ভারতকী প্রধানমন্ত্রী

ইজরেলগী মরুপশিংবু ভারত্তগী খুরুমজরি অমসুং সালোম। ঙসিগী নুমিৎ অসি ঐখোয়গী লৈনরিবা মরীদা য়াম্না মরু ওই। চহি ৩০গী মমাংদা, ঙসিগী নুমিৎ অসিমক্তদা, ঐখোয়গী মরক্তা দিপ্লোমেতিক রিলেশন অসি মপুং ফানা থমখি।

লৈবাক অনি অসিগী মরক্তা অনৌবা পন্দুপ অমা হৌদোকখি। মসিগী পন্দুপ অসি অনৌবা ওইজরবসু, লৈবাক অনিমক্কী পুৱারী অসি য়াম্না লিরে। ঐখোয়গী মীশিংগী মরক্তা য়াম্না অচেৎপা মরী লৈরকখি।

ভারতকী লিচত্তা লৈবা ওইবনা, চহি চা কয়াদগী ঐখোয়গী জ্যুশিংগী ফুরুপ অসিনা ভারতকী খুনাইদা খেৎনবা অমত্তা লৈতনা, নুংশি-চান্ননা লৈবা এনভাইরনমেন্ত অমদা লৈরকখি, অমসুং চাউখৎলকখি। মখোয়না ঐখোয়গী চাউখৎপগী খোংচৎ অসিদা য়াম্না মরু ওইবা থৌদাং লৌখি।

ঙসি মালেম অসিদা মরু ওইবা অহোংবা কয়া অমা থোক্লকপা মতম অসিদা, ভারত-ইজরেলগী মরীগী মরু ওইবা অসি অমুক্কা হেন্না হেনগৎহল্লে। অমসুং ঐখোয় মশেলগী মরক্তা তেংবাং পীনবগী অনৌবা পান্দম অমা থম্বগী খ্বাইদগী হেন্না ফবা মতাং অসি – ভারতনা হন্দক্কী চহি অসিদা নিংতম্বগী চহি ৭৫শুবা কুমওন পংথোক্লি, অমসুং ইজরেলনা মখোয়গী নিংতম্বগী চহি ৭৫শুবগী কুমওন মথংগী চহিদা পাংথোক্লগনি, অমসুং লৈবাক অনিমক্কী মরক্তা লৈরিবা মরী অসিনা চহি ৩০শুবগী কুমওন পাংথোকপগী মতম অসিদগী হেন্না ফবা করম্বা মতাং ওইগনি।

চহি ৩০ মপুং ফারকপগী য়াম্না মরু ওইবা তাঙ্কক অসিদা, ঐহাক্না নখোয় পুম্নমক্তা অমুক্কসু হন্না নুংঙাইবা ফোংদোক্লি। ঐহাক্না থাজৈ মদুদি ভারত-ইজরেলগী মরক্তা লৈরিবা নুংশিনবগী মরী অসি লাক্কদবা চহি তরা কয়া অমদা ঐখোয় মশেলগী মরক্তা তেংবাং পীনবগী অনৌবা রেকোর্দ অমা মখাতানা অদুমক থমখিগনি।

থাগৎচরি, তোদা রব্বা।

*****