ভারতকী প্রধানমন্ত্রী

প্রধান মন্ত্রী, শ্রী নরেন্দ্র মোদীনা ঙসি বারানসীদা শ্রী কাশী বিশ্বনাথ ধাম শঙ্গাখ্রে। মহাক্না কাশীদা লৈবা কাল ভৈরব মন্দির অমসুং কাশী বিশ্বনাথ ধামদা থৌনিজখি। মহাক্না গঙ্গা তুরেলদা শেংলবা স্নানসু তৌখি।

‘নগর কোতৱাল’ (বগৱান কাল বৈরব)গী খুয়া খাদা থৌনিজদুনা মহাক্না ৱা ঙাংবা হৌরদুনা প্রধান মন্ত্রীনা হায়খি মহাক্কী থৌজালশিং য়াওদনা করিগুম্বা অখন্নবা অমত্তা ওইবা ঙম্লোই। প্রধান মন্ত্রীনা প্রজা মীয়ামগীদমক্তা ভগৱানদা থৌনিজখি। প্রধান মন্ত্রীনা হায়খি পুরানশিংদা অসুম্না হায়বীরম্মি মদুদি কনাগুম্বা মনা কাশীদা চংলকপা মতমদা তুরৈ-ইরৈ চেল্লবা পুম্নমক অদু কোকই। “ভগৱাব বিশ্বেশ্বরগী থৌজালনা, ঈশ্বরগী ওইবা শক্তি অমনা মফম অসিদা লাকপগা ঐখোয়গী নুংগী ওইবা আত্মা অসি য়কাইহল্লি”। মহাক্না মখা তারদুনা হায়খি বিশ্বনাথ ধাম অসি শুম্নগী অচৌবা দলন খক্তা নত্তে। মসি ভারতকী সনাতন ধর্মগী খুদম অমনি। মসি ঐখোয়গী লাইনিংগী ওইবা থৱায় অদুগী খুদম অমনি। মসি ভারতকী অরিবা মতম, চৎনবীশিং, ভারতকী থৌনা লিংজেল অমসুং খুমাং চাউশিল্লিবা অসিগী খুদম অমনি। প্রধান মন্ত্রীনা হায়খি অদোম্না মফম অসিদা লাকপা মতমদা লাইনীং-লাইশোনগী ওইবা থাজবা খক্তা উরোই। অদোম্না মফম অসিদা হৌখিবা মতমগী নীংথিজবা অদুসু ফংওগনি। অরিবা মতম অমসুং অনৌবা অসি করম্না পুনশিন্নবগে, অরিবা মতমগী ইথিলশিং অদুনা তুংলমচৎকী মাইকৈ করম্না তাকপগে, ঐখোয়না বিশ্বনাথ ধাম কম্প্লেক্সতা মসিগী হকথেংননা দর্শন তৌরি, ঐখোয়না মসি বিশ্বনাথ ধাম কম্প্লেক্সতা য়াম্না ময়েক শেংনা উবা ফংলি’, হায়না মহাক্ন মখা তাখি।

প্রধান মন্ত্রীনা হায়খি মমাংদা লাইশঙ অসিগী লম অসি স্ক্যের ফুৎ লিশিং অহুম খক্তা ওইরমখি হায়রিবা অসি হৌজিক্তি স্ক্যের ফুৎ লাখ ৫রোম চাউথোকহনখ্রে। হৌজিক ভক্তা লিশিং ৫০দগী ৭৫না লাইশঙ অসিদা অমসুং লাইশঙনা কোল্লিবা মফম অসিদা লাকপা য়ারগনি। হায়বদি অহানবদা ইমা গঙ্গাগী দর্শন-স্নান, অমসুং মদুদগী বিশ্বনাথ ধাম তম্না চৎকনি হায়না মহাক্না ফোঙদোকখি।

কাশীগী নীংথিজবা অসি পল্লদুনা প্রধান মন্ত্রীনা হায়খি কাশী অসি মুৎপা নাইররোই অমসুং মসি ভগৱান শিবপু নীংজবা মীওইশিংগী মীৎয়েং মখাদা লৈ। মহাক্না অচৌবা কম্প্লেক্স অসি শাবদা য়াওখিবা শিন্মী খুদিংমক্তা তৌবীমল খঙবা উৎখি। মখোয়না মফম অসিগী থবক অসি কোরোনানা ফাওবা অপনবা পীহনখিদে। মহাক্না শিন্মীশিংগা উন্নখি অমসুং থাগৎপা ফোঙদোকখি। শ্রী মোদীনা ধাম শাবদা য়াওখিবা শিন্মীশিং অদুগা লোয়ননা অয়ুক্কী চাকলেন চামিন্নখি। প্রধান মন্ত্রীনা আর্তিসেনশিং, শাবদা, এদমিনিস্ত্রেসন্দা শরুক য়াখিবা মীওইশিং অমসুং মফম অসিদা লৈরিবা ইমুং-মনুংশিংবু থাগৎখি। পুম্নমক অসিগা লোয়ননা মহাক্না য়ু.পি. সরকার, কাশী বিশ্বনাথ ধাম প্রোজেক্ত অসি লোইশিন্নবা চোকথবা লৈতনা হোৎনখিবা মুখ্য মন্ত্রী শ্রী য়োগী আদিত্যনাথপু থাগৎপা ফোঙদোকখি।

