ভারতকী প্রধানমন্ত্রী

শক্নাইরবশিং,

গ্লোবেল সাউথকী লুচিংবশিং খুরুমজরি! মীফম অসিদা অদোমবু তরাম্না ওকপদা ঐ হরাওই। মালেমগী মফম কয়াদগী শরুক য়াবগীদমক ঐনা অদোমবু থাগৎচরি। অনৌবা চহি হৌরকপা, অনৌবা থাজবা অমসুং অনৌবা থৌনা লাকপা মতমদা ঐখোয় উনরে। ভারতমচা বিল্লিয়ন ১.৩গী মহুৎশীন্দুনা, ময়াম পুম্নমক অমসুং অদোমগী লৈবাকশিং নুংঙাইবা অমসুং মপুংফাবা চহি ২০২৩গীদমক ঐনা ঐগী য়াইফ-পাউজেল পীজরি।

লান, মুক্নবা, তেরোরিজম, মালেমগী রাজনিতিগী মুক্নবশিং, চীঞ্জাক, হার অমসুং থাউগী মমল হেনগৎপা, অইং-অশাগী খল হোংলকপদগী প্রকৃতিগী অমাং-অতাশিং, কোবিদ লাইচৎনা শেন-থুমগী চৈথেং পীবা খুদোংথিবগী অতোপ্পা চহি ঐখোয়না হৌখ্রে। মালেম অসি অৱাবা ফিবম অমদা লৈরি হায়বসি শেংলে। মসিগী তুংদু-লৈতাদবা অসি কয়াম কুইনা লৈখিগনি হায়বা খঙবা অসি অরুবনি।

শক্নাইরবশিং,

ঐখোয়, গ্লোবেল সাউথনা তুংগী খ্বাইদগী চাউরবা লাইবক লেপ্লি। মীওইবা খুন্নাইগী অপুনবা মীশিংগী শরুক মরি থোকপগী শরুক অহুম ঐখোয়গী লৈবাকশিংদা লৈরি। ঐখোয়না চপ মান্ননা খোল্লাউ লাউগদবনি। মরম অদুনা, চহি ৮০ হেল্লবা মালেমগী লৈঙাক্কী নমুনা তপ্ন-তপ্না হোঙলক্লে, অনৌবা থবকশিংগী মওং-মতৌ লেপ্নবা ঐখোয়না হোৎনগদবনি।

শক্নাইরবশিং,

মালেম্না মায়োক্নরিবা খুদোংচাদবা অয়াম্বা গ্লোবেল সাউথনা থোকহনবা নত্তে। অদুবু মখোয়না ঐখোয়দা হেন্না খুদোংচাদবা থোকহল্লে। কোবিদ লাইচৎ, অইং-অশা হোংলকপা, তেরোরিজম অমসুং য়ুক্রেন লানগী চৈথেংশিং ঐখোয়না উরে। পাম্বৈশিং থিবদা ঐখোয়গী থৌদাং নত্ত্রগা ঐখোয়গী খোল্লাউ য়াওদ্রে।

শক্নাইরবশিং,

ভারতনা লৈবাক অসিগী চাউখৎ-থৌরাংগী থবকশিংদগী ফংলকপা লৌশিং অদু মতম পুম্নমক্তা গ্লোবেল সাউথকী ঐখোয়গী মরুপশিংদা পীরি। ঐখোয়গী চাউখৎ-থৌরাংগী থবকশিং লৈবাক কয়া অমসুং হিরম কয়াদা মতেং পীনরি। লাইচৎ মনুংদা ঐখোয়না লৈবাক ১০০ হেনবদা হিদাক-লাংথকশিং অমসুং তিকাশিং পীখি। ঐখোয়গী তুংগী অমতা ওইবা লাইবক লেপ্নবা চাউখৎলক্লিবা লৈবাকশিংগীদমক মতম পুম্নমক্তা ভারতনা অচৌবা থৌদাং লৌরি।

শক্নাইরবশিং,

চহি অসিদগী ভারতনা জি-২০গী প্রসিদেন্দ ওইবা হৌখিবগা লোয়ন্না, ঐখোয়গী পান্দমদি গ্লোবেল সাউথকী খোল্লাউ কনখৎহনবনি। ঐখোয়না জি-২০গী প্রসিদেন্দ ওইবা অসিদা, ঐখোয়না থিম “মালেম অমা, ইমুং অমা, তুংলমচৎ অমা” খল্লে। মসিগী ঐখোয়গী সভেত্যগী চৎন-লোনচৎশিংগা অমতা ওইরে। ‘অমতা ওইবা’ হায়বসি মীওইবা খুন্নাইগী য়েংলগা চাউখৎ-থৌরাং পায়খৎপদুনি হায়বা লম্বী অদুদা ঐখোয়না থাজৈ। চাউখ-থৌরাংগী কান্নবশিং ফংনবা গ্লোবেল সাউথকী লৈবাকশিংগী মীয়াম মখা তানা নাথৈরম্লোইদবনি। মালেমগী রাজনিতি অমসুং শেন-থুমগী লৈঙাক অসি অমুক হন্না শেমদোক্নবা ঐখোয়না পুন্না থবক তৌমিন্নগদবনি। মসিনা থোং মান্নদবশিং লৈহল্লোই, খুদোংচাবশিং ফংবা হেনগৎহনগনি, চাউখৎপা অমসুং নুংঙাই-য়াইফবা হেনগৎহনগনি।

