پی ایم انڈیا

وزیر اعظم جناب نریندر مودی نے آج ویڈیو کانفرنسنگ کے ذریعے نو وندے بھارت ٹرینوں کو ہری جھنڈی دکھا کر روانہ کیا۔ یہ نئی وندے بھارت ٹرینیں ملک بھر میں رابطہ کو بہتر بنانے اور ریل مسافروں کو عالمی معیار کی سہولیات فراہم کرنے کے وزیر اعظم کے وژن کو عملی جامہ پہنانے کی طرف ایک قدم ہے۔ جن نئی ٹرینوں کو جھنڈی دکھا کر روانہ کیا گیا وہ درج ذیل ہیں:

اودے پور – جے پور وندے بھارت ایکسپریس

1. ترونلویلی-مدورائی-چنئی وندے بھارت ایکسپریس
2. حیدرآباد – بنگلورو وندے بھارت ایکسپریس
3. وجے واڑہ – چنئی (رینی گنٹا کے ذریعے) وندے بھارت ایکسپریس
4. پٹنہ – ہاوڑہ وندے بھارت ایکسپریس
5. کاسرگوڈ – تھرواننت پورم وندے بھارت ایکسپریس
6. رورکیلا – بھونیشور – پوری وندے بھارت ایکسپریس
7. رانچی – ہاوڑہ وندے بھارت ایکسپریس
8. جام نگر-احمد آباد وندے بھارت ایکسپریس

اس موقع پر خطاب کرتے ہوئے وزیر اعظم نے نو وندے بھارت ٹرینوں کے جھنڈی دکھانے کو ملک میں جدید رابطے کا ایک بے مثال موقع قرار دیا۔ انہوں نے کہا کہ ملک میں بنیادی ڈھانچے کی ترقی کی یہ رفتار اور پیمانہ 140 کروڑ ہندوستانیوں کی خواہشوں کے عین مطابق ہے۔ وزیراعظم نے کہا کہ آج شروع ہونے والی ٹرینیں زیادہ جدید اور آرام دہ ہیں۔ انہوں نے کہا کہ یہ وندے بھارت ٹرینیں نئے ہندوستان کے نئے جوش و جذبے کی علامت ہیں۔ انہوں نے وندے بھارت کے بڑھتے ہوئے جنون پر مسرت کا اظہار کیا کیونکہ انہوں نے بتایا کہ وندے بھارت ٹرینوں میں ایک کروڑ گیارہ لاکھ سے زیادہ مسافروں نے سفر کیا ہے۔

وزیر اعظم نے بتایا کہ 25 وندے بھارت ٹرینیں مختلف ریاستوں اور مرکز زیر انتظام علاقوں میں لوگوں کی خدمت کر رہی ہیں۔ آج اس میں 9 مزید وندے بھارت ٹرینیں شامل کی جا رہی ہیں اور انہوں نے کہا کہ ”وہ دن دور نہیں جب وندے بھارت ملک کے ہر حصے کو جوڑے گ“۔ انہوں نے ان لوگوں کے لیے وندے بھارت کی افادیت کو بھی بیان کیا جو وقت بچانا چاہتے ہیں اور ایک ہی دن کا سفر کرنا چاہتے ہیں۔ انہوں نے وندے بھارت سے جڑے مقامات پر بڑھتی ہوئی سیاحت پر بھی روشنی ڈالی جس کی وجہ سے اقتصادی سرگرمیاں بڑھ رہی ہیں۔

وزیر اعظم مودی نے ملک میں امید اور اعتماد کے ماحول کو اجاگر کیا کیونکہ ہر شہری ملک کی کامیابیوں پر فخر محسوس کر رہا ہے۔ انہوں نے چندریان 3 اور آدتیہ ایل 1 کی تاریخی کامیابیوں کا ذکر کیا۔ انہوں نے کہا کہ اسی طرح جی20 کی کامیابی نے ہندوستان کی جمہوریت، آبادی اور تنوع کی طاقت کو ظاہر کیا ہے۔

انہوں نے خواتین کی قیادت میں ترقی کو آگے بڑھانے کے لیے ایک فیصلہ کن لمحے کے طور پر ناری شکتی وندن ایکٹ کا بھی ذکر کیا۔ اس سلسلے میں انہوں نے بتایا کہ بہت سے ریلوے اسٹیشن خواتین کارکنان چلا رہی ہیں۔