প্রধান মন্ত্রীনা হায়খি ইনভেন্দরশিংনা শহর অসিদা লান্দারকখি, মসিবু মঙহন্নবা হোৎনখি। শহর অসিনা ওরঙ্গজেবকী মীওৎ-মীনৈ অমসুং মহাক্কী তমথিবা পুৱারী অদু থেংনখি। মহাক্না থাং শীজিন্নদুনা সভ্যতা হোংদোক্নবা হোৎনখি, চৎনবীবু ফনাতিসিজমনা নমথনবা হোৎনখি। অদুবু লৈবাক অসিদি মালেমগী অতোপ্পা মফমশিংগা খেন্নৈ। করিগুম্বা ওরঙ্গজেব অমা লৈরবদি শিবজীসু লৈগনি হায়না প্রধান মন্ত্রীনা ফোঙদোকখি। করিগুম্বা সলর মসুদ লাক্লবদি নিংথৌ সুহেলদেবগুম্বা থৌনা ফবা লান্মীশিংনা ভারতকী অপুনবগী শক্তি অদু মহাও তংহনগনি। অমসুং ব্রিতিশকী মতমদা ফাওবা কাশীগী মীয়াম্না হেস্তিঙ্গসদা করি থোকখি হাববা খঙখি হায়না শ্রী মোদীনা ফোঙদোকখি।

প্রধান মন্ত্রীনা কাশীগী মতিক ময়াই অমসুং মরু ওইবা অদু শন্দোক্না তাকখি। মহাক্না হায়খি কাশী অসি শুপ্নগী ৱাহৈ খরা খক্তগী ৱাফম নত্তে মসি সেন্সেসন পোকহল্লিবা ক্রিএসন অমনি। কাশী অসি – পুন্সিবু য়কাইহল্লিবা মফমনি; কাশী অসি – শীবা অসিসু কুহ্মৈ অমা ওইরিবা মফম অমনি; কাশী অসি – অচুম্বা অদুনা ধর্ম ওইরিবা মফমনি; কাশি অসি নুংশিবনা চৎনবী ওইবা মফমনি। মহাক্না মখা তারদুনা হায়খি বারানসী অসি জগদগুরু সঙ্করচর্য়্যনা শ্রী দোম রাজাগী অশেংবা মগুন অদুদগী ইথিল লৌখিবা শহর অদুনি অমসুং লৈবাক অসিগী অপুনবা শক্তমদা শীংনরকপা অদুগী মায়োক্তা অমত্তা ওইনা লেপ্নবা ৱারেপ লৌখি। ভগৱান শঙ্করদগী ইথিল লৌবগা লোয়ননা রামচরিতমানসকুম্বা লাইরৈবাক্কী ওইবা তাংবলপাল অমা দোস্বামী তুলসিদাসনা শেমখিবা মফম অদুনি। প্রধান মন্ত্রীনা মখা তারদুনা হায়খি মদুদি ভগৱান বুদ্ধনা মফম অসিগী সরনাথতা মালেদা মহাক মঙাল ফংলে হায়না খঙহনখি। খুন্নাইগী য়াইফনবা কবিরদাসগুম্বা মুনি মফম অসিআ পোকখি। করিগুম্বা খুন্নাই অসি পুনশিনবা মথৌ তারবদি কাশী অসি সন্ত রাইদাসকী কত্থোকপগী শক্তি অসি তুংনফম ওইগনি হায়না প্রধান মন্ত্রীনা মখা তাখি।

প্রধান মন্ত্রীনা হায়খি কাশী অসি অহিংশা অমসুং ইচম চম্বগী তুংনফম ওইরিবা জেন তীর্থকর মরিগী লমদমনি। নিংথৌ হরিশচন্দ্রগী ইন্তিগ্রিতীদগী বল্লভাচার্য়, রামানন্দজীগী লৌশিং। চৈতন্য মহাপ্রভু, সমর্থ গুরু রামদাসতগী স্বামী বিবেকানন্দ, মদন মোহন মালবীয় ফাওবা। কাশীগী শেংলবা লমদম অসি মশিং থিঙমদ্রবা মুনীংশিং, আচার্য়শিংগী হৌরকফম ওইরি। প্রধা মন্ত্রীনা হায়খি মদুদি ছত্রপতি শিবাজী মহারাজনা মফম অসিদা লাকলমখি। রানী লক্ষ্মী বাইদগী চন্দ্রসেখর আজাদ ফাওবা কাশী অসি লান্মীশিংগী কর্মভুমি ওইরি। ভারতেন্দু হরিশচন্দ্র, জয়শঙ্গকর প্রসাদ, মুন্সি প্রেমচান্দ, পন্দিৎ রভি শঙ্কর, অমসুং বিস্মিল্লা খান্দগুম্বা তেলেন্তশিং অসি শহর অসিদগী হায়না মহাক্না ফোঙদোকখি।

