ভারতকী প্রধানমন্ত্রী

খরুমজরি।
ৱার্লদ ইকোনোমিক ফোরম অসিদা শরুক য়ারিবা মালেমগী হৈথোই-শিংথোইরবশিং পুম্নমকপু, ভারত মচা করোর ১৩০গী মায়কৈদগী তরাম্না ওকচরি। ঐনা ঙসি নখোয় ময়ামদা ৱারি শারিঙৈ মতম অসিমক্তদা, ভারতনা কোরোনাগী অতোপ্পা ৱেব অমগা য়াম্না চেকশিন্না অমসুং চেকশিন্না শেন্নদুনা মায়োক্নরি। মসিগা লোইন-লোইননা ভারতনা ইকোনোমিক্কী লমদা য়াম্না প্রোমিসিং ওইবা রিজল্ত কয়া অমগা লোইননা খুমাং চাউশিল্লি। ভারতনা নিংতম্বগী চহি ৭৫ শুখিবগী নুঙাইবা ফাওই অমসুং ভারতনা চহি অমখক্তদা কোরোনা ভেক্সিন দোজ করোর ১৬০ থাবা ঙমগনি হায়না থাজৈ।

মরুপশিং,

ভারতগুম্বা য়াম্না লিংবা দেমোক্রেসী অসিনা মালেম পুম্নমক্তা বাম্না ফজরবা খুদোল অমা খুদোল তৌরি, বুকে ওফ হোপ। মসিগী বুকে অসিদা, ঐখোয় ভারত মচাশিংগী দেমোক্রেসীদা অচেৎপা থাজবা অদু য়াওরি, মসিগী বুকে অসিদা, ২১শুবা চহি চাবু এমপাৱর তৌগদবা তেক্নোলোজী য়াওরি, মসিগী বুকে অসিদা ঐখোয় ভারত মচা ঐখোয়গী তেমপরামেন্ত, ভারত মচা ঐখোয়গী তেলেন্ত য়াওরি। ঐখোয় ভারত মচাশিংনা লৈরকপা মল্তি-লিঙ্গ্বেল, মল্তি কলচরেল এনভাইরনমেন্ত অসি ভারত খক্তা নত্তনা মালেম পুম্বগী য়াম্না চাউরবা পাঙ্গল অমা ওইরিবনি। মসিগী পাঙ্গল অসিনা চিরবা মতমদা ঈশাগী খক্তা খন্দনা মীওইবা জাতিগী য়াইফনবগীদমক্তসু থবক তৌবা তম্বী। করোনাগী মতম অসিদা ঐখোয়না উখি মদুদি ভারতনা করম্না ‘ৱান আর্থ, ৱান হেল্থ’কী ৱাখল্লোন অদুবু ঙক্না চত্তুনা লৈবাক কয়া অমদা তঙাইফদবা হিদাক-লাংথকশিং, ভেক্সিনশিং পীদুনা করোর কয়াগী পুনশিং কল্লি। ঙসিদি ভারত অসি মালেমগী খ্বাইদগী চাউবা অহুমশুবা ফার্মা প্রোদ্যুসর, ফার্মসী ওইরি। ঙসিদি ভারত অসি হেল্থ প্রোফেস্নেলশিং, দোক্তরশিংনা মখোয়গী সেন্সিতিবিতী অমসুং এক্সপর্তিজনা মীয়ামগী থাজবা ফংলিবা অদুগুম্বা মালেমগী লৈবাকশিং অদুগী মনুংদা অমা ওইরে।

মরুপশিং,

সেন্সিতিবিতী হায়বসি চিরবা মতমদা চাংয়েং তৌই অদুবু ভারতকী কেপেবিলিতী অসি মসিগী মতম অসিদা মালেম পুম্বগী ওইনা খুদম অমা ওইরিবনি। মসিগী চিরবা মতম অসিদা, ভারতকী আই.তি. সেক্তরনা পুং ২৪ থবক তৌদুনা মালেমগী লৈবাকশিংবু য়াম্না চাউরবা খুদোংথিবা অমদগী কল্লবনি। ঙসি ভারতনা মালেমদা য়াম্লবা সোফৱেয়র ইঞ্জিনীয়রশিং থারি। সোফৱেয়র দিবেলপ্পর লাখ ৫০ হেন্না ভারত্তা থবক তৌরি। ঙসি মালেমগী ওইনা অহুমশুবা খ্বাইদগী য়াম্বা য়ুনিকোর্নশিংগী মশিং ভারত্তা লৈ। হৌখিবা থা তরুক্তা স্তার্ত অপ লিশিং ১০গী মথক্তা রজিস্তর তৌখি। ঙসি ভারত অসিনা মালেমগী ওইনা খ্বাইদগী চাউবা, চেকশিনবা অমসুং মাইপাকপা দিজিতেল পেমেন্তশিংগী প্লেতফোর্ম লৈ। মমাংগী থা খক্তদা হায়রুরগদি, ভারত্তা য়ুনিফাইদ পেমেন্তস ইন্তরফেস, মসিগী মীদিয়ম অসিগি খুত্থাংদা বিলিয়ন ৪.৪ ত্রান্সেক্সন তৌখি।