وزیر اعظم نے کہا کہ ایک پر اعتماد ہندوستان بیک وقت اپنے حال اور مستقبل کی ضروریات پر کام کر رہا ہے۔ انہوں نے بنیادی ڈھانچے کی ترقی میں ہموار تال میل اور نقل و حمل اور برآمدات سے متعلق قیمتوں میں کمی کے لیے نئی لاجسٹک پالیسی کے لیے پی ایم گتی شکتی ماسٹر پلان کو بھی بیان کیا۔ انہوں نے ملٹی موڈل کنیکٹیویٹی کے بارے میں بھی بات کی کیونکہ ٹرانسپورٹ کے ایک موڈ کو دوسرے موڈ کو سپورٹ کرنا چاہیے۔ انہوں نے کہا کہ یہ سب عام شہریوں کے لیے سفر کی آسانی کو بہتر بنانے کے لیے ہے۔

عام شہریوں کی زندگیوں میں ریلوے کی اہمیت کا ذکر کرتے ہوئے وزیر اعظم نے پہلے وقتوں میں اس اہم شعبے کو نظر انداز کرنے پر افسوس کا اظہار کیا۔ ہندوستانی ریلوے کی تبدیلی کے لیے موجودہ حکومت کی کوششوں کی وضاحت کرتے ہوئے وزیر اعظم نے بجٹ میں اضافے کے بارے میں بتایا کیونکہ اس سال ریلوے کا بجٹ 2014 کے ریل بجٹ سے 8 گنا ہے۔

وزیر اعظم نے اس بات پر زور دیا کہ ”ترقی کی راہ پر گامزن ہندوستان کو اب اپنے ریلوے اسٹیشنوں کو بھی جدید بنانا ہوگا“۔ اسی سوچ کو ذہن میں رکھتے ہوئے پہلی بار ہندوستان میں ریلوے اسٹیشنوں کی ترقی اور جدید کاری کی مہم شروع کی گئی ہے۔ آج ملک میں ریلوے مسافروں کی سہولت کے لیے ریکارڈ تعداد میں فٹ اوور پل، لفٹ اور ایسکلیٹر بنائے جا رہے ہیں۔ ابھی چند روز قبل ہی ملک کے 500 سے زائد بڑے اسٹیشنوں کی تعمیر نو کا کام شروع کیا گیا تھا۔ وزیر اعظم نے کہا کہ امرت کال کے دوران بنائے گئے ان نئے اسٹیشنوں کو امرت بھارت اسٹیشن کہا جائے گا۔ ”یہ اسٹیشن آنے والے دنوں میں نئے بھارت کی شناخت بن جائیں گے“، انہوں نے مزید کہا۔

وزیر اعظم نے اس بات پر خوشی کا اظہار کیا کہ ریلوے نے ریلوے اسٹیشن کے قیام کے دن کو ’استھاپنا دیوس‘ کے طور پر منانا شروع کر دیا ہے اور کوئمبٹور، چھترپتی شیواجی ٹرمینس اور ممبئی میں ہونے والی تقریبات کا ذکر کیا۔ کوئمبٹور ریلوے اسٹیشن نے 150 سال مکمل کر لیے ہیں۔ انہوں نے کہا کہ اب ریلوے سٹیشنوں کی سالگرہ منانے کی اس روایت کو مزید وسعت دی جائے گی اور زیادہ سے زیادہ لوگ اس میں شامل ہوں گے۔

محنتی ریلوے ملازمین سے خطاب کرتے ہوئے وزیر اعظم نے ان سے کہا کہ وہ مسافروں کے لیے ہر سفر کو یادگار بنائیں۔ وزیر اعظم نے درخواست کی کہ ”ریلوے کے ہر ملازم کو سفر میں آسانی اور مسافروں کو اچھا تجربہ فراہم کرنے کے لیے مسلسل حساس رہنا چاہیے۔“

