ভারতকী প্রধানমন্ত্রী

পঞ্জাবকী রাজ্যপাল শ্রী বনৱারী লাল পুরোহিত জী, মুখ্যমন্ত্রী শ্রীমান ভগৱন্ত মান জী, কেন্দ্র মন্ত্রী মন্দলগী ঐগী খোঙবু দোক্তর জিতেন্দ্র সিংহ জী, পার্লিয়ামেন্তকী ঐগী মরূপ ভাই মনীস তিৱারী জী, দোক্তর, রিসর্চর, পেরামেদিক্স, অতৈ থৌমী পুম্নমক অমদি পঞ্জাবগী মচি মচিদগী লেঙবিরক্লিবা ঐগী নুংশিরবা ইচিল ইনাওশিং!

নীংতমবগী অমৃৎকালসিদা লৈবাকসিনা অনৌবা পন্দোল ফংবা ঙম্নবগী মায়কৈদা খোঙ থাংজিল্লি‍। ঙসিগী থৌরম অসিদসু লৈবাকসিগী ফীভম ফগৎলক্লিবা হকশেলগী সর্ভিসশিংগী মমী তারি‍। হোমি বাবা কেন্সর হোস্পিতাল এন্দ রিসর্চ সেন্তর অসিনা পঞ্জাব, হরিয়ানাগী মীওইশিংখক্তা নত্তনা হিমাচল প্রদেশকী মীওইশিংদসু কান্নবা পীগনি‍। ঙসি মফম অসিবু ঐনা অতোপ্পা মরম অমগীদমকসু থাগৎপা ফোঙদোকচনিংই‍। পঞ্জাব অসি নীংতম লান্মী, য়াওল্লোই, মরৈবাক নীংবা অমদি চৎনবীগী শেংলবা মফম্নি‍। পঞ্জাবনা হায়রিবা চাৎনবী অসিবু হর ঘর তিরঙ্গা কেম্পেন মনুংদা নীংথিনা ঙাকখি‍। ঙসি ঐনা পঞ্জাবগী মীয়ামবু, মরুওইনা মফমসিগী নহাশিংবু, হর ঘর তিরঙ্গা কেম্পেন মায় পাকহনখিবগীদমক্তা থাগৎচরি‍।

মরূপশিং,

নুমিৎ খরনিগী মমাঙদা, ঐনা লৈবাক অসিবু চাওখৎলবা ভারত অমা ওইহন্নবা ৱাশক অমা শকখি‍। ভারত চাওখৎহনবদা, লমদমসিগী হকশেলগী সর্ভিসশিং ফগৎহনবসু চপ চানা মরুওই‍। ভারতকী মীয়াম্না মতমগা চুনবা লায়েংশঙগী লায়েং, মতমগা চুনবা ফেসিলিতীশিং ফংলবা মতমদা মখোয় থুনা ফগৎলক্কদৌরিবনি, মখোয়গী পাঙ্গল থৌনা অচুমবা মায়কৈদা ওনশিল্লক্কদৌরিবনি‍, মখোয় হেন্না প্রদক্তিব ওইরক্কদৌরিবনি‍। ঙসিদি লৈবাকসিদা হোমি বাবা কেন্সর হোস্পিতাল এন্দ রিসর্চ সেন্তরগী শক্তমদা মতমগা চুনবা লায়েংশঙ অমসু লৈরে‍।  হায়রিবা মতমগা চুনবা ফেসিলিতী অসি শেমগৎপদা কেন্দ্র লৈঙাক্কী তাতা মেমোরিএল সেন্তরনা মরুওইবা থৌদাং অমা লৌখি‍। সেন্তর অসিনা মখোয়গী সর্ভিস লৈবাকসিদা অমদি মপান লৈবাকশিংদা ফংহন্দুনা কেন্সর নারবা মীওই কয়াগী পুন্সি কল্লি‍। লৈবাকসিদা মতমগা চুনবা কেন্সর ফেসিলিতীশিং শেমগৎপদা ভারত লৈঙাক্না মপুং ওইবা থৌদাং লৌরি‍। তাতা মেমোরিএল সেন্তরদা চহি খুদিংগী অনাবা মীওই লাখ ১.৫ লায়েংনবগী ফেসিলিতী লৈ হায়না ঐঙোন্দা তম্মি‍। মসি কেন্সর নারবা মীওইশিংগীদমক্তদি য়াম্না অফবা থবক্নি‍। হিমাচলগী মনুং হঞ্জিনবা মফমদগী মীওই কয়ানা কেন্সর য়াওনা অরুবা লায়না কয়া লায়েংনবা চান্দিগরদা লৈরিবা পি.জি.আই.দা লাক্নরমবা ঐ নীংশিংলি‍। পি.জি.আই.দা মী য়াম্না চিনবা মরম্না অনাবা মীওইশিং অমসুং মখোয়গী ইমুং মনুংনা খুদোংচাদবা কয়া মায়োক্নরম্মি‍। হৌজিক্তি হিমাচল প্রদেশগী বিলাসপুরদা এইম্স অমা লিংখৎলে অমদি কেন্সর লায়েংনবা অসিগুম্বা অচৌবা ফেসিলিতী অমসু শেমগৎলে‍। বিলাসপুরগা নক্নবা মীওইশিংনা মফমদুদা চৎপা য়ারনি অদুগা মোহালিগা নক্নবা মীওইশিংনা মফমসিদা লাকপা য়ারনি‍।