মরুপশিং,

হৌখিবা চহি কয়াদা ভারতনা দিবেলপ তৌখিবা অমসুং এদোপ্ত তৌখিবা দিজিতেল ইনফ্রস্ত্রকচর অদুনা ঙসিদি ভারতকী য়াম্না চাউরবা পাঙ্গল ওইরে। কোরোনা ইনফেক্সনশিংগী ত্রেক্কিং তৌনবগীদমক্তা আরোগ্যা সেতু এপ অমসুং ভেক্সিনেশনগীদমক্তা কোৱিনপোর্তলগুম্বা তেক্নোলোগী ওইবা সোল্যুশনশিং অসি ভারতকী ওইনদি চাউথোকচনিংঙাই ওইবা ৱাফমনি। ভারতকী কোৱিন পোর্তলদা স্লোত বুকিংদগী হৌরগা সার্তিফিকেত জেনরেশন তৌবগী ওনলাইন সীস্তেম অসিনা অচৌ-অচৌবা লৈবাকশিংগীসু পুক্নিং চিংশল্লি।

মরুপশিং,

মতম অমদা ভারত অসি লাইসেন্স রাজনা মশক তাক্লম্মি, অনম্বনা পোতশিংদা সরকারনা পান্নরম্মি। ভারত্তা বিজনেস তৌনবগীদমক্তা থেংনখিবা অৱাবশিং অদু ঐহাক্না খঙই। ঐখোয়না শিংনবশিং অদুবু কোহন্নবা লেপ্তনা হোৎনরি। ঙসিদি ভারতনা ইজ ওফ দুইং বিজনেসপু শোগৎলি, সরকারনা খুৎ থিংজিনবা হন্থরে। ভারতনা মখোয়গী কোর্পোরেত তেক্স রেতশিংবু সিমপ্লিফাই তৌদুনা, হন্থহন্দুনা, মালেম অসিদা খ্বাইদগী কমপিতিতিব ওইবা অমা ওইহল্লে। হৌখিবা চহি খক্তদা ঐখোয়না কমপ্লায়েন্স লিশিং ২৫ হেন্না হন্থখ্রে। ভারতনা রেত্রোস্পেক্তিব তেক্সশিংগুম্বা পাম্বৈশিংদা অহোংবা পুরক্তুনা, বিজনেস কম্যুনিতীগী থাজবা অমুক হন্না পুরকখ্রে। ভারতনা দ্রোনশিং, স্পেস, জিয়ো স্পেসিবেল মেপ্পিংগুম্বা সেক্তর কয়া অমা দিরেগুলেত তৌখ্রে। ভারতনা আই.তি.সেক্তর অমসুং বি.পি.ও.গা মরী লৈনবা আউতদেতেদ তেলিকোম রেগুলেশনশিংদা য়াম্না চাউনা অহোংবা অমা পুরকখ্রে।