প্রধান মন্ত্রীনা হায়খি কাশী বিশ্বনাথ ধাম কত্থোকপা অসিনা ভারতপু পুক্নিং লেপ্পা ঙম্বা মাইকৈ অমদা পুরগনি অমসুং আশা লৈবা তুংলমচৎ অমা তম্না পুরগনি। মসিগী কম্প্লেক্স অসি ঐখোয়গী তৌবা ঙম্বা অমসুং ঐখোয়গী থৌদাংগী মীৎনা উবা শাখি অমা ওইরি। অচেৎপা অনীংবা অমসুং অপুনবা ৱাখল্লোনগা লোয়ননা ওইথোকপা ঙমদবা অমত্তা লৈতে। প্রধান মন্ত্রী হায়খি, “ভারত মচাশিংদা ৱাখলনা লাম্বা ফংদবা অদু ওইথোকহনবগী শক্তি লৈ। ঐখোয়না তপস্যা খঙই, অরানবা থবক তোরুবগী নীংঙমদবা খঙই অমসুং ঐখোয়না লৈবাক অসিগীদমক করম্না অয়ুক অমদি নুমিদাং লেনখি হায়বা খঙই। শীংনবা অদু ফনা চাউরবসু ভারত মচা ঐখোয়না মদু পুন্না মাইথিবা পীবা ঙমগনি”।

ঙসিদি ভারতনা মহাক্কী মাংখ্রবা হেরিতেজ অদু অমুক হিংগৎহনবা ঙমখ্রে হায়না প্রধান মন্ত্রীনা ফোঙদোকখি। কাশী অসিদা ইমা অন্নপুর্ন মশামক লৈবীরি। কাশীদগী হুরানখিবা ইমা অন্নপুর্নগী মীতম অদু হৌজিক চহি চা অমা ঙাইরবা মতুংদা কাশীদা অমুক হন্না শেমগৎখিবদা মহাক্না নুংঙাইবা ফোঙদোকখি। 

প্রধান মন্ত্রীনা হায়, মহাক্কী ওইনা ঈশ্বর হায়বসি মীয়ামগী শক্লোন লৌদুনা লাকই অমসুং মহাক্কীওইনা ভারত মচা খুদিংমক ঈশ্বরগী শরুক অমনি। মহাক্না লৈবাক অসিগী মীয়ামদগী ৱারেপ অহুম – লু-নানবা, শেমগৎ-শাগৎপা অমসুং মরোমদোম লেপ্পা ঙম্বা ভারত অমা ওইহন্নবা লেপ্পা লৈতনা হোৎননবা খংহনখি। 

প্রধান মন্ত্রী লু-নানবা হায়বসি পুন্সিগী পান্দম অমনি হায়না ফোঙদোকখি অমসুং নমামি গঙ্গে মিসন্দা অখন্ননা মীয়াম্না শরুক য়ানবা মহাক্না মীয়ামগী পুক্নিং চিংশিনখি। মতম শাংনা মীনাই-নাইথাং ওইদুনা লৈরকপনা ঐখোয়গী ইশানা শেমজবদা ঐখোয়না থাজবা মাংলকপগী মওং অমদা ঐখোয়গী ইশাদা থাজবা থম্বা ঙমখিদে। ঙসিদি মসিগী চহি লিশিং কয়া শুরবা কাশী অসিদগী ঐহাক্না ইরৈবাকচা খুদিংমক্তা হায়জরি – ইশাদা মপুং ফানা থজবা থম্লগা শেম্মু, অনৌবা পুথোকউ, অনৌবা মওং অমদা মদু পাঙথোকউ।

প্রধান মন্ত্রীনা হায় ঙসি ঐখোয়না লৌগদবা অহুমশুবা ৱারেপ অদুদি মরোমদোম লেপ্পা ঙম্বা ভারত অমা ওইনবা ঐখোয়গী ইথৌদাং হেনগৎহনবনি। মসিগী নীংখা তম্বগী চহি ৭৫ শুবগী ‘অমৃত কাল’ অসিদা ভারতনা নীংখা তম্বগী চহি চামা শুবগী হরাউ তয়াম্বা ফোঙদোকপা অদুদা ওইহন্নীংবা ভারত অদুগীদমক ঐখোয়না হৌজিক্তগী হোৎনগদবনি ফোঙদোক্লদুনা প্রধান মন্ত্রীনা মহাক্কী ৱারোল অদু তেনশিনখি।

***