মরূপশিং,

মতম কয়াগী মমাঙদগী খ্বাইদগী লায়রবা মীওইশিংগী অনা লায়েংগী, মখোয়গী হকশেলগী মতেং পাংনবা, লায়রবশিংবু লায়নাশিংদগী ঙাকথোক্নবা, মখোয়না নারকপা মতমদা খ্বাইদগী ফবা লায়েংগী খুদোংচাবা ফংহনগদবা হকশেলগী লৈবাক অমা লৈবাকসিদা লৈহন্নিংবগী অপামবা লোয়নদুনা লাকখি‍। অফবা হেল্থকেয়র সীস্তেম অমা হায়বসি ফক্লাং মরী চনখৎপদুখক নত্তে‍। লৈবাক অমগী হেল্থকেয়রগী ফীভম অসি হীরম খুদিংদা পাম্বৈ পুথোক্লবা, মদুবু খোঙথাঙ খুদিংদা ঙাক্লৌ পীরবা মতমদা অফবা হায়বদু ওইগদৌরিবনি‍। মরম অসিনা পুম্নমক কোনশিল্লবা হেল্থকেয়র অসি হৌখিবা চহি নিপানসিদা লৈবাকসিগী খ্বাইদগী মরুওইবা হীরমশিংগী মরক্তা হাপ্তুনা লাক্লি‍। হৌখিবা চহি ৭-৮সিদা ভারতকী হকশেলগী লমদা পায়খৎলিবা থবকশিং অসি মমাঙ চহি ৭০দা তৌখ্রিদ্রিবা ঙাক্তনি‍। ঙসিদি, হেল্থ সেক্তরগীদমক লৈবাকসিগী হকশেলগী ফেসিলিতীশিং ফগৎহল্লি, খ্বাইদগী হেন্না লায়রবশিংগী য়াইফনবগীদমক হীরম অমা অনিখক নত্তনা হীরম তরুক্তা পুন্না হোৎনমিন্নদুনা মপাঙ্গল কনখৎহল্লি‍। অহানবা হীরম অসিনা প্রিভেন্তিব হেল্থকেয়রনি‍। অনিসুবা অসিনা খুঙ্গঙশিংদা অপীকপা অমদি মতমগা চুনবা লায়েংশংশিং হাংদোকপনি‍। অহুমসুবসিনা ময়োল্লমশিংদা মেদিকেল কলেজ অমসুং মেদিকেল রিসর্চকী অচৌবা ইন্সতিত্যুসনশিং লিংখৎপনি‍। মরিশুবা অসিনা লৈবাক শিনবা থুংনা দোক্তর অমসুং পেরামেদিকেল স্তাফ মশিং হেনগৎহনবনি‍। মঙাশুবা অসিনা অনাবা মীওইশিংদা অহোঙবা মমলগী হিদাক অমসুং খুৎলায়শিং ফংহনবনি‍। অদুগা তরুকশুবসিনা তেক্নোলোজী শীজিন্নদুনা অনাবা মীওইশিংনা থেংনরিবা খুদোংচাদবশিং হন্থহনবনি‍। হায়রিবা হীরম তরুক অসিদা কেন্দ্র লৈঙাক্না শেল থাদরি, নুমিৎ লুপা করোর লিশিং কয়া থাদরি‍।

