ভারতকী প্রধানমন্ত্রী

ঙসি প্রধান মন্ত্রী শ্রী নরেন্দ্র মোদীনা নিউ দিল্লিগী ভারত মন্দপমদা লৈবাক অসিগী এস্পিরেসনেল ব্লোকশিংগীদমক অখন্নবা চয়োল অমা চৎথগদবা থৌরম অমা ‘সংকল্প সাপ্তাহ’ হৌদোকখ্রে। মহাক্না থৌরম অদুদা এস্পিরেসনেল ব্লোকস প্রোগ্রাম পোর্তেল অমসুং একজিবিন হৌদোকখ্রে।

প্রধান মন্ত্রীনা ব্লোক লেভেল ওফিসার ৩ গা ৱারি শানখি।

উত্তর প্রদেসকী বেরেলি, বহেরিদগী স্কুলগী ওজা রঞ্জনা অগরৱালগা উনবদা মহাক্কী ব্লোক্তা পাংথোকখিবা চিন্তন সিবিরশিংদগী ফংখিবা খ্বাইদগী কান্নবা অনৌবা ৱাখল্লোনশিংদগী মতাংদা প্রধান মন্ত্রীনা হংখি। ব্লোক হিরম খুদিংমক চাউখৎনবা পায়খৎখিবা থবকশিং অমসুং সরকারগী স্কিমশিংগী মীয়ামগী খোঙজং অমা ওইনবা মরী লৈনবা খুদিংমক মফম অমদা পুনবগী মরুওইবা অদু রঞ্জনা অগরৱালনা পনখি। স্কুলশিংদা তাকপী-তম্বীবা ফগৎহন্নবা পায়খৎলিবা থবকশিংগী মতাংদসু প্রধান মন্ত্রীনা হংখি।

রঞ্জনা অগরৱালনা হায়খি মমাংঙৈগী তাকপী-তম্বীগী থবকশিংগী মহুত্তা থবক্তা য়ুম্ফম ওইবা তাকপী-তম্বীবনা মহুৎশীল্লে অমসুং বাল সভাশিং, ঈশৈ অমসুং শান্নবা তম্বীবা অমসুং ফিজিকেল ত্রেনিংশিং পাংথোক্লে। স্মার্দ ক্লাসরুমশিং অমসুং তেক্নোলোজি শীজিন্নবনা লাইরিক-লাইশু তম্বগী মগুন হেনগৎহল্লে। মহাক্কী জিলাগী স্কুল ২,৫০০দা স্মার্দ ক্লাসরুমশিং লৈরে। প্রধান মন্ত্রীনা হায়খি চাউখৎলবা ভারত অমা ওইহন্নবা খ্বাইদগী মরুওইবা থবকশিংগী মনুংদা অমদি অঙাংশিংদা মগুন লৈবা লাইরিক-লাইশু তম্বগী খুদোংচাবা ফংহনবনি। হিরম অসিদা ওজাশিংগী কৎথোকপদা মহাক অপেনবা পোকই। মসি ‘সমর্পন সে সিদ্ধি’ য়ৌনবা লম্বীনি।

য়ুম হোং-হোংদুনা শা-ষন লোয়রিবা খুঞ্জাশিংনা থেংনরিবা খুদোংচাদবশিংগী মতাংদা জম্মু অমসুং কাস্মিরগী পুঞ্চ, মানকোতেদগী এসিস্তেন্ত সর্জন দোক্তর সাজৈদ অহমদনা শন্দোক্না তাকখি অমসুং য়ুম হোংবা মতমদা থেংনবা খুদোংচাদবশিং হন্থহন্নবা পাম্বৈশিংগী মতাংদা পনখি। মহাক্না থেংনরকপশিং মহাক্না প্রধান মন্ত্রীনা পাউদমখি। ক্লাসরুমদগী ফংলকপা লৌশিং অমসুং থবক তৌবা মতমদা থেংনবা অনিগী খেন্নবগী মতাংদা প্রধান মন্ত্রীনা হংখি। দোক্তরনা হায়খি ক্লাসরুমদা লোকেল ব্রিদশিংগী মতাংদা নৈনখিদে। ফুদ অমসুং মাউথ দিজিজগী তিকা থাবগী মতাংদা প্রধান মন্ত্রীদা পাউদমখি অমসুং মফম অদুদা পাক-শান্নবা তিকা থাবগী থবক পায়খৎপগী মতাংদা মহাক্না ফোঙদোকখি। কুছ লমদমদা লৈরিবা গুরজারশিংগা মহাক্না য়াম্না নক্না লোয়নখিবা অদু প্রধান মন্ত্রীনা পাউদমখি।

