ভারতকী প্রধানমন্ত্রী

জয়পুর রুরেলী এম.পি. অমসুং ঐহাক্কী মরুপ অমদি ইনাও রাজ্যবর্ধন সিংহ রাথোর, শান্নরোয়, কোচ অমসুং ঐগী নহা ওইরিবা মরুপ পুম্নমক!

অহানবদা ঐহাক্না জয়পুর মহাখেলদা মেদলশিং লৌরক্লবা, কম্পিতিসন অসিদা শরুক য়াখিবা শান্নরোয়, কোচ অমসুং মখোয়গী ইমুংগী মীওইশিংদা নুংঙাইবা ফোঙদোকচরি। নখোয় পুম্নমক্না জয়পুরগী শান্নবুং অসি শুপ্নগী শান্ননবা খক্তা চংলকখিবা নত্তে। নখোয়না মফম অসিদা থোইনা অমসুং মফম অসিদা তমশিন্নবা লাকখিবনি। অমসুং লেপ্পা লৈতনা তমশিল্লবদি মশানা থোইবা হায়বা অসি লাকচগনি। শান্নবুং অসিদগী শান্নরোয় অমত্তনা মখুৎ হাংনা হনখিদে।

মরুপশিং,

হৌজিক ঐখোয় পুম্নমক্না কবদ্দী শান্নরোয়শিংনা ফজরবা মশান্না অমা শান্নবা উবা ফংখ্রে। ঙসিগী লোইশিনবগী থৌরমদা স্পোর্তসকী লমদা মালেমগী থাক্তা ভারতকী মীংচৎ পুরকখিবা মশক নাইবা মীওই কয়া ঐহাক্না উবা ফংখি। রাম সিংহ, এসিয়ন গেম্সকী মেদলিস্ত, পেরা-এথেলিৎ দেবেন্দ্র ঝাঝারিয়া, ধ্যানচন্দ খেল রত্ন এৱার্দী, সক্ষি কুমারি, অর্জুন এৱার্দী অমসুং অতোপ্পা মকোক থোংবা এথেলিৎশিং উবা ফংখি। ভারতকী মশক নাইবা মীওইশিং অসিনা জয়পুর মহাখেলদা নহা ওইরিবা শান্নরোয়শিংবু শৌগৎনবা থোরকপদা নুংঙাইবা ফোঙদোকচরি।

মরুপশিং,

লৈবাক শিনবা থুংবদা স্পোর্তস কম্পিতিসনশিং অমসুং খেল মহাকুম্ভ মথং-মথং পাঙথোকপা অসিনা অচৌবা অহোংবশিং লাক্লি তাক্লি। রাজস্থান অসি নহারোলগী থৌনা লিংজেলগীদমক খঙনবা লমদম অমনি। লমদম অসিগী অঙাংশিংনা লানবুংবু মখোয়গী থৌনা-লিংজেলনা শান্নবুংদা ওন্থোকখিবগী খুদম পুৱারীনা ওইরি। জাতিগী ঙাকশেলগী মতাংদা লাকপা মতমদা লেমহৌরিবা শরুকশিংদগী মতম চুপ্পদা রাজস্থান্না মাং থাদুনা থোরকই। রাজস্থানগী স্পোর্তসকী চৎনবী অসিনা লমদম অসিগী নহারোলশিংগী মেন্তেল অমদি ফিজিকেলগী মতিক-ময়াইশিং মখোং শোম্বদা অচৌবা থৌদাং অমা লৌরি। দাদা, সিতোলিয়া, রুমাল ঝাপত্তাগুম্বা য়েলহৌঙৈগী মশান্নাশিং অসি মকর সংক্রান্তিদা শান্নৈ। মসি চহি কয়াদগী রাজস্থানগী চৎনবীগী শরুক অমা ওইদুনা লাকখি। মরম অসিনা রাজ্য অসিনা লৈবাক্কী স্পোর্তিং তেলেন্ত কয়া পুথোকখি, মসিনা মেদল কয়া লৌরক্তুনা মচু অহুমগী ফিরালগী মীংচৎ হেনগৎহনখি অমসুং জয়পুরগী মীয়াম্না মখোয়গী পার্লিয়ামেন্তরিয়ন অসি ওলিম্পিক মেদলিস্ত অমা ওইনা থাগৎলকখি। মেম্বর ওফ পার্লিয়ামেন্ত ওইরিবা শ্রী রাজ্যবর্ধন সিংহ রাথোরনা ‘সান্সদ খেল স্পর্ধো’গী খুত্থাংদা হৌরক্লিবা মীরোলদা লৈবাক অসিনা পীখিবা অদু হঞ্জিন হন্নবা হোৎনরি। ঐখোয়না মসিগী খোঙথাংশিং অসিগী শাফু চাউথোকহন্নবা হেন্না হেনগৎহনখি। হেন্না কমপ্রিহেন্সিব ওইবা ফলশিং ফংনবগীদমক অসিগুম্বা খোঙথাংশিং অসি হেনগৎহনবা মথৌ তাই অমসুং জয়পুর মহাখেল মাইপাক্না পাঙথোকপা অসি খোঙথাংশিং অসিগী মথংগী মরু ওইবা মরী অমা ওইরি। জয়পুর মহাখেলগী মাইপাক্না পাঙথোকপা অসি ঐখোয়গী মান্নবা খোঙথাংশিং মখা চত্থরকপনি। চহি অসিগী ইদিসন্দা তীম ৬০০ হেনবনা অমসুং নহারোল ৬,৫০০না শরুক য়াখি। নুপীমচাগী তিম ১২৫ হেনবনা শরুক য়াবা অসিনা অফবা পাউজেল অমা পীরি।