মরুপশিং,

ভারতনা গ্লোবল সপ্লাই চেনশিংদা মালেমগী ওইনা থাজবা পার্তনর অমা ওইনবা কত্থোক্লে। ঐখোয়না লৈবাক কয়ামরুম অমগা ফ্রী ত্রেদ এগ্রীমেন্তকী লম্বি কবা অমা শেম্লি। ভারত মচাশিংদা ইন্নোভেশনগী অনৌবা তেক্নোলজীবু এদোপ তৌনবগী লৈরিবা কেপাসিতি, এন্ত্রপ্রেনোরশিপকী স্পিরিৎ অদুনা ঐখোয়গী গ্লোবল পার্তনর খুদিংমক্তা অনৌবা পাঙ্গল অমা পীবা ঙম্লগনি। মরম অদুনা ভারত্তা ইনভেস্তমেন্ত তৌবগীদমক্তা খ্বাইদগী হেন্না ফবা মতমনি। ভারতকী নহাশিংগী মরক্তা ঙসিদি এন্ত্রপ্রেনোরশিপকী অনৌবা থাক অমা য়ৌরে। ২০১৪দা ভারত্তা রেজিস্তর তৌরবা স্তার্ত অপ চামা খরা লৈরম্মি। অদুবু ঙসিদি মখোয়শিংগী মশিং অদু লিশিং ৬০ হেনখ্রে। মসিদসু য়ুনিকোর্ন ৮০ হেন্না লৈ, মসিগী মনুংদা ৪০ অমদি ২০২১খক্তদা শেমখিবনি। এক্স-পেত ইন্দিয়নশিংনা মালেমগী স্তেজদা মখোয়গী হৈ-শিংবা অদু উৎলিবা, অদুগুম্না ভারতকী নহাশিংনা ভারত মচা নখোয় পুম্নমকপু অনৌবা থাক অমদা পুরক্না মপুং ফানা শেম-শাদুনা লৈরে অমসুং মসিগীদমক্তা ঙাইদুনা লৈরি।
মরুপশিং,
দীপ ইকোনোমিক রিফোর্মশিংগা মরী লৈননা ভারতকী কমিতমেন্ত অসিনসু ভারত অসিবু ঙসি ইনভেস্তমেন্তকীদমক্তা খ্বাইদগী এত্রেক্তিব ওইবা দেস্তিনেশন অমা ওইহনবগী খ্বাইদগী চাউবা মরম অমা ওইরিবনি। কোরোনাগী মনুংদা, মালেমনা ক্বান্তিতেতিব ইজিং প্রোগ্রামগুম্বা ইন্তর্ভেন্সনদা ফোকস তৌদুনা লৈরিঙৈদা ভারতনা রিফোর্মশিংগিদমক্তা লম্বি অমা য়াৎখি। দিজিতেল অমসুং ফিজিকেল ইনফ্রাস্ত্রকচরবু মোদর্নাইজ তৌনবগীদমক্তা খ্বাইদগী চাউবা প্রোজেক্ত অদু কোরোনাগী মনুংদা হেন্দোক-থোইদোকপা মওংদা খোংজেল য়াংশিনহনখি। লৈবাক অসিগী খুঙ্গং লাখ ৬কী মথক্তা ওপ্তিকেলম ফাইবর কনেক্ত তৌরি। মরু ওইনা কনেক্তিবিতীগা মরী লৈনবা ইনফ্রাস্ত্রকচরদা ১.৩ ত্রিলিয়ন দোলর ইনভেস্ত তৌরি। এসেত মোনিতাইজেশনগুম্বা ইন্নোভেতিব ফাইনান্সিং তুলশিংদগী ৮০ বিলিয়ন দোলর জেনরেত তৌনবা পান্দম থম্লি। দিবেলপমেন্তকীদমক্তা স্তেকহোলদর খুদিংমকপু প্কেতফোর্ম অমদা পুরক্নবগীদমক্তা ভারতনা গতিশক্তি নেস্নেল মাস্তর প্লানসু হৌদোকখ্রে। মসিগী মাস্তর প্লান অসিগী মনুং চন্না ইন্তিগ্রেতেদ ওইবা মওংদা ইনফ্রস্ত্রকচরগী প্লানিং, দেবিলপমেন্ত অমসুং ইমপ্লিমেন্তেশনগী থবক তৌরগনি। মসিনা গুদস, পীপল অমসুং সার্বিসশিংগী সীমলেস কনেক্তিবিতী অমসুং মুভমেন্ততা অনৌবা খোংজেল অমা পুরক্লগনি।

