোংবা পুরক্নবা খন্ন-নৈনরি, ঐহাক্কী ওইনদি, মসিনা G20দগী খক তাবা মীফম নত্তে।

মীওই কয়া অমসু ঐখোয়গা ওনলাইন্দা পুল্লি। থৌরম অসিদি ‘তীম ভারত’কী মায় পাকপগী খুদম্নি, ‘সবকা প্রয়াস’কী ৱাখল্লোনগী খুদম্নি। থৌরম অসি তুংগী মতমগী ভারতকী ওইনসু য়াম্না মরু ওইগনি, মসিনা ঐখোয়গী মঙলান পুম্নমকপু মঙফাওনহনগনি।

মরুপশিং,

নিংতম্লবা মতুংদা পাংথোকপা খ্বাইদগী মকোক থোংবা স্কিম 10গী ৱারি শাবা খুদিংদা এস্পিরেস্নেল দিস্ত্রিক্ত প্রোগ্রাম অসিদি সনাগী ময়েক্তা ইদুনা লৈহৌরগনি। মসিনা লৈবাক্কী জিলা ১১২গী মীওই করোর ২৫ হেনবগী পুন্সিদা অওনবা পুরকখ্রে, পুন্সি মহিং ফগৎহনখ্রে, ইজ ওফ গবর্নেন্সতা অহোংবা পুরকখ্রে। পুম্নমক অসি প্রোগ্রাম অসিদা য়ুম্ফম ওইবা ঙাক্তনি। জিলাগী থাক্কী প্রোগ্রামগী মায় পাকপবু মালেম্না শীংথানখি। মসিনা দিভেলপিং লৈবাকশিংদসু পারা কয়া অমা তম্বীবা ঙমগনি। ঐখোয়নসু মসিদগী হীরম কয়া অমা তম্বা ফংজখি অমসুং থৌওং অদুদগী ঐখোয়না লৈবাক্কী রাজ্যশিংগী মনুংদা মফম অমা হেক্তদবু লৈরিবা ব্লোক ৫০০বু পেরামীতর অমগী মখাদা য়েংশিনবগী ৱাখল্লোন লাকখিবনি। ঐখোয়না মসিবু রাজ্যগী চাংচত্তা পুরক্লবা, লৈবাক্কী চাংচত্তা পুরক্লবদি, অচৌবা অহোংবা অমা পুরকপা ঙমগনি হায়বগী ঐহাক্না থাজৈ। মতৌ অসুম্না, এস্পিরেস্নেল দিস্ত্রিক্ত প্রোগ্রামগী মায় পাকপা অদুমক স্পিরেস্নেল ব্লোক প্রোগ্রামসু মায় পাক্কনি। ঐহাক্না ঙৈহাক্কী মমাংদা মরুপ ৩গা ৱারি শাখি। অদোম্নসু তাখ্রে। মখোয়গুম্বা গ্রাসরুত থাক্তা থবক তৌবশিংগী মশাদা থাজবগী চাং উবদা ঐহাক্কী থাজবসু য়াম্না হেনগৎলে। মলতিপ্লাই তৌরে। মখোয়গী মফমদা ঐহাক্কী য়াইফ পাউজেলখক নত্তে, ঐহাক ইশামক মপুং ওইনা মখোয়গীদমক্তা লেপ্লি। মখোয়না ঐহাক্কী পাঙ্গল ওইরি।

অদুনা মরুপশিং,

এস্পিরেস্নেল দিস্ত্রিক্ত প্রোগ্রাম অসি চহি ৫ মপুং ফাখ্রে। মসিদা কান্নবা য়াম্না লাকখি, করি ফংখি, মসিগুম্বা ৱাফম কয়া অসি থার্দ পার্তি অমনা য়েংশিনবসি ঐহাক্না য়াম্না নুংঙাইবা ফাওই। থৌরম অসিগী অচম্বা লাল্লোংশিংগী মতাংদা পল্লুরবদি, লাল্লোংশিং অসি লৈবাক ঙাকপদা থেংনরিবা খুদোংচাদবশিং কোকহন্নবা পারাশিং ওইরে। লৈবাক অসিগী শরুক খুদিংমক অমসুং লমদম খুদিংমক য়েংশিনগদবনি। খুদিংমক চাউখৎ-থৌরাং য়ৌহন্দবা, মীওই খুদিংমক য়ৌদবা অসিনা, অঙ্ক মশিংদা ওইনা কান্নবা ফংবা উৎলবসু, তশেংনা চাউখৎ-থৌরাংগী থবক পায়খৎতে। মরম অদুনা ঐখোয়না গ্রাসরুত পেরামিতর খুদিংমক কোনশিনবা হায়বসি য়াম্না মরুওই।

