પીએમઇન્ડિયા

મહાનુભાવો,

તમારા મંતવ્યો માટે ખૂબ ખૂબ આભાર. આપણી ચર્ચાઓમાંથી જે વિચારો આવ્યા છે તે અમે ચોક્કસપણે ધ્યાનમાં લઈશું. આપણી પાસે કેટલીક સહિયારી પ્રાથમિકતાઓ છે અને પેસિફિક ટાપુ દેશોની જરૂરિયાતો છે. આ પ્લેટફોર્મ પર અમારો પ્રયાસ બંને પાસાઓને ધ્યાનમાં રાખીને આગળ વધવાનો છે. FIPIC ની અંદર અમારા સહકારને વધુ વધારવા માટે, હું કેટલીક જાહેરાતો કરવા માંગુ છું:

1. પેસિફિક પ્રદેશમાં હેલ્થકેરને પ્રોત્સાહન આપવા માટે, અમે ફિજીમાં સુપર-સ્પેશિયાલિટી કાર્ડિયોલોજી હોસ્પિટલની સ્થાપના કરવાનું નક્કી કર્યું છે. આ હોસ્પિટલ પ્રશિક્ષિત સ્ટાફ, આધુનિક સુવિધાઓ અને ઈન્ફ્રાસ્ટ્રક્ચરથી સજ્જ હશે અને તે સમગ્ર પ્રદેશ માટે જીવનરેખા તરીકે કામ કરશે. આ મેગા ગ્રીનફિલ્ડ પ્રોજેક્ટનો સંપૂર્ણ ખર્ચ ભારત સરકાર ઉઠાવશે.

2. ભારત તમામ 14 પેસિફિક ટાપુ દેશોમાં ડાયાલિસિસ યુનિટ સ્થાપવામાં મદદ કરશે.

3. પેસિફિકના તમામ 14 ટાપુ દેશોને સી એમ્બ્યુલન્સ આપવામાં આવશે.

4. વર્ષ 2022માં, અમે ફિજીમાં જયપુર ફૂટ કેમ્પનું આયોજન કર્યું.

આ કેમ્પમાં 600 થી વધુ લોકોને વિનામૂલ્યે કૃત્રિમ અંગો આપવામાં આવ્યા હતા. મિત્રો, આ ભેટ મેળવનારને એવું લાગે છે કે જાણે જીવનની ભેટ મળી હોય.

PIC પ્રદેશ માટે, અમે આ વર્ષે પાપુઆ ન્યુ ગિની (PNG)માં જયપુર ફૂટ કેમ્પનું આયોજન કરવાનું નક્કી કર્યું છે. 2024 થી શરૂ કરીને, પેસિફિક ટાપુ દેશોમાં દર વર્ષે આવા બે શિબિરોનું આયોજન કરવામાં આવશે.

5. ભારતમાં જન ઔષધિ યોજના દ્વારા, 1800 થી વધુ ઉચ્ચ-ગુણવત્તાવાળી જેનરિક દવાઓ લોકોને પોસાય તેવા ભાવે પૂરી પાડવામાં આવી રહી છે. ઉદાહરણ તરીકે, ડાયાબિટીસ વિરોધી દવા જન ઔષધિ કેન્દ્રો પર બજાર કિંમતોની તુલનામાં 90% ઓછી કિંમતે ઉપલબ્ધ છે. અન્ય દવાઓ પણ બજાર કિંમતના 60% થી 90% સુધીના ડિસ્કાઉન્ટ ભાવે ઉપલબ્ધ છે. હું તમારા દેશોમાં સમાન જન ઔષધિ કેન્દ્રો લાવવાનો પ્રસ્તાવ મૂકું છું.

6. વૈજ્ઞાનિક અભ્યાસોએ દર્શાવ્યું છે કે ડાયાબિટીસ જેવા જીવનશૈલીના રોગોને રોકવા માટે યોગ અત્યંત અસરકારક છે. તેના ફાયદાઓને પ્રોત્સાહન આપવા માટે અમે તમારા દેશોમાં યોગ કેન્દ્રો સ્થાપવાની દરખાસ્ત કરીએ છીએ.

7. PNG માં IT માટે સેન્ટર ઓફ એક્સેલન્સને અપગ્રેડ કરવામાં આવશે અને “પ્રાદેશિક માહિતી ટેકનોલોજી અને સાયબર સુરક્ષા હબ” માં રૂપાંતરિત કરવામાં આવશે.

8. ફિજીના નાગરિકો માટે 24×7 ઇમરજન્સી હેલ્પલાઇનની સ્થાપના કરવામાં આવશે, અને તમામ PIC દેશોમાં સમાન સુવિધા સ્થાપિત કરવામાં મદદ કરવામાં અમને આનંદ થશે.

9. હું દરેક પેસિફિક ટાપુ દેશમાં SME ક્ષેત્રના વિકાસ માટે એક પ્રોજેક્ટની જાહેરાત કરું છું. આ યોજના હેઠળ, મશીનરી અને ટેક્નોલોજીનો પુરવઠો પૂરો પાડવામાં આવશે, અને ક્ષમતાઓ વધારવા માટે ક્ષમતા-નિર્માણ કાર્યક્રમો હાથ ધરવામાં આવશે.

10. પેસિફિક આઇલેન્ડ હેડ ઓફ સ્ટેટ રેસીડેન્સીસને સૌર ઉર્જાથી ચાલતા નિવાસોમાં રૂપાંતરિત કરવાના પ્રોજેક્ટને તમારા બધા દ્વારા સારી રીતે આવકારવામાં આવ્યો હતો. અમે હવે તમામ FIPIC દેશોમાં ઓછામાં ઓછી એક સરકારી ઇમારતને સૌર ઉર્જાથી ચાલતી ઇમારતમાં રૂપાંતરિત કરીશું.

11. પાણીની અછતની સમસ્યાને ઉકેલવા માટે, હું દરેક પેસિફિક ટાપુ દેશના લોકો માટે ડિસેલિનેશન એકમો પ્રદાન કરવાની પ્રતિજ્ઞા કરું છું.

12. ક્ષમતા નિર્માણ માટે અમારી લાંબા ગાળાની પ્રતિબદ્ધતા ચાલુ રાખીને, હું આજે પેસિફિક ટાપુના દેશો માટે “સાગર અમૃત શિષ્યવૃત્તિ” યોજનાની જાહેરાત કરું છું. આ કાર્યક્રમ હેઠળ, આગામી પાંચ વર્ષમાં 1000 ITEC તાલીમની તકો પૂરી પાડવામાં આવશે.

મહાનુભાવો,

આજે, હું અહીં મારી ટિપ્પણી પૂરી કરું છું. મને આ ફોરમ માટે ખાસ લગાવ છે. તે સીમાઓને પડકારે છે અને માનવીય સહયોગની અમર્યાદ સંભાવનાને ઓળખે છે. ફરી એકવાર, આજે અહીં તમારી હાજરી માટે હું હૃદયપૂર્વક આભાર વ્યક્ત કરું છું.

હું આશા રાખું છું કે આગલી વખતે અમને ભારતમાં તમારું સ્વાગત કરવાની તક મળશે.

આભાર!

YP/GP/JD