মরুপশিং,

নীংতম্বগী অমৃত কাল অসিদা লৈবাক অসিনা অনৌবা ৱাহন্থোক অমা পীরি অমসুং অনৌবা ওর্দর অমা শেম্লি। ঙসিদি অহানবা ওইনা স্পোর্তস অসি রাজনিতীগী মীৎয়েংগী মহুৎ শান্নরোয়গী মীৎয়েংদগী য়েংবা হৌরে। ঐহাক্না খঙই মদুদি নহারোলগীদমক ওইথোক্তবা অমত্তা লৈতে অমসুং পান্দম খুদিংমক অসি মখোয়গী তৌবা ঙম্বশিং, মশানা মশাবু ইকাই খুম্নবা, মরোমদোম লেপচবা ঙম্বা, খুদোংচাবা অমদি রিসোর্সশিংগী শক্তি অসি লৈরবা মতমদা লায়না মঙফাওনবা ঙম্মি। অসিগুম্বা এপ্রোচকী মমিশিং অসি চহি অসিগী বজেৎতসু উবা ফংই। ২০১৪গী মমাংদা করোর ৮০০-৮৫০ এল্লোকেৎ তৌখিবা অদুগা চাংদম্নবা মতমদা স্পোর্তস মন্ত্রালয়না চহি অসিদা করোর ২৫০০গী বজেৎ অমা এল্লোকেৎ তৌখি। লৈবাক্কী স্পোর্তস বজেৎ অসি ২০১৪দগী শরুক অহুমরোম হেনগৎলকখি। লৈবাক্কী স্পোর্তস ফেসিলিতীশিং অমসুং রিসোর্সশিং শেমগৎপদা চাদিং তৌগদবা ‘খেলো ইন্দিয়া’ কেম্পেন খক্তদা লুপা করোর ১০০০ হেন্না এল্লোকেৎ তৌখি।

মরুপশিং,

মমাংদা লৈবাক্কী নহারোলশিংদা শান্ন-খোৎনবগী অপাম্বা অমসুং তেলেন্ত লৈখি অদুবু অয়াম্বা মতমদা রিসোর্সশিংগী অৱাৎপা লৈখি অমসুং মতম অদুদা সরকারদগী রিসোর্স অমদি তেংবাং ফংখিদে। ঙসিদি শান্নরোয়শিং অসিনা মায়োক্নখিবা সমস্যাশিং অসি কোকহনখ্রে। জয়পুর মহাখেল অসি ঐহাক্না খুদম ওইনা পীজগে। জয়পুরগী ইভেন্ত অসি চহি ৫-৬তগী পাঙথোক্তুনা লাকখি। মতৌ অসুম্না লৈবাক্কী কাচিন-কোয়া খুদিংমক্তা খেল মহাকুম্ভ অসি বি.জে.পি.গী মেম্বর ওফ পার্লিয়ামেন্তশিংনা মখোয়গী মশাগী কেন্দ্রদা পাঙথোক্লি। স্পোর্তিং ইভেন্ত কয়াদা তোঙান-তোঙানবা স্পোর্তসশিংদা তেলেন্ত লৈবা শান্নরোয় লিশিং কয়ানা শরুক য়াখি মসিনা মরম ওইদুনা নহারোল কয়াগী তেলেন্তশিং মাংদা থোরক্লি।