রাজ্য খুদিংমক য়াংনা চাউখৎনবা অমসুং চাউখৎত্রিবা জিলাশিংগা খুৎশম্নদুনা চৎমিন্ননবা মাইকৈ অনিদা দিপার্তমেন্তশিংগী সেক্রেতরিশিংনা থবক তৌগদবনি। মখোয়গা মরী লৈনবা দিপার্তমেন্তশিংদা শোৎথহৌরবা লৈবাক অসিগী ব্লোক 100 মশক খঙদোক্কদবনি অমসুং মখোয়গী ফিবমশিং ফগৎনবা থবক তৌগদবনি। মশক খঙদোক্লবা ব্লোক 100 অদু লৈবাক্কী চাংচৎকী মথক্তা লৈরবা মতমদা চাউখৎপগী পেরামিতরশিংদা অহোংবা লাক্কনি। সেন্তরদগী দিপার্তমেন্তশিংনা ব্লোকশিং চাউখৎনবা মীৎয়েং চঙগদবনি। রাজ্য সরকারশিংনা খ্বাইদগী চাউখৎত্রিবা খু্ঙ্গং 100 মশক খঙদোক্কদবনি অমসুং মথংগী খুঙ্গং 1000 চাউখৎনবা মখা তানা মতৌ তম্নবা নমুনা অমা ওইনা মখোয় শেমগৎকদবনি।

2047দা ভারত চাউখৎলবা লৈবাক অমা ওইনবা থৌরাং থম্লি, অদুগা মেত্রো সহরশিং অমসুং চাউখৎত্রিবা খুঙ্গংশিং চাউখৎপা অদু চাউখৎপা কৌবা য়ারোই। ঐখোয়না মদুগী নমুনা অদু ইন্দে, ঐখোয়না মীওই করোর 140গা লোয়ননা চৎমিন্নবা পাম্মী। এস্পিরেসনেল দিস্ত্রিকস প্রোগ্রাম মনুংদা জিলাশিংগী মনুংদা চাংদম্নবা পাংথোকখি অমসুং মতম অমদা ওফিসারশিং চৈরাক পীনবা পোস্তিং থানবা মফম অমা ওইনা খন্নরম্বা গুজরাতকী কুছ জিলা, য়ুহা হাবা মতুংদা কৎথোক্লবা ওফিসারশিং মফম অসিদা থাদুনা হৌজিক খ্বাইদগী ইকায়খুম্নবা মফম অমা ওইরে। এস্পিরেসনেল দিস্ত্রিক প্রোগ্রামগী ওইনা, ব্লোক লেভেলদা মাইপাক্লবা নহা ওইরিবা ওফিসারশিংবু রাজ্য সরকারশিংনা প্রোমোসন পীফম থোকই।

সরকারনা বজেৎত্তা অহোংবা কয়াসু পুরকখি, অমসুং সরকারগী বজেৎনা অফবা অহোংবা কয়া পুরক্লে। অদুবু, বজেৎ খক্তনা অহোংবা পুরক্নবা মচাক নত্তে। বজেৎ য়াওদনা চাউখৎপগী য়ুম্ফম ওইনা লন-থুমশিং মপুংফানা শীজিন্নগদবনি অমসুং থবকশিং পুনশিনগদবনি। পুনশিনবা অমসুং স্কিমশিং অমগা অমগা মতেং পীনবা অসি পুক্নিং থৌগৎকদবনি।

মরাং কাইনা লৈরিবা মফমশিংদা শেন থাদবা অসি অমাংবা ওইহল্লি, মরম অদুনা দরকার ওইরিবা মফমশিংদা লন-থুমশিং থাদনবা হেন্না ফবা ফলশিং ফংই। দরকার ওইবা মফমশিংদা মরুওইবা মীৎয়েং অমা থমদুনা লন-থুমশিং চপ মান্ননা য়েন্থোক্কদবনি।

অচৌবা থবকশিং পাংথোকপদা খুন্নাইগী মপাঙ্গল য়াম্না দরকার ওই। হিরম খুদিংমক্তা লুচিংবা অমা দরকার ওই। ‘সংকল্প সাপ্তাহ’ থৌরম অসিদা পুন্না থবক তৌমিন্নবগী থৌনা শেমগৎতুনা মসিনা অনৌবা লুচিংবশিং থোকহনগনি অমসুং জন ভাগিদারিগী অনৌবা ৱাখলশিং থোকহনগনি। মহৌশাগী ওইবা অমাং-অতা থোরকপা মতমদা অমনা অমগী মতেং পাংননবা খুন্নাই পুন্না থোরকখি। মীয়াম শরুক য়াবগী থৌনা লৈহন্নবা মসিগী থবক অসি ব্লোক থাক্তা পাংথোক্কদবনি। খুদোংচাদবশিংগী পাম্বৈশিং পুথোক্নবা জন ভাগিদারি নত্ত্রগা মীয়াম শরুক য়াবগী খুদোংচাবা য়াম্না লৈ।