মরূপশিং,

নারগা লায়েংববুদি নাদ্রিঙৈদা ঙাকথোকহৌবনা হেন্না ফৈ হায়বা ঐখো পুম্নমক্না তানরে‍। হায়রিবা ৱাখল্লোন অসিদা লৈবাকসিদা প্রিভেন্তিব হেল্থকেয়রদা অহেনবা মীৎয়েঙ চঙলি‍। নুমিৎ খরনিগী মমাঙদা লাকখৎবা রিপোর্ত অমদা জল জীবন মিসন্না মরম ওইরগা ঈশিংদগী পোকপা লায়না নাবগী চাং মশক থোক্না হন্থরে হায়না পল্লি‍। অসুম্না ঐখোয়না ঙাকথোক্নবা পাম্বৈদা থবক পায়খৎলবদি লায়নাসু মশিং হন্থরকই‍। মমাঙদা লৈঙাক্না অসিগুম্বা ৱাখল্লোন্দা থবক তৌরমদে‍। অদুবু ঙসিদি ঐখোয়গী লৈঙাক্না কেম্পেন কয়া পাঙথোক্তুনা, মীয়ামদা মমুৎ তানা খঙহন্নবা কেম্পেন তৌদুনা মখোয়বু নারক্কদবগদগী ঙাকথোক্লি‍। য়োগ অমসুং অয়ুসকী লমদা লৈবাক শিনবা থুংনা হান্না লৈরমদবা চাংদা মীয়াম্না খঙনরক্লি‍। মালেমসিদা য়োগ পাম্নবগী চাং হেনগৎলক্লে‍। ফিৎ ইন্দিয়া কেম্পেনসু লৈবাকসিগী নহাশিংনা পাম্নবা হেনগৎলক্লি‍। স্বচ্ছ ভারত কেম্পেন্না লায়না কয়া ঙাকথোকপদা মতেং ওইরি‍। পোসন অভিয়ান অমসুং জল জীবন মিসন্না মচি ওইবা চীঞ্জাক ৱাৎপগী ওইরকপা ফীভম লাকশিল্লি‍। ঐখোয়গী ইমা অমদি ইচে ইচলশিংদা এল.পি.জি. কন্নেক্সনগী খুদোংচাবা ফংহন্দুনা মখোয়বু মৈখুদগী ওইহল্লকপা লায়নাশিং, কেন্সরনচিংবদগী ঙাকথোক্লে‍।

মরূপশিং,

ঐখোয়গী খুঙ্গঙশিংদা লৈরিবা লায়েংশঙশিং হেন্না ফরিবমখৈ, তেস্তিংগী মফম হেন্না লৈরিবমখহ লায়নাশিং হেন্না থুনা খঙদোকপা ঙমগদৌরিবনি‍। হায়রিবা হীরমসিদসু ঐখোয়গী লৈঙাক অসিনা লৈবাক শিনবা থুংনা থবক চঙশিল্লি‍। ঐখোয়গী লৈঙাকসিনা খুঙ্গঙশিংবু মতমগা চুনরবা হকশেলগী ফেসিলিতীশিংগা মরী শম্নহন্নবগীদমক হেল্থ এন্দ ৱেলনেস সেন্তর লাখ ১.৫ হেন্না শাগৎলি‍। মসিগী মনুংদা হেল্থ এন্দ ৱেলনেস সেন্তর লাখ ১.২৫রোমদি মথৌ তৌবা হৌরে হায়না তাবদা ঐ নুংঙাইবা ফাওই‍। পঞ্জাবতা হেল্থ এন্দ ৱেলনেস সেন্তর লিশিং ৩ লোম মথৌ তৌরি‍। হৌজিক ফাওবদা লৈবাক শিনবা থুংনা লৈরিবা হেল্থ এন্দ ৱেলনেস সেন্তরশিংসিদা মীওই করোর ২২রোম কেন্সরগীদমক স্ত্রীনিং তৌখ্রে, মখোয়গী মনুংদা স্ক্রীনিং লাখ ৬০গী ময়াদি পঞ্জাবখক্তদা পাঙথোকখিবনি‍। মসিদা ঙল্লিঙৈ মতমদা কেন্সর থেংনহৌবশিংদু মখোয়বু খুদোংথিবা কয়াদগী ঙাকথোকপা ঙমহল্লি‍।