মরুপশিং,

পুম্নমক অসি জিলা অমসুং লোকেল লেবেলশিংদা কেন্দ্র সরকারনা স্পোর্তস ফেসিলিতীশিং শেমগৎলিবা অসিনা মরম ওইদুনা  ওইথোকখি। হৌজিক ফাওবদা লৈবাক্কী জিলা কয়াদা লৈরিবা নহারোল লাখ কয়াগীদমক স্পোর্তস ইনফ্রাস্ত্রকচর শেমগৎলি। রাজস্থান্দসু সহর কয়াদা কেন্দ্র সরকারনা স্পোর্তস ইনফ্রা শেমগৎলি। ঙসি লৈবাক অসিদা স্পোর্তস য়ুনিভর্সিতীশিং লিংখৎলি অমসুং খেল মহাকুম্ভগুম্বা অচৌবা ইভেন্তশিং প্রোফেস্নেল ওইবা মওংদা পাঙথোক্লি।

চহি অসিগী বজেৎ খ্বাইদগী ৱাংনা নেস্নেল স্পোর্তস য়ুনিভর্সিতীদা এল্লোকেৎ তৌখি। স্পোর্তস মেনেজমেন্ত অমসুং স্পোর্তস তেক্নোলোজীগা মরী লৈনবা লম খুদিংমক তমশিন্নবগী এনভাইর্নমেন্ত অমা শেম্বা মথৌ তাই মসিনা লমশিং অসিদা নহারোলশিংনা কেরিয়র অমা শেম্নবা খুদোংচাবা অমা পীরগনি।

মরুপশিং,

কেন্দ্র সরকারনা চহি অমদা লুপা লাখ ৫ ফাওবা পীদুনা খ্বাইদগী ফবা শান্নরোয়শিং শেমগৎলি। হায়রদুনা প্রধান মন্ত্রীনা ঐখোয়গী সরকারনা শেলগী অৱাৎপা লৈবনা মরম ওইদুনা নহা অমত্তা শোত্থনা লৈহৌদনবা মীৎয়েং চংলি। মরু ওইবা স্পোর্তস এৱার্দশিংদা থাদরিবা শেনফম অসিসু শরুক অহুম ফাওবা হেনগৎহনখি। চহি কয়া ওলিম্পিক্সকীদমক শান্নরোয়শিংবু শেম-শাবা অসি তোপ্সকুম্বা স্কিমনা য়াহল্লি। সরকারনা ওলিম্পিক্সগুম্বা অচৌবা গ্লোবেল কম্পিতিসনশিংদা মপুং ফাবা শক্তিগা লোয়ননা মাগী শান্নরোয়শিংগীদমক লেপ্পি।

মরুপশিং,

স্পোর্তসকী লমদা হকচাং ফনা থম্বগী মথৌ তাবা খক্তা নত্তনা নুংতিগী পুন্সিদসু মথৌ তাই। মসি শান্নরোয়গী খ্বাইদগী মরু ওইবা ৱাফম অমনি। নখোয়না হকচাং ফরবা খক্তদা সুপরহিৎ ওইনা ঙমগনি। মরম অসিনা ঙসি খেলো ইন্দিয়া, ফিৎ ইন্দিয়া অসি লৈবাক্কী অচৌবা মিসন ওইরি।  হকচাং ফনা থম্বদা মচি ওইবা চীঞ্জাক্কী থৌদাং চাউই। মরম অসিনা ঐহাক্না নখোয়দা অসিগুম্বা কেম্পেন অমগী মতাংদা খন্নবা পাম্মি। মসি ভারতনা হৌখিবনি অদুবু হৌজিক্তি গ্লোবেল কেম্পেন অমা ওইরে। নখোয়নসু তরাম্লগনু ভারতনা হায়জবদগী য়ুনাইতেদ নেসন্সনা ২০২৩গী চহি অসিবু ইন্তর্নেস্নেল ইয়র ওফ মিল্লেৎস হায়না পাঙথোক্লি। রাজস্থান অসি মিল্লেৎকী য়াম্না ফজবা চৎনবী, শ্রী অন্নগী হৌরকফম লমদম ওইরি। রাজস্থানগী শ্রী অন্ন-বাজরা অমসুং শ্রী অন্ন-জ্বারনা লমদম অসিগী মশক তাক্লি। হন্দক্তি ৱাফম অসি বজেৎতসু য়াওহনখ্রে। মসি সুপর ফুদনি, মসি শ্রী অন্ননি। অমসুং মরম অসিদা রাজস্থানগী শ্রী অন্ন-বাজরা , শ্রী অন্ন-জ্বার অসিগুম্বা কোর্স গ্রেন কয়া অসি শ্রী অন্ন হায়বা মমিং অসিগী হৌজিক মরী লৈনরি। লমদম অসিগী বাজরা পরিজ অমসুং চুরমা করম্না কাওগনি। ঐহাক্না নহারোল পুম্নমক্তা মখোয়গী চীঞ্জাক্তা শ্রী অন্ন য়াওহনবা খক্তা নত্তনা মাগী ব্রান্দ এম্বেসেদর ওইনবা হায়জরি।

