ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଉଜବେକିସ୍ତାନ ଗଣରାଜ୍ୟର ରାଷ୍ଟ୍ରପତି ମହାମହୀମ ଶ୍ରୀଯୁକ୍ତ ଶଭକତ୍ ମିର୍ଜିୟୋୟେଭଙ୍କୁ ଆଜି ସାଙ୍ଘାଇ ସହଯୋଗ ସଂଗଠନ (ଏସସିଓ) ସଦସ୍ୟ ରାଷ୍ଟ୍ରଗୁଡ଼ିକର କାଉନସିଲ ମୁଖ୍ୟମାନଙ୍କ ୨୨ତମ ବୈଠକ ଅବସରରେ ଉଜବେକିସ୍ତାନର ସମରକନ୍ଦରେ ସାକ୍ଷାତ କରିଛନ୍ତି ।

ଏହା ଉଭୟ ଦେଶ ପାଇଁ ସ୍ୱତନ୍ତ୍ର ବର୍ଷ କାହିଁକି ନା ଏହା କୂଟନୈତିକ ସମ୍ପର୍କ ସ୍ଥାପନାର ୩୦ ବର୍ଷ ପୂରଣ କରୁଛି । ନେତାଦ୍ୱୟ ୨୦୨୦ ଡିସେମ୍ବରରେ ଭର୍ଚୁଆଲ ସମ୍ମିଳନୀରେ ହୋଇଥିବା ନିଷ୍ପତ୍ତିର କାର୍ଯ୍ୟାନ୍ୱୟନ ସମେତ ସାମଗ୍ରିକ ଦ୍ୱିପାକ୍ଷିକ ସମ୍ପର୍କରେ ପ୍ରଗତିକୁ ପ୍ରଶଂସା କରିଥିଲେ ।

ଦୁଇନେତା ଦ୍ୱିପାକ୍ଷିକ ସହଯୋଗର ଅଗ୍ରାଧିକାର କ୍ଷେତ୍ର, ବିଶେଷକରି ବାଣିଜ୍ୟ, ଅର୍ଥନୈତିକ ସହଯୋଗ ଏବଂ କନେକ୍ଟିଭିଟି ଉପରେ ଆଲୋଚନା କରିଥିଲେ । ସେମାନେ ବାଣିଜ୍ୟ କ୍ଷେତ୍ରରେ ବିବିଧତା ଆଣିବା ଏବଂ ବ୍ୟବସାୟ ଓ ନିବେଶକୁ ସୁଦୃଢ଼ କରିବା ପାଇଁ ଦୀର୍ଘକାଳୀନ ବ୍ୟବସ୍ଥାରେ ପ୍ରବେଶ ନିମନ୍ତେ ଉପଯୁକ୍ତ ପଦକ୍ଷେପ ନେବାର ଆବଶ୍ୟକତା ଉପରେ ଜୋର ଦେଇଥିଲେ । ଚାବହାର ବନ୍ଦର ଏବଂ ଅନ୍ତଃରାଷ୍ଟ୍ରୀୟ ଉତ୍ତର ଦକ୍ଷିଣ ପରିବହନ କରିଡରର ଅଧିକ ଉପଯୋଗ ସହିତ ଏହି ସମ୍ପର୍କରେ କ୍ଷମତାକୁ ଉନ୍ମୁକ୍ତ କରିବା ଲାଗି କନେକ୍ଟିଭିଟିକୁ ମହତ୍ତ୍ୱପୂର୍ଣ୍ଣ ବୋଲି ବିବେଚନା କରିଥିଲେ ।

ନେତାଦ୍ୱୟ ଭାରତର ବିକାଶଗତ ଅନୁଭବ ଏବଂ ବିଶେଷଜ୍ଞତା ଆଧାରରେ ସୂଚନା ପ୍ରଯୁକ୍ତି, ସ୍ୱାସ୍ଥ୍ୟ ସେବା, ଉଚ୍ଚଶିକ୍ଷା ଆଦି ଭଳି କ୍ଷେତ୍ରରେ ସହଯୋଗ ଉପରେ ଗୁରୁତ୍ୱ ପ୍ରଦାନ କରିଥିଲେ । ଭାରତୀୟ ଶିକ୍ଷାନୁଷ୍ଠାନ ଖୋଲିବା ଏବଂ ଉଜବେକ ଓ ଭାରତୀୟ ବିଶ୍ୱବିଦ୍ୟାଳୟ ମଧ୍ୟରେ ସହଯୋଗିତାକୁ ସ୍ୱାଗତ କରାଯାଇଥିଲା ।

ଆଫଗାନିସ୍ତାନ ସମେତ ଆଞ୍ଚଳିକ ପ୍ରସଙ୍ଗଗୁଡ଼ିକ ଉପରେ ଚର୍ଚ୍ଚା ହୋଇଥିଲା । ଆଫଗାନିସ୍ତାନ ଅଞ୍ଚଳକୁ ଯେମିତି ଆତଙ୍କବାଦୀ ଗତିବିଧି ପାଇଁ ବ୍ୟବହାର କରା ନ ଯାଏ, ସେଥିପାଇଁ ଉଭୟ ନେତାଙ୍କ ବିଚାରରେ ସହମତି ହୋଇଥିଲା ।

ନେତାଦ୍ୱୟ ଚଳିତବର୍ଷ ଜାନୁଆରୀରେ ଆୟୋଜିତ ପ୍ରଥମ ଭାରତ-ମଧ୍ୟ ଏସିଆ ସମ୍ମିଳନୀର ନିର୍ଯାସକୁ ଅଧିକ ଗୁରୁତ୍ୱ ପ୍ରଦାନ କରିଥିଲେ । ସେମାନେ ଶିଖର ସମ୍ମିଳନୀରେ ହୋଇଥିବା ନିଷ୍ପତ୍ତିର କାର୍ଯ୍ୟାନ୍ୱୟନରେ ହେଉଥିବା ପ୍ରଗତିକୁ ସ୍ୱୀକାର କରିଥିଲେ ।

ପ୍ରଧାନମନ୍ତ୍ରୀ ଏସସିଓ ଶିଖର ସମ୍ମିଳନୀର ଉକ୍ରୃଷ୍ଟ ଆୟୋଜନ ଏବଂ ଉଜବେକିସ୍ତାନର ସଫଳ ଅଧ୍ୟକ୍ଷତା ନିମନ୍ତେ ରାଷ୍ଟ୍ରପତି ମିର୍ଜିୟୋୟେଭଙ୍କୁ ଶୁଭେଚ୍ଛା ଜଣାଇଥିଲେ ।

SR