মরূপশিং,

হায়রিবা লায়নাশিং অসি থেংনবা মতমদা, অসিগুম্বা অরুবা লায়নশিং অসি নীংথিনা লায়েংবা য়াগদবা লায়েংশঙশিং মথৌ তাই‍। হায়রিবা ৱাখল পরিং অসিদা, কেন্দ্র লৈঙাক্না লৈবাকসিগী দিস্ত্রিক্ত খুদিংদা য়ামদ্রবদা মেদিকেল কলেজ অমমম লৈহন্নবা থবক পায়খৎলি‍। অয়ুস্মান ভারত হেল্থ ইনফ্রাস্ত্রকচর মিসনগী মখাদা দিস্ত্রিক্তকী থাক্তা মতমগা চুনবা হকশেলগী ফেসিলিতীশিং শেমগৎনবগীদমক্তা লুপা করোর লিশিং ৬৪ চাদিং তৌখ্রে‍। মতম অমদা লৈবাকসিদা এইম্স ৭খক্তমক লৈরম্মি‍। ঙসিদি ২১ শুরে‍। পঞ্জাবগী ভদিন্দাদা লৈরিবা এইম্স অসিনসু শিংথানিংঙাই ওইরবা সর্ভিস পীরি‍। করিগুম্বা কেন্সর লায়েংশঙ খক্তগী ওইবা ৱাফম হায়রগদি, লৈবাকসিগী কাচিন কোয়া শিনবা থুংনা কেন্সর লায়েংবগী মতমগা চুনবা থৌরাং পায়খৎলি‍। মফম অসি পঞ্জাবকী ওইনা অসিগুম্লবা অচৌবা সেন্তর অমনি‍। হরিয়ানাগী ঝাজ্জরদসু নেস্নেল কেন্সর ইন্সতিত্যুৎ অমসু লিংখৎলি‍। নোংপোক ভারতলোমদসু, ভরানসি অসি হৌজিক্তি কেন্সর লায়েংবগী মফম অমা ওইরক্লি‍। নেস্নেল কেন্সর ইন্সতিত্যুৎকী কোলকতাদা লৈরিবা অনিসুবা কেম্পস অসিসু মথৌ তৌবা হৌখ্রে‍। নুমিৎ খরনিগী মমাঙদা অসামগী দিব্রুগরদগী অনৌবা কেন্সর হোস্পিতাল ৭ শঙ্গানবগী তাঞ্জা ফংখি‍। ঐখোয়গী লৈঙাক অসিনা লৈবাক শিনবা থুংবদা স্পিসিএলাইজ কেন্সর ইন্সতিত্যুৎ ৪০গী অয়াবা পীখ্রে, মসিগী মনুংদা লায়েংশঙ কয়া অমদি হান্ননা সর্ভিস পীবা হৌখ্রবনি‍।

মরূপশিং,

লায়েংশঙ অমা লিংখৎপা য়াম্না মরুওইবগুম, অফবা দোক্তর অমদি পেরামেদিকশিং মরাং কাইনা লৈহনবা অসিসু চপ চানা মরুওই‍। মসিগীদমক্তসু, ঙসি লৈবাকসিদা মিসন মোদতা থবক পায়খৎলি‍। ২০১৪গী মমাঙদা লৈবাকসিদা মেদিকেল কলেজ ৪০০গী মখাদা লৈরম্মি‍। মসিনা তাকপদি লৈবাকসিদা হৌখিবা চহি ৭০সিদা মেদিকেল কলেজ ৪০০গী মখাদা লিংখৎলম্মি হায়বনি‍। অদুগা অমরোমদা, হৌখিবা চহি ৮ সিদা লৈবাকসিদা মেদিকেল কলেজ ২০০ হেন্না লিংখৎখ্রে‍। মেদিকেল কলেজ মশিং হেনগৎলকপা হায়বসি মেদিকেল সীত মশিং হেনগৎলকপনি‍। মেদিকেল মহৈরোয়শিংগীদমক্তসু খুদোংচাবা হেনগৎলকপনি‍। অমদি লৈবাকসিগী হকশেলগী লমদা মথৌ তৌরিবা হেল্থ প্রোফেস্নেল মশিংসু হেনগৎলক্লিবনি‍। মসিনা হেল্থ সেক্তরদা থবক পীবগী তাঞ্জা কয়া অমসু শেমগৎলি‍। ঐখোয়গী লৈঙাক অসিনা অয়ুস দোক্তর লাখ ৫ হেনববুসু এলোপেথিক দোক্তরগুম্না শকখঙখ্রে‍। মসিনা ভারতকী দোক্তর-পেসেন্ত রেসিওসু হেনগৎহল্লে‍।

