ପିଏମଇଣ୍ଡିଆ

ଓଡିଶା ସମେତ 12 ରାଜ୍ୟର ଭିତ୍ତିଭୂମି ପ୍ରକଳ୍ପର ଅଗ୍ରଗତି ସମୀକ୍ଷା

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି (28.09.2016) ପ୍ରଗତି ବୈଠକରେ ଅଧ୍ୟକ୍ଷତା କରି ଆୟକର ପ୍ରଶାସନ ଏବଂ ଏହାର ଅଭିଯୋଗ ସମାଧାନ ପ୍ରକ୍ରିୟାର ଅଗ୍ରଗତି ନେଇ ସମୀକ୍ଷା କରିଛନ୍ତି । ପ୍ରଗତି ମାଧ୍ୟମରେ ଏହାଥିଲା ପ୍ରଧାନମନ୍ତ୍ରୀଙ୍କ 15ତମ ସମୀକ୍ଷା ବୈଠକ ।

ଆୟକର ଦାତାମାନଙ୍କର ବହୁ ଅଭିଯୋଗ ଆସୁଥିବାରୁ ପ୍ରଧାନମନ୍ତ୍ରୀ ଉଦବେଗ ପ୍ରକାଶ କରିଥିଲେ । ଏଭଳି ସମସ୍ୟାଗୁଡିକର ଆଶୁ ସମାଧାନ ପାଇଁ ଉପଯୁକ୍ତ ଢାଞ୍ଚା ପ୍ରସ୍ତୁତ କରିବାକୁ ପ୍ରଧାନମନ୍ତ୍ରୀ କହିଥିଲେ । ଆୟକର ସଂକ୍ରାନ୍ତ ମାମଲାଗୁଡିକୁ ଯେତେଶୀଘ୍ର ସମ୍ଭବ ସମାଧାନ କରିବା ଲାଗି ବର୍ତ୍ତମାନ ଉପଲବ୍ଧ ଟେକ୍ନୋଲୋଜିର ବହୁଳ ବ୍ୟବହାର କରିବାକୁ ସେ ଆୟକର ଅଧିକାରୀମାନଙ୍କୁ ପରାମର୍ଶ ଦେଇଥିଲେ ।

ଶ୍ରୀ ମୋଦୀ ଆଜିର ପ୍ରଗତି ବୈଠକରେ ପ୍ରଧାନମନ୍ତ୍ରୀ ଖଣିଜ କ୍ଷେତ୍ର କଲ୍ୟାଣ ଯୋଜନାର କାର୍ଯ୍ୟକାରୀତା ତଥା ଏହାର ଅଗ୍ରଗତି ନେଇ ମଧ୍ୟ ସମୀକ୍ଷା କରିଥିଲେ । ଏହି ଯୋଜନା ଅଧିନରେ 12 ଟି ଖଣିଜ ସମୃଦ୍ଧ ରାଜ୍ୟ ପକ୍ଷରୁ ଏପର୍ଯ୍ୟନ୍ତ 3214 କୋଟି ଟଙ୍କାର ପାଣ୍ଠି ସଂଗ୍ରହ କରାଯାଇଛି । କ୍ରମେ କ୍ରମେ ଆହୁରି ଅଧିକ ପାଣ୍ଠି ପ୍ରଧାନମନ୍ତ୍ରୀ ଖଣିଜ କ୍ଷେତ୍ର କଲ୍ୟାଣ ଯୋଜନାକୁ ମିଳିବ । ତେବେ ଏହି ପାଣ୍ଠିର କିପରି ସଦବିନିଯୋଗ କରାଯିବ ଏବଂ ଏହାଦ୍ୱାରା ସମ୍ପୃକ୍ତ ଖଣିଜ ସମୃଦ୍ଧ ରାଜ୍ୟର ଖଣି ଖାଦାନ ଅଞ୍ଚଳ / ଜିଲ୍ଲାର ଗରୀବ ଓ ଅନଗ୍ରସର ଶ୍ରେଣୀର ଲୋକ ବିଶେଷକରି ଆଦିବାସୀମାନେ ଉପକୃତ ହେବେ ସେ ଦିଗରେ ବିଭାଗୀୟ ଅଧିକାରୀମାନେ ପ୍ରାଧାନ୍ୟ ଦେବାକୁ ପ୍ରଧାନମନ୍ତ୍ରୀ ପରାମର୍ଶ ଦେଇଥିଲେ ।

ଅନେକ ଭିତ୍ତିଭୂମି ପ୍ରକଳ୍ପର ଅଗ୍ରଗତି ନେଇ ମଧ୍ୟ ଆଜି ପ୍ରଧାନମନ୍ତ୍ରୀ ସମୀକ୍ଷା କରିଥିଲେ । ବିଶେଷକରି ଓଡିଶା, ରାଜସ୍ଥାନ, ଆସାମ, ମେଘାଳୟ, ସିକ୍କିମ, ପଶ୍ଚିମବଂଗ, ମହାରାଷ୍ଟ୍ର, ଝାଡଖଣ୍ଡ, ବିହାର, ଉତ୍ତରପ୍ରଦେଶ, ଉତ୍ତରାଖଣ୍ଡ, ଜାମ୍ମୁ-କାଶ୍ମୀରରେ ସଡକ, ରେଳପଥ ଏବଂ ଶକ୍ତି କ୍ଷେତ୍ରରେ କାର୍ଯ୍ୟକାରୀ ହେଉଥିବା ପ୍ରକଳ୍ପଗୁଡିକର ଅଗ୍ରଗତି ନେଇ ଆଲୋଚନା କରାଯାଇଥିଲା ।