وزیراعظم نے کہا کہ ریلوے کے صفائی کے نئے معیار کو ہر شہری نے محسوس کیا ہے۔ انہوں نے سبھی سے کہا کہ وہ مہاتما گاندھی کو خراج عقیدت پیش کرنے کے لیے یکم اکتوبر کو صبح 10 بجے مجوزہ سوچھتا ابھیان میں شامل ہوں۔ انہوں نے سب سے یہ بھی کہا کہ وہ خود کو کھادی اور سودیشی مصنوعات کی خریداری کے لیے وقف کریں اور 2 اکتوبر سے 31 اکتوبر تک سردار پٹیل کی جینتی کے دوران مزید ووکل فار لوکل بنیں۔

”مجھے یقین ہے کہ ہندوستانی ریلوے اور معاشرے میں ہر سطح پر ہونے والی تبدیلیاں ایک ترقی یافتہ ہندوستان کی طرف ایک اہم قدم ثابت ہوں گی“، وزیر اعظم نے اپنے تبصرے کے اختتام پر کہا۔

اس موقع پر گورنر، وزرائے اعلیٰ، وزرا، اراکین پارلیمنٹ اور مرکزی وزیر جناب اشونی ویشنو موجود تھے۔

پس منظر

یہ نو ٹرینیں گیارہ ریاستوں یعنی راجستھان، تمل ناڈو، تلنگانہ، آندھرا پردیش، کرناٹک، بہار، مغربی بنگال، کیرالہ، اڈیشہ، جھارکھنڈ اور گجرات میں رابطے کو فروغ دیں گی۔

یہ وندے بھارت ٹرینیں اپنے آپریشن کے راستوں پر تیز ترین ٹرینیں ہوں گی اور مسافروں کا کافی وقت بچانے میں مدد کریں گی۔ ان راستوں پر موجودہ تیز ترین ٹرینوں کے مقابلے میں، رورکیلا- بھونیشور- پوری وندے بھارت ایکسپریس اور کاسرگوڈ- تھرواننت پورم وندے بھارت ایکسپریس تقریباً 3 گھنٹے تیز ہو جائے گی۔ حیدرآباد – بنگلورو وندے بھارت ایکسپریس 2.5 گھنٹے مزید تیز ہو جائے گی۔ مدورائی- چنئی وندے بھارت ایکسپریس 2 گھنٹے؛ رانچی – ہاوڑہ وندے بھارت ایکسپریس، پٹنہ – ہاوڑہ وندے بھارت ایکسپریس اور جام نگر-احمد آباد وندے بھارت ایکسپریس تقریباً 1 گھنٹہ اور ادے پور – جے پور وندے بھارت ایکسپریس تقریباً آدھا گھنٹہ تیز ہو جائیں گی۔

ملک بھر میں اہم مذہبی مقامات کے رابطے کو بہتر بنانے کے وزیر اعظم کے وژن کے مطابق، رورکیلا- بھونیشور- پوری وندے بھارت ایکسپریس اور ترونیل ویلی- مدورائی- چنئی وندے بھارت ایکسپریس پوری اور مدورائی کے اہم مذہبی شہروں کو جوڑے گی۔ اس کے علاوہ، وجے واڑہ – چنئی وندے بھارت ایکسپریس رینی گنٹا کے راستے سے چلے گی اور تروپتی مسافر مرکز سے رابطہ فراہم کرے گی۔

ان وندے بھارت ٹرینوں کے متعارف ہونے سے ملک میں ریل سروس کے ایک نئے معیار کا آغاز ہو گا۔ عالمی معیار کی سہولیات اور کوچ ٹیکنالوجی سمیت جدید حفاظتی خصوصیات سے آراستہ یہ ٹرینیں عام لوگوں، پیشہ ور افراد، تاجروں، طلبہ برادری اور سیاحوں کو جدید، تیز رفتار اور آرام دہ سفر کے ذرائع فراہم کرنے کی جانب ایک اہم قدم ثابت ہوں گی۔

Nine Vande Bharat Express trains being launched today will significantly improve connectivity as well as boost tourism across India. https://t.co/btK05Zm2zC

— Narendra Modi (@narendramodi) September 24, 2023

New Vande Bharat trains will improve connectivity across the country. pic.twitter.com/Buj1AsoY9Q

— PMO India (@PMOIndia) September 24, 2023

वो दिन दूर नहीं, जब वंदेभारत देश के हर हिस्से को कनेक्ट करेगी। pic.twitter.com/39G8ZmkjxW

— PMO India (@PMOIndia) September 24, 2023

**************

ش ح۔ ف ش ع- م ف

U: 9878