মরূপশিং,

মফমসিদা লেঙশিনবিরিবা ঐখোয় পুম্নমক অচমবা ইমুংশিংদগীনি‍। লায়রবশিংগী ইমুংদা অনা অয়েক য়াওরকপা মতমদা মখোয়গী য়ুম ইংঙ্গোল য়োনবা ঐখোয় পুম্নমক্না থেংনদুনা লাক্লবনি‍। মরম অসিননি ঐখোয়গী লৈঙাক অসিনা অহোঙবা মমলদা হিদাক ফংহনবা, অনাবা মীওইশিংদা অহোঙবা মমলগী লায়েং ফংহনবদা পুক্নিং চঙলিবসি‍। অয়ুস্মান ভারতনা লায়রবশিংদা লুপা লাখ ৫ ফাওবদী লেম্না লায়েংনবগী খুদোংচাবা পীরি‍। মসিগী মখাদা হৌজিক ফাওবদা অনাবা মীওই করোর ৩.৫ লায়েংখ্রে, অমদি মখোয়না লুপা অমা ফাওবা তিংবগী মথৌ তাখিদে‍। মসিদা কেন্সর নারবা মীওই কয়াসু য়াওরি‍। অয়ুস্মান ভারত অসি লৈরমদ্রগদি লায়রবশিংগী শেঙ্গাওদগী লুপা করোর লিশিং ৪০ চাদিং তৌরমগদবনি‍। হায়রিবা লুপা করোর লিশিং ৪০ অদু অদোমগুম্লবা ইমুংশিংদা লেমহৌরবনি‍। মসিদসু নত্তনা পঞ্জাব য়াওনা লৈবাক শিনবা থুংনা অমৃৎ স্তোর হায়নসু খঙনবা জনঔসধি কেন্দ্রগী নেতৱর্ক অমা লৈরি, মফমসিদা কেন্সরগী হিদাকশিংসু য়াম্না হন্থবা মমলদা ফংলি‍। হান্না মমল য়াম্না তাঙলমবা কেন্সর দ্রগ ৫০০ হেনবগ মমল হৌজিক্তি চাদা ৯০গী ময়াদা হন্থরে‍। হায়বদি, হান্না লুপা ১০০ পীরমবা হিদাক অদু হৌজিক্তি জনঔসধি কেন্দ্রশিংদা লুপা ১০দা ফংলে‍। মসিগীসু মথক্তা, অনাবশিংগী লুপা করোর লিশিং অমগী শেন্ফম চহি খুদিংগী কনবা ঙম্লে‍। লৈবাক শিনবা থুংনা লৈরিবা জনঔসধি কেন্দ্র ৯০০০গ লোমসিদা ফংলিবা অহোঙবা মমলগী হিদাক লাংথকসিনা লায়রবা অমদি মিদল ক্লাসকী মীওইশিংগী খুদোংচাদবা কয়া কোকহনবদা মতেং পাংলি‍।