মরুপশিং,

ইরোমদোম লেপচবা ঙম্নবগী লম্বিদা চৎপা মতমদা, ভারতকী ফোকস অসি প্রোসেসতু খক্তমক লাইহনবা খক্তা নত্তে, অদুবু ইনভেস্তমেন্ত অমসুং প্রোদক্সনবু ইন্সেন্তিবাইজ তৌনবসু য়াওরিবনি। মসিগী এপ্রোচ অসিগা লোইননা, ঙসিদি সেক্তর ১৪দা বিলিয়ন দোলর ২৬কী প্রোদক্সন লিঙ্কদ ইন্সেন্তিব স্কীমশিং চৎনহনখ্রে। ফেব, চিপ অমসুং দিসপ্লে ইন্দস্ত্রী লিংখৎনবগীদমক্তা বিলিয়ন দোলর ১১গী ইন্সেন্তিব প্লান অসিনা গ্লোবল চেনবু স্মুথ ওইহন্নবগীদমক্তা ঐখোয়না কয়া কন্না হোৎনবগে হায়বগী খুদম্নি। ঐখোয়না মেক ইন ইন্দিয়া, মেক ফোর দ ৱার্লদগী ৱাখল্লোন অসিগা লোইননা খুমাং চাউশিল্লি। তেলিকোম, ইন্সুরেন্স, দিফেন্স, ঐরোস্পেসকা লোইন-লোইননা হৌজিক্তি সেমিকন্দক্তরগী লমদসু ভারত্তা লোইবা নাইররোইদবা পোজিবিলিতী কয়া অমা লৈ।

মরুপশিং,

ঙসিদি ভারতনা হৌজিক্কী মতম অসিগা লোইন-লোইননা লাক্কদবা চহি ২৫গী থম্লিবা পান্দম অদুবু য়েংলগা পোলিসীশিং শেম্লি, ৱারেপশিং লৌরি। মতম অসিগী মনুংদা ভারতনা হাই গ্রোথকী, ৱেলফিয়র অমসুং ৱেলনেসকী সেচুরেশনগী পান্দম থম্লি। গ্রোথকী মতম অসি গ্রীনসু ওইগনি, ক্লীনসু ওইগনি, সস্তেন্নেবলসু ওইগনি, রিলায়েবলসু ওইগনি। মালেমগী ফনবগীদমক্তা অচৌবা কমিৎমেন্তশিং তৌনবা অমসুং অদুবু ঙাক্না চৎপগী ত্রেদিশন অদুবু মখাতানা চত্থদুনা, ঐখোয়না ২০৭০ফ ফাওবদা নেত জিরোগী তার্গেত থম্লি। মালেমগী অপুনবা মীশিংগী চাদা ১৭ ওইরিবা ভারত অসিনা গ্লোবল কার্বোন ইমিসনদা চাদা ৫ খক্তমক কন্ত্রিব্যুত তৌই, অদুবু ক্লাইমেত চেলেঞ্জদগী মায়োক্নবা ঙম্নবা ঐখোয়গী কমিৎমেন্ত অসি চাদা ১০০নি। ইন্তর্নেস্নেল সোলার এলাইন্স অমসুং কোলিশন ফোর দিজাস্ত্র-রিজিলিয়েন্ত ইনফ্রস্ত্রকচর ফোর ক্লাইমেত এদাপ্তেশনগুম্বা ইনিসিয়েতিব অসিগী খুদম্নি। হৌখিবা চহি কয়াদা হৌৎনখিবশিং অদুগী ফল ওইনা ঙসি ঐখোয়গী ইনর্জী মিক্সকী শরুক্তা চাদা ৪০দি নন-ফোসিল সোর্সশিংদগী লাক্লিবনি। ভারতনা পেরিসতা লাউথোকখিবা অদু, ঐখোয়না মদুগী তার্গেত অদুদগী চহি ৯ ঙনখৎনা ফংবা ঙমখ্রে।

মরুপশিং,

হৌৎনকিবশিং অসিগী মরক অসিদা, ঐখোয়না ঐখোয়গী লাইফস্তাইল অসিনসু ক্লাইমেতকী ওইনা য়াম্না চাউনা শিংনবনি হায়বসি য়াজগদবনি। ‘থ্রো অৱে’ কলচর অমসুং কঞ্জুমরিজমনা ক্লাইমেত চেঞ্জবু অমুক্কসু হেন্না ফিভম শোকহল্লে। হৌজিক মতমগী ‘তেক-মেক-য়ুজ-দিসপোজ’গী ইকোনোমী অসিবু বাম্না য়াংনা সার্কুলর ইকোনোমীগী মাইকৈদা পুরকপা হায়বসি য়াম্না তঙাইফদবনি। কোপ২৬দা ঐহাক্না খন্নখিবা মিসন লাইফকী মপুং ওইবা ৱাখল্লোন অদু অসিনি। লাইফ – হায়বদি লাইফস্তাইল ফোর এনভাইরনমেন্ত, অসিগুম্বা রেজিলিয়নে্ত অমসুং সস্তেন্নেবল লাইফস্তাইলগী ভিজন, মসিনা ক্লাইমেত খ্রাইসিসকা লোইন-লোইননা তুংদা লাক্কদবা অনপ্রেদিক্তেবল চেলেঞ্জশিংবু মায়োক্নবদা মতেং পাংগনি। মরম অদুনা মিসন লাইফপু গ্লোবল মাস মুভমেন্ত অমা ওইবা হায়বসি তঙাইফদে। লাইফগুম্বা মীয়াম্না শরুক য়াবা কেমপেনবু ঐখোয়না পী-থ্রি, অদুগা ঐন পি.থ্রি. হায়বা মতমদা, ‘প্রো প্লানেত পীপল’গী অচৌবা য়ুমফম অমা ওইহনবসু য়াই।