মেঘালয়গী রেসুবেলপারা(গারো রিজন)দগী জুনিয়র রুরেল দিবলপমেন্ত ওফিসার, শ্রী মিকেহেনচার্দ সিঐচ মোমিনদা লমদম অদুদা অকনবা নোংজু-নুংশাগী খুদোংচাদবশিং থেংননবা পায়খৎলিবা পাম্বৈশিংগী মতাংদা প্রধান মন্ত্রীনা হংখি। তঙাইফদবা পোৎলমশিং পৈশিন্দুনা থম্নবা মাঙজৌননা পাউতাকশিং পীখি অমসুং থবক অদু য়েংশিন্নবা কাংবু অমা শেমখি হায়না শ্রী মোমিন্না ফোঙদোকখি। লমদম অদুগী দিজাইনশিং শীজিন্নদুনা মগুন লৈবা পোৎথোকশিং পুথোকপদা অমসুং হিংবা লাইবা হেনগৎহন্নবা প্রধান মন্ত্রী অৱাস(গ্রামিন)দা মশানা য়ুম শাজবগী মতাংদা প্রধান মন্ত্রীনা হংলকপদা শ্রী মোমিন্না অফবা পাউখুম পীখি। লমদম অদুদা কাজু পুথোকপা অমসুং য়োনবগী মতাংদা প্রধান মন্ত্রীনা হংলকপদা, শ্রী মোমিন্না হায়খি লমদম অসিদগী পুথোকপা কাজু অসি লৈবাক অসিগী ওইনা খ্বাইদগী হাওবনি অমসুং মসি পুথোকপদা এম.এন.আর.ই.জি.এ অমসুং সেল্প-হেল্প গ্রুপশিং শীজিন্নরে।

লমদম অসিদা অহেনবা কাজু প্রোসেসিং য়ুনিতশিং লিংখৎনবা শ্রী মোমিন্না প্রধান মন্ত্রীদা তকশিনখি। মীয়াম ৱাখল তাহন্নবা লমদম অদুদা ঈশৈনা মরুওইবা পাম্বৈ অমা ওইবদা শ্রী মোদীনা অপেনবা ফোঙদোকখি। এস্পিরেসনেল ব্লোক অমসুং দিস্ত্রিক প্রোগ্রামদা গ্রাম পঞ্চায়তকী মরুওইবা থৌদাং অদু প্রধান মন্ত্রীনা পনখি।

থৌরম অদুদা তিনখিবা মীয়ামদা ৱা ঙাংবদা প্রধান মন্ত্রীনা হায়খি থা অমগী মমাঙদা মীয়াম্না মালেমগী থৌদোকশিংগী মাইওন লেপখিবা G20 মীফম পাংথোকখিবা মফম অসিদা অসিগুম্বা অচৌবা মীফম অমা পাংথোক্লিবা অসি লৈবাক অসিগী মনুং-হুঞ্জিনবা মফমশিং চাউখৎনবা সরকারগী ৱাখল্লোন অদু উৎপনি। মীয়ামগা হকথেংন্না থবক তৌমিন্নদুনা অহোংবা পুরকখিবা মীওইশিং তরাম্না ওক্লদুনা প্রধান মন্ত্রীনা হায়খি ঐঙোন্দা, মীফম অসি G20 দগী তাবা নত্তে।

প্রধান মন্ত্রীনা হায়খি থৌরম অসি তিম ভারত মাইপাকপা অমসুং সবকা প্রয়াসকী ৱাখল্লোনগী খুদম অমনি। থৌরম অসি ভারতকী তুংগীদমক য়াম্না মরুওই অমসুং  মসি ‘সমর্পন সে সিদ্ধি’ য়ৌনবা লম্বীনি। নিংতম্বা ফংলবা ভারতকী মকোক থোংবা থৌরম ১০গী পরেং অমদা, এস্পিরেসনেল দিস্ত্রিক প্রোগ্রাম সনাগী ময়েক্না ইদুনা লৈহৌরগনি। এস্পিরেসনেল দিস্ত্রিক প্রোগ্রামনা জিলা ১১২দা মীওই করোর ২৫ রোমগী পুন্সিদা অহোংবা পুরক্লে। এস্পিরেসনেল দিস্ত্রিক প্রোগ্রামদা য়ুম্ফম ওইরগা থৌরম অসি মাইপাকপনি অমসুং থৌরম অসি মালেম্না থাগৎনরে। স্কিম অসি মমাঙদা অমুক্তা পাংথোকখিবা খক নত্তনা মসিদা মীয়াম্না থৱায় য়াওনা শরুক য়াবদগী এস্পিরেসনেল ব্লোকস প্রোগ্রাম অসি য়াম্না চাউনা মাইপাকপনি।