মালেমগী থাক্তা লৈবাক অসিগী মিংচৎ হেনগৎহনবদা মপান লৈবাকশিংদা লৈরিবা ভারতমচাশিংগী থৌদাং অমসুং সরকারগী দিপ্লোমেতকী থবকশিংদা মখোয়না মতেং য়াম্না পাংলি। ‘সংকল্প সাপ্তাহ’ অসিবু দেলিগেতশিংনা নীংথিনা নৈনবীয়ু অমসুং মসিগী কান্নবা মপুংফানা লৌবীয়ু। মসিনা ওফিসারশিংগী মরক্তা পাউ ফাউনদবা লৈহন্দবা ঙমগনি অমসুং সরকারগী থবকশিং অপুনবা ওইনা পাংথোকমিন্নবা ঙমগনি। পাউ ফাউনবদা তেক্নোলোজিগী অচৌবা থৌদাং লৈরি। অদুবু হকথেংননা শরুক য়াবদগী হেন্না ফবা অমা লৈতে। ঐখোয়না চৎলিবা মফম অদুগী অফবশিং ঐখোয়না খঙগদবনি। ‘সংকল্প সাপ্তাহ’ মনুংদা চয়োল অমা মরুপশিংগা লোয়ননা ফম্মিন্নবা মতমদা, মখোয়গী মপাঙ্গলশিং খঙগনি অমসুং পুন্না থবক তৌমিন্নবগী থৌনা হেনগৎহনগনি।

দেলিগেদশিংনা পেরামিতর 5দা মীৎয়েং থমগদবনি অমসুং মসিনা অফবা ফলশিং ফংগনি। মসিনা মখোয়গী থাজবশিং হেনগৎহনগনি। খুদোংচাদবশিং কোকহনবা হেনগৎলকপা অসিনা, ব্লোক অদু অতোপ্পশিংগী থাজবগী হৌরকফম অমা ওইরক্কনি। এস্পিরেসনেল দিস্ত্রিক ওইরম্বা জিলা 112 হৌজিক ইন্সপিরেসনেল দিস্ত্রিকশিং ওইরে। চহি অমগী মনুংদা য়ামদ্রবদা এস্পিরেসনেল ব্লোক 100 ইন্সপিরেসনেল ব্লোকশিং ওইরক্কনি হায়না ঐনা থাজৈ।

মরুপশিং, থৌরম অসিগী খুত্থাংদা ঐহাক্না অদোমগা উন্নদুনা ৱারি শাবা ফংবসিদা ঐহাক্না য়াম্না নুংঙাইবা ফাওই। ঐহাকপু ওনলাইন্দা তারিবা মীওইশিংগী মফমদসু ঐহাক্না তৌবীমল খঙবা উৎচরি। ঐখোয়না মিসন মোদতা চৎকদবনি, অদুগা লৈবাক পুম্বগী মনুংদগী ব্লোক 100 খনগৎপীয়ু, মখোয়গীসু অকক্নবা মতম অমা থমদুনা নেস্নেল এভরেজ ফাওবা পুদুনা লাকপীয়ু হায়না ঐহাক্না বিভাগশিংগী মফমদা থমজরি। বিভাগ খুদিংনা অসুম্না থবক তৌরবদি, গ্রাসরুত থাক্তা করিমত্তা চিত্থহৌরোই হায়না ঐহাক্না খল্লি। থবক পুম্নমক চহি 1-2গী মনুংদা লোইবা ঙমগনি। মরুপশিং, ঐখয়না ইং 2024গী ওক্তোবর-নবেম্বরদা অমুক উন্নবা মতমদা, হোই ফিজিকেল ওইনা উন্নগনি হায়না থাজৈ, মসিগী হিসাব অমুক তৌসি। মতম অদুদদি, ঐহাক্না মীয়াম মরক্তা ভাবোক ওইনা ফমদুনা অদোমগী মরক্তগী মীওই 10গী মায় পাকপগী ৱারি তাবা পাম্মি। অদুগা, ঐহাক্না হায়গদবশিংদি মথংগী চহিদা উন্নবদা হায়রগে, অদোমগা ৱারি শাসি। মদু ফাওবা ঙাইমিন্নরসি। ঐহাক্না অদোমগী মতম য়াম্না লৌজরোই, মরমদি অদোম্না অদোমগী ব্লোকশিংবু চাউখৎহনবগী থবক পাংথোক্কদবা য়াম্না লৈরি। অদুনা, ঐহাক্না মীয়াম্বু অমুক্কা হন্না থাগৎচরি।

***