ইচিন ইনাওশিং,

মতমগী তেক্নোলোজীনা লৈঙাক্কী পুম্নমক কোনশিল্লবা হেল্থকেয়র কেম্পেনদা অনৌবা মাইওন অমা হাপচিল্লক্লি‍। হেল্থ সেক্তরদা অহানবা ওইমা মতমগী তেক্নোলোজীবু অচৌবা মওংদা শীজিন্নরি‍। অয়ুস্মান ভারত দিজিতেল হেল্থ মিসন্না অনাবা মীওই খুদিংদা মতম চানা, খুরৌ থাংহন্দনা মতিং লৈবা হকশেলগী ফেসিলিতীশিং ফংহন্নবা থবক পায়খৎলি‍। তেলিমেদিসিন, তেলিকন্সল্তেসনগী ফেসিলিতীশিংনা মরম ওইরগা, ঙসিদি মনুং হঞ্জিনবা খুঙ্গঙগী মীওই অমনসু ময়োল্লমদা লৈবা দোক্তরদগী অহানবগী ওইনা তাথোক তাশিন তৌবা ঙমহল্লে‍। হৌজিক ফাওবদা মীওই করোর কয়ানা হায়রিবা খুদোংচাবা অসি সঞ্জীবানি এপতগী কান্নবা লৌখ্রে‍। হৌজিক ভারত্তা পুথোকচবা ৫জি সর্ভিস লৈবাকসিদা হৌদোক্লি‍। মসিনা রিমোৎ হেল্থকেয়র সেক্তরদা চাওনা অওনবা পুরক্লগনি‍। খুঙ্গঙগী লায়রবা ইমুংগী অনাবা মীওইশিং অচৌবা লায়েংশঙশিংদা হঞ্জিন হঞ্জিন চৎপগী চাংসু হন্থহল্লগনি‍।

মরূপশিং,

লৈবাকসিগী কেন্সরগা লোয়ননা হিংলিবা অমদি মখোয়গী ইমুং মনুং পুম্নমক্কী মফমদা ৱাফম অমত্তং থমজনিংই‍। ঐ অদোমগী অৱাবা নীংথিনা খঙবা ঙমই‍। অদুবু কেন্সর অসি অকিবা লৈতনা লান্থেংনবা অমা চঙই‍। মসি লায়েংবা ঙম্মি‍। কেন্সরগা লান্থেংনরুরগা মায় পাক্তুনা নুংঙাইনা হিংলিবা মীওই কয়া ঐনা খঙই‍। হায়রিবা লান্থেং অসিদা অদোম্না মথৌ তাবা মতেং পুম্নমক, কেন্দ্র লৈঙাক্না ঙসি পীরি‍। লায়েংশঙ অসিগা মরী লৈনরিবা মরূপ মপাঙ পুম্নমক্কী মফমদা ঐনা অখন্নবা ৱাফম অমখকসু থমজনিংই মদুদি কেন্সরনা নীংবা কায়হল্লবা অনাবা অমদি মখোয়গী ইমুং মনুংশিংবু ঐখোয়না মতেং পাংবা মথৌ তাই‍। মাঙদা চঙশিল্লিবা খুন্নাই অমা ওইনা, পুক্নিংগী হকশেলগী লমদা অহোংবা পুরক্তুনা ঐখোয়গী ৱাখল্লোন্দা লৌথুপ লৌকোই লৈতবা ফীভম পুরকপা অসি ঐখোয়গী থৌদাংনি‍। মসিখক্তদা পরৈ অসিগী অচুম্বা পাম্বৈ থোরক্কনি‍। হেল্থকেয়রগা মরী লৈনবা ঐগী মরূপ মপাঙশিংগী মফমদসু অদোম্না খুঙ্গঙগী মফমশিংদা কেম্প পাঙথোকপা মতমদা হায়রিবা ৱাফম অসিদসু পুক্নিং শোয়দনা চঙবিয়ু হায়বা ৱাফমসি থমজরি‍। পুম্নমক্না পুন্না হোৎনমিন্নরগা লৈবাকসিগী কেন্সরগী মায়োক্তা চঙশিল্লিবা লান্থেং অসি মপাঙ্গল কনখৎমিন্নহনসি‍। হায়রিবা থাজবা অসিদগী পঞ্জাব অমসুং হিমাচলগী মীয়াম্নসু কান্নবা ফংগদৌরিবনি‍। ঙসিদি অসিগুম্লবা অচৌবা খুদোল অমা ময়ামগী মফমদা তমজবদা ঐ নুংঙাইবা, অপেনবা পোকই‍। পুম্নমক্কী মফমদা য়াইফ-পাউজেল পীজরি, হন্না হন্না থাগৎচরি‍।

***