ঙাইহাক্কী মমাঙদা ব্লোক লেভেল ওফিসার ৩ গা মহাক্কা ৱারি শানখিবা অদু নিংশিংলদুনা, প্রধান মন্ত্রীনা হায়খি মীয়ামগা হকথেংননা থবক তৌরিবশিংগী থৌনা উরবা মতুংদা মহাক মশানা মশাবু থাজবা শরুক কয়া হেনগৎলে। মখোয়গী কাংবুদা শরুক য়াদুনা মীয়ামগা হকথেংননা থবক তৌরিবা ওফিসারশিংগা লোয়ননা মহাক্না থবক তৌমিন্ননিংবগী অপাম্বা শ্রী মোদীনা ফোঙদোকখি অমসুং অপীবা মতমগী মমাঙদা থৌরম অসিগী পান্দমশিং ফংবা ঙমগনি হায়বগী থাজবা ফোঙদোকখি। প্রধান মন্ত্রীনা হায়খি থৌরম অসি মহাক্না চেকশিন্না য়েংশিনগনি, মসি মহাক্না মখোয়গী হৈশিংবা চাংয়েং তৌবা পাম্বগী নত্তে, থবক মাইপাকপা অদুনা মঙোন্দা অহেনবা থৌনা পীবা অমসুং চোকথবা লৈতনা থবক তৌনিংবা অদুনা ওইহনবনি। এস্পিরেসনেল দিস্ত্রিক প্রোগ্রাম খুমাঙচাউশিনবা অসিনা ঐঙোন্দা ইথিল অমা পীরে।

এস্পিরেসনেল দিস্ত্রিক প্রোগ্রাম চহি ৫ মপুংফারকপা অদু পল্লদুনা, থৌরম অসি থার্দ পার্তি অমনা য়েংশিনবদা প্রধান মন্ত্রীনা হরাওবা ফোঙদোকখি। থৌরম অসিগী অচম্বা লাল্লোং পল্লদুনা, প্রধান মন্ত্রীনা হায়খি লাল্লোংশিং অসি লৈবাক ঙাকপদা থেংনরিবা খুদোংচাদবশিং কোকহন্নবা পারাশিং ওইরে। লৈবাক অসিগী শরুক খুদিংমক অমসুং লমদম খুদিংমক য়েংশিনগদবনি। খুদিংমক চাউখৎ-থৌরাং য়ৌহন্দবা, মীওই খুদিংমক য়ৌদবা অসিনা, অঙ্ক মশিংদা ওইনা কান্নবা ফংবা উৎলবসু, তশেংনা চাউখৎ-থৌরাংগী থবক পায়খৎতে। মরম অদুনা ঐখোয়না গ্রাসরুত পেরামিতর খুদিংমক কোনশিনবা হায়বসি য়াম্না মরুওই।

প্রধান মন্ত্রীনা হায়খি রাজ্য খুদিংমক য়াংনা চাউখৎনবা অমসুং চাউখৎত্রিবা জিলাশিংগা খুৎশম্নদুনা চৎমিন্ননবা মাইকৈ অনিদা দিপার্তমেন্তশিংগী সেক্রেতরিশিংনা থবক তৌগদবনি। মখোয়গা মরী লৈনবা দিপার্তমেন্তশিংদা শোৎথহৌরবা লৈবাক অসিগী ব্লোক ১০০ মশক খঙদোক্কদবনি অমসুং মখোয়গী ফিবমশিং ফগৎনবা থবক তৌগদবনি। মশক খঙদোক্লবা ব্লোক ১০০ অদু লৈবাক্কী চাংচৎকী মথক্তা লৈরবা মতমদা চাউখৎপগী পেরামিতরশিংদা অহোংবা লাক্কনি। সেন্তরদগী দিপার্তমেন্তশিংনা ব্লোকশিং চাউখৎনবা মীৎয়েং চঙগদবনি। রাজ্য সরকারশিংনা খ্বাইদগী চাউখৎত্রিবা খু্ঙ্গং ১০০ মশক খঙদোক্কদবনি অমসুং মথংগী খুঙ্গং ১০০০ চাউখৎনবা মখা তানা মতৌ তম্নবা নমুনা অমা ওইনা মখোয় শেমগৎকদবনি।

