ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদীনা মে ১৮গী নুংথিল পুং ১২:৩০ রোম তাবদা ভিদিও কনফরেন্সকী খুৎথাংদা ওরিসাদা লুপা করোর ৮০০০ হেনবগী তোঙান-তোঙানবা রেলৱে প্রোজেকশিং উরেপ-উয়ুং তমগনি অমসুং মীয়ামদা কৎথোক্কনি।

থৌরম অদুদা প্রধান মন্ত্রীনা পুরি অমসুং হাওরাগী মরক্তা বন্দে ভারত এক্সপ্রেস লমথাগনি। ত্রেন অসিনা ওরিসাগী খোরধা, কত্তক, জাজপুর, ভাদ্রাক অমসুং পালাসোর জিলাশিং অমসুং নোংচুপ বেঙ্গলগী পসচিম মেদিনিপুর, পুর্বা মেদিনিপুর জিলাশিং ফাওদুনা চেনগনি। ত্রেন অসিনা রেল তোংলিবশিংদা হেন্না য়াংবা, নুংঙাইবা অমসুং খুদোংচাবা চৎথোক-চৎশিন ফংহনগনি, লমদম অসিগী তুরিজম অমসুং শেন-থুমগী ফিবম ফগৎহনগনি।

প্রধান মন্ত্রীনা পুরি অমসুং কত্তক রেলৱে স্তেসনশিং নৌনা শেমগৎনবা উরেপ-উয়ুং তমগনি। নৌনা শেমগৎকদৌরিবা স্তেসনশিং অসিদা মতমগা চুনরবা মালেম থাক্কী খুদোংচাবশিং রেল তোংলিবা মীওইশিংদা ফংহনগনি।

ওরিসাদা রেল নেতৱার্ক চাদা ১০০ ইলেক্ত্রিক ফংহনবগী থবক প্রধান মন্ত্রীনা মীয়ামদা কৎথোক্কনি। মসিনা ওপরেসন অমসুং মেন্তেনেন্সকী শেনফম হন্থহনগনি অমসুং মপান লৈবাকশিংদগী শুংদোক্ত্রিবা থাউ পুশিল্লকপগী মখা পোনবা হন্থহনগনি। 

সাম্বলপুর-তিতলাগর রেল লাইন দবল ওনখৎপা; অঙ্গুল-সুকিন্দাগী মরক্তা অনৌবা ব্রোদ গেজ লাইন অমা শেমগৎপা; মনোহরপুর-রৌরকেলা-ঝারসুগুদা-জামগা শম্নবা অহুমশুবা লাইন অমসুং বিছুপালি-ঝারতারভাগী মরক্তা অনৌবা ব্রোদ গেজ লাইন প্রধান মন্ত্রীনা মীয়ামদা কৎথোক্কনি। ওরিসাদা স্তিল, পৱার অমসুং মাইনিং সেক্তরশিংদা য়াংনা উদোগ চাউখৎলকপদগী চৎথোক-চৎশিন দরকার ওইবা হেনগৎলক্লিবা অদু হায়রিবা প্রোজেকশিং অসিনা ফংহনবা ঙমগনি অমসুং হায়রিবা রেল সেক্সনশিং অসিদা পেসেঞ্জর মশিং হেনগৎলকপা অদু শাফহনগনি।

*****