ভারতকী প্রধানমন্ত্রী

মিস্তর প্রেসিদেন্ত,

ঐনা অদোমগী মফমদা তৌবিমল খঙবা উৎচরি অমদি জিল বাইদেনগী মফমদসু তৌবিমল খঙবা ফোঙদোকচরি‍। ঐবু অমদি ঐখোয়গী দেলিগেসনবু অদোম্না তরাম্না ওকপিরিবসিগীদমক ঐনা অদোমগী মফমদা তৌবিমল খঙবা উৎচরি অমদি ঙসি অদোম্না ভারত মচাশিংগী মফমদা হ্বাইত হাউসকী থোঙ হাংদোকপিরিবা অসিনা মরম ওইরগা ভারত মচা লিশিং কয়ানা অমেরিকা অমদি ভারতকী মরক্তা তুংগী ওইবা মরী শেমগৎপগী থৌরম অসি মীৎয়েঙ তাননবগীদমক ঐখোয়গী ইরক্তা তিল্লরি‍।

য়োর এক্সেলেন্সী,

অদোম্না মতম পুম্বদা ভারতকী য়াইফনবা খনবিদুনা লাক্লি অমদি অদোম্না তাঞ্জা ফংবা মতম অমদি মফম অমা হেক্তদা অদোম্না ভারত-য়ু.এস.কী মরীগী মতাঙদা মরুওইবা ৱাফম কয়া থমদুনা লাক্লি‍। ঐ ঙসিসু নীংশিংলি, চহি ৮ গী মমাঙদা, য়ু.এস.-ইন্দিয়া বিজিনেস কাউন্সিলদা ৱা ঙাঙবা মতমদা, অদোম্না য়াম্না মরুওইবা ৱাফম অমা ফোঙদোকখি‍। “ঐখোয়গী পান্দমদি ভারতকী খ্বায়দগী চান্নবা মরূপ ওইবদুনি” হায়না অদোম্না হায়খি‍। হায়রিবা অদোমগী ৱাহৈশিং অসি ঙসিসু নিন্দুনা লৈরি‍। অদোম্না ভারতকীদমক লেপ্পিরিবা খোঙফমদুনা ঐখোয়বু য়াম্লবা ইচঙ থৌবা অমদি মতিং লৈবা খোঙথাঙ কয়া লৌখৎনবগী থৌনা হাপ্লি‍।

ঙসি, ভারত অমদি অমেরিকানা তরংগী অৱাংবদগী সমুদ্রগী লুরবা ইরোন্নুং ফাওবদা, অরিবা মতমগী নাত্তগী হৌরগা আর্তিফিসিএল ইন্তলিজেন্স ফাওবদা হীরম খুদিংদা খুঙশম্ননা চৎমিন্নরি‍।

দিপ্লোমেতিক ওইবা মীৎয়েঙদা য়েংবদা, লৈবাক অনিগী মরক্তা লৈনরিবা মরী অসি ফোর্মেল জোইন্ত স্তেতমেন্ত, ৱর্কিং গ্রুপ, অমদি এম.ও.য়ু.শিংনা ওইরি‍। তশেংবমকসু, মসি মরু ওইবা অমনি, অদুবু ভারত অমদি অমেরিকাগী মরক্তা লৈনরিবা মরী অসিবু থৌদুনা পুরিবা অশেঙবা ইঞ্জিনদি ঐখোয়গী মপাঙ্গল কল্লবা মীগা মীগগী মরক্তা লৈনরিবা মরীসিনি‍। অদুগা হায়রিবা ইঞ্জিন অসিগী অহৌবা খোঞ্জেল অমা হ্বাইত হাউসকী লোনগী মপান্দা ঐখোয়না তারি‍।

য়োর এক্সেলেন্সী,

অদোম্না হায়খিবা ৱাফম অমা ঐ অমুক হন্না নীংশিংজগে‍। ঙসিগী খোঙলৈ থুনা হোংলক্লিবা মালেমগী ফীভমসিদা, মী পুম্নমক্কী মীৎয়েঙ ভারত অমদি অমেরিকা হায়রিবা মালেমগী খ্বায়দগী চাউবা দিমোক্রেসী অনিসিদা থম্লি‍। মালেমগী ওইনা ইং চিকপা অমদি মরা চেৎপা লোয়ননা মীওইবা খুন্নাইগী য়াইফনবগীদমক দিমোক্রেতিক ভেল্যুশিংদা থাজবা থম্বা শাফু পুম্নমক্কী ওইনা ঐখোয়গী স্ত্রেতেজিক ওইবা খোঙবু অসি য়াম্না মচঙ ওইবা অমদি মরুওইবা অমনি হায়না ঐনা থাজৈ‍।

ঐখোয়না পুল্লগা মালেম পুম্বগী মতিং হেনগৎহনবদা শোয়দনা মায় পাক্কনি হায়না ঐনা থাজৈ‍।

ঙসি ঐখোয়গী ৱারী শানবসিদা, ঐখোয়না ইসু কয়া খন্নগনি অমদি ঐখোয়গী স্ত্রেতেজিক ওইবা মরীসিদা অনৌবা মাইওন হাপচিনগনি‍। ঐনা অমুক্কা হন্না ঐখোয়গী মরী অসিগীদমক অদোমগী মফমদা তৌবিমল খঙবা উৎচরি‍।

***