২০৪৭দা ভারত চাউখৎলবা লৈবাক অমা ওইনবা থৌরাং পল্লদুনা, প্রধান মন্ত্রীনা হায়খি মেত্রো সহরশিং অমসুং চাউখৎত্রিবা খুঙ্গংশিং চাউখৎপা অদু চাউখৎপা কৌবা য়ারোই। ঐখোয়না মদুগী নমুনা অদু ইন্দে, ঐখোয়না মীওই করোর ১৪০গা লোয়ননা চৎমিন্নবা পাম্মী। এস্পিরেসনেল দিস্ত্রিকস প্রোগ্রাম মনুংদা জিলাশিংগী মনুংদা চাংদম্নবা পাংথোকখি অমসুং মতম অমদা ওফিসারশিং চৈরাক পীনবা পোস্তিং থানবা মফম অমা ওইনা খন্নরম্বা গুজরাতকী কুছ জিলা, য়ুহা হাবা মতুংদা কৎথোক্লবা ওফিসারশিং মফম অসিদা থাদুনা হৌজিক খ্বাইদগী ইকায়খুম্নবা মফম অমা ওইরে। এস্পিরেসনেল দিস্ত্রিক প্রোগ্রামগী ওইনা, ব্লোক লেভেলদা মাইপাক্লবা নহা ওইরিবা ওফিসারশিং প্রোমোসন পীনবা প্রধান মন্ত্রীনা রাজ্য সরকারশিংদা পাউতাক পীখি।

সরকারনা বজেৎনা অহোংবা পুরকখিবগী মতাংদা প্রধান মন্ত্রীনা হায়খি সরকারগী বজেৎনা অফবা অহোংবা কয়া পুরক্লে। বজেৎ খক্তনা অহোংবা পুরক্নবা মচাক নত্তে। বজেৎ য়াওদনা চাউখৎপগী য়ুম্ফম ওইনা লন-থুমশিং মপুংফানা শীজিন্নগদবনি অমসুং থবকশিং পুনশিনগদবনি। পুনশিনবা অমসুং স্কিমশিং অমগা অমগা মতেং পীনবা অসি পুক্নিং থৌগৎকদবনি।

প্রধান মন্ত্রীনা হায়খি মরাং কাইনা লৈরিবা মফমশিংদা শেন থাদবা অসি অমাংবা ওইহল্লি, মরম অদুনা দরকার ওইরিবা মফমশিংদা লন-থুমশিং থাদনবা হেন্না ফবা ফলশিং ফংই। দরকার ওইবা মফমশিংদা মরুওইবা মীৎয়েং অমা থমদুনা লন-থুমশিং চপ মান্ননা য়েন্থোক্কদবনি।

প্রধান মন্ত্রীনা হায়খি অচৌবা থবকশিং পাংথোকপদা খুন্নাইগী মপাঙ্গল য়াম্না দরকার ওই। হিরম খুদিংমক্তা লুচিংবা অমা দরকার ওই। ‘সংকল্প সাপ্তাহ’ থৌরম অসিদা পুন্না থবক তৌমিন্নবগী থৌনা শেমগৎতুনা মসিনা অনৌবা লুচিংবশিং থোকহনগনি অমসুং জন ভাগিদারিগী অনৌবা ৱাখলশিং থোকহনগনি। মহৌশাগী ওইবা অমাং-অতা থোরকপা মতমদা অমনা অমগী মতেং পাংননবা খুন্নাই পুন্না থোরকখি। মীয়াম শরুক য়াবগী থৌনা লৈহন্নবা মসিগী থবক অসি ব্লোক থাক্তা পাংথোক্কদবনি। খুদোংচাদবশিংগী পাম্বৈশিং পুথোক্নবা জন ভাগিদারি নত্ত্রগা মীয়াম শরুক য়াবগী খুদোংচাবা য়াম্না লৈ।

মালেমগী থাক্তা লৈবাক অসিগী মিংচৎ হেনগৎহনবদা মপান লৈবাকশিংদা লৈরিবা ভারতমচাশিংগী থৌদাং অমসুং সরকারগী দিপ্লোমেতকী থবকশিংদা মখোয়না মতেং পাংলিবা অদু প্রধান মন্ত্রীনা শন্দোক্না তাকখি। ‘সংকল্প সাপ্তাহ’ মপুংফানা শীজিন্ননবা দেলিগেদশিংদা তকশিল্লদুনা প্রধান মন্ত্রীনা হায়খি মসিনা ওফিসারশিংগী মরক্তা পাউ ফাউনদবা লৈহন্দবা ঙমগনি অমসুং সরকারগী থবকশিং অপুনবা ওইনা পাংথোকমিন্নবা ঙমগনি। পাউ ফাউনবদা তেক্নোলোজিগী অচৌবা থৌদাং লৈরি। অদুবু হকথেংননা শরুক য়াবদগী হেন্না ফবা অমা লৈতে। ঐখোয়না চৎলিবা মফম অদুগী অফবশিং ঐখোয়না খঙগদবনি। ‘সংকল্প সাপ্তাহ’ মনুংদা চয়োল অমা মরুপশিংগা লোয়ননা ফম্মিন্নবা মতমদা, মখোয়গী মপাঙ্গলশিং খঙগনি অমসুং পুন্না থবক তৌমিন্নবগী থৌনা হেনগৎহনগনি।