মরুপশিং,

লৈবাক অসিনা নহারোলগী অপুনবা চাউখৎ-থৌরাংগীদমক থবক পাইখৎলি অমসুং ঙসিগী নহারোলশিংনা মখোয়গী মলতি-তেলেন্তেদ অমসুং মলতি-দাইমেন্সনেল কেপাবিলিতীশিংনা মরম ওইদুনা লম অমা খক্তদা ফাজিনদুনা লৈবা পাম্লক্ত্রে। নাকল অমরোমদা মোদর্ন স্পোর্তস ইনফ্রাস্ত্রকচর শেমগৎলি অমরোমদনা অঙাংশিং অমসুং নহারোলগীদমক নেস্নেল দিজিতেল লাইব্রেরীগীদমক চহি অসিগী বজেৎতা প্রপোজ তৌখি অমসুং সহরদগী খুঙ্গং ফাওবগী থাক খুদিংমক্তা সাইন্স,হিস্তরী, সোসিওলোজী, সংস্ক্রৎ অসিগুম্বা সবজেক্ত খুদিংমক্কী লাইরিকশিং ফংগনি। মসিনা নখোয়গী লর্নিং এক্সপরিয়েন্সতা অনৌবা পনখৈ অমা পীবা ঙম্লগনি, রিসোর্স পুম্নমক নখোয়গী কম্প্যুতর অমসুং মোবাইলদা ফংলগনি।

মরুপশিং,

স্পোর্তস অসি শুপ্নগী জোনর খক্তা নত্তনা ইন্দস্ত্রী অমনি। স্পোর্তসকা মরী লৈনবা পোৎলমশিং অমসুং রিসোর্সশিং শারিবা এম.এস.এম.ই.শিংগী খুত্থাংদা মশিং য়াম্লবা মীওইশিংনা থবক ফংলি। হন্দক্তি স্পোর্তস সেক্তরগা মরী লৈনবা এম.এস.এম,ই,শিং মপাঙ্গল কনখৎহন্নবা বজেৎ অসিদা মরু ওইবা ৱাফম কয়ামরুম লাউথোকখি। ঐহাক্না নখোয়না অতোপ্পা স্কিম অমগী মতাংদা হায়জগে। মেন্যুএল স্কিলশিং অমসুং খুৎকী খুৎলাইশিং পাইবা মীওইশিংদা চাউনা মতেং পাংগদৌরিবা পি.এম. বিশ্বাকর্ম কৌশল সম্মান হায়বদি পি.এম. বিকাস য়োজনা অসিনি। নহারোলশিংগীদমক অনৌবা মার্কেৎশিং শেমদুনা পি.এম. বিশ্বাকর্ম য়োজনানা মখোয়দা শেলগী তেংবাং পীদুনা ঐখোয়গী নহারোলশিংগীদমক অনৌবা থবক্কী খুদোংচাবশিং পীরগনি।

মরুপশিং,

খোঙথাংশিং অসি থমোয় শেংনা লৌখৎলবা মতমদা শোইদনা অফবা ফলশিং ফংগনি। তোকিও ওলিম্পিক্স অমসুং কম্মনৱেল্থ গেম্স মনুংদা লৈবাক অসিনা লৌখৎখিবা খোঙথাংশিংগী ফলশিং অদু মীপুম খুদিংমক্না উবা ফংখি। জয়পুর মহাখেল মনুংদা লৌখৎখিবা খোঙথাংশিং অসিনা তুংলমচৎতা শোইদনা মহৈ য়ানগি। নখোয়গী নরক্তগী লৈবাক্কী মথংগী গোল্দ অদি সিলভর মেদলিস্তশিং থোরক্কনি। করিগুম্বা নখোয়না অখাং কল্লবি নখোয়না ওলিম্পিক্সতসু মচু অহুমগী ফিরালগী মীংচৎ হেনগৎহনবা ঙমগনি। নখোয়না চৎপা মফম খুদিংমক্তা নখোয়না লৈবাক্কী মীংচৎ পুরক্কনি। ঐহাক্না থাজৈ ঐখোয়গী নহারোলশিংনা লৈবাক্কী মাইপাকপা মখা তানা পুরক্কনি। ৱাখল্লোন অসিগা লোয়ননা ঐহাক্না পুম্নমকপু থাগৎচরি। ঐহাক্না য়াইফ-মঙ্গোল পীজরি।

***