শক্নাইরবশিং,

মালেম অসি অমুক হন্না মপাঙ্গল হাপ্নবা, মালেমগী পান্দম ‘রেসপোন্দ, রিককনাইজ, রেস্পেক এন্দ রিফোর্ম’গীদমক ঐখোয় পুন্না থবক তৌমিন্নগদবনি। অপুনবা অমসুং খল মান্নবা মালেমগী এজেন্দা অমা শেমদুনা গ্লোবেল সাউথকী তঙাইফদবশিং ফংহনগদবনি। লৈবাক পুম্নমক্কী নিংতম্বা, আইন ইকায়খুম্নগদবনি অমসুং য়ানদবা খুদিংমক শান্তিনা ওইনা ৱারোইশিন পুরক্কদবনি অমসুং য়ুনাইতেদ নেসন্স য়াওনা মালেমগী লুপশিং অওনবা পুরক্কদবনি।

শক্নাইরবশিং,

চাউখৎলক্লিবা লৈবাকশিংনা খুদোংচাদবা কয়া থেংনরবশু, ঐখোয়গী মতম লাক্লে হায়না ঐনা থাজৈ। হৌজিক তঙাইফদনা পাংথোকপা দরকার ওইরিবদি ঐখোয়গী খুন্নাইশিং অমসুং শেন্মিৎলোনশিং অওনবা পুরক্নবা অচম্বা, ফংবদা লাইগদবা অমসুং তুংকোইনা চৎনবা য়াবা পাম্বৈশিং পুথোকপনি। অসিগুম্বা থৌরাং অমগী মখাদা, ঐখোয়না লায়রবা, মীওই খুদিংমক অনা-লায়য়েংগী খুদোংচাবা পীবা নত্ত্রগা মীওই কয়া ত্রেনিং পীবদা থেংনরিবা খুদোংচাদবশিং ঐখোয়না কোকহনবা ঙমগনি। হৌখিবা চহিচাদা, লোইলম লৈঙাক থেংন্নবা ঐখোয়না লান্থেংনবদা ঐখোয় অমনা অমগী মতেং পাংনখি। ঐখোয়গী মীয়াম য়াইফনবা অনৌবা মালেমগী কাংলোন অমা শেম্নবা চৎলিবা চহিচা অসিদা ঐখোয় অমুক হন্না মতেং পাংনগদবনি।

ভারতকী মাইকৈদগীদি, অদোমগী খোল্লাউ অসি ভারতকী খোল্লাউনি। অদোমগী মরুওইবশিং অদু ভারতকী মরুওইবনি। মথং নুমিৎ নিনিদা গ্লোবেল সাউথকী মীফম অসিদা মরুওইবা হিরম ৮ খন্নগনি। গ্লোবেল সাউথনা অপুনবা ওইনা অনৌবা অমসুং কান্নরবা ৱাখল্লোন কয়া পুথোক্কনি হায়না ঐনা থাজবা থম্লি। হায়রিবা অনৌবা ৱাখল্লোন অদুনা জি-২০ অমসুং অতোপ্পা ফোরমশিংদা ঐখোয়গী খোল্লাউ ওইগনি। ভারত্তা ঐখোয়গী লাইশোন অমা লৈরি- आ नो भद्राः क्रतवो यन्तु विश्वतः  মসিনা হায়রি মদুদি অচুম্বা ৱাখল কয়া তাইবংপাল অসিগী মাইকৈ কয়াদগী ঐখোয়দা লাকই। পাংথোক্লিবা ভোইস ওফ গ্লোবেল সাউথ সম্মিৎ অসি ঐখোয়গী অপুনবা তুংলমচৎকীদমক অচুম্বা ৱাখল্লোনশিং খোমজিন্নবা অপুনবা থবক অমনি।

শক্নাইরবশিং,

অদোমগী অনৌবা ৱাখল্লোনশিং তাগনি হায়না ঐনা থাজবা থম্লি। শরুক য়াবগীদমক ঐনা অদোমবু অমুক হন্না থাগৎচরি। অদোমবু থাগৎচরি।

থাগৎচরি।

***