ভারতকী প্রধানমন্ত্রী

শক্নাইরবশিং,

খুরুমজরি!

ঐখোয়না মীফম হৌদ্রিঙৈ মমাংদা, ঙাইহাক্কী মমাঙদা মোরোকোদা য়ুহা হাবদা মীওই কয়া শোকহনখিবা থৌদোক অদু ঐখোয় ময়ামগী মহুৎশীন্দুনা ঐনা থম্মোয় শোক্না অৱাবা ফোঙদোকচরি।

অশোকপশিং অথুবা মতমদা ফগৎলক্নবা ঐখোয়না থৌনিজরি। মোরোকোনা অৱাবা তারবা মতম অসিদা মালেম পুম্নমক্না লেপ্লি অমসুং পাংবা য়াবা মতেংশিং পাংনবা ঐখোয় থৌরাং তৌদুনা লৈরে।

শক্নাইরবশিং,

জি-২০ গী প্রসিদেন্ত ওইনা, ভারতনা ময়াম পুম্নমক তরাম্না ওকচরি। হৌজিক ঐখোয় ময়াম পুল্লিবা মফম অসিদগী কিলোমিতর খর লাপ্না চহি লিশিং ২.৫ রোম শুরবা য়ুম্বী অমা লৈরি।

য়ুম্বী অসিদা প্রাকিত লোলদা অশুম্না ইরি-

“হেবাম লোকাসা হিতমুখে তি,

অথ ইয়ম নাতিসু হেবাম”

মসিনা হায়রি,

“মতম পুম্নমক্তা মীওই খুন্নাইগী য়াইফনবা অমসুং নুংঙাইনবা থবক তৌগদবনি”।

চহি লিশিং ২.৫গী মমাঙদা , ভারতনা মসিগী পাউজেল অসি মালেম শীনবা থুংনা শন্দোকখি।

মসিগী পাউজেল অসি নিংশিংদুনা ঐখোয় জি-২০ মীফম হৌরসি। মালেম শীনবা থুংনা অনৌবা মাইকৈ অমা তাক্কদবা মরম্না ২১শুবা চহিচা অসি য়াম্না মরুওইবা মতম্নি।

মতম অসি অরিবা খুদোংচাদবশিং কোকহন্নবা ঐখোয়দগী অনৌবা পাম্বৈশিং থিরিবা মতম্নি।

মরম অদুনা, মীওইবা খুন্নাই য়াইফনবা য়ুম্ফম ওইদুনা ঐখোয়গী থৌদাংশিং পাংথোক্নবা ঐখোয় মাঙলোমদা চঙশিনগদবনি।

মরুপশিং,

কোবিদ-১৯ মতুংদা, মালেমদা থাজন্দবগী অচৌবা ময়ি অমা চৎলে। মসিগী থাজনদবা অসি লান্না অমুক্কা হেন্না ময়েক শেংহল্লে। ঐখোয়না কোবিদ মাইথিবা পীবা ঙম্বনা, ঐখোয়না অমগা অমগা থাজন্দবগী অৱাবা অসি কোকহনবা ঙমগনি।

ঙসি, জি-২০গী প্রসিদেন্ত ওইনা, মালেমগী থাজনদবা অসি অমগা অমগা থাজনবদা অহানবা ওইনা ওন্থোক্নবা ভারতনা মালেমগী লৈবাকশিংদা হায়জরি। হৌজিক অসি ঐখোয় অমতা ওইনা চৎমিন্নগদবা মতম্নি।

মরম অদুনা, “সবকা সাথ, সবকা বিকাস, সবকা বিশ্বাস অমসুং সবকা প্রায়াস” লাইৱা অসি ঐখোয় খুদিংমক্কী লমজিং মৈরা অমা ওইগনি।

মালেমগী শেন্মিৎলোন ফিবম চাদ্রে,

অৱাং অমসুং খাগী  মরক্তা খেন্নবা অমা লৈরে,

নোংপোক অমসুং নোংচুপ লাপ্নরে,

চীঞ্জাক, থাউ অমসুং হার ফংহনবা দরকার ওইরে,

তেরোরিজম অমসুং সাইবর সেকুরিতি লৈরে,

হকশেল, ইনর্জি অমসুং ঈশিং ফংহনগদবনি,

হৌজিক্কী মীরোল অমসুং তুংগী মীরোলশিংগীদমক, হায়রিবা অৱাবশিং অসিগী পাম্বৈশিং ঐখোয়না পুথোক্কদবনি।

মরুপশিং,

ভারতনা জি-২০গী প্রসিদেন্ত ওইবা অসি লৈবাক্কী মনুং অমসুং মপান্দা “সবকা সাথ”কী খুদম অমা ওইরে। ভারত্তা, মসি মীয়ামগী জি-২০ ওইরে। ভারতমচা করোর কয়া মসিদা শরুক য়ারে। লৈবাক অসিগী সহর ৬০ হেনবদা মীফম ২০০ হেন্না পাংথোকখ্রে।

অপুনবগী ৱাখল্লোন্দা অফ্রিকান য়ুনিয়ন জি-২০গী লেংদবা মেম্বর ওইহন্নবা ভারতনা পুখৎলি। ৱাফম অসি লৈবাক পুম্নমক্না য়াগনি হায়না ভারতনা থাজৈ।

ময়াম পুম্নমক্তগী অয়াবা লৌরগা, মীফম মখা চৎথদ্রিঙৈদা, জি-২০গী লেংদবা মেম্বর অমা ওইনা মহাক্কী ফমফমদা ফম্নবা ঐনা অফ্রিকান য়ুনিয়নগী চিয়ারদা হায়জরি।

***