মরুপশিং,

ঙসি ২০২২গী হৌরকপা অসিদা ঐখোয়না দাবোসতা অসিগুম্বা খন্না-নৈনবগী থৌরম অমা পাংথোকপা অসিদা অতোপ্পা শিংনবা কয়া অমগী মতাংদা খঙহনবা হায়বসি ভারতনা মশাগী মথৌ অমনি হায়না লৌই। ঙসি গ্লোবেল ওর্দরদা অহোআবা অমা পুরকপগা লোইননা মালেম অসিগী ইমুং ওইনা ঐখোয়না মায়োকমিন্নদুনা লাকখিবা শিংনবশিং অদুসু হেনগৎলক্লি। মখোয়শিং অসিবু মায়োক্ননবগীদমক্তা লৈবাক খুদিংমক, মালেমগী এজেন্সীগী খুত্থাংদা কলেক্তিব অমসুং সিনক্রোনাইজদ এক্সনগী মথৌ তাই। সপ্লাই চেনগী দিসরপসন, ইনফ্লেশন অমসুং ক্লাইমেত চেঞ্জ অসি মসিগী খুদমনি। অতোপ্পা খুদম অমনা- ক্রিপ্তোকরেন্সীগী। মসিগা মরী লৈনরিবা তেক্নোলোজী অসিদা কনাগুম্বা লৈবাক অমত্তনা লৌখিবা ৱারেপ অদু মসিগী শিংনবা অসিগা মায়োক্নবা ঙম্লোই। ঐখোয় ময়াম ৱাখল মান্নবা অমা চংঙি। হৌজিক মালেমগী লৈরিবা ফিভম অসি য়েংলুরগদি, মল্তিলেতরেল ওর্গনাইজেশনশিং, অনৌবা ৱার্লদ ওর্দর অমসুং অনৌবা শিংনবশিং অসিবু মায়োক্নবা ঙম্লগদ্রা হায়বা ৱাহং অসিনি? মসিগী ইন্সতিত্যুশনশিং অসি শেমখিবা মতমদদি, মতম অদু য়াম্না তোঙাল্লম্মি। হৌজিক্কী মতম অসিনা মওং অমা ওল্লে। মরম অদুনা হৌজিক্কী মতম অমসুং তুংদা লাক্কদবা মতমশিংদা শিংনবশিং অসিগা মায়োক্নবা ঙম্নবা মসিগী ইন্সতিত্যুশনশিং অসিদা রিফোর্মশিং পুরকপদা মীৎয়েং থম্বা হায়বসি দেমোক্রেতিক ওইবা লৈবাক খুদিমক্কী মথৌদাংনি। দাবোসতা খন্নরিবা-নৈনরিবশিং অসিদা মসিগী মতাংদসু অফবা মওংদা ৱারী-ৱাতাই শানরগনি হায়বা ঐহাক্না থাজৈ।

মরুপশিং,

অনৌবা শিংনবশিং অসিগী মরক অসিদা মালেম অসিদা অনৌবা লম্বিগী তঙাইফদবা লৈরে, অনৌবা রিজোল্যুশন কয়া অমগী তঙাইফদবা লৈরে। ঙসি মালেমগী লৈবাক খুদিংমক্না হান্নদগী হেন্না অমনা অমগী মতেং লৌবগী তঙাইফদবা লৈরে। মসিনা হেন্না ফবা তুংগী লম্বিনি। দাবোসতা পাংথোক্লিবা খন্ন-নৈনবা অসিনা মসিগী সেন্তিমেন্ত অসিবু হেন্না শন্দোকহল্লগনি হায়না ঐহাক্না থাজৈ। অমুক্কসু হন্না, নখোয় ময়ামগা ভর্চুৱল ওইনা উনবগী তাঞ্জা ফংজরে, নখোয় ময়াম্বু হন্না-হন্না থাগৎচরি!