প্রধান মন্ত্রীনা হায়খি দেলিগেদশিংনা পেরামিতর ৫দা মীৎয়েং থমগদবনি অমসুং মসিনা অফবা ফলশিং ফংগনি। মসিনা মখোয়গী থাজবশিং হেনগৎহনগনি। খুদোংচাদবশিং কোকহনবা হেনগৎলকপা অসিনা, ব্লোক অদু অতোপ্পশিংগী থাজবগী হৌরকফম অমা ওইরক্কনি। এস্পিরেসনেল দিস্ত্রিক ওইরম্বা জিলা ১১২ হৌজিক ইন্সপিরেসনেল দিস্ত্রিকশিং ওইরে। চহি অমগী মনুংদা য়ামদ্রবদা এস্পিরেসনেল ব্লোক ১০০ ইন্সপিরেসনেল ব্লোকশিং ওইরক্কনি হায়না ঐনা থাজৈ।

থৌরম অদুদা শরুক য়াখিবশিংগী মনুংদা নিতি অয়োগকী ভাইস চিয়ার্মেন শ্রী সুমন বেরি য়াওখি।

নুঙগীৱারোল

‘সংকল্প সাপ্তাহ’ অসি ইন্সপিরেসনেল ব্লোক প্রোগ্রাম(এবিপি) মপুংফানা পাংথোকপগা মরী লৈনৈ। থৌরম অসি প্রধান মন্ত্রীনা লৈবাক শীনবা থুংনা জনুৱারি ৭,২০২৩দা হৌদোকখি। মসিনা ব্লোক থাক্তা মীয়ামগী পু্ন্সি মহিং ফগৎহন্নবা পান্দম থম্লি। লৈবাক অসিগী জিলা ৩২৯গী ইন্সপিরেসনেল ব্লোক ৫০০দা থৌরম অসি পায়খৎলি। ইন্সপিরেসনেল ব্লোক প্রোগ্রামশিং থবক ওইনা পায়খৎনবা লৈবাক শীনবা থুংনা খুঙ্গং অমসুং ব্লোক থাক্তা চিন্তন সিবিরশিং পাংথোকখ্রে। হায়রিবা চিন্তন সিবিরশিং অসিগী মপুংফাবা অরোইবা অমা ওইনা ‘সংকল্প সাপ্তাহ’ অসি পাংথোকপনি।

এস্পিরেসনেল ব্লোক ৫০০ শীনবা থুংনা ‘সংকল্প সাপ্তাহ’ পাংথোক্কনি। ওক্তোবর ৩দগী ওক্তোবর ৯,২০২৩ ফাওবদা নুমিৎ খুদিংগী অকক্নবা চাউখৎ-থৌরাংগী থিম অমদা ‘সংকল্প সাপ্তাহ’ পাংথোক্কনি। অহানবা নুমিৎ তরুক্নিগী থিমশিংগী মনুংদা ‘সমপুর্না শ্বাসথ্য, সুপোসিৎ পরিৱার, শ্বাছতা, কৃষি, সিক্ষা অমসুং সমরিধি দিৱস য়াওরি। চয়োলগী অরোইবা নুমিৎ ওক্তোবর ৯,২০২৩দা ‘সংকল্প সাপ্তাহ- সমবেস সমারোহ’ হায়না চয়োল অমা চুপ্না পাংথোরকপা থৌরম লোইশিনগনি।

হৌদোকপগী থৌরমদা ভারত মন্দপমদা পঞ্চায়ত অমসুং ব্লোক লেভেলগী মীওই ৩০০০ শরুক য়াখি। মসিগী মথক্তা ভর্চুএল ওইনা ব্লোক অমসুং পঞ্চায়ত থাক্কী থৌমীশিং, লৌমীসিং অমসুং শীনফম খুদিংমক্কী মীওই লাখ ২ রোম শরুক য়াখি।

Aspirational Blocks Programme strives to enhance citizens’ quality of life at the block level. Addressing the #SankalpSaptah. https://t.co/fpBLp3c4tY

— Narendra Modi (@narendramodi) September 30, 2023

*****